Secondo libro dei Re ܡܠܟܐ 9

¹ܘܐܠܝܫܥ ܢܒܝܐ ܩܪܐ ܠܚܕ ܡܢ ܒܢ̈ܝ ܢܒ̈ܝܐ ܘܐܡܪ ܠܗ ܐܣܘܪ ܚܨ̈ܝܟ ܘܣܒ ܩܪܢܐ ܕܡܫܚܐ ܒܐܝܕܟ ܘܙܠ ܠܪܡܬ ܓܠܥܕ²ܘܥܘܠ ܠܬܡܢ ܘܚܙܝ ܬܡܢ ܠܝܗܘ ܒܪ ܝܡܫܝ ܥܘܠ ܐܩܝܡܝܗܝ ܡܢ ܒܝ̈ܢܬ ܐܚ̈ܘܗܝ ܘܐܥܠܝܗܝ ܬܘܢ ܒܓܘ ܬܘܢ³ܘܣܒ ܩܪܢܐ ܕܡܫܚܐ ܘܣܘܟ ܒܪܝܫܗ ܘܐܡܪ ܠܗ ܗܟܢܐ ܐܡܪ ܡܪܝܐ ܡܫܚܬܟ ܕܬܗܘܐ ܡܠܟܐ ܥܠ ܥܡܝ ܐܝܣܪܝܠ ܘܦܬܚ ܬܪܥܐ ܘܥܪܘܩ ܘܠܐ ܬܟܬܪ⁴ܘܐܙܠ ܥܠܝܡܐ ܢܒܝܐ ܠܪܡܬ ܓܠܥܕ⁵ܘܥܠ ܘܚܙܐ ܪ̈ܒܝ ܚܝ̈ܠܐ ܟܕ ܝܬܒܝܢ ܘܐܡܪ ܦܬܓܡܐ ܐܝܬ ܠܝ ܕܐܡܪ ܠܟ ܪܒܐ ܘܐܡܪ ܝܗܘ ܠܡܢ ܡܢ ܟܠܢ ܘܐܡܪ ܠܗ ܠܟ ܪܒܐ⁶ܘܩܡ ܘܥܠ ܠܬܘܢܐ ܘܢܣܟ ܡܫܚܐ ܒܪܝܫܗ ܘܐܡܪ ܠܗ ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܡܫܚܬܟ ܕܬܡܠܟ ܥܠ ܥܡܗ ܕܡܪܝܐ ܥܠ ܐܝܣܪܝܠ⁷ܘܬܡܚܐ ܠܕܒܝܬ ܐܚܒ ܡܪܟ ܘܐܬܢܩܡ ܕܡܐ ܕܥܒ̈ܕܝ ܢܒ̈ܝܐ ܘܕܡܐ ܕܟܠܗܘܢ ܥܒ̈ܕܘܗܝ ܕܡܪܝܐ ܡܢ ܐܝܕܐ ܕܐܝܙܒܠ⁸ܘܐܘܒܕ ܟܠܗ ܒܝܬܗ ܕܐܚܒ ܘܐܘܒܕ ܠܐܚܒ ܕܬܐܢ ܒܐܣܬܐ ܘܕܐܣܪ ܘܫܪܐ ܒܐܝܣܪܐܝܠ⁹ܘܐܥܒܕܝܘܗܝ ܠܒܝܬܗ ܕܐܚܒ ܐܝܟ ܒܝܬ ܝܘܪܒܥܡ ܒܪ ܢܒܛ ܘܐܝܟ ܒܝܬ ܒܥܫܐ ܒܪ ܐܚܝܐ¹⁰ܘܠܐܝܙܒܠ ܢܐܟܠܘܢ ܟ̈ܠܒܐ ܒܝܪܬܘܬܐ ܕܐܝܙܪܥܝܠ ܘܠܝܬ ܕܩܒܪ ܘܦܬܚ ܬܪܥܐ ܘܥܪܩ¹¹ܘܝܗܘ ܢܦܩ ܠܘܬ ܥܒ̈ܕܐ ܕܡܪܗ ܘܐܡܪܝܢ ܠܗ ܫܠܡ ܡܢܐ ܐܬܐ ܫܛܝܐ ܗܢܐ ܠܘܬܟ ܐܡܪ ܠܗܘܢ ܐܢܬܘܢ ܝܕܥܝܢ ܠܓܒܪܐ ܘܠܫܛܝܘܬܗ¹²ܐܡܪܝܢ ܠܗ ܡܕܓܠ ܐܢܬ ܚܘܢ ܐܡܪ ܠܗܘܢ ܗܟܢܐ ܐܡܪ ܠܝ ܗܟܢܐ ܐܡܪ ܡܪܝܐ ܡܫܚܬܟ ܕܬܡܠܟ ܥܠ ܐܝܣܪܝܠ¹³ܘܐܣܬܪܗܒܘ ܘܢܣܒܘ ܓܒܪ ܠܒܫܗ ܘܣܡܘ ܬܚܘܬܘܗܝ ܥܠ ܡܘܬܒܐ ܕܕܪ̈ܓܐ ܘܩܪܘ ܒܫܝܦܘܪܐ ܘܐܡܪܘ ܐܡܠܟ ܝܗܘ¹⁴ܘܡܪܕ ܝܗܘ ܒܪ ܝܡܫܝ ܥܠ ܝܘܪܡ ܘܝܘܪܡ ܢܛܪ ܗܘܐ ܒܪܡܬܓܠܥܕ ܗܘ ܘܟܠܗ ܐܝܣܪܝܠ ܥܡܗ ܡܢ ܩܕܡ ܚܙܐܝܠ ܡܠܟܐ ܕܐܕܘܡ¹⁵ܘܗܦܟ ܝܘܪܡ ܡܠܟܐ ܠܡܬܐܣܝܘ ܒܐܝܙܪܥܝܠ ܡܢ ܡܚܘܬܐ ܕܡܚܐܘܗܝ ܐ̈ܕܘܡܝܐ ܟܕ ܡܬܟܬܫ ܥܡ ܚܙܐܝܠ ܡܠܟܐ ܕܐܕܘܡ ܘܐܡܪ ܝܗܘ ܐܢ ܨ̈ܒܝܢ ܢܦܫ̈ܬܟܘܢ ܠܐ ܢܦܘܩ ܕܡܬܦܠܛ ܡܢ ܩܪܝܬܐ ܕܢܐܙܠ ܘܢܚܘܐ ܒܐܝܙܪܥܝܠ¹⁶ܘܪܟܒ ܝܗܘ ܘܐܙܠ ܠܬܡܢ ܡܛܠ ܕܝܘܪܡ ܪܡܐ ܗܘܐ ܬܡܢ ܘܐܚܙܝܐ ܡܠܟܐ ܕܝܗܘܕܐ ܢܚܬ ܠܡܚܙܐ ܠܝܘܪܡ ܒܪ ܐܚܒ ܕܟܪܝܗ ܗܘܐ ܒܐܝܙܪܥܝܠ¹⁷ܘܕܘܩܐ ܩܐܡ ܗܘܐ ܥܠ ܡܓܕܠܐ ܕܐܝܙܪܥܝܠ ܘܚܙܐ ܪܟܘܒܐ ܕܝܗܘ ܟܕ ܐܬܐ ܘܐܡܪ ܕܘܩܐ ܪ̈ܟܒܐ ܚܙܐ ܐܢܐ ܘܐܡܪ ܝܘܪܡ ܕܒܪ ܡܪܟܒܬܐ ܘܫܕܪ ܠܐܘܪܥܗܘܢ ܘܢܐܡܪ ܫܠܡ¹⁸ܘܐܙܠ ܪܟܒ ܣܘܣܝܐ ܠܐܘܪܥܗ ܘܐܡܪ ܠܗ ܗܟܢܐ ܐܡܪ ܡܠܟܐ ܫܠܡ ܘܐܡܪ ܝܗܘ ܡܐ ܠܟ ܘܠܫܠܡܐ ܗܦܘܟ ܒܬܪܝ ܘܚܘܝ ܕܘܩܐ ܘܐܡܪ ܡܛܐ ܐܝܙܓܕܐ ܥܕܡܐ ܠܘܬܗܘܢ ܘܠܐ ܗܦܟ¹⁹ܘܫܕܪ ܦܪܫܐ ܐܚܪܢܐ ܠܘܬܗܘܢ ܘܐܡܪ ܗܟܢܐ ܐܡܪ ܡܠܟܐ ܫܠܡ ܘܐܡܪ ܝܗܘ ܡܐ ܠܟ ܘܠܫܠܡܐ ܗܦܘܟ ܒܬܪܝ²⁰ܘܚܘܝ ܕܘܩܐ ܘܐܡܪ ܡܛܐ ܐܝܙܓܕܐ ܥܕܡܐ ܠܘܬܗܘܢ ܘܠܐ ܗܦܟ ܘܕܒܪܐ ܐܝܟ ܕܒܪܐ ܕܝܗܘ ܒܪ ܝܡܫܝ ܡܛܠ ܕܡܣܪܗܒܐܝܬ ܕܒܪ ܗܘܐ²¹ܘܐܡܪ ܝܘܪܡ ܦܓܕܘ ܘܦܓܕܘ ܡܪ̈ܟܒܬܐ ܘܢܦܩ ܝܘܪܡ ܡܠܟܐ ܕܐܝܣܪܝܠ ܘܐܚܙܝܐ ܡܠܟܐ ܕܝܗܘܕܐ ܓܒܪ ܒܡܪܟܒܬܗ ܘܢܦܩܘ ܠܐܘܪܥܗ ܕܝܗܘ ܘܐܫܟܚܘܗܝ ܒܝܪܬܘܬܗ ܕܢܒܘܬ ܐܝܙܪܥܠܝܐ²²ܘܟܕ ܚܙܝܗܝ ܝܘܪܡ ܠܝܗܘ ܐܡܪ ܠܗ ܫܠܡ ܝܗܘ ܐܡܪ ܠܗ ܝܗܘ ܡܢܘ ܫܠܡܐ ܕܙܢܝܘܬܐ ܕܐܝܙܒܠ ܐܡܟ ܐܘ ܕܚܪ̈ܫܝܗ ܣ̈ܓܝܐܐ²³ܘܗܦܟ ܝܘܪܡ ܘܥܪܩ ܘܐܡܪ ܠܐܚܙܝܐ ܢܟܠܐ ܐܚܙܝܐ²⁴ܘܝܗܘ ܡܠܐ ܐܝܕܗ ܒܩܫܬܐ ܘܡܚܝܗܝ ܠܝܘܪܡ ܒܝܬ ܕܪ̈ܥܘܗܝ ܘܢܦܩ ܓܐܪܐ ܡܢ ܠܒܗ ܘܒܪܟ ܒܡܪܟܒܬܗ²⁵ܘܐܡܪ ܝܗܘ ܠܒܪ ܕܩܪ ܓܢܒܪܗ ܫܩܘܠ ܐܪܡܝܗܝ ܒܝܪܬܘܬܗ ܕܢܒܘܬ ܐܝܙܪܥܠܝܐ ܡܛܠ ܕܕܟܝܪ ܐܢܐ ܟܕ ܪܟܝܒܝܢ ܗܘܝܢ ܐܢܐ ܘܐܢܬ ܘܕܒܪܝܢ ܒܬܪ ܐܚܒ ܐܒܘܗܝ ܘܡܪܝܐ ܐܡܪ ܥܠܘܗܝ ܦܬܓܡܐ ܗܢܐ²⁶ܐܠܐ ܕܡܗ ܕܢܒܘܬ ܘܕܡܐ ܕܒܢ̈ܘܗܝ ܚܙܝܬ ܒܪܡܫܐ ܐܡܪ ܡܪܝܐ ܘܐܦܪܥܟ ܒܝܪܬܘܬܐ ܗܕܐ ܐܡܪ ܡܪܝܐ ܘܗܫܐ ܣܒ ܫܕܝܘܗܝ ܒܝܪܬܘܬܐ ܗܕܐ ܐܝܟ ܦܬܓܡܗ ܕܡܪܝܐ. ܘܫܕܐܘܗܝ ܒܝܪܬܘܬܗ ܕܢܒܘܬ ܐܝܙܪܥܠܝܐ²⁷ܘܐܚܙܝܐ ܡܠܟܐ ܕܝܗܘܕܐ ܚܙܐ ܘܥܪܩ ܒܐܘܪܚܐ ܕܒܝܬܓ̈ܢܐ ܘܪܕܦ ܒܬܪܗ ܝܗܘ ܘܐܡܪ ܐܦ ܠܗ ܩܘܛܠܘܗܝ ܘܩܛܠܘܗܝ ܒܡܪܟܒܬܗ ܒܡܣܩܢܐ ܕܓܘܕ ܕܥܠ ܓܒ ܢܒܠܥܡ ܘܥܪܩ ܠܡܓܕܘ ܘܡܝܬ ܬܡܢ²⁸ܘܫܩܠܘܗܝ ܥ̈ܒܕܘܗܝ ܘܐܘܒܠܘܗܝ ܠܐܘܪܫܠܡ ܘܩܒܪܘܗܝ ܒܩܒܪܐ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ²⁹ܘܒܫܢܬ ܚܕܥܣܪܐ ܠܝܘܪܡ ܒܪ ܐܚܒ ܐܡܠܟ ܐܚܙܝܐ ܥܠ ܝܗܘܕܐ³⁰ܘܐܬܐ ܝܗܘ ܠܐܝܙܪܥܝܠ ܘܐܝܙܒܠ ܫܡܥܬ ܘܟܚܠܬ ܒܨܕܝܕܐ ܥܝܢ̈ܝܗ ܘܐܣܪܬ ܪܝܫܗ ܘܐܕܝܩܬ ܡܢ ܟܘܬܐ³¹ܘܝܗܘ ܥܐܠ ܒܬܪܥܐ ܘܐܡܪܬ ܫܠܡ ܙܡܪܝ ܩܛܠ ܡܪܗ³²ܘܐܪܝܡ ܐ̈ܦܘܗܝ ܠܟܘܬܐ ܘܐܡܪ ܡ̇ܢ ܥܡܝ ܘܐܬܚܙܝܘ ܠܗ ܬܪ̈ܝܢ ܬܠܬܐ ܡܗܝ̈ܡܢܝܢ³³ܘܐܡܪ ܦܘܫܚܘܗ. ܘܦܫܚܘܗ ܘܪܣܘ ܡܢ ܕܡܗ ܥܠ ܐܣܬܐ ܘܥܠܘ ܪ̈ܟܫܐ ܘܕܫܘܗ³⁴ܘܥܠ ܠܡܠܥܣ ܘܠܡܫܬܐ ܘܐܡܪ ܦܘܩܕܘܗ ܠܠܝܛܬܐ ܗܝ ܘܩܘܒܪܘܗ ܡܛܠ ܕܒܪܬ ܡܠܟܐ ܗܝ³⁵ܘܐܙܠܘ ܠܡܩܒܪܗ ܘܠܐ ܐܫܟܚܘ ܒܗ ܐܠܐ ܐܢ ܪܝܫܗ ܘܪ̈ܓܠܝܗ ܘܦܣ̈ܐ ܕܐ̈ܝܕܝܗ³⁶ܘܗܦܟܘ ܘܚܘܝܘܗܝ ܘܐܡܪ ܦܬܓܡܗ ܗܘ ܕܡܪܝܐ ܕܡܠܠ ܒܐܝܕܐ ܕܥܒܕܗ ܐܠܝܐ ܕܡܢ ܬܫܒܝ ܕܒܝܪܬܘܬܐ ܕܐܝܙܪܥܝܠ ܢܐܟܠܘܢ ܟܠܒ̈ܐ ܒܣܪܗ ܕܐܝܙܒܠ³⁷ܘܬܗܘܐ ܫܠܕܗ ܕܐܝܙܒܠ ܐܝܟ ܙܒܠܐ ܥܠ ܐ̈ܦܝ ܐܪܥܐ ܒܝܪܬܘܬܐ ܕܐܝܙܪܥܝܠ ܘܠܝܬ ܕܩܒܪ ܕܠܐ ܢܐܡܪܘܢ ܗܕܐ ܗܝ ܐܝܙܒܠ

Cambia Bibbia

Confronta con un'altra Bibbia

Versetti esaminati