Secondo libro dei Re ܡܠܟܐ 8

¹ ܘܐܠܝܫܥ ܐܡܪ ܠܐܢܬܬܐ ܕܐܚܝ ܒܪܗ ܩܘܡܝ ܙܠܝ ܐܢܬܝ ܘܒܝܬܟܝ ܘܥܡܪܝ ܐܝܟܐ ܕܥܡܪܐ ܐܢܬܝ ܡܛܠ ܕܩܪܐ ܡܪܝܐ ܠܟܦܢܐ ܘܐܦ ܐܬܐ ܥܠ ܐܪܥܐ ܫܒܥ ܫ̈ܢܝܢ

² ܘܩܡܬ ܐܢܬܬܐ ܘܥܒܕܬ ܐܝܟ ܦܬܓܡܗ ܕܢܒܝܗ ܕܐܠܗܐ ܘܐܙܠܬ ܗܝ ܘܒܢ̈ܝ ܒܝܬܗ ܘܥܡܪܬ ܒܐܪܥܐ ܕܦܠܫ̈ܬܝܐ ܫܒܥ ܫ̈ܢܝܢ

³ ܘܡܢ ܒܬܪ ܫܒܥ ܫ̈ܢܝܢ ܗܦܟܬ ܘܐܬܬ ܡܢ ܐܪܥܐ ܕܦܠܫ̈ܬܝܐ ܘܐܙܠܬ ܠܡܒܓܢܘ ܩܕܡ ܡܠܟܐ ܥܠ ܒܝܬܗ ܘܥܠ ܚܩܠܗ

⁴ ܘܡܠܟܐ ܐܡܪ ܠܓܚܙܝ ܥܠܝܡܐ ܕܢܒܝܗ ܕܐܠܗܐ ܐܫܬܥܐ ܠܝ ܟܠܗܝܢ ܪ̈ܘܪܒܬܐ ܕܥܒܕ ܐܠܝܫܥ

⁵ ܘܟܕ ܡܫܬܥܐ ܠܡܠܟܐ ܕܐܚܝ ܡܝܬܐ ܚܙܐ ܐܢܬܬܐ ܕܐܚܝ ܒܪܗ ܡܒܓܢܐ ܩܕܡ ܡܠܟܐ ܥܠ ܒܝܬܗ ܘܥܠ ܚܩܠܗ ܘܐܡܪ ܓܚܙܝ ܡܪܝ ܡܠܟܐ ܗܕܐ ܗܝ ܐܢܬܬܐ ܘܗܢܘ ܒܪܗ ܕܐܚܝ ܐܠܝܫܥ

⁶ ܘܫܐܠܗ ܡܠܟܐ ܠܐܢܬܬܐ ܘܐܫܬܥܝܬ ܠܗ. ܘܩܪܐ ܡܠܟܐ ܠܡܗܝܡܢܐ ܚܕ ܘܐܡܪ ܠܗ ܦܢܐ ܠܗ ܟܠܡܕܡ ܕܐܝܬ ܠܗ ܘܟܠܗ ܥܠܠܬܐ ܕܚܩܠܗ ܡܢ ܝܘܡܐ ܕܫܒܩܬܗ ܠܐܪܥܐ ܘܥܕܡܐ ܠܗܫܐ

⁷ ܘܐܬܐ ܐܠܝܫܥ ܠܕܪܡܣܘܩ ܘܒܪܗܕܕ ܡܠܟܐ ܕܐܕܘܡ ܐܬܟܪܗ ܘܚܘܝܘܗܝ ܘܐܡܪܘ ܠܗ ܐܬܐ ܢܒܝܗ ܕܐܠܗܐ ܠܗܪܟܐ

⁸ ܘܐܡܪ ܡܠܟܐ ܠܚܙܐܝܠ ܣܒ ܒܐܝܕܟ ܩܘܪܒܢܐ ܘܙܠ ܠܐܘܪܥܐ ܕܢܒܝܗ ܕܐܠܗܐ ܘܫܐܠ ܡܠܬܗ ܕܡܪܝܐ ܡܢܗ ܘܐܡܪ ܠܗ ܐܢ ܡܬܚܠܡ ܐܢܐ ܡܢ ܟܘܪܗܢܝ ܗܢܐ

⁹ ܘܐܙܠ ܚܙܐܝܠ ܠܐܘܪܥܗ ܘܫܩܠ ܩܘܪܒܢܐ ܒܐܝܕܗ ܡܢ ܟܠ ܛܘܒܐ ܕܕܪܡܣܘܩ ܛܥܢ ܐܪ̈ܒܥܝܢ ܓܡ̈ܠܝܢ ܘܐܬܐ ܘܩܡ ܩܕܡܘܗܝ ܘܐܡܪ ܠܗ ܒܪܟ ܒܪܗܕܕ ܡܠܟܐ ܕܐܕܘܡ ܫܕܪܢܝ ܠܘܬܟ ܘܐܡܪ ܐܢ ܚܝܐ ܐܢܐ ܡܢ ܟܘܪܗܢܝ ܗܢܐ

¹⁰ ܘܐܡܪ ܠܗ ܐܠܝܫܥ ܙܠ ܘܐܡܪ ܠܗ ܡܚܐ ܬܚܐ ܚܘܝܢܝ ܡܪܝܐ ܕܡܡܬ ܬܡܘܬ

¹¹ ܘܒܟܐ ܢܒܝܗ ܕܐܠܗܐ

¹² ܘܐܡܪ ܚܙܐܝܠ ܡܛܠ ܡܢܐ ܒܟܐ ܡܪܝ ܘܐܡܪ ܠܗ ܐܠܝܫܥ ܝܕܥ ܐܢܐ ܒܝܫܬܐ ܕܥܒܕ ܐܢܬ ܠܒܢ̈ܝ ܐܝܣܪܝܠ ܟܪ̈ܟܝܗܘܢ ܡܘܩܕ ܐܢܬ ܒܢܘܪܐ ܘܓܕܘ̈ܕܝܗܘܢ ܒܚܪܒܐ ܡܩܛܠ ܐܢܬ ܘܝ̈ܠܘܕܝܗܘܢ ܡܫܩܦ ܐܢܬ ܘܒܛܢ̈ܬܗܘܢ ܡܦܪܬ ܐܢܬ

¹³ ܘܐܡܪ ܚܙܐܝܠ ܡܢܐ ܚܫܝܒ ܥܒܕܟ ܟܠܒܐ ܕܢܥܒܕ ܦܬܓܡܐ ܗܢܐ ܪܒܐ ܘܐܡܪ ܠܗ ܐܠܝܫܥ ܚܘܝܢܝ ܡܪܝܐ ܕܐܢܬ ܡܠܟܐ ܥܠ ܐܕܘܡ

¹⁴ ܘܐܬܐ ܚܙܐܝܠ ܡܢ ܠܘܬ ܐܠܝܫܥ ܘܐܙܠ ܠܘܬ ܡܪܗ ܘܐܡܪ ܠܗ ܡܪܗ ܡܢܐ ܐܡܪ ܠܟ ܐܠܝܫܥ ܐܡܪ ܠܗ. ܗܟܢܐ ܐܡܪ ܠܝ ܕܡܚܐ ܬܚܐ

¹⁵ ܘܡܢ ܒܬܪ ܝܘܡܐ ܢܣܒ ܚܙܐܝܠ ܚܡܝܠܬܐ ܘܨܒܥܗ ܒܡ̈ܝܐ ܘܦܪܣ ܥܠ ܐ̈ܦܘܗܝ ܘܡܝܬ ܘܐܡܠܟ ܚܙܐܝܠ ܒܬܪܗ

¹⁶ ܘܒܫܢܬ ܚܡܫ ܕܝܘܪܡ ܒܪ ܐܚܒ ܡܠܟܐ ܕܐܝܣܪܝܠ ܐܡܠܟ ܝܘܪܡ ܒܪ ܝܘܫܦܛ ܡܠܟܐ ܕܝܗܘܕܐ

¹⁷ ܒܪ ܬܠܬܝܢ ܗܘܐ ܘܬܪ̈ܬܝܢ ܫ̈ܢܝܢ ܟܕ ܐܡܠܟ ܘܬܡܢܐ ܫ̈ܢܝܢ ܐܡܠܟ ܒܐܘܪܫܠܡ

¹⁸ ܘܗܠܟ ܒܐܘܪܚܐ ܕܡ̈ܠܟܐ ܕܐܝܣܪܐܝܠ ܐܝܟ ܕܥܒܕܘ ܕܒܝܬ ܐܚܒ ܡܛܠ ܕܚܬܗ ܕܐܚܒ ܗܘܬ ܠܗ ܐܢܬܬܐ ܘܥܒܕ ܕܒܝܫ ܩܕܡ ܡܪܝܐ

¹⁹ ܘܠܐ ܨܒܐ ܡܪܝܐ ܠܡܚܒܠܘ ܠܝܗܘܕܐ ܡܛܠ ܕܘܝܕ ܥܒܕܗ ܐܝܟ ܕܐܡܪ ܠܗ ܕܢܬܠ ܠܗ ܫܪܓܐ ܘܠܒ̈ܢܘܗܝ ܟܠܗܘܢ ܝܘ̈ܡܬܐ

²⁰ ܒܝ̈ܘܡܘܗܝ ܡܪܕ ܐܕܘܡ ܡܢ ܬܚܝܬ ܐܝܕܐ ܕܝܗܘܕܐ ܘܐܡܠܟܘ ܥܠܝܗܘܢ ܡܠܟܐ

²¹ ܘܥܒܪ ܝܘܪܡ ܠܨܥܝܪܐ ܘܟܠܗܘܢ ܪ̈ܟܒܐ ܥܡܗ. ܘܩܡ ܒܠܠܝܐ ܕܢܚܪܘܒ ܠܐ̈ܕܘܡܝܐ ܕܟܪܝܟܝܢ ܠܗ ܘܠܪ̈ܘܪܒܢܘܗܝ ܒܡܪ̈ܟܒܬܐ ܘܥܪܩܘ ܥܡܐ ܠܡܫ̈ܟܢܝܗܘܢ

²² ܘܡܪܕ ܐܕܘܡ ܡܢ ܬܚܝܬ ܐܝܕܐ ܕܝܗܘܕܐ ܥܕܡܐ ܠܝܘܡܢܐ ܗܝܕܝܢ ܡܪܕܬ ܠܒܢܐ ܒܙܒܢܐ ܗܘ

²³ ܘܫܪܟܐ ܕܦܬ̈ܓܡܘܗܝ ܕܝܘܪܡ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ

²⁴ ܘܫܟܒ ܝܘܪܡ ܥܡ ܐ̈ܒܗܘܗܝ ܘܐܬܩܒܪ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ ܘܐܡܠܟ ܐܚܙܝܐ ܒܪܗ ܒܬܪܗ

²⁵ ܒܫܢܬ ܚܕܥܣܪܐ ܠܝܘܪܡ ܒܪ ܐܚܒ ܡܠܟܐ ܕܐܝܣܪܐܝܠ ܐܡܠܟ ܐܚܙܝܐ ܒܪ ܝܘܪܡ ܡܠܟܐ ܕܝܗܘܕܐ

²⁶ ܒܪ ܥܣܪ̈ܝܢ ܗܘܐ ܘܬܪ̈ܬܝܢ ܫܢܝ̈ܢ ܐܚܙܝܐ ܟܕ ܐܡܠܟ ܘܫܢܬܐ ܚܕܐ ܐܡܠܟ ܒܐܘܪܫܠܡ ܘܫܡܐ ܕܐܡܗ ܥܬܠܝܐ ܒܪܬ ܥܡܪܝ ܡܠܟܐ ܕܐܝܣܪܝܠ

²⁷ ܘܗܠܟ ܒܐܘܪܚܐ ܕܒܝܬ ܐܚܒ ܘܥܒܕ ܕܒܝܫ ܩܕܡ ܡܪܝܐ ܐܝܟ ܕܥܒܕܘ ܕܒܝܬ ܐܚܒ ܡܛܠ ܕܚܬܢܐ ܗܘܐ ܕܒܝܬ ܐܚܒ

²⁸ ܘܐܙܠ ܝܘܪܡ ܒܪ ܐܚܒ ܠܩܪܒܐ ܥܠ ܚܙܐܝܠ ܡܠܟܐ ܕܐܕܘܡ ܠܪܡܬ ܓܠܥܕ ܘܡܚܝܗܝ ܐܕܘܡܝܐ ܠܝܘܪܡ

²⁹ ܘܗܦܟ ܝܘܪܡ ܒܪ ܐܚܒ ܠܡܬܐܣܝܘ ܒܐܝܙܪܥܝܠ ܡܢ ܡܚܘܬܐ ܕܡܚܝܗܝ ܐܕܘܡܝܐ ܒܪܡܬܐ ܟܕ ܡܬܟܬܫ ܥܡ ܚܙܐܝܠ ܡܠܟܐ ܕܐܕܘܡ ܘܐܚܙܝܐ ܡܠܟܐ ܕܝܗܘܕܐ ܢܚܬ ܠܡܚܙܐ ܠܝܘܪܡ ܒܪ ܐܚܒ ܕܟܪܝܗ ܗܘܐ ܒܐܝܙܪܥܝܠ