Secondo libro dei Re ܡܠܟܐ 15

¹ ܒܫܢܬ ܥܣܪ̈ܝܢ ܘܫܒܥ ܫܢܝ̈ܢ ܠܝܘܪܒܥܡ ܡܠܟܐ ܕܐܝܣܪܝܠ ܐܡܠܟ ܥܘܙܝܐ ܒܪ ܐܡܘܨܝܐ ܡܠܟܐ ܕܝܗܘܕܐ

² ܒܪ ܫܬܬܥܣܪܐ ܗܘܐ ܫܢܝ̈ܢ ܟܕ ܐܡܠܟ ܘܚܡܫܝܢ ܘܬܪ̈ܬܝܢ ܫܢܝ̈ܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܝܟܢܝܐ ܡܢ ܐܘܪܫܠܡ

³ ܘܥܒܕ ܕܫܦܝܪ ܩܕܡ ܡܪܝܐ ܐܝܟ ܐܡܘܨܝܐ ܐܒܘܗܝ

⁴ ܒܪܡ ܕܝܢ ܥ̈ܠܘܬܐ ܠܐ ܐܥܒܪ ܘܥܕܟܝܠ ܥܡܐ ܡܕܒܚܝܢ ܗܘܘ ܘܣܝܡܝܢ ܒܣ̈ܡܐ ܥܠ ܥ̈ܠܘܬܐ

⁵ ܘܡܚܝܗܝ ܡܪܝܐ ܠܡܠܟܐ ܘܗܘܐ ܓܪܒܐ ܥܕܡܐ ܠܝܘܡܐ ܕܡܝܬ ܘܝܬܒ ܒܒܝܬܐ ܡܛܫܝܐܝܬ ܘܝܘܬܡ ܒܪ ܡܠܟܐ ܪܒܝܬܐ ܕܐܢ ܗܘܐ ܠܥܡܐ ܕܐܪܥܐ

⁶ ܘܫܪܟܐ ܕܦܬ̈ܓܡܘܗܝ ܕܥܘܙܝܐ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ

⁷ ܘܫܟܒ ܥܘܙܝܐ ܥܡ ܐ̈ܒܗܘܗܝ ܘܩܒܪܘܗܝ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ ܘܐܡܠܟ ܝܘܬܡ ܒܪܗ ܒܬܪܗ

⁸ ܒܫܢܬ ܬܠܬܝܢ ܘܬܡܢܐ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܙܟܪܝܐ ܒܪ ܝܘܪܒܥܡ ܥܠ ܐܝܣܪܝܠ ܒܫܡܪܝܢ ܫܬܐ ܝܪ̈ܚܝܢ

⁹ ܘܥܒܕ ܕܒܝܫ ܩܕܡ ܡܪܝܐ ܐܝܟ ܕܥܒܕ ܐܒܘܗܝ ܘܠܐ ܣܛܐ ܡܢ ܟܠܗܘܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ

¹⁰ ܘܡܪܕ ܥܠܘܗܝ ܫܠܘܡ ܒܪ ܝܒܝܫ ܘܡܚܝܗܝ ܠܘܩܒܠ ܥܡܐ ܘܩܛܠܗ ܘܐܡܠܟ ܒܬܪܗ

¹¹ ܘܫܪܟܐ ܕܦܬܓܡ̈ܘܗܝ ܕܙܟܪܝܐ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

¹² ܘܫܠܡܬ ܡܠܬܗ ܕܡܪܝܐ ܕܐܡܪ ܠܝܗܘ ܕܒܢ̈ܝܐ ܐܪ̈ܒܝܥܝܐ ܢܬܒܘܢ ܠܟ ܥܠ ܟܘܪܣܝܐ ܕܐܝܣܪܝܠ ܘܗܘܐ ܗܟܢܐ

¹³ ܘܫܠܘܡ ܒܪ ܝܒܝܫ ܐܡܠܟ ܒܫܢܬ ܬܠܬܝܢ ܘܬܫܥ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܘܐܡܠܟ ܝܪܚ ܝܘܡ̈ܝܢ ܒܫܡܪܝܢ

¹⁴ ܘܣܠܩ ܡܚܢܝܡ ܒܪ ܓܕܝ ܡܢ ܬܪܨܐ ܘܥܠ ܠܫܡܪܝܢ ܘܡܚܝܗܝ ܠܫܠܘܡ ܒܪ ܝܒܝܫ ܒܫܡܪ̈ܝܢ ܘܩܛܠܗ ܘܐܡܠܟ ܒܬܪܗ

¹⁵ ܘܫܪܟܐ ܕܦܬܓܡ̈ܘܗܝ ܕܫܠܘܡ ܘܡܪܕܐ ܕܡܪܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

¹⁶ ܗܝܕܝܢ ܡܚܐ ܡܚܢܝܡ ܠܬܦܣܚ ܘܠܟܠ ܕܐܝܬ ܒܗ ܘܠܬܚ̈ܘܡܝܗ ܡܢ ܬܪܨܐ ܥܠ ܕܠܐ ܦܬܚܘ ܠܗ ܬܪܥܐ ܘܚܪܒܗ ܘܠܟܠܗܝܢ ܒܛܢܬ̈ܗ ܦܪܬ

¹⁷ ܒܫܢܬ ܬܠܬܝܢ ܘܬܫܥ ܫ̈ܢܝܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܡܚܢܝܡ ܒܪ ܓܕܝ ܥܠ ܐܝܣܪܝܠ ܒܫܡܪܝܢ ܥܣܪ ܫ̈ܢܝܢ

¹⁸ ܘܥܒܕ ܕܒܝܫ ܩܕܡ ܡܪܝܐ ܘܠܐ ܣܛܐ ܡܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ ܟܘܠܗܘܢ ܝܘܡ̈ܘܗܝ

¹⁹ ܘܐܬܐ ܦܘܠ ܡܠܟܐ ܕܐܬܘܪ ܥܠ ܐܪܥܐ ܘܝܗܒ ܡܚܢܝܡ ܠܦܘܠ ܐܠܦ ܟܟܪ̈ܝܢ ܕܟܣܦܐ ܕܬܗܘܐ ܐܝܕܗ ܥܡܗ ܘܢܐܚܘܕ ܡܠܟܘܬܐ ܒܐܝܕܗ

²⁰ ܘܐܪܡܝ ܡܚܢܝܡ ܥܠ ܐܝܣܪܝܠ ܟܣܦܐ ܥܠ ܟܠܗܘܢ ܥܬܝܪ̈ܐ ܕܐܪܥܐ ܕܢܬܠ ܠܡܠܟܐ ܕܐܬܘܪ ܚܡܫܝܢ ܡܬܩ̈ܠܝܢ ܕܟܣܦܐ ܥܠ ܓܒܪܐ ܚܕ ܘܗܦܟ ܡܠܟܐ ܕܐܬܘܪ ܘܠܐ ܩܡ ܬܡܢ ܒܐܪܥܐ

²¹ ܘܫܪܟܐ ܕܦ̈ܬܓܡܘܗܝ ܕܡܚܢܝܡ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

²² ܘܫܟܒ ܡܚܢܝܡ ܥܡ ܐ̈ܒܗܘܗܝ ܘܐܡܠܟ ܦܩܚܝܐ ܒܪܗ ܒܬܪܗ

²³ ܒܫܢܬ ܚܡܫܝܢ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܦܩܚܝܐ ܒܪ ܡܚܢܝܡ ܥܠ ܐܝܣܪܐܝܠ ܒܫܡܪܝܢ ܬܪ̈ܬܝܢ ܫ̈ܢܝܢ

²⁴ ܘܥܒܕ ܕܒܝܫ ܩܕܡ ܡܪܝܐ ܘܠܐ ܣܛܐ ܡܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ

²⁵ ܘܡܪܕ ܥܠܘܗܝ ܦܩܚ ܒܪ ܪܘܡܠܝܐ ܓܢܒܪܗ ܘܩܛܠܗ ܒܫܡܪܝܢ ܒܣܚܪܬܐ ܕܒܝܬ ܡܠܟܐ ܘܕܒܪ ܠܪܓܐܘܒ ܘܠܐܢܝ ܘܥܡܗ ܚܡܫܝܢ ܓܒܪ̈ܝܢ ܡܢ ܒܢ̈ܝ ܓܠܥܕ ܘܩܛܠܗ ܘܐܡܠܟ ܒܬܪܗ

²⁶ ܘܫܪܟܐ ܕܦ̈ܬܓܡܘܗܝ ܕܦܩܚܝܐ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

²⁷ ܒܫܢܬ ܚܡܫܝܢ ܘܬܪ̈ܬܝܢ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܦܩܚ ܒܪ ܪܘܡܠܝܐ ܥܠ ܐܝܣܪܝܠ ܒܫܡܪܝܢ ܥܣܪܝܢ ܫ̈ܢܝܢ

²⁸ ܘܥܒܕ ܕܒܝܫ ܩܕܡ ܡܪܝܐ ܘܠܐ ܣܛܐ ܡܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ

²⁹ ܘܒܝ̈ܘܡܘܗܝ ܕܦܩܚ ܡܠܟܐ ܕܐܝܣܪܝܠ ܐܬܐ ܬܓܠܬܦܠܣܪ ܡܠܟܐ ܕܐܬܘܪ ܘܕܒܪ ܠܥܝܘܢ ܘܠܐܒܠ ܡܚܘܠܐ ܘܠܟܠ ܒܝܬ ܡܥܟܐ ܘܠܢܝܚ ܘܠܩܕܫ ܘܠܚܨܘܪ ܘܠܓܠܥܕ ܘܠܓܠܝܠܐ ܘܠܟܠܗ ܐܪܥܐ ܕܢܦܬܠܝ ܘܓܠܝ ܐܢܘܢ ܠܐܬܘܪ

³⁰ ܘܡܪܕ ܡܪܕܐ ܗܘܫܥ ܒܪ ܐܠܐ ܥܠ ܦܩܚ ܒܪ ܪܘܡܠܝܐ ܘܡܚܝܗܝ ܘܩܛܠܗ ܘܐܡܠܟ ܒܬܪܗ ܒܫܢܬ ܬܪ̈ܬܝܢ ܠܝܘܬܡ ܒܪ ܥܘܙܝܐ

³¹ ܘܫܪܟܐ ܕܦ̈ܬܓܡܘܗܝ ܕܦܩܚ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

³² ܒܫܢܬ ܬܪ̈ܬܝܢ ܕܦܩܚ ܒܪ ܪܘܡܠܝܐ ܡܠܟܐ ܕܐܝܣܪܝܠ ܐܡܠܟ ܝܘܬܡ ܒܪ ܥܘܙܝܐ ܡܠܟܐ ܕܝܗܘܕܐ

³³ ܒܪ ܥܣܪ̈ܝܢ ܗܘܐ ܘܚܡܫ ܫܢܝ̈ܢ ܟܕ ܐܡܠܟ ܘܫܬܬܥܣܪܐ ܫܢ̈ܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܝܪܘܫܐ ܒܪܬ ܨܕܘܩ

³⁴ ܘܥܒܕ ܕܫܦܝܪ ܩܕܡ ܡܪܝܐ ܐܝܟ ܕܥܒܕ ܥܘܙܝܐ ܐܒܘܗܝ

³⁵ ܒܪܡ ܥ̈ܠܘܬܐ ܠܐ ܐܥܒܪ ܘܥܕܟܝܠ ܥܡܐ ܡܕܒܚܝܢ ܗܘܘ ܘܣܝܡܝܢ ܗܘܘ ܒܣ̈ܡܐ ܥܠ ܥ̈ܠܘܬܐ ܘܗܘ ܒܢܐ ܬܪܥܐ ܥܠܝܐ ܕܒܝܬܗ ܕܡܪܝܐ

³⁶ ܘܫܪܟܐ ܕܦܬ̈ܓܡܘܗܝ ܕܝܘܬܡ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ

³⁷ ܒܝ̈ܘܡܬܐ ܗܢܘܢ ܫܪܝ ܡܪܝܐ ܠܡܓܪܝܘ ܒܝܗܘܕܐ ܠܪܨܢ ܡܠܟܐ ܕܐܪܡ ܘܠܦܩܚ ܒܪ ܪܘܡܠܝܐ ܡܠܟܐ ܕܐܝܣܪܝܠ

³⁸ ܘܫܟܒ ܝܘܬܡ ܥܡ ܐ̈ܒܗܘܗܝ ܘܐܬܩܒܪ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ ܘܐܡܠܟ ܐܚܙ ܒܪܗ ܒܬܪܗ