Giudici 5

¹ Cecineruntque Debora et Barac filius Abinoem in die illo dicen tes:

² “ Quia comae excussae sunt in Israel,
cum sponte se obtulit populus,
benedicite Domino!

³ Audite, reges, percipite auribus, principes;
ego sum, ego sum, quae Domino canam,
psallam Domino, Deo Israel!

⁴ Domine, cum exires de Seir,
incederes de regione Edom,
terra mota est, caelique stillaverunt, ac nubes stillaverunt aquis;

⁵ montes fluxerunt a facie Domini Sinai,
a facie Domini, Dei Israel.

⁶ In diebus Samgar filii Anath,
in diebus Iahel quieverunt semitae; et, qui ingrediebantur per eas,
ambulaverunt per calles devios.

⁷ Cessaverunt fortes in Israel et quieverunt,
donec surgeres, Debora,
surgeres mater in Israel.

⁸ Elegerunt deos novos;
tunc erat pugna in portis.
Clipeus et hasta non apparuerunt
in quadraginta milibus Israel.

⁹ Cor meum diligit principes Israel.
Qui sponte obtulistis vos in populo, benedicite Domino!

¹⁰ Qui ascenditis super nitentes asinas
et sedetis super tapetia
et ambulatis in via, loquimini.

¹¹ Ad vocem eorum,
qui distribuunt aquas ad canales,
ibi narrant iustitias Domini,
iustitias fortitudinis eius in Israel:
tunc descendit populus Domini ad portas.

¹² Surge, surge, Debora;
surge, surge et loquere canticum!
Surge, Barac, et apprehende captivos tuos,
fili Abinoem!

¹³ Tunc descenderunt reliquiae ad inclitos,
populus Domini descendit pro eo in fortibus.

¹⁴ Ex Ephraim venerunt principes in vallem
post te, Beniamin, in populis tuis.
De Machir principes descenderunt, et de Zabulon, qui tenent sceptrum, praefecti.

¹⁵ Duces Issachar fuere cum Debora;
sic Barac in vallem missus cum peditibus suis.
In pagis Ruben magna consilia cordis.

¹⁶ Quare sedebas inter caulas,
ut audires sibilos tibiae apud greges?
Pagis Ruben magnae investigationes cordis.

¹⁷ Galaad trans Iordanem quiescebat;
et Dan cur peregrinus vacabat navibus?
Aser habitabat in litore maris
et in portibus morabatur.

¹⁸ Zabulon vero obtulit animam suam morti,
et Nephthali super excelsa regionis.

¹⁹ Venerunt reges et pugnaverunt,
pugnaverunt reges Chanaan
in Thanach iuxta aquas Mageddo, praedam argenti non tulere!

²⁰ De caelo dimicaverunt stellae,
cursu suo adversus Sisaram pugnaverunt.

²¹ Torrens Cison traxit cadavera eorum,
torrens proeliorum, torrens Cison; incede, anima mea, fortiter.

²² Tunc calcaverunt ungulae equorum
in cursu praecipiti fortium suorum.

²³ Maledicite, Meroz, dixit angelus Domini,
maledicite habitatoribus eius,
quia non venerunt ad auxilium Domini,
in adiutorium Domini in fortibus.

²⁴ Benedicta prae mulieribus Iahel uxor Haber Cinaei,
prae mulieribus tabernaculi benedicatur!

²⁵ Aquam petenti lac dedit
et in phiala principum obtulit butyrum.

²⁶ Sinistram manum misit ad clavum
et dextram ad fabrorum malleum:
percussitque Sisaram quaerens in capite vulneri locum
et tempus valide perforans.

²⁷ Inter pedes eius ruit, cecidit, iacebat;
inter pedes eius ruit, cecidit;
ubi ruit, ibi iacebat exanimis.

²⁸ Per fenestram prospiciens eiulabat
mater Sisarae per cancellos:
“Cur moratur regredi currus eius? Quare tardant rotae quadrigarum illius?”.

²⁹ Una sapientior ceteris uxoribus respondit ei,
et ipsa sibi repetit verba illius:

³⁰ “Certo nunc dividunt inventa spolia, unam, duas feminas singulis viris;
duas vestes diversorum colorum
Sisarae in praedam;
unam, duas texturas discolores
collo meo in praedam”.

³¹ Sic pereant omnes inimici tui, Domine!
Qui autem diligunt eum, rutilent,
sicut sol in ortu suo splendet ”.

³² Quievitque terra per quadraginta annos.