2 Samuele ܫܡܘܐܝܠ 5

¹ ܘܐܬܘ ܟܘܠܗܘܢ ܫܒ̈ܛܐ ܕܒܝܬ ܐܝܣܪܝܠ ܠܘܬ ܕܘܝܕ ܠܚܒܪܘܢ ܘܐܡܪܘ ܠܗ ܗܐ ܒܣܪܟ ܚܢܢ ܘܓܪܡܟ

² ܐܦ ܡܢ ܐܬܡܠܝ ܐܦ ܡܢ ܡܢܬܡܠܝ ܟܕ ܫܐܘܠ ܗܘܐ ܡܠܟܐ ܥܠܝܢ ܐܢܬ ܗܘ ܡܦܩ ܗܘܝܬ ܘܡܥܠ ܠܐܝܣܪܝܠ ܘܐܡܪ ܠܟ ܡܪܝܐ ܕܐܢܬ ܬܪܥܐ ܠܥܡܝ ܐܝܣܪܝܠ ܘܐܢܬ ܬܗܘܐ ܡܕܒܪܢܐ ܥܠ ܥܡܝ ܐܝܣܪܝܠ

³ ܘܐܬܘ ܟܠܗܘܢ ܣܒ̈ܐ ܕܐܝܣܪܝܠ ܠܘܬ ܡܠܟܐ ܠܚܒܪܘܢ ܘܐܩܝܡ ܠܗܘܢ ܡܠܟܐ ܕܘܝܕ ܒܚܒܪܘܢ ܩܝܡܐ ܩܕܡ ܡܪܝܐ ܘܡܫܚܘ ܠܕܘܝܕ ܕܢܡܠܟ ܥܠ ܐܝܣܪܝܠ

⁴ ܒܪ ܬܠܬܝܢ ܗܘܐ ܫܢܝ̈ܢ ܕܘܝܕ ܟܕ ܐܡܠܟ ܘܐܪ̈ܒܥܝܢ ܫܢܝ̈ܢ ܐܡܠܟ

⁵ ܒܚܒܪܘܢ ܐܡܠܟ ܥܠ ܕܒܝܬ ܝܗܘܕܐ ܫܒܥ ܫܢܝ̈ܢ ܘܫܬܐ ܝܪ̈ܚܝܢ ܘܒܐܘܪܫܠܡ ܐܡܠܟ ܬܠܬܝܢ ܘܬܠܬ ܫܢ̈ܝܢ ܥܠ ܟܠܗ ܐܝܣܪܝܠ ܘܝܗܘܕܐ

⁶ ܘܐܙܠ ܡܠܟܐ ܕܘܝܕ ܘܓܒܪ̈ܘܗܝ ܠܐܘܪܫܠܡ ܥܠ ܝܒܘܣ̈ܝܐ ܝܬ̈ܒܝ ܐܪܥܐ ܘܐܡܪܘ ܠܕܘܝܕ ܠܡܐܡܪ ܠܐ ܬܥܘܠ ܠܗܪܟܐ ܐܠܐ ܐܢ ܐܥܒܪܬ ܥܘܝܪ̈ܐ ܘܚܓܝܪ̈ܐ ܘܐܡܪܘ ܠܐ ܢܥܘܠ ܕܘܝܕ ܠܗܪܟܐ

⁷ ܘܐܚܕ ܕܘܝܕ ܠܡܨܪܘܬ ܨܗܝܘܢ ܗܝ ܗܝ ܩܪܝܬܗ ܕܕܘܝܕ

⁸ ܘܐܡܪ ܕܘܝܕ ܒܝܘܡܐ ܗ̇ܘ ܟܠ ܕܢܡܚܐ ܠܝܒܘܣܝܐ ܘܕܢܩܪܘܒ ܒܣܟܪܐ ܠܥܘܝܪܐ ܘܠܚܓܝܪܐ ܣܢ̇ܐ ܢܦܫܗ ܗܘ ܕܕܘܝܕ ܡܛܠ ܗܢܐ ܐܡܪܝܢ ܥܘܝܪܐ ܘܚܓܝܪܐ ܠܐ ܢܥܘܠ ܠܒܝܬܐ

⁹ ܘܝܬܒ ܕܘܝܕ ܒܡܨܪܘܬ ܗܝ ܗܝ ܨܗܝܘܢ ܘܩܪܗ̇ ܩܪܝܬܗ ܕܕܘܝܕ. ܘܒܢܐ ܕܘܝܕ ܚܕܪ̈ܝܗ̇ ܡܢ ܠܓܘ.

¹⁰ ܘܕܘܝܕ ܐܙ̇ܠ ܘܝ̇ܪܒ ܘܡܪܝܐ ܐܠܗܗ ܨܒܐܘܬ ܥܡܗ

¹¹ ܘܫܕܪ ܚܝܪܡ ܡܠܟܐ ܕܨܘܪ ܐܝ̈ܙܓܕܐ ܠܘܬ ܕܘܝܕ ܘܩܝ̈ܣܐ ܕܐܪܙܐ ܘܐ̈ܘܡܢܐ ܕܩܝܣܐ ܘܐܘ̈ܡܢܐ ܕܟܐܦܐ ܕܐܣܬܐ ܘܒܢܘ ܒܝܬܐ ܠܕܘܝܕ

¹² ܘܝܕܥ ܕܘܝܕ ܕܐܬܩܢܗ ܡܪܝܐ ܡܠܟܐ ܥܠ ܐܝܣܪܝܠ ܘܐܬܬܪܝܡܬ ܡܠܟܘܬܗ ܥܠ ܥܡܗ ܐܝܣܪܝܠ

¹³ ܘܢܣܒ ܬܘܒ ܕܘܝܕ ܕܪ̈ܘܟܬܐ ܘܢܫ̈ܐ ܡܢ ܐܘܪܫܠܡ ܡܢ ܒܬܪ ܕܐܬܐ ܡܢ ܚܒܪܘܢ ܘܐܬܝܠܕܘ ܬܘܒ ܠܕܘܝܕ ܒ̈ܢܝܐ ܘܒܢ̈ܬܐ

¹⁴ ܘܗܠܝܢ ܫܡ̈ܗܐ ܕܒ̈ܢܝܐ ܕܐܬܝܠܕܘ ܠܗ ܒܐܘܪܫܠܡ ܫܡܘܥ ܘܫܟܘܒ ܘܢܬܢ ܘܫܠܝܡܘܢ

¹⁵ ܘܝܘܟܒܪ ܘܐܠܝܫܥ ܘܢܦܓ ܘܢܦܝܥ

¹⁶ ܘܐܠܝܫܡܥ ܘܐܠܝܕܥ ܘܐܠܝܦܠܛ

¹⁷ ܘܫܡܥܘ ܦܠܫ̈ܬܝܐ ܕܡܫܚܘ ܠܕܘܝܕ ܕܢܡܠܟ ܥܠ ܐܝܣܪܝܠ ܘܣܠܩܘ ܟܠܗܘܢ ܦܠܫ̈ܬܝܐ ܠܡܒܥܐ ܠܕܘܝܕ ܘܫܡܥ ܕܘܝܕ ܘܢܚܬ ܠܗ ܠܡܨܪܘܬ

¹⁸ ܘܦܠܫ̈ܬܝܐ ܐܬܘ ܫܪܘ ܒܥܘܡܩܐ ܕܓܢܒܪ̈ܐ

¹⁹ ܘܫܐܠ ܕܘܝܕ ܒܡܪܝܐ ܘܐܡܪ ܐܣܩ ܥܠ ܦܠܫ̈ܬܝܐ ܡܫܠܡ ܐܢܬ ܠܗܘܢ ܒܐ̈ܝܕܝ ܘܐܡܪ ܠܗ ܡܪܝܐ ܣܩ ܡܛܠ ܕܒܐ̈ܝܕܝܟ ܡܫܠܡ ܐܢܐ ܠܗܘܢ

²⁰ ܘܐܬܐ ܕܘܝܕ ܠܒܥܠ ܦܪܨܝܡ ܘܡܚܐ ܐܢܘܢ ܬܡܢ ܘܐܡܪ ܕܘܝܕ ܬܪܥ ܡܪܝܐ ܠܒ̈ܥܠܕܒܒܘܗܝ ܩܕܡܝ ܐܝܟ ܬܘܪܥܬܐ ܕܡ̈ܝܐ ܡܛܠ ܗܢܐ ܩܪܐ ܫܡܗ ܕܐܬܪܐ ܗܘ ܒܥܠ ܦܪܨܝܡ

²¹ ܘܫܒܩܘ ܬܡܢ ܦܬܟܪ̈ܝܗܘܢ ܘܫܩܠ ܐܢܘܢ ܕܘܝܕ ܘܓܒܪ̈ܘܗܝ

²² ܘܐܘܣܦܘ ܬܘܒ ܦܠܫ̈ܬܝܐ ܠܡܣܩ ܘܫܪܘ ܒܥܘܡܩܐ ܕܓܢܒܪ̈ܐ

²³ ܘܫܐܠ ܕܘܝܕ ܒܡܪܝܐ ܘܐܡܪ ܠܗ ܡܪܝܐ ܠܐ ܬܣܩ ܐܠܐ ܗܦܘܟ ܠܟ ܡܢ ܒܣܬܪܗܘܢ ܘܬܐ ܥܠܝܗܘܢ ܡܢ ܠܘܩܒܠ ܒܟܝܡ

²⁴ ܘܡܐ ܕܫܡܥܬ ܩܠܐ ܕܗܠܟܬܐ ܒܪܝܫܗ ܕܛܘܪܐ ܕܒܐܟܝܡ ܗܝܕܝܢ ܬܬܥܫܢ ܡܛܠ ܕܗܝܕܝܢ ܢܦ̇ܩ ܡܪܝܐ ܩܕܡܝܟ ܠܡܡܚܐ ܠܡܫܪܝܬܐ ܕܦܠܫ̈ܬܝܐ

²⁵ ܘܥܒܕ ܕܘܝܕ ܗܟܢܐ ܐܝܟܢܐ ܕܦܩܕܗ ܡܪܝܐ ܘܡܚܐ ܠܦܠܫ̈ܬܝܐ ܡܢ ܓܒܥ ܘܥܕܡܐ ܠܡܥܠܢܐ ܕܓܕܪ