2 Samuele ܫܡܘܐܝܠ 9

¹ ܘܶܐܡܰܪ ܕܰܘܺܝܕ. ܐܺܝܬ ܐ̱ܢܳܫ ܕܶܐܫܬܚܰܪ ܡܶܢ ܕܒܶܝܬ ܫܳܐܘܳܠ. ܐܶܥܒܶܕ ܥܠܰܘܗܝ ܖ̈ܰܚܡܶܐ ܡܶܛܽܠ ܝܽܘܢܳܬܳܢ.

² ܘܰܠܒܶܝܬ ܫܳܐܘܳܠ ܐܺܝܬ ܗܘܳܐ ܥܰܒܕܳܐ ܕܰܫܡܶܗ ܨܺܝܒܳܐ. ܘܰܩܪܳܐܗܝ ܠܘܳܬ ܕܰܘܺܝܕ.

³ ܘܶܐܡܰܪ ܠܶܗ ܡܰܠܟܳܐ. ܐܰܢ̱ܬ ܗܽܘ ܨܺܝܒܳܐ. ܘܶܐܡܰܪ ܐܶܢܳܐ ܥܰܒܕܳܟ. ܘܶܐܡܰܪ ܠܶܗ ܡܰܠܟܳܐ. ܐܺܝܬ ܬܽܘܒ ܐ̱ܢܳܫ ܡܶܢ ܕܒܶܝܬ ܫܳܐܘܳܠ. ܐܶܥܒܶܕ ܥܠܰܘܗܝ ܖ̈ܰܚܡܶܐ ܡܶܛܽܠ ܐܰ‌ܠܳܗܳܐ. ܘܶܐܡܰܪ ܨܺܝܒܳܐ ܠܡܰܠܟܳܐ. ܩܰܝܳܡ ܒܪܳܐ ܠܝܽܘܢܳܬܳܢ. ܘܰܡܣܰܖ̈ܚܳܢ ܖ̈ܶܓܠܰܘܗܝ.

⁴ ܘܶܐܡܰܪ ܠܶܗ ܡܰܠܟܳܐ. ܐܰܝܟܰܘ. ܐܶܡܰܪ ܨܺܝܒܳܐ ܠܡܰܠܟܳܐ. ܗܳܐ ܒܶܝܬ ܡܳܟܺܝܪ ܗܽܘ ܒܰܪ ܓܡܺܝܠ ܡܶܢ ܠܽܘܕܒܰܪ.

⁵ ܘܫܰܕܰܪ ܡܰܠܟܳܐ. ܘܕܒܪܶܗ ܡܶܢ ܒܶܝܬ ܡܳܟܺܝܪ ܒܰܪ ܓܡܺܝܠ ܡܶܢ ܠܽܘܕܒܰܪ.

⁶ ܘܶܐܬܳܐ ܡܰܦܺܝܒܫܳܬ ܒܰܪ ܝܽܘܢܳܬܳܢ. ܒܰܪ ܫܳܐܘܳܠ. ܠܘܳܬ ܕܰܘܺܝܕ. ܘܰܢܦܰܠ ܥܰܠ ܐܰܦܰܘ̈ܗܝ ܘܰܣܓܶܕ. ܘܶܐܡܰܪ ܕܰܘܺܝܕ. ܡܰܦܺܝܒܫܳܬ. ܘܶܐܡܰܪ ܐܶܬܳܐ ܥܰܒܕܳܟ.

⁷ ܘܶܐܡܰܪ ܠܶܗ ܕܰܘܺܝܕ ܠܳܐ ܬܶܕܚܰܠ. ܡܶܛܽܠ ܕܥܳܒܶܕ ܐ̱ܢܳܐ ܥܰܡܳܟ ܛܰܝܒܽܘܬܳܐ. ܡܶܛܽܠ ܝܽܘܢܳܬܳܢ ܐܰܒܽܘܟ. ܘܡܰܦܢܶܐ ܐ̱ܢܳܐ ܠܳܟ ܟܽܠܗܶܝܢ ܚܰܩ̈ܠܳܬܳܐ ܕܫܳܐܘܳܠ ܐܰܒܽܘܟ. ܘܰܐܢ̱ܬ ܬܶܗܘܶܐ ܐܳܟܶܠ ܠܰܚܡܳܐ ܥܰܠ ܦܳܬܽܘܪܝ ܐܰܡܺܝܢܳܐܺܝܬ.

⁸ ܘܰܣܓܶܕ ܘܶܐܡܰܪ. ܡܳܢܳܐ ܗܽܘ ܥܰܒܕܳܟ ܕܚܳܪܬ ܒܺܝ. ܕܰܐܝܟ ܟܰܠܒܳܐ ܐ̱ܢܳܐ ܡܺܝܬܳܐ.

⁹ ܘܰܩܪܳܐ ܡܰܠܟܳܐ ܠܨܺܝܒܳܐ ܘܶܐܡܰܪ ܠܶܗ. ܟܽܠ ܕܺܐܝܬ ܗܘܳܐ ܠܫܳܐܘܳܠ ܘܰܠܟܽܠܶܗ ܒܰܝܬܶܗ. ܝܶܗܒܶܬ ܠܒܰܪ ܡܳܪܳܟ.

¹⁰ ܘܬܶܦܠܽܘܚ ܠܶܗ ܐܰܪܥܳܐ. ܐܰܢ̱ܬ ܘܰܒܢܰܝ̈ܟ. ܘܬܰܥܶܠ ܠܒܰܪ ܡܳܪܳܟ ܠܰܚܡܳܐ ܘܢܶܐܟܽܘܠ. ܘܡܰܦܺܝܒܫܳܬ ܒܰܪ ܡܳܪܳܟ. ܢܶܗܘܶܐ ܐܳܟܶܠ ܠܰܚܡܳܐ ܥܰܠ ܦܳܬܽܘܪܝ ܐܰܡܺܝܢܳܐܺܝܬ. ܘܰܠܨܺܝܒܳܐ ܐܺܝܬ ܗܘܰܘ ܠܶܗ ܚܰܡܶܫܬܰܥܣܰܪ ܒܢܺܝ̈ܢ. ܘܥܶܣܪܺܝܢ ܥܰܒ̈ܕܺܝܢ.

¹¹ ܘܶܐܡܰܪ ܨܺܝܒܳܐ ܠܡܰܠܟܳܐ. ܟܽܠ ܕܦܳܩܶܕ ܡܳܪܝ ܡܰܠܟܳܐ ܠܥܰܒܕܶܗ. ܗܳܟܰܢܳܐ ܥܳܒܶܕ ܥܰܒܕܳܟ. ܘܡܰܦܺܝܒܫܳܬ ܐܳܟܶܠ ܗܘܳܐ ܠܰܚܡܳܐ ܥܰܠ ܦܳܬܽܘܪܶܗ ܕܡܰܠܟܳܐ ܐܰܝܟ ܚܰܕ ܡܶܢ ܒܢܰܝ̈ ܡܰܠܟܳܐ.

¹² ܘܰܠܡܰܦܺܝܒܫܳܬ ܐܺܝܬ ܗܘܳܐ ܠܶܗ ܒܪܳܐ ܙܥܽܘܪܳܐ ܘܰܫܡܶܗ ܡܺܝܟܳܐ. ܘܟܽܠܶܗ ܝܰܬܒܳܐ ܕܒܶܝܬ ܨܺܝܒܳܐ. ܗܘܰܘ ܥܰܒܕ̈ܶܐ ܕܡܰܦܺܝܒܫܳܬ.

¹³ ܘܡܰܦܺܝܒܫܳܬ ܝܳܬܶܒ ܗܘܳܐ ܒܽܐܘܪܺܫܠܶܡ. ܡܶܛܽܠ ܕܥܰܠ ܦܳܬܽܘܪܳܐ ܕܡܰܠܟܳܐ ܐܰܡܺܝܢܳܐܺܝܬ ܠܳܥܶܣ ܗܘܳܐ. ܘܰܡܣܰܖ̈ܚܳܢ ܗܘܰܝ̈ ܬܰܖ̈ܬܰܝܗܶܝܢ ܖ̈ܶܓܠܰܘܗܝ.