Giudici ܕܝ̈ܢܐ 21

¹ ܘܓܒܪ̈ܐ ܕܐܝܣܪܝܠ ܐܝܡܘ ܒܡܨܦܝܐ ܘܐܡܪܘ ܕܓܒܪܐ ܡܢܢ ܠܐ ܢܬܠ ܒܪܬܗ ܠܒܢܝ̈ ܒܢܝܡܝܢ ܠܐܢܬܬܐ

² ܘܐܬܘ ܥܕܡܐ ܠܒܝܬ ܐܝܠ ܘܐܝܬܒܘ ܬܡܢ ܥܕܡܐ ܠܪܡܫܐ ܩܕܡ ܐܠܗܐ ܘܐܪܝܡܘ ܩܠܗܘܢ ܘܒܟܘ ܒܟܬܐ ܪܒܬܐ

³ ܘܐܡܪܘ ܠܡܢܐ ܡܪܝܐ ܐܠܗܐ ܕܐܝܣܪܝܠ ܗܘܬ ܗܕܐ ܒܝܬ ܐܝܣܪܝܠ ܕܢܛܥܐ ܝܘܡܢܐ ܡܢ ܐܝܣܪܝܠ ܚܕ ܫܒܛܐ

⁴ ܘܡܢ ܒܬܪ ܝܘܡܐ ܩܕܡܘ ܥܡܐ ܘܒܢܘ ܬܡܢ ܡܕܒܚܐ ܘܐܣܩܘ ܥ̈ܠܘܬܐ ܘܫ̈ܠܡܐ

⁵ ܘܐܡܪܘ ܒܢܝ̈ ܐܝܣܪܝܠ ܡܢܘ ܕܠܐ ܣܠܩ ܒܟܢܫܐ ܡܢ ܟܠܗܘܢ ܫܒ̈ܛܐ ܕܐܝܣܪܝܠ ܩܕܡ ܡܪܝܐ ܡܛܠ ܕܡ̈ܘܡܬܐ ܪܒܬܐ ܗܘܬ ܕܡ̇ܢ ܕܠܐ ܣܠܩ ܩܕܡ ܡܪܝܐ ܠܡܨܦܝܐ ܡܡܬ ܢܡܘܬ

⁶ ܘܐܬܬܘܝܘ ܒܢ̈ܝ ܐܝܣܪܝܠ ܥܠ ܒܢ̈ܝ ܒܢܝܡܝܢ ܐܚܘܗܘܢ ܘܐܡܪܝܢ ܝܘܡܢܐ ܥܢܕ ܫܒܛܐ ܚܕ ܡܢ ܐܝܣܪܝܠ

⁷ ܘܐܡܪܘ ܡܢܐ ܢܥܒܕ ܠܗܢܘܢ ܕܐܫܬܒܩܘ ܕܠܐ ܢܫ̈ܐ ܕܚܢܢ ܐܝܡܝܢ ܒܡܪܝܐ ܕܠܐ ܢܬܠ ܠܗܘܢ ܢܫ̈ܐ

⁸ ܘܐܡܪܝܢ ܡܢ ܚܕ ܡܢ ܫܒ̈ܛܐ ܕܐܝܣܪܐܝܠ ܕܠܐ ܣܠܩܘ ܩܕܡ ܡܪܝܐ ܠܡܨܦܝܐ ܘܠܐ ܐܬܘ ܓܒܪ̈ܐ ܠܡܫܪܝܬܐ ܡܢ ܝܬ̈ܒܝ ܝܒܝܫ ܕܓܠܥܕ

⁹ ܘܐܬܡܢܝܘ ܬܡܢ ܥܡܐ ܘܠܐ ܐܫܬܟܚ ܐܢܫ ܬܡܢ ܡܢ ܝܬܒ̈ܝ ܝܒܝܫ ܕܓܠܥܕ

¹⁰ ܘܫܕܪܘ ܠܬܡܢ ܥܡܐ ܬܪ̈ܥܣܪ ܐ̈ܠܦܝܢ ܓܒܪ̈ܝܢ ܡܢ ܒܢ̈ܝ ܚܝܠܐ ܘܦܩܕܘ ܐܢܘܢ ܘܐܡܪܘ ܠܗܘܢ ܙܠܘ ܚܪܘܒܘ ܠܝܬ̈ܒܝ ܝܒܝܫ ܕܓܠܥܕ ܒܦܘܡܐ ܕܚܪܒܐ ܘܢܫ̈ܐ ܘ̈ܛܠܝܐ

¹¹ ܗܟܢܐ ܥܒܕܘ ܠܟܠ ܓܒܪܐ ܘܠܟܠ ܐܢܬܬܐ ܕܚܟܡܗ̇ ܓܒܪܐ ܚܪܘܒܘ

¹² ܘܐܫܟܚܘ ܡܢ ܝܬܒ̈ܝ ܝܒܝܫ ܕܓܠܥܕ ܐܪܒܥܡܐܐ ܥܠܝܡ̈ܬܐ ܒܬܘ̈ܠܬܐ ܕܠܐ ܚܟܡܘ ܐܢܝ̈ܢ ܓܒܪ̈ܐ ܘܐܝܬܝܘ ܐ̈ܢܝܢ ܠܡܫܪܝܬܐ ܠܫܝܠܘ ܕܒܐܪܥܐ ܕܟܢܥܢ

¹³ ܘܫܕܪܘ ܟܠܗ ܥܡܐ ܘܐܡܪܘ ܠܒܢܝܡܝܢ ܕܒܫܩܝܦܐ ܕܪܡܘܢ ܘܩܪܘ ܠܗ ܫܠܡܐ

¹⁴ ܘܐܬܐ ܒܢܝܡܝܢ ܒܙܒܢܐ ܗܘ ܘܝܗܒܘ ܠܗܘܢ ܢܫ̈ܐ ܕܐܚܝܘ ܡܢ ܢܫ̈ܐ ܕܝܒܝܫ ܕܓܠܥܕ ܘܠܐ ܡܠܝ ܠܗܘܢ

¹⁵ ܘܥܡܐ ܐܬܬܘܝܘ ܥܠ ܒܢܝܡܝܢ ܡܛܠ ܕܥܒܕ ܡܪܝܐ ܬܘܪܥܬܐ ܒܫ̈ܒܛܐ ܕܐܝܣܪܝܠ

¹⁶ ܘܐܡܪܘ ܣܒ̈ܐ ܕܥܡܐ ܡܢܐ ܢܥܒܕ ܠܐܝܠܝܢ ܕܐܫܬܒܩܘ ܕܠܐ ܢܫ̈ܐ ܗܠܝܢ ܕܐܫܬܚܪܘ ܡܛܠ ܕܣܦ ܠܗܝܢ ܢ̈ܫܐ ܕܒܢܝܡܝܢ

¹⁷ ܘܐܡܪܘ ܕܢܫܬܒܩ ܫܪܟܢܐ ܕܒܢܝܡܝܢ ܘܠܐ ܢܛܥܐ ܫܒܛܐ ܡܢ ܐܝܣܪܝܠ

¹⁸ ܚܢܢ ܓܝܪ ܠܐ ܡܫܟܚܝܢܢ ܕܢܬܠ ܠܗܘܢ ܢܫ̈ܐ ܡܢ ܒܢ̈ܬܢ ܡܛܠ ܕܐܝܡܘ ܒܢܝ̈ ܐܝܣܪܝܠ ܘܐܡܪܘ ܠܝܛ ܗܘ ܡ̇ܢ ܕܢܬܠ ܐܢܬܬܐ ܠܒܢܝܡܝܢ

¹⁹ ܘܐܡܪܘ ܗܐ ܚܓܐ ܕܡܪܝܐ ܗܘܐ ܒܫܝܠܘ ܡܢ ܥܕܢ ܠܥܕܢ ܡܢ ܓܪܒܝܐ ܕܒܝܬ ܐܝܠ ܡܢ ܡܕ̈ܢܚܝ ܫܡܫܐ ܡܢ ܫܒܝܠܐ ܕܣܠܩ ܡܢ ܒܝܬ ܐܝܠ ܠܫܟܝܡ ܡܢ ܬܝܡܢܐ ܕܠܒܘܢܐ

²⁰ ܘܦܩܕܘ ܠܒܢ̈ܝ ܒܢܝܡܝܢ ܘܐܡܪܘ ܠܗܘܢ ܙܠܘ ܟܡܢܘ ܒܟܪ̈ܡܐ

²¹ ܘܡܐ ܕܚܙܝܬܘܢ ܕܢܦܩ ܡܢ ܒܢ̈ܬ ܫܝܠܘ ܠܡܩܫ ܒ̈ܦܠܓܐ ܦܘܩܘ ܡܢ ܟܪ̈ܡܐ ܘܚܛܘܦܘ ܠܟܘܢ ܓܒܪ ܐܢܬܬܗ ܡܢ ܒܢ̈ܬ ܫܝܠܘ ܘܙܠܘ ܠܐܪܥܐ ܕܒܢܝܡܝܢ

²² ܘܐܢ ܐܬܘ ܐܒܗܝ̈ܗܝܢ ܐܘ ܐ̈ܚܝܗܝܢ ܠܡܕܢ ܩܕܡܝܢ ܐܡܪܝܢܢ ܠܗܘܢ ܪܚܡܘ ܥܠܝܗܘܢ ܡܛܠ ܕܠܐ ܕܒܪܘ ܓܒܪ ܐܢܬܬܗ ܒܩܪܒܐ ܠܐ ܗܘܐ ܐܢܬܘܢ ܝܗܒܬܘܢ ܐ̈ܢܝܢ ܠܗܘܢ ܕܬܚܛܘܢ

²³ ܘܥܒܕܘ ܗܟܢܐ ܒܢ̈ܝ ܒܢܝܡܝܢ ܘܢܣܒܘ ܠܗܘܢ ܢܫ̈ܐ ܠܟܠܗܘܢ ܡܢ ܢܩ̈ܫܬ ܦ̈ܠܓܐ ܕܚܛܦܘ ܘܗܦܟܘ ܘܐܬܘ ܠܝܪܬܘܬܗܘܢ ܘܒܢܘ ܩܘܪ̈ܝܐ ܘܐܝܬܒܘ ܒܗܝܢ

²⁴ ܘܐܙܠܘ ܡܢ ܬܡܢ ܒܢ̈ܝ ܐܝܣܪܝܠ ܒܙܒܢܐ ܗܘ ܐܢܫ ܠܫܒܛܗ ܘܠܫܪܒܬܗ ܘܢܦܩܘ ܡܢ ܬܡܢ ܐܢܫ ܠܝܪܬܘܬܗ

²⁵ ܘܒܝ̈ܘܡܬܐ ܗܢܘܢ ܠܝܬ ܗܘܐ ܡܠܟܐ ܒܝܬ ܐܝܣܪܝܠ ܘܟܠ ܐܢܫ ܐܝܟ ܕܫܦܝܪ ܒܥܝ̈ܢܘܗܝ ܗܘ ܗܘ ܥܒ̇ܕ ܗܘܐ