Giudici ܕܝ̈ܢܐ 13

1 2 3 4 5 6 7 8 9 10 11 12 13 14 15 16 17 18 19 20 21

Gen Es Lv Nm Dt Gs Gdc Rt 1Sam 2Sam 1Re 2Re 1Cr 2Cr Esd Ne

¹ܘܐܘܣܦܘ ܬܘܒ ܒܢܝ̈ ܐܝܣܪܝܠ ܠܡܥܒܕ ܕܒܝܫ ܩܕܡ ܡܪܝܐ ܘܐܫܠܡ ܐܢܘܢ ܡܪܝܐ ܒܐܝܕܐ ܕܦܠܫ̈ܬܝܐ ܐܪ̈ܒܥܝܢ ܫܢܝ̈ܢ²ܘܗܘܐ ܓܒܪܐ ܚܕ ܡܢ ܨܕܥܐ ܡܢ ܫܪܒܬܐ ܕܕܢ ܘܫܡܗ ܡܢܘܚ ܘܐܢܬܬܗ ܥܩܪܬܐ ܗܘܬ ܘܠܐ ܝܠܕܐ³ܘܐܬܚܙܝ ܡܠܐܟܗ ܕܡܪܝܐ ܠܐܢܬܬܐ ܗܝ ܘܐܡܪ ܠܗ̇ ܗܐ ܐܢܬܝ ܥܩܪܐ ܘܠܐ ܝܠܕܐ ܗܫܐ ܬܒܛܢܝܢ ܘܬܐܠܕܝܢ ܒܪܐ⁴ܐܙܕܗܪ ܕܠܡܐ ܬܫܬܝܢ ܚܡܪܐ ܐܘ ܫܟܪܐ ܘܠܐ ܬܐܟܠܝܢ ܟܠ ܡܕܡ ܕܛܡܐ⁵ܡܛܠ ܕܗܐ ܒܛܢܐ ܐܢܬܝ ܘܝܠܕܐ ܐܢܬܝ ܒܪܐ ܘܡܕܟܝܐ ܠܐ ܢܣܩ ܥܠ ܪܝܫܗ ܡܛܘܠ ܕܢܙܝܪܗ ܕܐܠܗܐ ܢܗܘܐ ܛܠܝܐ ܡܢ ܡܪܒܥܐ ܘܗܘ ܢܫܪܐ ܠܡܦܪܩ ܠܐܝܣܪܝܠ ܡܢ ܐܝܕܐ ܕܦܠܫܬ̈ܝܐ⁶ܘܐܬܬ ܐܢܬܬܐ ܘܐܡܪܬ ܠܒܥܠܗ̇ ܓܒܪܐ ܕܐܠܗܐ ܐܬܐ ܠܘܬܝ ܘܐܬܚܙܝ ܠܝ ܒܚܙܘܐ ܕܡܠܐܟܐ ܕܐܠܗܐ ܘܙܥܬ ܛܒ ܘܠܐ ܫܐܠܬܗ ܡܢ ܐܝܡܟܐ ܗܘ ܘܫܡܗ ܠܐ ܚܘܝܢܝ⁷ܘܐܡܪ ܠܝ ܕܗܐ ܒܛܢܐ ܐܢܬܝ ܘܝܠܕܐ ܐܢܬܝ ܒܪܐ ܡܟܝܠ ܠܐ ܬܫܬܝܢ ܚܡܪܐ ܐܘ ܫܟܪܐ ܘܠܐ ܬܐܟܠܝܢ ܟܠ ܡܕܡ ܕܛܡܐ ܡܛܠ ܕܢܙܝܪܗ ܕܐܠܗܐ ܢܗܘܐ ܛܠܝܐ ܡܢ ܡܪܒܥܐ ܥܕܡܐ ܠܝܘܡܐ ܕܡܐܬ⁸ܘܒܥܐ ܡܢܘܚ ܡܢ ܡܪܝܐ ܘܐܡܪ ܒܒܥܘ ܡܪܝܐ ܓܒܪܐ ܕܐܠܗܐ ܕܫܕܪܬ ܢܐܬܐ ܬܘܒ ܠܘܬܢ ܘܢܠܦܢ ܡܢܐ ܢܥܒܕ ܠܗ ܠܛܠܝܐ ܕܡܬܝܠܕ⁹ܘܫܡܥ ܡܪܝܐ ܒܩܠܗ ܕܡܢܘܚ ܘܐܬܐ ܬܘܒ ܡܠܐܟܗ ܕܡܪܝܐ ܠܘܬ ܐܢܬܬܐ ܘܗܝ ܝܬܒܐ ܗܘܬ ܒܚܩܠܐ ܘܡܢܘܚ ܒܥܠܗ̇ ܠܐ ܗܘܐ ܠܘܬܗ̇¹⁰ܘܐܣܬܪܗܒܬ ܐܢܬܬܐ ܘܪܗܛܬ ܘܚܘܝܬ ܠܒܥܠܗ̇ ܘܐܡܪܐ ܠܗ ܗܐ ܐܬܚܙܝ ܠܝ ܓܒܪܐ ܕܐܬܐ ܒܗܘ ܝܘܡܐ ܠܘܬܝ¹¹ܘܩܡ ܡܢܘܚ ܘܐܙܠ ܥܡ ܐܢܬܬܗ ܘܐܬܐ ܠܘܬ ܓܒܪܐ ܘܐܡܪ ܠܗ ܐܢܬ ܗܘ ܓܒܪܐ ܕܡܠܠܬ ܥܡ ܗܕܐ ܐܢܬܬܐ¹²ܘܐܡܪ ܐܢܐ ܗܘ ܘܐܡܪ ܡܢܘܚ ܗܫܐ ܗܘܐ ܦܬܓܡܟ ܐܡܪ ܠܝ ܡܢܐ ܗܘ ܕܝܢܗ ܕܛܠܝܐ ܘܥܒ̈ܕܘܗܝ¹³ܘܐܡܪ ܡܠܐܟܗ ܕܡܪܝܐ ܠܡܢܘܚ ܡܢ ܟܠ ܡܕܡ ܕܐܡܪܬ ܠܐܢܬܬܐ ܬܙܕܗܪ¹⁴ܡܢ ܟܠ ܕܢܦܩ ܡܢ ܓܦܬܐ ܠܐ ܬܐܟܘܠ ܘܚܡܪܐ ܘܫܟܪܐ ܠܐ ܬܫܬܐ ܘܟܘܠ ܕܛܡܐ ܠܐ ܬܐܟܘܠ ܘܟܘܠ ܕܦܩܕܬܗ̇ ܬܛܪ¹⁵ܘܐܡܪ ܡܢܘܚ ܠܡܠܐܟܗ ܕܡܪܝܐ ܢܟܠܝܟ ܘܢܥܒܕ ܓܕܝܐ ܕܥܙ̈ܐ ܩܕܡܝܟ¹⁶ܘܐܡܪ ܡܠܐܟܗ ܕܡܪܝܐ ܠܡܢܘܚ ܐܢ ܬܟܠܝܢܝ ܠܐ ܐܟܘܠ ܡܢ ܠܚܡܟ ܘܐܢ ܬܣܩ ܥܠܬܐ ܠܡܪܝܐ ܬܣܩܝܗ ܡܛܠ ܕܠܐ ܝܕܥ ܗܘܐ ܡܢܘܚ ܕܡܠܐܟܗ ܗܘ ܕܡܪܝܐ¹⁷ܘܐܡܪ ܡܢܘܚ ܠܡܠܐܟܗ ܕܡܪܝܐ ܡܢܘ ܫܡܟ ܕܡܐ ܕܗܘܐ ܦܬܓܡܟ ܢܩܪܝܟ¹⁸ܘܐܡܪ ܠܗ ܡܠܐܟܗ ܕܡܪܝܐ ܠܡܢܐ ܫܐܠ ܐܢܬ ܥܠ ܫܡܝ ܕܗܘ ܡܫܒܚ¹⁹ܘܢܣܒ ܡܢܘܚ ܓܕܝܐ ܕܥ̈ܙܐ ܘܣܡܝܕܐ ܘܐܣܩ ܥܠ ܟܐܦܐ ܠܡܪܝܐ ܘܡܫܒܚ ܗܘܐ ܠܡܪܝܐ ܘܡܢܘܚ ܘܐܢܬܬܗ ܚܙܝܢ ܗܘܘ²⁰ܟܕ ܣܠܩܬ ܫܠܗܒܝܬܐ ܕܢܘܪܐ ܡܢ ܟܐܦܐ ܠܫܡܝܐ ܘܣܠܩ ܡܠܐܟܗ ܕܡܪܝܐ ܒܫܠܗܒܝܬܐ ܕܡܕܒܚܐ ܘܡܢܘܚ ܘܐܢܬܬܗ ܚܙܘ ܘܢܦܠܘ ܥܠ ܐ̈ܦܝܗܘܢ ܥܠ ܐܪܥܐ ܘܣܓܕܘ²¹ܘܠܐ ܐܘܣܦ ܬܘܒ ܡܠܐܟܗ ܕܡܪܝܐ ܠܡܬܚܙܝܘ ܠܡܢܘܚ ܘܠܐܢܬܬܗ ܘܗܝܕܝܢ ܐܝܕܥܘ ܡܢܘܚ ܘܐܢܬܬܗ ܕܡܠܐܟܗ ܗܘ ܕܡܪܝܐ²²ܘܐܡܪ ܡܢܘܚ ܠܐܢܬܬܗ ܡܡܬ ܡܝܬܝܢ ܚܢܢ ܡܛܠ ܕܠܐܠܗܐ ܚܙܝܢ²³ܘܐܡܪܬ ܠܗ ܐܢܬܬܗ ܐܠܘ ܨܒܐ ܗܘܐ ܐܠܗܐ ܕܢܡܝܬܢ ܠܐ ܡܩܒܠ ܗܘܐ ܡܢܢ ܥܠܬܐ ܘܣܡܝܕܐ ܘܠܐ ܡܚܘܐ ܗܘܐ ܠܢ ܗܠܝܢ ܟܘܠܗܝܢ ܒܗܢܐ ܙܒܢܐ ܘܠܐ ܡܫܡܥ ܗܘܐ ܠܢ ܗܠܝܢ²⁴ܘܝܠܕܬ ܐܢܬܬܐ ܒܪܐ ܘܩܪܬ ܫܡܗ ܫܡܫܘܢ ܘܪܒܐ ܛܠܝܐ ܘܒܪܟܗ ܡܪܝܐ²⁵ܘܫܪܝܬ ܪܘܚܗ ܕܡܪܝܐ ܠܡܗܠܟܘܬܗ ܒܡܫܪܝܬܐ ܕܕܢ ܒܝܬ ܨܕܥܐ ܘܒܝܬ ܐܫܬܘܐܝܠ

1 2 3 4 5 6 7 8 9 10 11 12 13 14 15 16 17 18 19 20 21

Gen Es Lv Nm Dt Gs Gdc Rt 1Sam 2Sam 1Re 2Re 1Cr 2Cr Esd Ne

Altre sezioni del sito

Utility

SCRUTATIO

Giudici ܕܝ̈ܢܐ 13

Confronta con un'altra Bibbia

Cambia Bibbia