Siracide ܝܫܘܥ ܒܪ ܐܣܝܪܐ 45

¹ ܘܪܚܝܡ ܩܕܡ ܐܠܗܐ ܘܐܦ ܒܥ̈ܝܢܝ ܒܢܝܢܫ̈ܐ ܡܘܫܐ ܕܘܟܪܢܗ ܠܒܘܪܟܬܐ

² ܘܪܒܝܗ ܒܒܘܪ̈ܟܬܐ ܘܬܩܦܗ ܠܕܚ̈ܠܘܠܝܢ

³ ܘܐܩܝܡܗ ܩܕܡ ܡܠܟܐ ܘܦܩܕܗ ܥܠ ܥܡܐ ܘܚܘܝܗ ܐܝܩܪܗ ܘܐܫܡܥܗ ܩܠܗ

⁴ ܒܗܝܡܢܘܬܗ ܘܒܡܟܝܟܘܬܗ ܓܒܝܗܝ ܡܢ ܟܠܗܘܢ ܒܢ̈ܝ ܐܢܫܐ

⁵ ܘܩܪܒܗ ܠܥܪܦܠܗ ܘܣܕܪ ܩܕܡܘܗܝ ܢܡܘܣܐ ܕܚ̈ܝܐ ܘܒܘܪܟܬܐ ܠܡܠܦܘ ܠܕܒܝܬ ܐܝܣܪܝܠ ܢܡܘ̈ܣܘܗܝ ܘܩܝܡܘܗܝ ܘܕܝܢ̈ܘܗܝ ܠܝܥܩܘܒ

⁶ ܘܐܪܝܡ ܐܟܘܬܗ ܩܕܝܫܐ ܠܐܗܪܘܢ ܡܢ ܫܒܛܐ ܕܠܘܝ

⁷ ܘܣܡܗ ܠܫܪܪܐ ܕܥܡܐ ܘܝܗ̣ܒ ܥܠܘܗܝ ܡܢ ܐܝܩܪܗ ܘܫܘܒܚܗ ܘܓܒܝܗܝ ܒܪܘܡܐ ܕܐܝܩܪܗ

⁸ ܘܐܠܒܫܗ ܢܚ̈ܬܐ ܕܬܟܠܬܐ ܘܝܩܪܗ ܒܡܐ̈ܢܐ ܕܬܘܩܦܐ

¹⁵ ܘܣܡ ܥܠܘܗܝ ܡܘܫܐ ܐܝܕܗ ܘܡܫܚܗ ܡܫܚܐ ܕܩܘܕܫܐ ܘܗܘܬ ܠܗ ܠܩܝܡܐ ܕܠܥܠܡ ܘܠܙܪܥܗ ܐܝܟ ܝܘܡ̈ܬܐ ܕܫܡܝܐ ܠܡܫܡܫܘ ܘܠܡܒܪܟܘ ܠܥܡܗ ܒܫܡܗ

¹⁶ ܘܓܒܝܗܝ ܡܢ ܟܠܗܘܢ ܚ̈ܝܐ ܠܡܩܪܒܘ ܥ̈ܠܘܬܐ ܘܕܒܚ̈ܐ ܘܒܣ̈ܡܐ ܘܠܡܚܣܝܘ ܥܠ ܟܠܗ ܐܝܣܪܝܠ

¹⁷ ܘܝܗܒ ܠܗ ܦܘܩܕ̈ܢܐ ܘܐܫܠܛܗ ܒܩܝ̈ܡܐ ܘܕܝ̈ܢܐ

¹⁸ ܘܐܬܚܪܝܘ ܥܡܗ ܢܘܟܪ̈ܝܐ ܘܛܢܘ ܒܗ ܒܡܕܒܪܐ ܐ̈ܢܫܝ ܕܬܢ ܘܐܒܝܪܡ ܘܟܢܘܫܬܐ ܕܩܘܪܚ ܒܬܘܩܦܐ

¹⁹ ܘܚܙܐ ܐܠܗܐ ܘܪܓܙ ܘܐܘܩܕ ܐܢܘܢ ܒܢܘܪܐ ܘܒܪܐ ܠܗܘܢ ܡܚܘܬܐ ܘܐܣܝܦ ܐܢܘܢ ܒܬܘܩܦܐ ܕܪܘܓܙܗ

²⁰ ܘܣܡ ܥܠ ܐܗܪܘܢ ܐܝܩܪܐ ܘܝܗܒ ܠܗ ܝܘܪܬܢܗ ܪ̈ܫܝܬܐ ܕܩܘܕܫܐ ܘܣܕܪ̈ܐ ܕܠܚܡܐ ܠܗ ܘܠܙܪܥܗ

²² ܒܠܚܘܕ ܒܐܪܥܗܘܢ ܠܐ ܝܪܬܘ ܝܘܪܬܢܐ ܘܠܐ ܦܠܓܘ ܦܠܓܘܬܐ ܥܡܗܘܢ ܡܛܠ ܕܡܪܝܐ ܡܢܬܗ ܘܝܪܬܘܬܗ ܒܝܬ ܐܝܣܪܝܠ

²³ ܘܐܦ ܦܝܢܚܣ ܒܪ ܐܠܝܥܙܪ ܒܓܢܒܪܘܬܗ ܢܣ̣ܒ ܠܗ ܬܠܬܐ ܐܝܩܪܝܢ ܒܛܢܢܐ ܕܛܢ ܒܡܕܝܢܝܬܐ ܘܒܒܪ ܐܝܣܪܝܠ ܘܕܩܡ ܒܬܘܪܥܬܐ ܕܥܡܐ ܘܒܥ̣ܐ ܥܠ ܐܝܣܪܝܠ

²⁴ ܡܛܘܠ ܗܢܐ ܒܡܘ̈ܡܬܐ ܝܡ̣ܐ ܠܗ ܐܠܗܐ ܕܢܒܢܐ ܠܗ ܡܕܒܚܐ ܘܬܗܘܐ ܠܗ ܘܠܙܪܥܗ ܟܗܢܘܬܐ ܪܒܬܐ ܠܥܠܡ

²⁵ ܘܐܦ ܕܘܝܕ ܒܪ ܐܝܫܝ ܝܘܪܬܢܐ ܕܡ̈ܠܟܐ ܒܠܚܘܕܘܗܝ ܝܪ̣ܬ ܘܝܘܪܬܢܐ ܕܐܗܪܘܢ ܠܗ ܘܠܙܪܥܗ

²⁶ ܡܟܝܠ ܒ̇ܪܟܘ ܠܐܠܗܐ ܕܝܗ̣ܒ ܠܟܘܢ ܚܟܡܬܐ ܕܠܒܐ ܠܡܕܢ ܠܥܡܗ ܒܫܡܗ ܡܛܠ ܕܠܐ ܢܬܛܥܐ ܛܘܒܗܘܢ ܘܫܘܠܛܢܗܘܢ ܠܟܠ ܕܪ̈ܐ ܕܥܠܡܐ