Sapientia 11

¹Direxit opera eorum in manibus prophetæ sancti.
²Iter fecerunt per deserta quæ non habitabantur,
et in locis desertis fixerunt casas.
³Steterunt contra hostes,
et de inimicis se vindicaverunt.
⁴Sitierunt, et invocaverunt te,
et data est illis aqua de petra altissima,
et requies sitis de lapide duro.
⁵Per quæ enim pœnas passi sunt inimici illorum
a defectione potus sui,
et in eis cum abundarent filii Israël lætati sunt :
⁶per hæc, cum illis deessent, bene cum illis actum est.
⁷Nam pro fonte quidem sempiterni fluminis,
humanum sanguinem dedisti injustis.
⁸Qui cum minuerentur in traductione infantium occisorum,
dedisti illis abundantem aquam insperate,
⁹ostendens per sitim quæ tunc fuit,
quemadmodum tuos exaltares,
et adversarios illorum necares.
¹⁰Cum enim tentati sunt,
et quidem cum misericordia disciplinam accipientes,
scierunt quemadmodum cum ira judicati impii tormenta paterentur.
¹¹Hos quidem tamquam pater monens probasti ;
illos autem tamquam durus rex interrogans condemnasti.
¹²Absentes enim, et præsentes, similiter torquebantur.
¹³Duplex enim illos acceperat tædium et gemitus,
cum memoria præteritorum.
¹⁴Cum enim audirent per sua tormenta bene secum agi,
commemorati sunt Dominum, admirantes in finem exitus.
¹⁵Quem enim in expositione prava projectum deriserunt,
in finem eventus mirati sunt,
non similiter justis sitientes.
¹⁶Pro cogitationibus autem insensatis iniquitatis illorum,
quod quidam errantes colebant mutos serpentes
et bestias supervacuas,
immisisti illis multitudinem mutorum animalium in vindictam ;
¹⁷ut scirent quia per quæ peccat quis, per hæc et torquetur.
¹⁸Non enim impossibilis erat omnipotens manus tua,
quæ creavit orbem terrarum ex materia invisa,
immittere illis multitudinem ursorum, aut audaces leones,
¹⁹aut novi generis ira plenas ignotas bestias,
aut vaporem ignium spirantes,
aut fumi odorem proferentes,
aut horrendas ab oculis scintillas emittentes ;
²⁰quarum non solum læsura poterat illos exterminare,
sed et aspectus per timorem occidere.
²¹Sed et sine his uno spiritu poterant occidi,
persecutionem passi ab ipsis factis suis,
et dispersi per spiritum virtutis tuæ :
sed omnia in mensura, et numero et pondere disposuisti.
²²Multum enim valere, tibi soli supererat semper :
et virtuti brachii tui quis resistet ?
²³Quoniam tamquam momentum stateræ,
sic est ante te orbis terrarum,
et tamquam gutta roris antelucani quæ descendit in terram.
²⁴Sed misereris omnium, quia omnia potes ;
et dissimulas peccata hominum, propter pœnitentiam.
²⁵Diligis enim omnia quæ sunt,
et nihil odisti eorum quæ fecisti ;
nec enim odiens aliquid constituisti aut fecisti.
²⁶Quomodo autem posset aliquid permanere, nisi tu voluisses ?
aut quod a te vocatum non esset conservaretur ?
²⁷Parcis autem omnibus, quoniam tua sunt, Domine,
qui amas animas.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati