Geremia ܐܪܡܝܐ 39

¹ ܒܫܢܬܐ ܕܬܫܥ ܕܨܕܩܝܐ ܡܠܟܐ ܕܝܗܘܕܐ ܒܝܪܚܐ ܕܥܣܪܐ ܐܬܐ ܢܒܘܟܕܢܨܪ ܡܠܟܐ ܕܒܒܠ ܗܘ ܘܟܠܗ ܚܝܠܗ ܥܠ ܐܘܪܫܠܡ ܘܫܪܘ ܥܠܝܗ̇

² ܘܒܫܢܬ ܚܕܥܣܪܐ ܕܡܠܟܐ ܨܕܩܝܐ ܒܝܪܚܐ ܚܡܝܫܝܐ ܒܬܫܥܬܐ ܒܗ ܒܝܪܚܐ ܐܬܬܪܥܬ ܩܪܝܬܐ

³ ܘܐܬܘ ܟܠܗܘܢ ܪ̈ܘܪܒܢܐ ܕܡܠܟܐ ܕܒܒܠ ܘܝܬܒܘ ܒܬܪܥܐ ܡܨܥܝܐ ܢܪܓܠ ܫܪܐܨܪ ܘܣܡܓܕܢܒܘ ܘܣܪܣܟܝܡ ܪܒ ܡܗܝ̈ܡܢܐ ܘܢܪܓܠ ܫܪܐܨܪ ܪܒܡܓ ܘܟܠܗܘܢ ܪ̈ܘܪܒܢܐ ܕܡܠܟܐ ܕܒܒܠ

⁴ ܘܟܕ ܚܙܐ ܐܢܘܢ ܨܕܩܝܐ ܡܠܟܐ ܕܝܗܘܕܐ ܘܟܠܗܘܢ ܓܒܪ̈ܐ ܩܪ̈ܒܬܢܐ ܥܪܩܘ ܘܢܦܩܘ ܡܢ ܩܪܝܬܐ ܒܠܠܝܐ ܒܐܘܪܚܐ ܕܓܢܬܐ ܕܡܠܟܐ ܒܬܪܥܐ ܕܒܝܬ ܫܘܪ̈ܐ ܘܢܦܩܘ ܒܐܘܪܚܐ ܕܦܩܥܬܐ

⁵ ܘܪܕܦܘ ܚܝܠܐ ܕܟ̈ܠܕܝܐ ܒܬܪܗܘܢ ܘܐܕܪܟܘܗܝ ܠܨܕܩܝܐ ܒܦܩܥܬܐ ܕܐܝܪܝܚܘ ܘܟܘܠܗ ܚܝܠܗ ܐܬܒܕܪ ܡܢܗ ܘܕܒܪܘܗܝ ܘܐܣܩܘܗܝ ܠܘܬ ܢܒܘܟܕܢܨܪ ܡܠܟܐ ܕܒܒܠ ܠܕܒܠܬ ܒܐܪܥܐ ܕܚܡܬ ܘܡܠܠ ܥܡܗ ܕܝܢܐ

⁶ ܘܢܟܣ ܡܠܟܐ ܕܒܒܠ ܠܒ̈ܢܘܗܝ ܕܨܕܩܝܐ ܒܕܒܠܬ ܠܥܢ̈ܘܗܝ ܘܠܟܠܗܘܢ ܚܐܪ̈ܐ ܕܝܗܘܕܐ ܢܟܣ ܡܠܟܐ ܕܒܒܠ

⁷ ܘܥܝܢ̈ܘܗܝ ܕܨܕܩܝܐ ܥܘܪ ܘܐܣܪܗ ܒܫܫ̈ܠܬܐ ܠܡܘܒܠܘܬܗ ܠܒܒܠ

⁸ ܘܠܒܝܬ ܡܠܟܐ ܘܠܒ̈ܬܐ ܕܥܡܐ ܐܘܩܕܘ ܟ̈ܠܕܝܐ ܒܢܘܪܐ ܘܠܫܘܪܐ ܕܐܘܪܫܠܡ ܟܕ ܚܕܪܐ ܥܩܪܘ

⁹ ܘܫܪܟܗ ܕܥܡܐ ܕܐܫܬܚܪܘ ܒܩܪܝܬܐ ܘܐܢܫܐ ܕܥܪܩܘ ܠܘܬܗ ܘܫܪܟܗ ܕܥܡܐ ܕܐܫܬܚܪܘ ܫܒܐ ܢܒܘܙܪܕܢ ܪܒ ܕܚ̈ܫܐ ܘܐܘܒܠ ܐܢܘܢ ܠܒܒܠ

¹⁰ ܘܡܢ ܥܡܐ ܡܣ̈ܟܢܐ ܕܠܝܬ ܠܗܘܢ ܡܕܡ ܫܒܩ ܢܒܘܙܪܕܢ ܪܒ ܕܚ̈ܫܐ ܒܐܪܥܐ ܕܝܗܘܕܐ ܘܝܗܒ ܠܗܘܢ ܟܪ̈ܡܐ ܘܦܘܠܚܢܐ ܒܝܘܡܐ ܗ̇ܘ

¹¹ ܘܦܩܕ ܢܒܘܟܕܢܨܪ ܡܠܟܐ ܕܒܒܠ ܥܠ ܐܪܡܝܐ ܠܢܒܘܙܪܕܢ ܪܒ ܕܚܫ̈ܐ ܘܐܡܪ ܠܗ

¹² ܕܒܪܝܗܝ ܠܐܪܡܝܐ ܘܥܝܢ̈ܝܟ ܢܗ̈ܘܝܢ ܥܠܘܗܝ ܘܠܐ ܬܥܒܕ ܠܗ ܡܕܡ ܕܒܝܫ ܘܟܘܠ ܡܕܡ ܕܐܡܪ ܠܟ ܥܒܕ ܠܗ

¹³ ܘܫܕܪ ܢܒܘܙܪܕܢ ܪܒ ܕܚܫ̈ܐ ܘܢܒܘܫܙܒܢ ܪܒ ܡܗ̈ܝܡܢܐ ܘܢܪܓܠ ܫܪܐܨܪ ܪܒܡܓ ܘܟܠܗܘܢ ܪ̈ܘܪܒܢܐ ܕܡܠܟܐ ܕܒܒܠ

¹⁴ ܫܕܪܘ ܕܒܪܘܗܝ ܠܐܪܡܝܐ ܡܢ ܕܪܬܐ ܕܒܝܬ ܐܣܝܪ̈ܐ ܘܐܫܠܡܘܗܝ ܠܓܕܠܝܐ ܒܪ ܐܚܝܩܡ ܒܪ ܫܦܢ ܠܡܦܩܘܬܗ ܠܒܝܬܗ ܘܝܬܒ ܒܓܘ ܥܡܐ

¹⁵ ܘܥܠ ܐܪܡܝܐ ܗܘܐ ܦܬܓܡܗ ܕܡܪܝܐ ܟܕ ܟܠܐ ܗܘܐ ܒܕܪܬ ܡܛܪܬܐ

¹⁶ ܙܠ ܘܐܡܪ ܠܥܒܕܡܠܟ ܟܘܫܝܐ ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܗܐ ܡܝܬܐ ܐܢܐ ܦܬ̈ܓܡܐ ܥܠ ܩܪܝܬܐ ܗܕܐ ܠܒܝܫܬܐ ܘܠܐ ܠܛܒܬܐ ܘܢܗܘܘܢ ܩܕܡܝܟ ܒܝܘܡܐ ܗ̇ܘ

¹⁷ ܘܐܦܨܝܟ ܒܝܘܡܐ ܗ̇ܘ ܐܡܪ ܡܪܝܐ ܘܠܐ ܬܫܬܠܡ ܒܐܝܕܐ ܕܓܒܪ̈ܐ ܕܕܚܠ ܐܢܬ ܡܢܗܘܢ

¹⁸ ܘܐܦܨܝܟ ܘܒܚܪܒܐ ܠܐ ܬܦܠ ܘܬܫܘܙܒ ܢܦܫܟ ܥܠ ܕܐܬܬܟܠܬ ܥܠܝ ܐܡܪ ܡܪܝܐ