Geremia ܐܪܡܝܐ 41

¹ ܘܒܝܪܚܐ ܕܫܒܥܐ ܐܬܐ ܐܝܫܡܥܝܠ ܒܪ ܢܬܢܝܐ ܒܪ ܐܝܫܡܥܝܠ ܡܢ ܙܪܥܐ ܕܡܠܟܘܬܐ ܘܪ̈ܘܪܒܢܝ ܡܠܟܐ ܘܥܣܪ̈ܝܢ ܓܒܪ̈ܝܢ ܥܡܗ ܠܘܬ ܓܕܠܝܐ ܒܪ ܐܚܝܩܡ ܠܡܨܦܝܐ ܘܐܟܠܘ ܬܡܢ ܠܚܡܐ ܐܟܚܕܐ ܒܡܨܦܝܐ

² ܘܩܡ ܐܝܫܡܥܝܠ ܒܪ ܢܬܢܝܐ ܗܘ ܘܥܣܪ̈ܝܢ ܓܒܪ̈ܝܢ ܕܐܬܘ ܥܡܗ ܘܡܚܐܘܗܝ ܠܓܕܠܝܐ ܒܪ ܐܚܝܩܡ ܒܪ ܫܦܢ ܒܚܪܒܐ ܘܩܛܠܘܗܝ ܗ̇ܘ ܕܐܫܠܛܗ ܡܠܟܐ ܕܒܒܠ ܒܐܪܥܐ

³ ܘܠܟܠܗܘܢ ܝܗ̈ܘܕܝܐ ܕܐܝܬ ܗܘܘ ܥܡܗ ܥܡ ܓܕܠܝܐ ܒܡܨܦܝܐ ܘܠܟ̈ܠܕܝܐ ܕܐܫܬܟܚܘ ܬܡܢ ܘܐܦ ܠܓܒܪ̈ܐ ܩܪ̈ܒܬܢܐ ܩܛܠ ܐܝܫܡܥܝܠ

⁴ ܘܐܢܫ ܠܐ ܫܡܥ ܘܒܝܘܡܐ ܕܬܪ̈ܝܢ ܡܢ ܒܬܪ ܕܐܬܩܛܠ ܓܕܠܝܐ

⁵ ܐܬܘ ܓܒܪ̈ܐ ܡܢ ܫܟܝܡ ܘܡܢ ܫܝܠܘ ܘܡܢ ܫܡܪܝܢ ܬܡܢܐܝܢ ܓܒܪ̈ܝܢ ܓܪ̈ܝܥܝܢ ܕܩܢ̈ܝܗܘܢ ܘܡܨܪܝܢ ܠܒܘܫ̈ܝܗܘܢ ܘܡܬܟܬܫܝܢ ܘܩܘܪ̈ܒܢܐ ܘܠܒܘܢܬܐ ܒܐ̈ܝܕܝܗܘܢ ܠܡܥܠܘ ܠܒܝܬܗ ܕܡܪܝܐ

⁶ ܘܢܦܩ ܐܝܫܡܥܝܠ ܒܪ ܢܬܢܝܐ ܠܐܘܪܥܗܘܢ ܡܢ ܡܨܦܝܐ ܡܗܠܟ ܘܐܙܠ ܘܒܟܐ ܘܟܕ ܦܓܥ ܒܗܘܢ ܐܡܪ ܠܗܘܢ ܬܘ ܠܘܬ ܓܕܠܝܐ ܒܪ ܐܚܝܩܡ

⁷ ܘܟܕ ܥܠܘ ܠܓܘ ܩܪܝܬܐ ܢܟܣ ܐܢܘܢ ܐܝܫܡܥܝܠ ܒܪ ܢܬܢܝܐ ܘܐܪܡܝ ܐܢܘܢ ܒܓܘܒܐ ܗܘ ܘܓܒܪ̈ܐ ܕܥܡܗ

⁸ ܘܥܣܪܐ ܓܒܪ̈ܝܢ ܐܫܬܟܚܘ ܒܗܘܢ ܘܐܡܪܝܢ ܠܐܝܫܡܥܝܠ ܠܐ ܬܩܛܠܢ ܡܛܠ ܕܐܝܬ ܠܢ ܚ̈ܕܘܬܐ ܒܚܩܠܐ ܕܚ̈ܛܐ ܘܕܣܥܪ̈ܐ ܘܡܫܚܐ ܘܕܒܫܐ ܘܫܒܩ ܐܢܘܢ ܘܠܐ ܩܛܠ ܐܢܘܢ ܥܡ ܐܚܝܗܘܢ

⁹ ܘܓܘܒܐ ܕܫܕܐ ܒܗ ܐܝܫܡܥܝܠ ܟܠܗܝܢ ܫ̈ܠܕܐ ܕܓܒܪ̈ܐ ܕܩܛܠ ܥܡ ܓܕܠܝܐ ܗ̇ܘ ܗܘ ܕܥܒܕ ܐܣܐ ܡܠܟܐ ܕܝܗܘܕܐ ܡܢ ܩܕܡ ܒܥܫܐ ܡܠܟܐ ܕܐܝܣܪܝܠ ܠܗ ܠܓܘܒܐ ܗ̇ܘ ܡܠܝܗܝ ܐܝܫܡܥܝܠ ܒܪ ܢܬܢܝܐ ܩ̈ܛܝܠܐ

¹⁰ ܘܫܒܐ ܐܝܫܡܥܝܠ ܟܠܗ ܫܪܟܐ ܕܥܡܐ ܕܒܡܨܦܝܐ ܕܐܫܠܡ ܢܒܘܙܪܕܢ ܪܒ ܕܚܫ̈ܐ ܠܓܕܠܝܐ ܒܪ ܐܚܝܩܡ ܘܫܒܐ ܐܢܘܢ ܐܝܫܡܥܝܠ ܒܪ ܢܬܢܝܐ ܘܐܙܠ ܠܥܒܪܐ ܕܒܢ̈ܝ ܥܡܘܢ

¹¹ ܘܫܡܥ ܝܘܚܢܢ ܒܪ ܩܘܪܚ ܘܟܘܠܗܘܢ ܪ̈ܒܝ ܚܝ̈ܠܐ ܕܥܡܗ ܥܠ ܟܠܗ̇ ܫܒܝܬܐ ܕܕܒܪ ܐܝܫܡܥܝܠ ܒܪ ܢܬܢܝܐ

¹² ܘܕܒܪ ܟܠܗܘܢ ܓܒܪܐ ܘܐܙܠ ܠܡܬܟܬܫܘ ܥܡ ܐܝܫܡܥܝܠ ܒܪ ܢܬܢܝܐ ܘܐܫܟܚܘܗܝ ܥܠ ܡ̈ܝܐ ܣ̈ܓܝܐܐ ܕܐܝܬ ܒܓܒܥܘܢ

¹³ ܘܟܕ ܚܙܐ ܟܠܗ ܥܡܐ ܕܥܡ ܐܝܫܡܥܝܠ ܠܝܘܚܢܢ ܒܪ ܩܘܪܚ ܘܠܟܠܗܘܢ ܪ̈ܒܝ ܚ̈ܝܠܐ ܕܥܡܗ ܚܕܝܘ

¹⁴ ܘܗܦܟܘ ܟܠܗ ܥܡܐ ܕܫܒܐ ܐܝܫܡܥܝܠ ܡܢ ܡܨܦܝܐ ܘܐܬܘ ܠܘܬ ܝܘܚܢܢ ܒܪ ܩܘܪܚ

¹⁵ ܘܐܝܫܡܥܝܠ ܒܪ ܢܬܢܝܐ ܐܫܬܘܙܒ ܒܬܡܢܝܐ ܐ̈ܢܫܝܢ ܡܢ ܩܕܡ ܝܘܚܢܢ ܘܐܙܠ ܠܘܬ ܒܢ̈ܝ ܥܡܘܢ

¹⁶ ܘܕܒܪ ܝܘܚܢܢ ܒܪ ܩܘܪܚ ܘܟܠܗܘܢ ܪ̈ܒܝ ܚ̈ܝܠܐ ܕܥܡܗ ܟܠ ܫܪܟܐ ܕܥܡܐ ܕܐܗܦܟ ܡܢ ܠܘܬ ܐܝܫܡܥܝܠ ܒܪ ܢܬܢܝܐ ܡܢ ܡܨܦܝܐ ܡܢ ܒܬܪ ܕܩܛܠ ܐܝܫܡܥܝܠ ܠܓܕܠܝܐ ܒܪ ܐܚܝܩܡ ܘܕܒܪ ܓܒܪ̈ܐ ܩܪ̈ܒܬܢܐ ܘܢܫ̈ܐ ܘ̈ܛܠܝܐ ܘܡܗܝ̈ܡܢܐ ܕܐܗܦܟ ܡܢ ܓܒܥܘܢ

¹⁷ ܘܐܙܠ ܘܝܬܒ ܒܐܕܪ̈ܐ ܕܒܡܗܡ ܕܥܠ ܓܢܒ ܒܝܬ ܠܚܡ ܠܡܐܙܠ ܠܡܥܠ ܠܡܨܪܝܢ

¹⁸ ܡܢ ܩܕܡ ܟ̈ܠܕܝܐ ܕܕܚܠܘ ܡܢܗܘܢ ܥܠ ܕܩܛܠ ܐܝܫܡܥܝܠ ܒܪ ܢܬܢܝܐ ܠܓܕܠܝܐ ܒܪ ܐܚܝܩܡ ܗ̇ܘ ܕܐܫܠܛܗ ܡܠܟܐ ܕܒܒܠ ܒܐܪܥܐ ܕܝܗܘܕܐ