| 1 ܘܐܡ̣ܪ ܠܗ̇ ܐܠܦܪܢܐ. ܬܪܣܝ ܐܢܬܬܐ ܠܐ ܬܕܚܠܝܢ ܒܠܒܟܝ. ܡܛܠ ܕܠܐ ܐܒܐ̇ܫܬ ܠܟܠܢܫ̇. ܕܨ̇ܒܐ ܕܢܦܠܘܚ̇ ܠܢܒܘ ܟܕܢܨܪ ܡ̇ܠܟܐ ܕܟܠܗ̇ ܐܪܥܐ | |
| 2 ܘܐܦ ܗܫܐ ܥܡܟܝ ܐܝܠܝܢ ܕܥܡ̇ܪܝܢ ܒܛܘ̣ܪܐ̣. ܐܠܘ ܠܐ ܐܣܠܝܘܢܝ̣. ܠܐ ܡܪܝܡ ܗܘ̣̇ܝܬ ܥܠܝܗܘܢ ܢܝܙܟܐ. ܐܠܐ ܗܢܘܢ ܥܒܕܘ ܠܢܦܫܗܘܢ ܗܠܝܢ | |
| 3 ܡܟܝܠ ܐܡ̣ܪ ܠܝ ܠܡܢܐ ܥܪܩܬܝ ܡܢܗܘܢ ܘܐܬܝܬܝ ܠܘܬܢ. ܐܬܝܬ ܓܝܪ̣ ܠܚ̈ܝܐ. ܬܪܣܝ ܡܢ ܗܢܐ ܠܠܝܐ ܘܠܗܠ ܬܚܝܢ | |
| 4 ܡܛܠ ܕܠܝܬ ܕܡܗܪ ܠܟܝ. ܘܐ̇ܥܒܕ ܠܟܝ̣. ܐܝܟ ܕܡܬܥܒܕ ܠܥܒ̣̈ܕܘܗܝ ܕܡܪܝ | |
| 5 ܘܐܡ̣ܪܬ ܠܗ ܝܗܘܕܝܬ. ܫܡ̣ܥ ܡ̈ܠܝܗ̇ ܕܐܡܬܟ. ܘܬܡܠܠ ܐܡܬܟ ܩܕܡܝܟ. ܘܠܐ ܐܡܠܠ ܕܓ̈ܠܬܐ ܩܕܡܝܟ ܒܠܠܝܐ ܗܢܐ | |
| 6 ܘܐܢ ܬܫܡ̣ܥ ܦܬܓ̈ܡܝ̣ ܢܫ̣ܬܠܡ ܟܠܡܕܡ ܒܐܝ̈ܕܝܟ. ܟܘܠ ܕܢ̇ܥܒܕ ܥܡܟ ܐܠܗܐ. ܘܠܐ ܢ̇ܦܠ ܡܪܝ ܡܢ ܨܢܥ̈ܬܗ ܟܡܐ ܕܚܝ | |
| 7 ܡܛܠ ܕܚܝ ܗܘ ܢܒܘܟܕܢܨ̇ܪ ܡ̇ܠܟܐ ܕܟܘܠܗ̇ ܐܪܥܐ. ܕܠܐ ܒܠܚܘܕ ܒܢܝܢ̈ܫܐ ܢܦܠܚܘܢܗ ܡܛܠܬܟ̣. ܐܠܐ ܐܦ ܚܝܘܬܐ ܘܒܥܝܪܐ ܘܦܪܚܬܐ ܕܫܡܝܐ. ܢܕܥܘܢܝܗܝ ܠܢܒܘܟܕܢܨ̇ܪ ܒܚܝܠܟ | |
| 8 ܫܡܥܢ ܚܟܡܬܟ ܘܨܢܥܬܗ ܕܠܒܟ. ܘܐܬܐܡܪ ܒܟܠܗ̇ ܐܪܥܐ̣. ܕܐܢܬ ܒܠܚܘܕܝܟ ܛܒ ܒܟܠܗ̇ ܡܠܟܘܬܐ. ܘܬܡܝܗ ܒܝܕܥܬܐ. ܘܚܝܠܬܢ ܒܩܪܒܐ | |
| 9 ܘܗܫܐ ܡ̣ܪ̣ܝ. ܡܠܬܐ ܕܐܡ̣ܪ ܐܚܝܘܕ ܒܟܢܫܐ ܩܕܡܝܟ. ܫܡܥܢ ܡܠܘܗܝ̣. ܡܛܘܠ ܕܩܒܠܘܗܝ ܒ̈ܢܝ ܡܕܝܢܬܐ. ܘܐܫܬܥܝ ܠܗܘܢ ܟܠܗܘܢ ܦܬܓ̈ܡܐ ܕܐܡ̣ܪ ܩܕܡܝܟ | |
| 10 ܡܛܠ ܗܢܐ ܡܪܝ ܠܐ ܬܥܒܪ ܥܠ ܡܠܬܗ. ܐܠܐ ܣܝܡܝܗ̇ ܒܠܒܟ̣. ܡܛܠ ܕܫܪܝܪ ܗ̣ܘ. ܡܛܠ ܕܠܐ ܡܬ̣ܬܒܥ ܥܡܢ. ܘܐܦܠܐ ܫܠܛܐ ܒܗܘܢ ܚܪܒܐ. ܐܠܐ ܐܢ ܚܛܘ ܩܕܡ ܐܠܗܗܘܢ | |
| 11 ܘܡܟܝܠ ܕܠܐ ܢܗܘܐ ܡܪܝ ܕܠܐ ܣܘܥܪܢ. ܢ̇ܦܠ ܡܘܬܐ̣. ܩܕܡܝܗܘ̇ܢ. ܘܐܕܪܟ ܐܢܘܢ ܚܛܐ ܪܒܐ. ܕܒܗ ܡܪܓܙܝܢ ܠܐܠܗܗܘܢ ܟܕ ܢܥܒܕܘܢܗ̇ | |
| 12 ܡܛܠ ܕܚ̣ܣܪ ܠܗܘܢ ܬܘܪܣܝܐ. ܘܐܬܛܠ̇ܩܘ ܠܗܘܢ ܡܝܝ̈ܗܘܢ. ܐܬܚܫܒܘ ܠܡܫܠܛ ܒܒܥܝܪܗܘܢ. ܘܟܠ ܕ̣ܦܪܫ ܠܗܘܢ ܐܠܗܗܘܢ ܒܢܡܘ̈ܣܘܗܝ ܕܠܐ ܢܐܟܠܘܢ | |
| 13 ܘܐܬܪܥܝܘ ܠܡܐܟܠ ܪ̈ܫܝܬܐ ܕܥܒܘܪܐ ܘܕܚ̣ܡܪܐ ܘܕܡܫܚܐ. ܕܢܛܪܘ ܟܠܗܘܢ̇ ܠܡܩܕܫܘ ܠܟܗ̈ܢܐ ܕܩܝܡܝܢ ܩܕܡ ܐܠܗܐ ܒܐܘܪܫܠܡ. ܘܐܨܛܒܝܘ ܠܡܐܟܠ̣. ܡܢ ܗ̈ܢܘܢ ܕܐܦ ܠܐ ܒܐܝܕ̈ܝܗܘܢ ܫܠܝܛ ܠܐܢܫ ܡܢ ܒܢ̈ܝ ܥܡܐ ܠܡܩܪܒ | |
| 14 ܘܫ̣ܕܪܘ ܐܦ ܠܐܘܪܫܠܡ. ܡܛܠ ܕܐܦ ܥܡܘܪ̈ܐ ܕܬܡܢ ܥܒܕܘ ܐܝܟ ܟܠܗܝܢ ܗܠܝܢ̇. ܠܐܝܠܝܢ ܕܐܘܒܠܘ ܠܗܘܢ ܦܬܓܡܐ ܠܘܬ ܣ̈ܒܐ | |
| 15 ܘܢܗܘܐ ܕܟܕ ܢܫܠܚܘܢ ܠܗܘܢ ܘܢܥܒܕܘܢ ܗܕܐ̣. ܢܫܬܠܡܘܢ ܠܟ ܒܝܘܡܐ ܗ̇ܘ. ܘܬܘܒܕ ܐܢܘܢ | |
| 16 ܡܛܠ ܗܢܐ ܐܦ ܐܢܐ ܐܡܬܟ̣. ܟܕ ܚ̇ܙܝܬ ܗܠܝ̣ܢ. ܥ̇ܪܩܬ ܡܢܗܘܢ. ܘܫܕܪܢܝ ܐܠܗܐ ܠܡܥܒܕ ܥܡܟ ܨܒܘܬܐ̣. ܕܬܬܡܗ ܒܗ̇ ܟܠܗ̇ ܐܪܥܐ. ܐܝܠܝܢ ܕܢܫܡܥܘܢ | |
| 17 ܡܛܠ ܕܕܚܠܬ ܐܠܗܐ ܗ̣ܝ ܐܡܬܟ. ܘ̇ܦܠܚܬ ܒܐܝ̇ܡܡܐ ܘܒܠܠܝܐ ܩܕܡ ܐܠܗܐ. ܕܫܡܝܐ. ܘܡܟܝܠ ܐܟܬܪ ܠܘܬܟ ܡܪܝ. ܘܬܗܘܐ ܢܦ̇ܩܐ ܐܡܬܟ ܒܠܠܝܐ ܠܢܚܠܐ̣. ܘܐܨ̇ܠܐ ܠܐܠܗܐ̣. ܘܢܚܘܝܢܝ ܐܡܬܝ ܡܬܥܒܕܝܢ ܚܛܗ̈ܝܗܘܢ | |
| 18 ܘܐܬ̇ܐ ܘܐܘܕܥܝܘܗܝ ܠܟ. ܘܬܦܘܩ ܒܚܝܠܟ. ܘܠܐ ܢܗܘܐ ܐܢܫ ܡܢܗܘܢ ܕܩܐ̇ܡ ܠܩܘܒܠܟ | |
| 19 ܘܐ̇ܥܒܪܟ ܒܓܘ ܝܗܘܕ. ܥܕܡܐ ܕܬܡܛܐ ܠܐܘܪܫܠܡ. ܘܐܣ̇ܝܡ ܟܘܪܣܝܟ ܒܡܨܥܬܗ̇. ܘܬ̣ܕܒܪ ܐܢܘܢ ܐܝܟ ܥܢܐ ܕܠܝܬ ܠܗ̇ ܪ̈ܥܝܐ̇. ܘܠܐ ܢܒ̇ܚ ܟܠܒܐ ܒܠܫܢܗ ܩܕܡܝܟ. ܡܛܠ ܕܗܠܝܢ ܐܬܓܠܝ ܒܡܕܥܝ. ܘܐ̇ܫܬܕܪܬ ܕܐܡ̇ܪ ܠܟ | |
| 20 ܘܫܦ̣ܪܘ ܦܬܓܡ̈ܝܗ̇ ܩܕܡ ܐܠܦܪܢܐ̇. ܘܩܕܡ ܥܒ̈ܕܘܗܝ ܟܘܠܗܘܢ ܘܐܬܕܡܪܘ ܒܫܘܦܪܗ̇ ܘܒܚܟܡܬܗ̇. ܘܐܡܪܘ ܠܗ̇ | |
| 21 ܕܠܝܬ ܐܢܬܬܐ ܐܝܟ ܗܕܐ ܡܢ ܣܘ̈ܦܝܗ̇ ܠܣܘ̈ܦܝܗ̇ ܕܐܪܥܐ. ܒܫܘܦܪܐ ܕܐܦ̈ܐ ܘܒܡ̈ܠܐ ܕܣܘܟܠܐ. | |
| 22 ܘܐܡ̣ܪ ܠܗ̇ ܐܠܦܪܢܐ. ܫܦ̣ܝܪ ܥ̣ܒܕ ܐܠܗܐ ܕܫܕܪܟܝ ܩܕܡ ܒ̈ܢܝ ܥܡܟܝ. ܕܢܗܘܐ ܒܢ ܥܘܗܕܢܐ. ܘܒܐܝܠܝܢ ܕܐܣܠܝܘ ܠܡܪܝ̣ ܐܒܕܢܐ ܢܗܘܐ | |
| 23 ܘܗܫܐ. ܐܢܬܝ ܫܦܝܪܐ ܐܢܬܝ ܒܚܙܘܟܝ̣. ܘ̇ܛܒܐ ܐܢܬܝ ܒܡܕܥܟܝ ܘܒܦܬ̈ܓܡܝܟܝ. ܘܐܢ ܬܥܒܕܝܢ ܐܝܟ ܕܐܡܪܬܝ̣. ܐܠܗܟܝ ܢܗܘܐ ܐܠܗܝ. ܘܐܢܬܝ ܒܒܝܬܗ ܕܡ̇ܠܟܐ ܬܬܒܝܢ. ܘܬܗܘܝܢ ܡܝܬܪܐ ܒܫܡܐ ܛܒ ܡܢ ܟܘܠܗ̇ ܐܪܥܐ | |
