Neemia ܢܚܡܝܐ 9

¹ ܘܒܝܘܡܐ ܕܐܪܒܥܐ ܘܥܣܪܝܢ ܒܗ ܒܝܪܚܐ ܗܢܐ ܐܬܟܢܫܘ ܒܢ̈ܝ ܐܝܣܪܝܠ ܒܨܘܡܐ ܘܒܣ̈ܩܐ ܘܐܪܡܝܘ ܩܛܡܐ ܥܠܝܗܘܢ

² ܘܐܬܦܪܫ ܙܪܥܐ ܕܐܝܣܪܝܠ ܡܢ ܟܘܠܗܘܢ ܥܡ̈ܡܐ ܘܩܡܘ ܘܐܘܕܝܘ ܥܠ ܚܛܗܝ̈ܗܘܢ ܘܥܠ ܚܛܗ̈ܐ ܕܐܒܗܝ̈ܗܘܢ

³ ܘܩܡܘ ܥܠ ܕܘܟܬܗܘܢ ܘܩ̇ܪܝܢ ܗܘܘ ܒܟܬܒܐ ܕܢܡܘܣܐ ܕܡܪܝܐ ܐܠܗܗܘܢ ܪܘܒܥܗ ܕܝܘܡܐ ܩܪܝܢ ܘܪܘܒܥܗ ܕܝܘܡܐ ܡܘܕܝܢ ܘܣ̇ܓܕܝܢ ܩܕܡ ܡܪܝܐ ܐܠܗܗܘܢ

⁴ ܘܩܡܘ ܪܫܐ ܥܠ ܠܘܝ̈ܐ ܝܫܘܥ ܘܩܕܡܐܝܠ ܒܢ̈ܝ ܚܫܒܝܐ ܘܫܪܒܝܐ ܒܢ̈ܝ ܟܒܢܝ ܘܨ̇ܠܝܘ ܩܕܡ ܡܪܝܐ ܐܠܗܗܘܢ ܒܩܠܐ ܪܡܐ

⁵ ܘܐܡܪܝܢ ܠܘܝ̈ܐ ܝܫܘܥ ܘܩܕܡܐܝܠ ܒܢ̈ܝ ܚܫܒܝܐ ܘܫܪܒܝܐ ܘܗܘܕܝܐ ܘܫܟܢܝܐ ܘܦܬܚܝܐ ܩܡܘ ܘܒ̇ܪܟܘ ܠܡܪܝܐ ܐܠܗܗܘܢ ܡܢ ܥܠܡ ܘܥܕܡܐ ܠܥܠܡ ܘܒܪܝܟ ܫܡܐ ܕܐܝܩܪܗ ܘܡܪܡܪܡ ܥܠ ܟܘܠ ܒܪ̈ܝܬܐ ܘܬܫܒ̈ܚܬܐ

⁶ ܐܢܬ ܗܘ ܡܪܝܐ ܒܠܚܘܕܝܟ ܐܢܬ ܥܒܕ̣ܬ ܫܡܝܐ ܘܫܡܝ̈ ܫܡܝܐ ܘܟܠ ܚܝܠܘ̈ܬܗܘܢ ܘܐܪܥܐ ܘܟܘܠ ܡܕܡ ܕܐܝܬ ܥܠܝܗ̇ ܘܡܝ̈ܐ ܘܟܠ ܡܕܡ ܕܐܝܬ ܒܗܘܢ ܘܐܢܬ ܗܘ ܕܡܚܐ ܠܟܠܗܘܢ ܘܚܝ̈ܠܘܬܐ ܕܫܡܝܐ ܠܟ ܗܘ ܣ̇ܓܕܝܢ

⁷ ܐܢܬ ܗܘ ܡܪܝܐ ܐܠܗܐ ܕܓܒܝ̣ܬ ܠܐܒܪܡ ܘܐܦܩܬܝܗܝ ܡܢ ܐܘܪ ܕܟܠܕܝ̈ܐ ܘܫܚܠܦ̣ܬ ܫܡܗ ܐܒܪܗܡ

⁸ ܘܐܫܟܚ̣ܬ ܠܒܗ ܕܟܐ ܩܕܡܝܟ ܘܝܡܝ̣ܬ ܠܗ ܡܘܡ̈ܬܐ ܠܡܬܠ ܠܗ ܐܪܥܐ ܕܟܢܥܢܝ̈ܐ ܘܕܚ̈ܬܝܐ ܘܕܐܡܘܪ̈ܝܐ ܘܕܦܪ̈ܙܝܐ ܘܕܚܘܝ̈ܐ ܘܕܝܒܘܣܝ̈ܐ ܘܕܓܪ̈ܓܘܣܝܐ ܠܡܬܠ ܠܙܪܥܗ ܘܐܫܪܬ ܡ̈ܠܝܟ ܥܡܗ ܡܛܠ ܕܙܕܝܩ ܐܢܬ

⁹ ܘܚܙܝ̣ܬ ܫܘܥܒܕܐ ܕܐܒ̈ܗܝܢ ܕܒܡܨܪܝܢ ܘܫܡܥ̣ܬ ܝܠܠܬܗܘܢ ܥܠ ܝܡܐ ܕܣܘܦ

¹⁰ ܘܥܒܕ̣ܬ ܐܬܘ̈ܬܐ ܘܬܕܡܪ̈ܬܐ ܒܦܪܥܘܢ ܘܒܟܠܗ ܚܝܠܗ ܘܒܟܠܗ ܥܡܐ ܕܐܪܥܗ ܡܛܠ ܕܝܕܥ̣ܬ ܕܐܥܠܝܘ ܒܗܘܢ ܒܥܡܟ ܘܥܒܕ̣ܬ ܠܟ ܫܡܐ ܐܝܟ ܕܝܘܡܢܐ

¹¹ ܘܝܡܐ ܬܪܥ̣ܬ ܩܕܡܝܗܘܢ ܘܥܒܪܘ ܒܓܘ ܝܡܐ ܒܝܒܫܐ ܘܠܪ̈ܕܘܦܝܗܘܢ ܛܒܥ̣ܬ ܒܥܘܡ̈ܩܘܗܝ ܕܝܡܐ ܐܝܟ ܕܛܒܥܐ ܟܐܦܐ ܒܡܝ̈ܐ ܥܫܝ̈ܢܐ

¹² ܘܒܥܡܘܕܐ ܕܥܢܢܐ ܕܒܪ̣ܬ ܐܢܘܢ ܒܐܝܡܡܐ ܘܒܐܣܛܘܢܐ ܕܢܘܪܐ ܒܠܠܝܐ ܠܡܢܗܪܘ ܠܗܘܢ ܐܘܪܚܐ ܠܡܗܠܟܘ ܒܗ̇

¹³ ܘܥܠ ܛܘܪܐ ܕܣܝܢܝ ܢܚܬ̣ܬ ܘܡܠܠ̣ܬ ܥܡܗܘܢ ܡܢ ܫܡܝܐ ܘܝܗܒ̣ܬ ܠܗܘܢ ܕܝ̣̈ܢܐ ܬܪ̈ܝܨܐ ܘܢܡ̈ܘܣܐ ܕܫܪܪܐ ܘܩܝ̈ܡܐ ܘܦܘܩ̈ܕܢܐ ܕܛܒܝܢ

¹⁴ ܘܫܒܬܐ ܕܩܘܕܫܟ ܐܘܕܥ̣ܬ ܐܢܘܢ ܘܦܘܩ̈ܕܢܐ ܘܩܝ̈ܡܐ ܘܢܡ̈ܘܣܐ ܕܦܩܕ̣ܬ ܐܢܘܢ ܒܐܝܕܐ ܕܡܘܫܐ ܥܒ̣ܕܟ

¹⁵ ܠܚܡܐ ܡܢ ܫܡܝܐ ܝܗܒ̣ܬ ܠܗܘܢ ܠܟܦܢܗܘܢ ܘܡܝ̈ܐ ܡܢ ܟܐܦܐ ܝܗܒ̣ܬ ܠܗܘܢ ܠܨܗܝܗܘܢ ܘܐܡܪ̣ܬ ܠܗܘܢ ܠܡܥܠ ܘܠܡܐܪܬ ܐܪܥܐ ܕܐܬܩܢܬ ܐܝܕܟ ܠܡܬܠ ܠܗܘܢ

¹⁶ ܗ̣ܢܘܢ ܕܝܢ ܘܐܒܗܝ̈ܗܘܢ ܐܥܠܝܘ ܘܩܫܝܘ ܩܕܠܗܘܢ ܘܠܐ ܫ̣ܡܥܘ ܠܦܘܩ̈ܕܢܝܟ

¹⁷ ܘܠܐ ܨܒܘ ܠܡܫܡܥ ܘܠܐ ܐܬܕܟܪܘ ܬܕܡܪ̈ܬܟ ܕܥܒܕ̣ܬ ܠܗܘܢ ܘܗ̣ܦܟ ܠܒܗܘܢ ܠܥܒ̇ܕܝ̈ܗܘܢ ܒܝ̈ܫܐ ܘܐܢܬ ܐܠܗܐ ܫܒܘܩܐ ܘܪܚܡܬܢܐ ܘܚܢܢܐ ܪܚܝܩ ܪܘܓܙܐ ܘܩܪܝܒ ܒܥܘܬܐ ܠܐ ܫܒܩ̣ܬ ܐܢܘܢ

¹⁸ ܡܛܠ ܕܗܢܘܢ ܥ̣ܒܕܘ ܥܓܠܐ ܕܢܣܟܬܐ ܘܐܡܪܝܢ ܗܢܘ ܐܠܗܟ ܐܝܣܪܝܠ ܕܐܣܩܟ ܡܢ ܐܪܥܐ ܕܡܨܪܝܢ ܘܥ̣ܒܕܘ ܒܝ̈ܫܬܐ ܪ̈ܘܪܒܬܐ

¹⁹ ܘܐܢܬ ܒܪ̈ܚܡܝܟ ܣܓܝ̈ܐܐ ܠܐ ܫܒܩ̣ܬ ܐܢܘܢ ܒܡܕܒܪܐ ܘܥܡܘܕܐ ܕܥܢܢܐ ܠܐ ܥ̣ܒܪ ܡܢܗܘܢ ܒܐܝܡܡܐ ܠܡܕܒܪܘ ܐܢܘܢ ܒܐܘܪܚܐ ܘܐܣܛܘܢܐ ܕܢܘܪܐ ܒܠܠܝܐ ܠܡܢܗܪܘ ܠܗܘܢ ܐܘܪܚܐ ܕܢܐܙܠܘܢ ܒܗ̇

²⁰ ܘܪܘܚܟ ܛܒܬܐ ܝܗܒ̣ܬ ܠܡܠܦܘ ܐܢܘܢ ܘܡܢܢܐ ܠܐ ܟܠܝ̣ܬ ܡܢ ܦܘܡܗܘܢ ܘܡܝ̈ܐ ܝܗܒ̣ܬ ܠܗܘܢ ܠܨܗܝܗܘܢ

²¹ ܘܐܪܒܥܝܢ ܫܢ̈ܝܢ ܡܕܡ ܠܐ ܚܣܪ̣ܬ ܠܗܘܢ ܒܡܕܒܪܐ ܢܚܬܝ̈ܗܘܢ ܠܐ ܒܠܝܘ ܘܡܣܢܝ̈ܗܘܢ ܠܐ ܐܬܒܙܥܘ

²² ܘܝܗܒ̣ܬ ܠܗܘܢ ܡܠܟܘ̈ܬܐ ܕܥܡܡ̈ܐ ܘܦܠܓ̣ܬ ܠܗܘܢ ܠܪܝܫ ܐܢܫ ܘܝܪܬܘ ܐܪܥܐ ܕܣܝܚܘܢ ܐܪܥܐ ܕܡ̇ܠܟܐ ܕܚܫܒܘܢ ܘܐܪܥܐ ܕܥ̣ܘܓ ܡܠܟܐ ܕܒܝܫܘܢ

²³ ܘܒܢܝ̈ܗܘܢ ܐܣܓܝ̣ܬ ܐܝܟ ܟܘܟܒ̈ܐ ܕܒܫܡܝܐ ܘܐܥܠ̣ܬ ܐܢܘܢ ܠܐܪܥܐ ܕܐܡ̣ܪܬ ܠܐܒܗܝ̈ܗܘܢ ܠܡܥܠ ܠܗ̇ ܠܡܐܪܬܗ̇

²⁴ ܘܥܠܘ ܒܢܝ̈ܐ ܘܝܪܬܘ ܐܪܥܐ ܘܬܒܪ̣ܬ ܩܕܡܝܗܘܢ ܥܡܘܪ̈ܝܗ̇ ܕܐܪܥܐ ܕܟܢܥܢܝ̈ܐ ܘܐܫܠܡ̣ܬ ܐܢܘܢ ܒܐܝܕܝ̈ܗܘܢ ܠܗܘܢ ܘܠܡ̈ܠܟܝܗܘܢ ܘܠܥܡ̈ܡܐ ܕܐܪܥܐ ܠܡܥܒܕ ܒܗܘܢ ܐܝܟ ܨܒܝܢܗܘܢ

²⁵ ܘܐܚܕܘ ܩܘܪ̈ܝܐ ܬܩܝ̈ܦܬܐ ܘܐܪܥܐ ܫܡܝܢܬܐ ܘܝܪܬܘ ܒ̈ܬܐ ܕܡ̣ܠܝܢ ܟܘܠܗܝܢ ܛܒ̈ܬܐ ܘܓܘ̈ܒܐ ܚܦܝܪ̈ܐ ܘܟܪ̈ܡܐ ܘܙܝ̈ܬܐ ܘܐܝ̈ܠܢܐ ܕܡܐܟ̈ܠܬܐ ܣܓܝ̈ܐܬܐ ܘܐ̣ܟܠܘ ܘܣ̣ܒܥܘ ܘܫ̣ܡܢܘ ܘܐܬܦܢܩܘ ܒܛܘܒܟ ܪܒܐ

²⁶ ܘܗ̣ܦܟܘ ܘܕܓܠܘ ܒܟ ܘܫܕܐܘܗܝ ܠܢܡܘܣܟ ܠܒܪ ܡܢ ܬܪ̈ܥܝܬܗܘܢ ܘܠܢܒ̈ܝܝܟ ܩ̇ܛܠܘ ܥܠ ܕܐܡܪܘ ܠܗܘܢ ܠܡܗܦܟ ܠܘܬܟ ܘܥ̣ܒܕܘ ܒܝ̈ܫܬܐ ܪ̈ܘܪܒܬܐ

²⁷ ܘܐܫܠܡ̣ܬ ܐܢܘܢ ܒܐܝܕ ܒܥܠܕܒܒܝ̈ܗܘܢ ܘܐܥܝܩܘ ܠܗܘܢ ܘܒܥܕܢܐ ܕܐܘܠܨܢܐ ܒܥܘ ܡܢܟ ܘܫܡܥ̣ܬ ܐܢܘܢ ܡܢ ܫܡܝܐ ܐܝܟ ܪ̈ܚܡܝܟ ܣܓܝ̈ܐܐ ܘܐܩܝܡ̣ܬ ܠܗܘܢ ܦܪ̈ܘܩܐ ܘܦܪܩܘ ܐܢܘܢ ܡܢ ܐܝܕܐ ܕܐܠܘܨܝ̈ܗܘܢ

²⁸ ܘܟܕ ܐܪܘܚ̣ܬ ܠܗܘܢ ܗ̣ܦܟܘ ܠܡܥܒܕ ܕܣ̣ܢܐ ܩܕܡܝܟ ܘܫܒܩ̣ܬ ܐܢܘܢ ܒܐܝܕ ܒܥܠܕܒܒܝ̈ܗܘܢ ܘܫܥܒܕܘ ܐܢܘܢ ܘܗ̣ܦܟܘ ܘܨ̇ܠܝܘ ܩܕܡܝܟ ܘܐܢܬ ܡܢ ܫܡܝܐ ܫܡܥ̣ܬ ܘܦܪܩ̣ܬ ܐܢܘܢ ܒܟܠ ܙܒܢ ܐܝܟ ܣܘܓܐܬ ܪ̈ܚܡܝܟ

²⁹ ܘܐܣܗ̣ܕܬ ܒܗܘܢ ܠܡܗܦܟܘ ܐܢܘܢ ܠܢܡܘܣܝ̈ܟ ܘܗܢܘܢ ܐܥܠܝܘ ܘܠܐ ܫ̣ܡܥܘ ܠܦܘܩ̈ܕܢܝܟ ܘܒܕܝ̣̈ܢܝܟ ܚܛܘ ܒܗܘܢ ܕܐܢ ܥܒ̇ܕ ܠܗܘܢ ܒܪܢܫܐ ܚ̇ܝܐ ܒܗܘܢ ܘܥ̣ܒܕܘ ܠܗܘܢ ܟܬܦܐ ܡܪܘܕܬܐ ܘܩܕܠܗܘܢ ܩܫܝܘ ܘܠܐ ܫ̣ܡܥܘ

³⁰ ܘܐܟܪܙ̣ܬ ܥܠܝܗܘܢ ܫܢܝ̈ܐ ܣܓܝ̈ܐܬܐ ܘܐܣܗ̣ܕܬ ܒܗܘܢ ܒܪܘܚܟ ܒܐܝܕܐ ܕܢܒܝ̈ܝܟ ܘܠܐ ܫ̣ܡܥܘ ܘܐܫܠܡ̣ܬ ܐܢܘܢ ܒܐܝܕܐ ܕܥܡ̈ܡܐ ܕܡܕܝ̈ܢܬܐ

³¹ ܘܡܛܠ ܪ̈ܚܡܝܟ ܣܓܝ̈ܐܐ ܠܐ ܐܘܒ̣ܕܬ ܐܢܘܢ ܘܠܐ ܫܒܩ̣ܬ ܐܢܘܢ ܡܛܘܠ ܕܐܠܗܐ ܐܢܬ ܚܢܢܐ ܘܪܚܡܬܢܐ

³² ܡܟܝܠ ܐܠܗܢ ܐܠܗܐ ܪܒܐ ܘܓܢܒܪܐ ܘܕܚܝܠܐ ܢ̇ܛܪ ܡܘܡ̈ܬܐ ܘܫܪܪܐ ܠܐ ܢܬܟܣܐ ܡܢ ܩܕܡܝܟ ܟܠܗ ܐܘܠܨܢܐ ܕܐܬܐ ܥܠܝܢ ܘܥܠ ܡ̈ܠܟܝܢ ܘܥܠ ܪ̈ܘܪܒܢܝܢ ܘܥܠ ܟܘܡܪ̈ܝܢ ܘܥܠ ܢܒܝ̈ܝܢ ܘܥܠ ܐܒܗ̈ܝܢ ܘܥܠ ܟܘܠܗ ܥܡܐ ܡܢ ܝܘܡ̈ܘܗܝ ܕܡܠܟܐ ܕܐܬܘܪ ܘܥܕܡܐ ܠܝܘܡܢܐ

³³ ܘܐܢܬ ܙܕܝܩ ܥܠ ܟܠܡܕܡ ܕܐ̣ܬܐ ܥܠܝܢ ܡܛܠ ܕܒܩܘܫܬܐ ܐܢܬ ܓܝܪ ܘܚܢܢ ܐܥܠܝܢܢ

³⁴ ܘܡ̈ܠܟܝܢ ܘܪ̈ܘܪܒܢܝܢ ܘܟܘܡܪ̈ܝܢ ܘܐܒܗ̈ܝܢ ܘܠܐ ܥ̣ܒܕܘ ܢܡܘܣܟ ܘܠܐ ܨܬܘ ܠܦܘܩ̈ܕܢܝܟ ܘܠܣܗ̈ܕܘܬܟ ܕܐܣ̣ܗܕܬ ܒܗܘܢ

³⁵ ܘܟ̣ܦܪܘ ܒܡܠܟܘܬܟ ܘܒܛܘܒܟ ܪܒܐ ܕܝܗ̣ܒܬ ܠܗܘܢ ܒܐܪܥܐ ܛܒܬܐ ܘܫܡܝܢܬܐ ܕܝܗܒ̣ܬ ܠܗܘܢ ܘܠܐ ܦܠܚܘܟ ܘܠܐ ܗ̣ܦܟܘ ܡܢ ܥ̇ܒ̈ܕܝܗܘܢ ܒܝ̈ܫܐ

³⁶ ܡܛܠ ܗܢܐ ܚܢܢ ܝܘܡܢܐ ܥܒ̣̈ܕܐ ܘܐܪܥܐ ܕܝܗܒ̣ܬ ܠܐܒܗ̈ܝܢ ܠܡܐܟܠ ܐܒܗ̇ ܘܛܘܒܗ̇ ܗܐ ܚܢܢ ܐܝܟ ܥ̣ܒ̈ܕܐ ܦܠܚܝܢ ܒܗ̇ ܒܓܘܗ̇

³⁷ ܘܥ̈ܠܠܬܗ̇ ܢܣܒܝܢ ܡ̈ܠܟܐ ܕܐܩܝܡ̣ܬ ܥܠܝܢ ܡܛܠ ܚܛܗ̈ܝܢ ܘܥܠ ܦܓܪܢ ܗܢܘܢ ܫܠܝܛܝܢ ܘܥܠ ܒܥܝܪܢ ܐܝܟ ܨܒܝܢܗܘܢ ܘܒܐܘܠܨܢܐ ܪܒܐ ܫ̇ܪܝܢܢ