Neemia ܢܚܡܝܐ 8

¹ ܘܐܬܟܢܫܘ ܥܡܐ ܟܠܗ ܐܝܟ ܓܒܪܐ ܚܕ ܠܫܘܩܐ ܕܐܝܬ ܩܕܡ ܬܪܥܐ ܕܡܝ̈ܐ ܘܐܡܪܝܢ ܠܥܙܪܐ ܣ̇ܦܪܐ ܠܡܝܬܝܘ ܣ̣ܦܪܐ ܕܢܡܘܣܐ ܕܡܘܫܐ ܕܦ̇ܩܕ ܡܪܝܐ ܥܠ ܐܝܣܪܝܠ

² ܘܐܝܬܝ ܥܙܪܐ ܟܗܢܐ ܣ̣ܦܪܐ ܕܢܡܘܣܐ ܩܕܡ ܥܡܐ ܡܢ ܓܒܪ̈ܐ ܘܥܕܡܐ ܠܢܫ̈ܐ ܘܟܠ ܡ̇ܢ ܕܐܬܛܝܒ ܠܡܫܡܥ ܒܚܕ ܒܝܪܚܐ ܫܒܝܥܝܐ

³ ܘܩ̣ܪܐ ܣ̣ܦܪܐ ܒܫܘܩܐ ܕܬܪܥܐ ܕܡܝ̈ܐ ܡܢ ܨܦܪܐ ܘܥܕܡܐ ܠܦܠܓܗ ܕܝܘܡܐ ܩܕܡ ܓܒܪ̈ܐ ܘܢܫ̈ܐ ܘܩܕܡ ܐܝܠܝܢ ܕܫܡܥܝܢ ܘܐܕܢܝ̈ܗܘܢ ܕܥܡܐ ܨܠܝ̈ܢ ܗ̈ܘܝ ܘܨܝܬܝܢ ܠܦ̈ܘܩܕܢܐ ܕܢܡܘܣܐ

⁴ ܘܩܡ ܥܙܪܐ ܣ̇ܦܪܐ ܥܠ ܡܓܕܠܐ ܕܩܝܣܐ ܕܥܒ̣ܕ ܕܢܗܘܐ ܡܡܠܠ ܥܠܘܗܝ ܘܩܡ ܠܘܬܗ ܡܬܝܬܐ ܘܫܡܘܥ ܘܥܢܢܝܐ ܘܐܘܪܝܐ ܘܚܠܩܝܐ ܘܡܥܣܝܐ ܩܡܘ ܡܢ ܝܡܝܢܗ ܘܡܢ ܣܡܠܗ ܩܡܘ ܦܪܝܐ ܘܡܫܐܝܠ ܘܡܠܟܝܐ ܘܚܫܘܡ ܘܚܫܒܝܐ ܘܙܟܪܝܐ ܘܡܫܠܘܡ

⁵ ܘܦܬ̣ܚ ܥܙܪܐ ܣ̇ܦܪܐ ܟܬܒܐ ܕܢܡܘܣܐ ܠܥܝܢ ܟܠܗ ܥܡܐ ܡܛܠ ܕܪܡ ܗܘܐ ܡܢ ܟܠܗ ܥܡܐ ܘܟܕ ܦܬ̣ܚ ܩܡ ܟܠܗ ܥܡܐ

⁶ ܘܒ̇ܪܟ ܥܙܪܐ ܠܡܪܝܐ ܐܠܗܐ ܪܒܐ ܘܥܢܘ ܟܠܗ ܥܡܐ ܘܐܡܪܝܢ ܐܡܝܢ ܘܐܡܝܢ ܘܟܕ ܐܪܝܡܘ ܐܝܕܝ̈ܗܘܢ ܩܥ̣ܕܘ ܘܣܓ̣ܕܘ ܩܕܡ ܡܪܝܐ ܥܠ ܐܦܝ̈ܗܘܢ ܥܕܡܐ ܠܐܪܥܐ

⁷ ܘܝܫܘܥ ܘܒܢ̈ܘܗܝ ܘܣܪܒܝܐ ܘܝܡܝܢ ܘܥܩܘܦ ܘܫܒܬܝ ܘܗܘܕܝܐ ܘܡܥܣܝܐ ܘܩܠܛܝܐ ܘܥܙܪܝܐ ܘܝܘܙܒܪ ܘܚܢܢܝ ܘܦܢܝܐ ܘܠܘܝ̈ܐ ܕܡܫܡܫܝܢ ܠܥܡܐ ܒܢܡܘܣܐ ܘܥܡܐ ܩܝܡܝܢ ܥܠ ܕܘܟܬܗܘܢ

⁸ ܘܩܪܘ ܒܟܬܒܐ ܕܢܡܘܣܐ ܕܡܪܝܐ ܟܕ ܦܪܝܣ ܘܐܬܛܦܝܣܘ ܒܗ ܘܐܣܬܟܠܘ ܒܩܪܝܢܗ

⁹ ܘܐܡ̣ܪ ܢܚܡܝܐ ܪܝܫܐ ܕܟܘܡܪ̈ܐ ܘܥܙܪܐ ܟܘܡܪܐ ܣ̇ܦܪܐ ܘܠܘܝ̈ܐ ܐܝܠܝܢ ܕܡܫܡܫܝܢ ܗܘܘ ܠܥܡܐ ܘܐܡܪܝܢ ܠܟܘܠܗ ܥܡܐ ܝܘܡܢܐ ܩܕܝܫ ܗܘ ܩܕܡ ܡܪܝܐ ܐܠܗܟܘܢ ܠܐ ܬܟܪܐ ܠܟܘܢ ܘܠܐ ܬܒܟܘܢ ܡܛܠ ܕܒܟܝܢ ܗܘܘ ܓܝܪ ܟܘܠܗ ܥܡܐ ܟܕ ܫܡܥܝܢ ܗܘܘ ܟܬܒܐ ܕܢܡܘܣܐ

¹⁰ ܘܐܡ̣ܪ ܠܗܘܢ ܙܠܘ ܐܟܘܠܘ ܘܐܫܬܘ ܘܫܕܪܘ ܡܐܟܘܠܬܐ ܠܡ̇ܢ ܕܠܐ ܡܛܝܒ ܠܗ ܡܛܘܠ ܕܩܕܝܫ ܗܘ ܝܘܡܢܐ ܩܕܡ ܡܪܝܐ ܠܐ ܬܟܪܐ ܠܟܘܢ ܡܛܠ ܕܝܘܡܐ ܗܘ ܕܚܕܘܬܐ ܕܡܪܝܐ ܘܗܘ ܢܗܘܐ ܥܕܘܪܟܘܢ

¹¹ ܘܠܘܝ̈ܐ ܡܫܬܩܝܢ ܠܟܠܗ ܥܡܐ ܘܐܡܪܝܢ ܫܬܘܩܘ ܡܛܠ ܕܝܘܡܢܐ ܡܩܕܫ ܗܘ ܘܠܐ ܬܒܟܘܢ

¹² ܘܐܙܠܘ ܟܘܠܗ ܥܡܐ ܠܡܐܟܠ ܘܠܡܫܬܐ ܘܠܡܫܕܪܘ ܡܐܟܘܠܬܐ ܘܠܡܥܒܕ ܚܕܘܬܐ ܪܒܬܐ ܘܐܬܛܦܝܣܘ ܒܡ̈ܠܐ ܐܝܠܝܢ ܕܐܘܕܥܘ ܐܢܘܢ

¹³ ܘܒܝܘܡܐ ܕܬܪܝܢ ܐܬܟܢܫܘ ܪ̈ܝܫܝ ܐܒܗ̈ܬܐ ܕܟܘܠܗ ܥܡܐ ܘܟܘܡܪ̈ܐ ܘܠܘܝ̈ܐ ܠܘܬ ܥܙܪܐ ܣ̇ܦܪܐ ܠܡܬܛܦܣܘ ܡܢܗ ܥܠ ܟܬܒܐ ܕܢܡܘܣܐ

¹⁴ ܐܫܟܚܘ ܒܟܬܒܐ ܕܢܡܘܣܐ ܕܦ̇ܩܕ ܡܪܝܐ ܠܡܘܫܐ ܕܢܬܒܘܢ ܒܢ̈ܝ ܐܝܣܪܐܝܠ ܒܡ̈ܛܠܐ ܒܥܐܕܐ ܒܝܪܚܐ ܕܬܫܪܝ

¹⁵ ܘܕܢܫܡܥܘܢ ܐܩܪܝܘ ܟܪ̈ܘܙܐ ܒܟܠܗܝܢ ܩܘܪ̈ܝܗܘܢ ܘܒܐܘܪܫܠܡ ܘܐܡܪܝܢ ܣܩܘ ܠܛܘܪܐ ܐܝܬܘ ܩܝ̈ܣܐ ܕܙܝ̈ܬܐ ܘܩܝ̈ܣܐ ܕܓܘܙܐ ܘܛܪ̈ܦܐ ܕܕܩ̈ܠܐ ܘܛܪ̈ܦܐ ܕܐܛܪܘܓܐ ܘܣܘ̈ܟܐ ܕܥܪ̈ܒܐ ܘܥܒ̣ܕܘ ܡ̈ܛܠܠܐ ܐܝܟܢܐ ܕܟܬܝܒ ܒܟܬܒܐ ܕܢܡܘܣܐ ܕܡܘܫܐ

¹⁶ ܘܢܦ̣ܩܘ ܥܡܐ ܘܐܝܬܝܘ ܘܥܒ̣ܕܘ ܠܗܘܢ ܡ̈ܛܠܐ ܓܒܪ ܥܠ ܐܓܪܗ ܘܒܕܪ̈ܝܗܘܢ ܘܒܕܪܬܐ ܕܒܝܬܗ ܕܡܪܝܐ ܘܒܫܘܩܐ ܕܬܪܥܐ ܕܡܝ̈ܐ ܘܒܫܘܩܐ ܕܬܪܥܐ ܕܐܦܪܝܡ

¹⁷ ܘܥܒܕܘ ܟܠܗ ܥܡܐ ܕܗܦܟܘ ܡܢ ܫܒܝܐ ܡ̈ܛܠܐ ܘܝ̣ܬܒܘ ܒܡ̈ܛܠܐ ܡܛܠ ܕܠܐ ܥ̣ܒܕܘ ܒܢ̈ܝ ܐܝܣܪܝܠ ܗܟܢܐ ܡܢ ܝܘܡ̈ܬܗ ܕܝܫܘܥ ܒܪܢܘܢ ܥܕܡܐ ܠܗ ܠܝܘܡܐ ܗܢܐ ܘܗܘܬ ܚܕܘܬܐ ܪܒܬܐ ܕܛܒ

¹⁸ ܘܩ̇ܪܝܢ ܗܘܘ ܒܟܬܒܐ ܕܢܡܘܣܗ ܕܡܪܝܐ ܟܘܠ ܝܘܡ ܒܝܘܡ ܡܢ ܝܘܡܐ ܩܕܡܝܐ ܥܕܡܐ ܠܝܘܡܐ ܐܚܪܝܐ ܘܥ̣ܒܕܘ ܥܐܕܐ ܫܒܥܐ ܝܘܡ̈ܝܢ ܘܒܝܘܡܐ ܕܬܡܢܝܐ ܐܬܟܢܫܘ ܐܝܟܢܐ ܕܟܬܝܒ ܠܗܘܢ