Deuteronomio ܬܢܝܢ ܢܡܘܣܐ 4

¹ ܡܶܟܺܝܠ ܝܺܣܪܳܐܶܝܠ. ܫܡܰܥܘ ܢܳܡܽܘܣ̈ܶܐ ܘܕܺܝܢ̈ܶܐ ܕܡܰܠܶܦ ܐ̱ܢܳܐ ܠܟܽܘܢ ܝܰܘܡܳܢܳܐ ܠܡܶܥܒܰܕ. ܕܬܺܚܽܘܢ. ܘܬܶܥܠܽܘܢ ܘܬܺܐܪܬܽܘܢ ܐܰܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ.

² ܠܳܐ ܬܰܘܣܦܽܘܢ ܥܰܠ ܦܽܘܩܕܳܢ̈ܶܐ ܕܰܡܦܰܩܶܕ ܐ̱ܢܳܐ ܠܟܽܘܢ. ܘܠܳܐ ܬܒܰܨܪܽܘܢ ܡܶܢܶܗ ܐܶܠܳܐ ܛܰܪܘ ܦܽܘܩܕܳܢܶܗ ܕܡܳܪܝܳܐ ܐܰܠܳܗܟܽܘܢ ܕܰܡܦܰܩܶܕ ܐ̱ܢܳܐ ܠܟܽܘܢ.

³ ܥܰܝܢܰܝ̈ܟܽܘܢ ܚܙܰܝ̈ ܟܽܠܡܶܕܶܡ ܕܰܥܒܰܕ ܡܳܪܝܳܐ ܠܰܒܥܶܠ ܦܥܽܘܪ ܡܶܛܽܠ ܕܟܽܠ ܓܰܒܪܳܐ ܕܶܐܙܰܠ ܒܳܬܰܪ ܒܥܶܠ ܦܥܽܘܪ. ܐܰܘܒܕܶܗ ܡܳܪܝܳܐ ܐܰܠܳܗܟܽܘܢ ܡܶܢ ܒܰܝܢܳܬܟܽܘܢ.

⁴ ܘܰܐܢ̱ܬܽܘܢ ܕܶܐܬܢܩܶܦܬܽܘܢ ܠܡܳܪܝܳܐ ܐܰܠܳܗܟܽܘܢ. ܗܳܐ ܚܰܝܝܺܢ ܐܢ̱ܬܽܘܢ ܟܽܠܟܽܘܢ ܥܕܰܡܳܐ ܠܝܰܘܡܳܢܳܐ.

⁵ ܚܙܰܘ ܕܰܐܠܶܦܬܟܽܘܢ ܢܳܡܽܘܣ̈ܶܐ ܘܕܺܝܢ̈ܶܐ. ܐܰܝܟܰܢܳܐ ܕܦܰܩܕܰܢܝ ܡܳܪܝܳܐ ܐܰܠܳܗܝ. ܕܬܶܥܒܕܽܘܢ ܐܶܢܽܘܢ ܒܰܐܪܥܳܐ ܕܥܳܐܠܺܝܢ ܐܢ̱ܬܽܘܢ ܠܳܗ̇ ܠܡܺܐܪܬܳܗ̇

⁶ ܘܬܶܛܪܽܘܢ ܘܬܶܥܒܕܽܘܢ ܐܶܢܽܘܢ. ܕܗܺܝ ܗܺܝ ܚܶܟܡܰܬܟܽܘܢ ܘܣܽܘܟܠܟܽܘܢ ܠܥܺܝܢ ܥܰܡ̈ܡܶܐ. ܕܢܶܫܡܥܽܘܢ ܗܳܠܶܝܢ ܟܽܠܗܽܘܢ ܢܳܡܽܘܣ̈ܶܐ. ܘܢܺܐܡܪܽܘܢ ܕܚܰܟܺܝܡ ܗܽܘ ܘܣܰܟܽܘܠܬܳܢ ܥܰܡܳܐ ܗܳܢܳܐ ܪܰܒܳܐ.

⁷ ܐܰܝܢܰܘ ܓܶܝܪ ܥܰܡܳܐ ܪܰܒܳܐ ܕܩܰܪܺܝܒ ܠܶܗ ܐܰܠܳܗܶܗ. ܐܰܝܟ ܡܳܪܝܳܐ ܐܰܠܳܗܰܢ ܒܟܽܠ ܕܩܳܪܶܝܢܰܢ ܠܶܗ.

⁸ ܘܰܐܝܢܰܘ ܥܰܡܳܐ ܪܰܒܳܐ ܕܺܐܝܬ ܠܶܗ ܢܳܡܽܘܣ̈ܶܐ. ܘܕܺܝܢ̈ܶܐ ܙܰܕܺܝܩ̈ܶܐ. ܐܰܝܟ ܟܽܠܶܗ ܢܳܡܽܘܣܳܐ ܗܳܢܳܐ ܕܝܳܗܶܒ ܐ̱ܢܳܐ ܩܕܳܡܰܝܟܽܘܢ ܝܰܘܡܳܢܳܐ.

⁹ ܒܰܠܚܽܘܕ ܐܶܙܕܰܗܪܘ ܛܳܒ. ܘܛܰܪܘ ܢܰܦ̈ܫܳܬܟܽܘܢ. ܕܠܳܐ ܬܶܛܥܽܘܢ ܟܽܠ ܦܶܬܓܳܡ̈ܶܐ ܕܰܚ̈ܙܰܝ ܥܰܝܢܰܝ̈ܟܽܘܢ. ܘܠܳܐ ܢܶܥܒܪܽܘܢ ܡܶܢ ܠܶܒܟܽܘܢ ܟܽܠܗܽܘܢ ܝܰܘ̈ܡܰܝ ܚܰܝܰܝ̈ܟܽܘܢ. ܘܰܐܘܕܰܥܘ ܐܶܢܽܘܢ ܠܰܒܢܰܝ̈ܟܽܘܢ. ܘܠܰܒܢܰܝ̈ ܒܢܰܝ̈ܟܽܘܢ.

¹⁰ ܝܰܘܡܳܐ ܕܩܳܡܬܽܘܢ ܩܕܳܡ ܡܳܪܝܳܐ ܐܰܠܳܗܟܽܘܢ ܒܚܽܘܪܺܝܒ. ܟܰܕ ܐܶܡܰܪ ܠܺܝ ܡܳܪܝܳܐ. ܟܰܢܶܫ ܩܕܳܡܰܝ ܠܥܰܡܳܐ ܘܰܐܫܡܰܥ ܐܶܢܽܘܢ ܦܶܬܓܳܡܰܝ̈. ܘܢܺܐܠܦܽܘܢ ܠܡܶܕܚܰܠ ܩܕܳܡܰܝ. ܟܽܠܗܽܘܢ ܝܰܘ̈ܡܳܬܳܐ ܕܚܰܝܺܝܢ ܒܰܐܪܥܳܐ. ܘܠܰܒܢܰܝ̈ܗܽܘܢ ܢܰܠܦܽܘܢ.

¹¹ ܘܰܩܪܶܒܬܽܘܢ ܘܩܳܡܬܽܘܢ ܒܰܫ̈ܦܽܘܠܰܝ ܛܽܘܪܳܐ. ܘܛܽܘܪܳܐ ܡܶܬܓܰܘܙܰܠ ܗܘܳܐ ܒܢܽܘܪܳܐ. ܥܕܰܡܳܐ ܠܠܶܒܳܐ ܕܰܫܡܰܝܳܐ. ܘܚܶܫܽܘܟܳܐ. ܘܰܥܢܳܢܳܐ. ܘܥܰܪܦܠܳܐ.

¹² ܘܡܰܠܶܠ ܡܳܪܝܳܐ ܥܰܡܟܽܘܢ ܒܛܽܘܪܳܐ ܡܶܢ ܓܰܘ ܢܽܘܪܳܐ. ܩܳܠܳܐ ܕܡܰܡܠܠܳܐ ܫܳܡܥܺܝܢ ܗܘܰܝܬܽܘܢ. ܘܰܕܡܽܘܬܳܐ ܠܳܐ ܚܳܙܶܝܢ ܗܘܰܝܬܽܘܢ. ܐܶܠܳܐ ܐܶܢ ܩܳܠܳܐ ܒܰܠܚܽܘܕ.

¹³ ܘܚܰܘܺܝܟܽܘܢ ܩܝܳܡܶܗ. ܘܦܰܩܶܕܟܽܘܢ ܕܬܶܥܒܕܽܘܢ ܥܶܣܪܳܐ ܦܶܬܓܳܡܺܝ̈ܢ. ܘܰܟܬܰܒ ܐܶܢܽܘܢ ܥܰܠ ܬܰܪܬܶܝܢ ܠܽܘ̈ܚܶܐ ܕܟܺܐܦܳܐ.

¹⁴ ܘܠܺܝ ܦܰܩܕܰܢܝ ܡܳܪܝܳܐ ܒܙܰܒܢܳܐ ܗܰܘ. ܕܰܐܠܶܦܟܽܘܢ ܢܳܡܽܘܣ̈ܶܐ ܘܕܺܝܢ̈ܶܐ. ܕܬܶܥܒܕܽܘܢ ܐܶܢܽܘܢ ܒܰܐܪܥܳܐ ܕܥܳܒܪܺܝܢ ܐ̱ܢܬܽܘܢ ܠܬܰܡܳܢ ܠܡܺܐܪܬܳܗ̇

¹⁵ ܐܶܙܕܰܗܪܘ ܛܳܒ ܒܢܰܦܫܟܽܘܢ ܡܶܛܽܠ ܕܠܳܐ ܚܙܰܝܬܽܘܢ ܕܡܽܘܬܳܐ. ܒܝܰܘܡܳܐ ܕܡܰܠܶܠ ܡܳܪܝܳܐ ܥܰܡܟܽܘܢ ܒܚܽܘܪܺܝܒ ܡܶܢ ܓܰܘ ܢܽܘܪܳܐ.

¹⁶ ܕܠܳܐ ܬܚܰܒܠܽܘܢ ܘܬܶܥܒܕܽܘܢ ܠܟܽܘܢ ܨܰܠܡܶܐ ܘܕܶܡ̈ܘܳܬܳܐ ܕܟܽܠ ܓܢܶܣ. ܕܡܽܘܬܳܐ ܕܕܶܟܪܳܐ. ܐܰܘ ܕܢܶܩܒܬܳܐ.

¹⁷ ܕܡܽܘܬܳܐ ܕܟܽܠ ܒܥܺܝܪܳܐ ܕܺܐܝܬ ܒܰܐܪܥܳܐ. ܕܡܽܘܬܳܐ ܕܟܽܠ ܦܳܪܰܚܬܳܐ ܕܓܶܦܳܐ ܕܦܳܪܚܳܐ ܒܰܫܡܰܝܳܐ.

¹⁸ ܕܡܽܘܬܳܐ ܕܟܽܠ ܖ̈ܰܚܫܳܐ ܕܰܐܪܥܳܐ. ܕܡܽܘܬܳܐ ܕܟܽܠ ܢܽܘ̈ܢܶܐ ܕܰܒܝܰܡܳܐ ܕܰܠܬܰܚܬ ܡܶܢ ܐܰܪܥܳܐ.

¹⁹ ܘܰܕܠܳܐ ܬܪܺܝܡܽܘܢ ܥܰܝܢܰܝ̈ܟܽܘܢ. ܠܰܫܡܰܝܳܐ. ܘܬܶܚܙܽܘܢ ܫܶܡܫܳܐ. ܘܣܰܗܪܳܐ. ܘܟܰܘܟ̈ܒܶܐ. ܘܟܽܠܗܽܘܢ ܚܰܝ̈ܠܘܳܬܳܐ ܕܰܫܡܰܝܳܐ. ܘܬܶܛܥܽܘܢ ܘܬܶܣܓܕܽܘܢ ܠܗܽܘܢ. ܘܬܶܦܠܚܽܘܢ ܐܶܢܽܘܢ. ܕܦܰܠܶܓ ܐܶܢܽܘܢ ܡܳܪܝܳܐ ܐܰܠܳܗܟܽܘܢ ܠܟܽܠܗܽܘܢ ܥܰܡ̈ܡܶܐ ܕܰܬܚܶܝܬ ܫܡܰܝܳܐ.

²⁰ ܘܰܠܟܽܘܢ ܩܰܪܶܒ ܡܳܪܝܳܐ. ܘܰܐܦܶܩܟܽܘܢ ܡܶܢ ܟܽܘܪܳܐ ܕܦܰܪܙܠܳܐ ܡܶܢ ܡܶܨܪܶܝܢ. ܕܬܶܗܘܢ ܠܶܗ ܥܰܡܳܐ ܘܝܳܪܬܽܘܬܳܐ ܐܰܝܟ ܝܰܘܡܳܢܳܐ.

²¹ ܘܰܪܓܶܙ ܥܠܰܝ ܡܳܪܝܳܐ ܡܶܛܽܠ ܦܶܬܓܳܡܰܝ̈ܟܽܘܢ. ܘܺܝܡܳܐ ܕܠܳܐ ܐܶܥܒܰܪ ܝܽܘܪܕܢܳܢ ܗܳܢܳܐ. ܘܠܳܐ ܐܶܥܽܘܠ ܠܰܐܪܥܳܐ ܛܳܒܬܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ ܝܽܘܪܬܳܢܳܐ.

²² ܡܶܛܽܠ ܕܶܐܢܳܐ ܡܳܐܶܬ ܐ̱ܢܳܐ ܒܰܐܪܥܳܐ ܗܳܕܶܐ. ܘܠܳܐ ܥܳܒܰܪ ܐ̱ܢܳܐ ܝܽܘܪܕܢܳܢ ܗܳܢܳܐ. ܐܰܢ̱ܬܽܘܢ. ܕܶܝܢ ܥܳܒܪܺܝܢ ܐ̱ܢܬܽܘܢ. ܘܝܳܪܬܺܝܢ ܐ̱ܢܬܽܘܢ ܐܰܪܥܳܐ ܗܳܕܶܐ ܛܳܒܬܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ.

²³ ܐܶܙܕܰܗܪܘ ܕܠܳܐ ܬܶܛܥܽܘܢ ܩܝܳܡܶܗ ܕܡܳܪܝܳܐ ܐܰܠܳܗܟܽܘܢ ܕܰܐܩܺܝܡ ܥܰܡܟܽܘܢ. ܘܰܬܚܰܒܠܽܘܢ ܘܬܶܥܒܕܽܘܢ ܠܟܽܘܢ ܨܰܠ̈ܡܶܐ ܘܕܶܡ̈ܘܳܬܳܐ. ܕܟܽܠܡܶܕܶܡ ܕܦܰܩܶܕܟܽܘܢ ܡܳܪܝܳܐ ܐܰܠܳܗܟܽܘܢ.

²⁴ ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܢܽܘܪܳܐ ܗܽܘ ܐܳܟܶܠܬܳܐ. ܘܰܐ‌ܠܳܗܳܐ ܗܽܘ ܛܰܢܳܢܳܐ.

²⁵ ܘܟܰܕ ܬܰܘܠܕܽܘܢ ܒܢܰܝ̈ܳܐ. ܐܰܘ ܒܢܰܝ̈ ܒܢܰܝ̈ܳܐ. ܘܬܶܥܬܩܽܘܢ ܒܰܐܪܥܳܐ. ܘܰܬܚܰܒܠܽܘܢ ܘܬܶܥܒܕܽܘܢ ܨܰܠ̈ܡܶܐ ܘܕܶܡ̈ܘܳܬܳܐ ܕܟܽܠܡܶܕܶܡ. ܘܬܶܥܒܕܽܘܢ ܕܒܺܝܫ ܩܕܳܡ ܡܳܪܝܳܐ ܐܰܠܳܗܟܽܘܢ ܘܬܰܪܓܙܽܘܢܶܗ.

²⁶ ܣܰܗܕܶܬ ܒܟܽܘܢ ܝܰܘܡܳܢܳܐ ܫܡܰܝܳܐ ܘܰܐܪܥܳܐ. ܕܡܶܐܒܰܕ ܐܳܒܕܺܝܢ ܐ̱ܢܬܽܘܢ ܒܰܥܓܰܠ ܡܶܢ ܐܰܪܥܳܐ ܕܥܳܒܪܺܝܢ ܐ̱ܢܬܽܘܢ ܝܽܘܪܕܢܳܢ ܝܰܘܡܳܢܳܐ ܠܡܺܐܪܬܳܗ̇ ܘܠܳܐ ܬܰܣܓܽܘܢ ܒܳܗ̇ ܝܰܘ̈ܡܳܬܳܐ. ܐܶܠܳܐ ܡܺܐܒܰܕ ܬܺܐܒܕܽܘܢ.

²⁷ ܘܰܢܒܰܕܰܪܟܽܘܢ ܡܳܪܝܳܐ ܒܶܝܬ ܥܰܡ̈ܡܶܐ. ܘܬܶܫܬܰܚܪܽܘܢ ܩܰܠܺܝܠ ܒܡܶܢܝܳܢܳܐ. ܒܶܝܬ ܥܰܡ̈ܡܶܐ. ܕܰܢܒܰܕܰܪܟܽܘܢ ܡܳܪܝܳܐ ܠܬܰܡܳܢ.

²⁸ ܘܬܶܦܠܚܽܘܢ ܬܰܡܳܢ ܠܰܐܠܳܗ̈ܳܐ ܥܒܳܕ ܐܺܝ̈ܕܰܝܳܐ ܕܰܒܢܰܝ̈ܢܳܫܳܐ. ܕܩܰܝܣܳܐ ܘܰܕܟܺܐܦܳܐ. ܕܠܳܐ ܚܳܙܶܝܢ ܘܠܳܐ ܫܳܡܥܺܝܢ. ܘܠܳܐ ܐܳܟܠܺܝܢ. ܘܠܳܐ ܡܪܺܝܚܺܝܢ.

²⁹ ܘܬܶܒܥܽܘܢܶܗ ܬܰܡܳܢ ܠܡܳܪܝܳܐ ܐܰܠܳܗܟܽܘܢ. ܘܬܶܫܟܚܽܘܢܶܗ. ܟܰܕ ܬܥܰܩܒܽܘܢ ܥܠܰܘܗܝ ܡܶܢ ܟܽܠܶܗ ܠܶܒܟܽܘܢ ܘܡܶܢ ܟܽܠܳܗ̇ ܢܰܦܫܟܽܘܢ.

³⁰ ܡܳܐ ܕܥܳܩܰܬ ܠܟܽܘܢ. ܘܡܰܛܺܝܟܽܘܢ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ ܒܚܰܪܬܳܐ ܕܝܰܘ̈ܡܳܬܳܐ. ܘܬܶܬܦܢܽܘܢ ܠܘܳܬ ܡܳܪܝܳܐ ܐܰܠܳܗܟܽܘܢ ܘܬܶܫܡܥܽܘܢ ܒܩܳܠܶܗ.

³¹ ܡܶܛܽܠ ܕܰܐܠܳܗܰܐ ܗ̱ܘ ܡܪܰܚܡܳܢܳܐ ܡܳܪܝܳܐ ܐܰܠܳܗܟܽܘܢ. ܠܳܐ ܢܚܰܒܶܠܟܽܘܢ. ܘܠܳܐ ܢܶܫܒܽܘܩܟܽܘܢ. ܘܠܳܐ ܢܶܛܥܶܐ ܩܝܳܡܳܐ ܕܺܝܡܳܐ ܠܰܐܒܳܗܰܝ̈ܟܽܘܢ.

³² ܐܶܠܳܐ ܫܰܐܶܠܘ ܥܰܠ ܝܰܘ̈ܡܳܬܳܐ ܩܰܕܡܳܝ̈ܶܐ ܕܰܗܘܰܘ ܩܕܳܡܰܝܟܽܘܢ. ܡܶܢ ܝܰܘܡܳܐ ܕܰܒܪܳܐ ܐܰ‌ܠܳܗܳܐ ܠܐ̱ܢܳܫܳܐ ܥܰܠ ܐܰܪܥܳܐ. ܡܶܢ ܣܰܘ̈ܦܰܝ ܫܡܰܝܳܐ ܘܰܥܕܰܡܳܐ ܠܣܰܘ̈ܦܰܝ ܫܡܰܝܳܐ. ܐܶܢ ܗܘܳܐ ܐܰܝܟ ܦܶܬܓܳܡܳܐ ܗܳܢܳܐ ܪܰܒܳܐ. ܐܰܘ ܐܶܫܬܡܰܥ ܐܰܟܘܳܬܶܗ.

³³ ܐܶܢ ܫܡܰܥ ܥܰܡܳܐ ܐ̱ܚܪܺܢܳܐ ܩܳܠܶܗ ܕܰܐ‌ܠܳܗܳܐ ܕܰܡܡܰܠܶܠ ܡܶܢ ܓܰܘ ܢܽܘܪܳܐ. ܐܰܝܟ ܕܰܫܡܰܥܬܽܘܢ ܐ̱ܢܬܽܘܢ ܘܰܚܝܰܝܬܽܘܢ.

³⁴ ܐܰܘ ܢܰܣܺܝܘ ܠܰܐܠܳܗܳܐ ܕܶܐܙܰܠ ܘܰܢܣܰܒ ܠܶܗ ܥܰܡܳܐ ܡܶܢ ܓܰܘ ܥܰܡܳܐ. ܒܢܶܣܝܽܘܢ̈ܶܐ. ܘܒܳܐܬܘ̈ܳܬܳܐ. ܘܰܒܬܶܕܡܖ̈ܳܬܳܐ. ܘܒܰܩܖ̈ܳܒܶܐ. ܘܒܺܐܝܕܳܐ ܬܰܩܺܝܦܬܳܐ. ܘܒܰܕܪܳܥܳܐ ܪܳܡܳܐ. ܘܰܒܚܶܙ̈ܘܳܢܶܐ ܪܰܘܖ̈ܒܶܐ. ܐܰܝܟ ܟܽܠ ܕܰܥܒܰܕ ܡܳܪܝܳܐ ܐܰܠܳܗܟܽܘܢ ܠܡܶܨܖ̈ܳܝܶܐ ܠܥܺܝܢܰܝ̈ܟܽܘܢ.

³⁵ ܐܰܢ̱ܬܽܘܢ ܚܙܰܝܬܽܘܢ ܘܳܝܕܥܺܝܬܽܘܢ ܕܡܳܪܝܰܐ ܗ̱ܘ ܐܰ‌ܠܳܗܳܐ. ܘܠܰܝܬ ܬܽܘܒ ܠܒܰܪ ܡܶܢܶܗ.

³⁶ ܡܶܢ ܫܡܰܝܳܐ ܐܰܫܡܰܥܟܽܘܢ ܩܳܠܶܗ ܠܡܰܠܳܦܽܘܬܟܽܘܢ. ܘܥܰܠ ܐܰܪܥܳܐ ܚܰܘܺܝܟܽܘܢ ܢܽܘܪܶܗ ܪܰܒܬܳܐ. ܘܦܶܬܓܳܡܰܘ̈ܗܝ ܫܡܰܥܬܽܘܢ ܡܶܢ ܓܰܘ ܢܽܘܪܳܐ.

³⁷ ܘܰܒܕܰܪܚܶܡ ܠܰܐܒܳܗܰܝ̈ܟܽܘܢ ܓܒܳܐ ܠܙܰܪܥܗܽܘܢ ܒܳܬܰܪܗܽܘܢ. ܘܰܐܦܶܩܟܽܘܢ ܒܦܰܪܨܽܘܦܶܗ ܒܚܰܝܠܳܐ ܪܰܒܳܐ ܡܶܢ ܡܶܨܪܶܝܢ.

³⁸ ܠܡܰܘܒܳܕܽܘ ܡܶܢ ܩܕܳܡܰܝܟܽܘܢ ܥܰܡ̈ܡܶܐ ܕܪܰܘܪܒܺܝܢ ܘܥܰܫܺܝܢܺܝܢ ܡܶܢܟܽܘܢ. ܕܢܰܥܶܠܟܽܘܢ ܘܢܶܬܶܠ ܠܟܽܘܢ ܐܰܪܥܗܽܘܢ ܝܽܘܪܬܳܢܳܐ ܐܰܝܟ ܝܰܘܡܳܢܳܐ.

³⁹ ܘܬܶܕܥܽܘܢ ܝܰܘܡܳܢܳܐ ܘܬܰܦܢܽܘܢ ܠܶܒܟܽܘܢ. ܡܶܛܽܠ ܕܡܳܪܝܰܐ ܗ̱ܘ ܐܰ‌ܠܳܗܳܐ ܒܰܫܡܰܝܳܐ ܡܶܢ ܠܥܶܠ. ܘܥܰܠ ܐܰܪܥܳܐ ܡܶܢ ܠܬܰܚܬ. ܘܠܰܝܬ ܬܽܘܒ ܠܒܰܪ ܡܶܢܶܗ.

⁴⁰ ܛܰܪܘ ܢܳܡܽܘܣܰܘ̈ܗܝ ܘܦܽܘܩܕܳܢܰܘ̈ܗܝ ܕܰܡܦܰܩܶܕ ܐ̱ܢܳܐ ܠܟܽܘܢ ܝܰܘܡܳܢܳܐ. ܕܢܰܛܐܶܒ ܠܟܽܘܢ. ܘܠܰܒܢܰܝ̈ܟܽܘܢ ܒܳܬܰܪܟܽܘܢ. ܘܬܰܣܓܽܘܢ ܝܰܘ̈ܡܳܬܳܐ ܒܰܐܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰܠܳܗܟܽܘܢ ܟܽܠܗܽܘܢ ܝܰܘ̈ܡܳܬܳܐ.

⁴¹ ܗܳܝܕܶܝܢ ܦܪܰܫ ܡܽܘܫܶܐ ܬܠܳܬ ܩܽܘܖ̈ܝܳܐ ܒܥܶܒܪܳܐ ܕܝܽܘܪܕܢܳܢ. ܡܶܢ ܡܰܕܢܳܚܰܝ̈ ܫܶܡܫܳܐ.

⁴² ܕܢܶܥܪܽܘܩ ܠܬܰܡܳܢ ܩܳܛܽܘܠܳܐ ܕܢܶܩܛܽܘܠ ܠܚܰܒܪܶܗ ܕܠܳܐ ܒܨܶܒܝܳܢܶܗ. ܘܠܳܐ ܣܳܢܶܐ ܗܘܳܐ ܠܶܗ ܡܶܢ ܐܶܬܡܳܠܝ ܘܡܶܢ ܡܢܳܬܡܳܠܝ. ܘܢܶܥܪܽܘܩ ܠܰܚܕܳܐ ܡܶܢ ܗܳܠܶܝܢ ܩܽܘܖ̈ܝܳܐ. ܘܢܺܚܶܐ.

⁴³ ܚܕܳܐ ܡܶܢܗܶܝܢ ܒܽܘܨܳܪ ܕܰܒܡܰܕܒܪܳܐ ܒܰܐܪܥܳܐ ܕܰܦܩܰܥܬܳܐ ܕܪܽܘܒܺܝܠ. ܘܰܐ̱ܚܪܺܬܳܐ ܪܳܡܰܬ ܓܶܠܥܳܕ ܕܓܳܕ. ܘܓܽܘܠܳܢ ܕܰܒܡܰܬܢܺܝܢ ܕܰܡܢܰܫܶܐ.

⁴⁴ ܗܳܢܳܐ ܢܳܡܽܘܣܳܐ ܕܣܳܡ ܡܽܘܫܶܐ ܩܕܳܡ ܒܢܰܝ̈ ܝܺܣܪܳܐܶܝܠ.

⁴⁵ ܗܳܠܶܝܢ ܣܳܗܕܘ̈ܳܬܳܐ. ܘܢܳܡܽܘܣ̈ܶܐ. ܘܕܺܝܢ̈ܶܐ. ܕܡܰܠܶܠ ܡܽܘܫܶܐ ܥܰܡ ܒܢܰܝ̈ ܝܺܣܪܳܐܶܝܠ. ܟܰܕ ܢܦܰܩܘ ܡܶܢ ܡܶܨܪܶܝܢ.

⁴⁶ ܒܥܶܒܪܳܐ ܕܝܽܘܪܕܢܳܢ. ܒܢܰܚܠܳܐ ܠܽܘܩܒܰܠ ܒܶܝܬ ܦܥܽܘܪ. ܒܰܐܪܥܳܐ ܕܣܺܝܚܽܘܢ ܡܰܠܟܳܐ ܕܳܐܡܽܘܖ̈ܳܝܶܐ ܕܝܳܬܶܒ ܗܘܳܐ ܒܚܶܫܒܽܘܢ. ܕܩܰܛܠܶܗ ܡܽܘܫܶܐ ܘܰܒܢܰܝ̈ ܝܺܣܪܳܐܶܝܠ. ܟܰܕ ܢܦܰܩܘ ܡܶܢ ܡܶܨܪܶܝܢ.

⁴⁷ ܘܺܝܪܶܬܘ ܐܰܪܥܶܗ. ܘܰܐܪܥܳܐ ܕܥܽܘܓ ܡܰܠܟܳܐ ܕܡܰܬܢܺܝܢ. ܬܪܶܝܢ ܡܰܠ̈ܟܶܐ ܕܳܐܡܽܘܖ̈ܳܝܶܐ ܕܰܒܥܶܒܪܳܐ ܕܝܽܘܪܕܢܳܢ. ܡܶܢ ܡܰܕܢܳܚܰܝ̈ ܫܶܡܫܳܐ.

⁴⁸ ܡܶܢ ܥܰܕܽܘܥܺܝܪ ܕܥܰܠ ܣܶܦܬܳܐ ܕܢܰܚܠܳܐ ܕܰܐܪܢܽܘܢ. ܘܰܥܕܰܡܳܐ ܠܛܽܘܪܳܐ ܕܣܰܪܝܽܘܢ ܗܽܘܝܽܘ ܚܶܪܡܽܘܢ.

⁴⁹ ܘܟܽܠܶܗ ܥܳܪܳܒܳܐ ܕܰܒܥܶܒܪܳܐ ܕܝܽܘܪܕܢܳܢ ܡܶܢ ܡܰܕܢܚܳܐ. ܘܰܥܕܰܡܳܐ ܠܝܰܡܳܐ ܕܥܳܪܳܒܳܐ ܕܰܬܚܶܝܬ ܐܰܫܕܽܘܕ ܘܦܰܣܓܳܐ.