Giudici ܕܝ̈ܢܐ 9

¹ ܘܶܐܙܰܠ ܐܰܒܺܝܡܠܶܟ ܒܰܪ ܢܕܽܘܒܥܺܝܠ ܠܰܫܟܺܝܡ ܠܘܳܬ ܐܰܚ̈ܶܐ ܕܶܐܡܶܗ. ܘܶܐܡܰܪ ܠܗܽܘܢ. ܘܰܠܟܽܠܳܗ̇ ܫܰܪܒܬܳܐ ܕܒܶܝܬ ܐܰܒܽܘܗ̇ ܕܶܐܡܶܗ.

² ܐܶܡܰܪܘ ܩܕܳܡ ܟܽܠܗܽܘܢ ܡܳܖ̈ܶܝܗ̇ ܕܰܫܟܺܝܡ. ܡܳܢܳܐ ܦܰܩܳܚ ܠܟܽܘܢ. ܕܢܶܫܬܰܠܛܽܘܢ ܒܟܽܘܢ ܫܰܒܥܺܝܢ ܓܰܒܖ̈ܺܝܢ ܒܢܰܘ̈ܗܝ ܕܰܢܕܽܘܒܥܺܝܠ. ܐܰܘ ܕܢܶܫܬܰܠܰܛ ܒܟܽܘܢ ܚܰܕ ܓܒܰܪ. ܘܶܐܬܕܰܟܪܘ ܕܓܰܪܡܟܽܘܢ ܐ̱ܢܳܐ ܘܒܶܣܪܟܽܘܢ.

³ ܘܶܐܡܰܪܘ ܐܰܚ̈ܶܐ ܕܶܐܡܶܗ ܩܕܳܡ ܟܽܠܗܽܘܢ ܡܳܖ̈ܶܝܗ̇ ܕܰܫܟܺܝܡ ܥܠܰܘܗܝ ܟܽܠܗܶܝܢ ܡ̈ܶܠܶܐ ܗܳܠܶܝܢ. ܘܶܐܨܛܒܺܝ ܠܶܒܗܽܘܢ ܒܳܬܰܪ ܐܰܒܺܝܡܠܶܟ. ܘܳܐܡܪܺܝܢ ܐܰܚܽܘܢ ܗܽܘ.

⁴ ܘܝܰܗܒܘ ܠܶܗ ܫܰܒܥܺܝܢ ܕܟܶܣܦܳܐ ܡܶܢ ܒܶܝܬ ܒܥܶܠ ܩܝܳܡܳܐ. ܘܶܐܓܰܪ ܒܗܽܘܢ ܐܰܒܺܝܡܠܶܟ ܐ̱ܢܳܫ̈ܳܐ ܣܖ̈ܺܝܩܶܐ. ܘܦܰܚ̈ܙܶܐ. ܘܶܐܙܰܠ̣ܘ ܒܳܬܪܶܗ.

⁵ ܘܥܰܠ ܠܒܶܝܬ ܐܰܒܽܘܗܝ ܠܥܽܘܦܪܳܐ. ܘܩܰܛܶܠ ܠܰܐܚܰܘ̈ܗܝ ܒܢܰܘ̈ܗܝ ܕܰܢܕܽܘܒܥܺܝܠ ܫܰܒܥܺܝܢ ܓܰܒܖ̈ܺܝܢ ܥܰܠ ܟܺܐܦܳܐ ܚܕܳܐ. ܘܶܐܫܬܰܚܰܪ ܝܽܘܬܳܡ ܒܰܪ ܢܕܽܘܒܥܺܝܠ ܙܥܽܘܪܳܐ ܡܶܛܽܠ ܕܶܐܬܛܰܫܺܝ.

⁶ ܘܶܐܬܟܰܢܰܫܘ ܟܽܠܗܽܘܢ ܡܳܖ̈ܶܝܗ̇ ܕܰܫܟܺܝܡ ܘܟܽܠܶܗ ܥܰܡܳܐ ܕܒܶܝܬ ܡܳܠܽܘ. ܘܶܐܙܰܠܘ ܘܰܐܩܺܝܡܘ ܠܰܐܒܺܝܡܠܶܟ ܕܢܶܗܘܶܐ ܥܠܰܝܗܽܘܢ ܡܰܠܟܳܐ. ܥܰܠ ܓܶܢ̱ܒ ܒܰܠܽܘܛܳܐ ܕܡܰܨܦܝܳܐ ܕܺܐܝܬ ܒܰܫܟܺܝܡ.

⁷ ܘܚܰܘܺܝܘ ܠܝܽܘܬܳܡ. ܘܰܣܠܶܩ ܘܩܳܡ ܒܪܺܝܫ ܛܽܘܪܳܐ ܕܓܰܪܙܺܝܡ. ܘܰܐܪܺܝܡ ܩܳܠܶܗ. ܘܶܐܡܰܪ. ܫܽܘܡܥܽܘܢܝ ܡܳܖ̈ܶܝܗ̇ ܕܰܫܟܺܝܡ. ܕܢܶܫܡܰܥܟܽܘܢ ܐܰ‌ܠܳܗܳܐ.

⁸ ܡܺܐܙܰܠ ܐܶܙܰܠܘ ܐܺܝ̈ܠܳܢܶܐ ܕܢܶܡܫܚܽܘܢ ܥܠܰܝܗܽܘܢ ܡܰܠܟܳܐ. ܐܳܡܪܺܝܢ ܠܙܰܝܬܳܐ ܐܰܡܠܶܟ ܥܠܰܝܢ.

⁹ ܐܳܡܰܪ ܠܗܽܘܢ ܙܰܝܬܳܐ. ܠܳܐ ܫܳܒܶܩ ܐ̱ܢܳܐ ܕܽܘܗܢܝ. ܕܒܺܝ ܡܶܬܝܰܩܪܺܝܢ ܐܰܠܳܗ̈ܶܐ ܘܐ̱ܢܳܫ̈ܳܐ. ܘܳܐܙܶܠ ܐ̱ܢܳܐ ܠܰܡܢܳܕ ܐܺܝ̈ܠܳܢܶܐ.

¹⁰ ܐܳܡܪܺܝܢ ܐܺܝ̈ܠܳܢܶܐ ܠܬܺܬܳܐ. ܬܳܝ ܐܰܢ̱ܬܝ ܐܰܡܠܶܟܝ ܥܠܰܝܢ.

¹¹ ܐܳܡܪܳܐ ܠܗܽܘܢ ܬܺܬܳܐ. ܠܳܐ ܫܳܒܩܳܐ ܐ̱ܢܳܐ ܚܰܠܝܽܘܬܝ. ܘܶܐܒܝ ܛܳܒܳܐ. ܘܳܐܙܳܠ̱ܐ ܐ̱ܢܳܐ ܠܰܡܢܳܕ ܥܰܠ ܐܺܝ̈ܠܳܢܶܐ.

¹² ܐܳܡܪܺܝܢ ܐܺܝ̈ܠܳܢܶܐ ܠܰܓܦܶܬܳܐ. ܬܳܝ ܐܰܢ̱ܬܝ ܐܰܡܠܶܟܝ ܥܠܰܝܢ.

¹³ ܐܳܡܪܳܐ ܠܗܽܘܢ ܓܦܶܬܳܐ. ܠܳܐ ܫܳܒܩܳܐ ܐ̱ܢܳܐ ܐܳܕܫܝ ܕܰܡܚܰܕܶܐ ܠܶܒܳܐ ܕܰܐܠܳܗ̈ܶܐ ܘܰܕܐ̱ܢܳܫ̈ܳܐ. ܘܳܐܙܠ̱ܐ ܐ̱ܢܳܐ ܠܰܡܢܳܕ ܥܰܠ ܐܺܝ̈ܠܳܢܶܐ.

¹⁴ ܐܳܡܪܺܝܢ ܐܺܝ̈ܠܳܢܶܐ ܟܽܠܗܽܘܢ ܠܗܰܛܛܳܐ. ܐܰܢ̱ܬ ܐܰܡܠܶܟ ܥܠܰܝܢ.

¹⁵ ܐܳܡܰܪ ܗܰܛܛܳܐ ܠܺܐܝ̈ܠܳܢܶܐ. ܐܶܢ ܒܰܫܪܳܪܳܐ ܡܳܫܚܺܝܢ ܐ̱ܢܬܽܘܢ ܠܺܝ ܕܰܐܡܠܶܟ ܥܠܰܝܟܽܘܢ. ܬܰܘ ܐܶܣܬܰܬܰܪܘ ܒܛܶܠܳܠܝ. ܘܶܐܢ ܠܳܐ. ܬܶܦܽܘܩ ܢܽܘܪܳܐ ܡܶܢ ܗܰܛܛܳܐ. ܘܬܶܐܟܽܘܠ ܠܰܐܖ̈ܙܶܐ ܕܰܒܠܶܒܢܳܢ.

¹⁶ ܘܗܳܫܳܐ ܐܶܢ ܒܩܽܘܫܬܳܐ ܘܒܰܫܪܳܪܳܐ ܥܒܰܕܬܽܘܢ. ܕܰܐܡܠܶܟܬܽܘܢ ܠܰܐܒܺܝܡܠܰܟ. ܘܶܐܢ ܛܳܒܬܳܐ ܥܒܰܕܬܽܘܢ ܥܰܡ ܢܕܽܘܒܥܺܝܠ ܘܥܰܡ ܒܰܝܬܶܗ. ܐܰܘ ܐܰܝܟ ܥܰܡܠܳܐ ܕܺܐܝܕܰܘ̈ܗܝ ܦܪܰܥܬܽܘܢܳܝܗܝ.

¹⁷ ܕܶܐܬܟܰܬܰܫ ܐܳܒܝ ܥܰܠ ܐܰܦܰܝ̈ܟܽܘܢ. ܘܰܫܕܳܐ ܢܰܦܫܶܗ ܡܶܢ ܩܒܽܘܠ. ܘܦܰܨܺܝܟܽܘܢ ܡܶܢ ܐܺܝܕܳܐ ܕܡܶܕܝܰܢ.

¹⁸ ܘܰܐܢ̱ܬܽܘܢ ܩܳܡܬܽܘܢ ܥܰܠ ܒܶܝܬ ܐܳܒܝ ܝܰܘܡܳܢܳܐ. ܘܩܰܛܶܠܬܽܘܢ ܠܰܒܢܰܘ̈ܗܝ ܫܰܒܥܺܝܢ ܓܰܒܖ̈ܺܝܢ ܥܰܠ ܟܺܐܦܳܐ ܚܕܳܐ. ܘܰܐܡܠܶܟܬܽܘܢ ܠܰܐܒܺܝܡܠܰܟ ܒܰܪ ܐܰܡܬܶܗ ܥܰܠ ܡܳܖ̈ܶܝܗ̇ ܕܰܫܟܺܝܡ. ܡܶܛܽܠ ܕܰܐܚܽܘܟܽܘܢ ܗܽܘ.

¹⁹ ܘܶܐܢ ܒܩܽܘܫܬܳܐ ܘܒܰܫܪܳܪܳܐ ܥܒܰܕܬܽܘܢ ܥܰܡ ܢܕܽܘܒܥܺܝܠ ܘܥܰܡ ܒܰܝܬܶܗ ܝܰܘܡܳܢܳܐ. ܚܕܰܘ ܒܰܐܒܺܝܡܠܶܟ. ܘܳܐܦ ܗܽܘ ܢܶܚܕܶܐ ܒܟܽܘܢ.

²⁰ ܘܶܐܢ ܠܳܐ. ܬܶܦܽܘܩ ܢܽܘܪܳܐ ܡܶܢ ܐܰܒܺܝܡܠܶܟ. ܘܬܶܐܟܽܘܠ ܠܡܳܖ̈ܶܝܗ̇ ܕܰܫܟܺܝܡ ܘܰܠܡܳܖ̈ܶܝܗ̇ ܕܡܰܠܽܘ. ܘܬܶܦܽܘܩ ܢܽܘܪܳܐ ܡܶܢ ܡܳܖ̈ܶܝܗ̇ ܕܰܫܟܺܝܡ. ܘܡܳܖ̈ܶܝܗ̇ ܕܡܰܠܽܘ. ܘܬܶܐܟܠܺܝܘܗܝ ܠܰܐܒܺܝܡܠܰܟ.

²¹ ܘܰܥܪܰܩ ܝܽܘܬܳܡ ܘܶܐܬܦܰܠܰܛ. ܘܶܐܙܰܠ ܠܕܳܒܺܝܪ ܘܺܝܬܶܒ ܬܰܡܳܢ. ܐܰܝܟܳܐ ܕܝܳܬܶܒ ܗܘܳܐ ܐܰܒܺܝܡܠܶܟ ܡܶܢ ܩܕܺܝܡ.

²² ܘܶܐܫܬܰܠܰܛ ܐܰܒܺܝܡܠܶܟ ܥܰܠ ܝܺܣܪܳܐܶܝܠ ܬܠܳܬ ܫܢܺܝ̈ܢ.

²³ ܘܫܰܕܰܪ ܐܰ‌ܠܳܗܳܐ ܪܽܘܚܳܐ ܒܺܝܫܬܳܐ ܥܰܠ ܐܰܒܺܝܡܠܶܟ. ܘܥܰܠ ܡܳܖ̈ܶܝܗ̇ ܕܰܫܟܺܝܡ. ܘܕܰܓܶܠܘ ܡܳܖ̈ܶܝܗ̇ ܕܰܫܟܺܝܡ ܒܰܐܒܺܝܡܠܶܟ.

²⁴ ܡܶܛܽܠ ܕܢܺܐܬܶܐ ܥܰܘܠܳܐ ܕܫܰܒܥܺܝܢ ܒܢܰܘ̈ܗܝ ܕܰܢܕܽܘܒܥܺܝܠ. ܘܕܶܡܗܽܘܢ ܠܰܡܣܳܡ ܥܰܠ ܐܰܒܺܝܡܠܶܟ ܐܰܚܽܘܗܽܘܢ ܕܩܰܛܶܠ ܐܶܢܽܘܢ. ܘܥܰܠ ܡܳܖ̈ܶܝܗ̇ ܕܰܫܟܺܝܡ ܕܚܰܝܶܠܘ ܐܺܝܕܰܘ̈ܗܝ ܕܰܢܩܰܛܶܠ ܠܰܐܚܰܘ̈ܗܝ.

²⁵ ܘܰܐܟܡܶܢܘ ܠܶܗ ܟܡܺܐܢ̈ܶܐ ܥܰܠ ܪܺܝܫ ܛܽܘܪܳܐ. ܘܰܚܛܰܦܘ ܟܽܠ ܕܥܳܒܰܪ ܥܠܰܝܗܽܘܢ ܒܽܐܘܪܚܳܐ. ܘܶܐܬܚܰܘܺܝ ܠܰܐܒܺܝܡܠܰܟ.

²⁶ ܘܶܐܬܳܐ ܓܳܥܶܠ ܒܰܪ ܥܳܦܳܪ. ܗܽܘ ܘܰܐܚܰܘ̈ܗܝ. ܘܰܥܒܰܪܘ ܒܰܫܟܺܝܡ. ܘܶܐܬܬܟܶܠܘ ܥܠܰܘܗܝ ܡܳܖ̈ܶܝܗ̇ ܕܰܫܟܺܝܡ.

²⁷ ܘܰܢܦܰܩܘ ܠܕܰܒܪܳܐ. ܘܰܩܛܰܦܘ ܟܰܖ̈ܡܰܝܗܽܘܢ ܘܰܥܨܰܪܘ. ܘܰܥܒܰܕܘ ܚܠܽܘܠܳܐ. ܘܥ̣ܰܠܘ ܠܒܶܝܬ ܐܰܠܳܗܰܝ̈ܗܽܘܢ. ܘܰܠܥܶܣܘ. ܘܶܐܫܬܺܝܘ. ܘܨܰܚܺܝܘ ܠܰܐܒܺܝܡܠܰܟ.

²⁸ ܘܳܐܡܰܪ ܓܳܥܶܠ ܒܰܪ ܥܳܦܳܪ. ܡܰܢܽܘ ܐܰܒܺܝܡܠܶܟ ܘܡܰܢܽܘ ܫܟܺܝܡ ܕܢܶܦܠܚܺܝܘܗܝ. ܠܳܐ ܗܘܳܐ ܒܰܪ ܢܕܽܘܒܥܺܝܠ. ܘܙܳܒܳܠ ܕܫܰܢܺܝ ܦܽܘܩܕܳܢܶܗ. ܦܠܰܚ ܠܐ̱ܢܳܫܰܝ̈ ܚܡܽܘܪ ܐܰܒܽܘܗܝ ܕܰܫܟܺܝܡ. ܡܶܛܽܠ ܡܳܢܳܐ ܢܶܦܠܚܺܝܘܗܝ ܚܢܰܢ.

²⁹ ܡܰܢ ܕܶܝܢ ܐܰܫܠܡܶܗ ܠܥܰܡܳܐ ܗܳܢܳܐ ܒܺܐܝܕܰܝ̈. ܘܰܐܥܒܰܪܬܶܗ ܠܰܐܒܺܝܡܠܰܟ. ܘܶܐܡܰܪ ܠܰܐܒܺܝܡܠܰܟ. ܐܰܣܓܳܐ ܚܰܝܠܳܟ. ܘܦܽܘܩ.

³⁰ ܘܰܫܡܰܥ ܙܳܒܳܠ ܫܰܠܺܝܛܳܐ ܕܰܩܪܺܝܬܳܐ ܡܶܠܰܘ̈ܗܝ ܕܓܳܥܶܠ ܒܰܪ ܥܳܦܳܪ. ܘܶܐܬܚܰܡܰܬ ܪܽܘܓܙܶܗ.

³¹ ܘܫܰܕܰܪ ܐܺܝܙܓܰܕ̈ܶܐ ܠܘܳܬ ܐܰܒܺܝܡܠܶܟ ܒܢܶܟܠܳܐ. ܘܶܐܡܰܪ. ܗܳܐ ܓܳܥܶܠ ܒܰܪ ܥܳܦܳܪ ܗܽܘ ܘܰܐܚܰܘ̈ܗܝ ܐܶܬܰܘ ܠܰܫܟܺܝܡ. ܘܗܳܐ ܚܕܺܝܪܺܝܢ ܠܰܩܪܺܝܬܳܐ ܥܠܰܝܟ.

³² ܗܳܫܳܐ ܩܽܘܡ ܒܠܺܠܝܳܐ ܐܰܢ̱ܬ ܘܥܰܡܳܐ ܕܥܰܡܳܟ. ܘܶܐܬܟܡܰܢܘ ܒܕܰܒܪܳܐ.

³³ ܘܰܒܨܰܦܪܳܐ ܡܳܐ ܕܕܶܢܚܰܬ ܫܶܡܫܳܐ. ܩܽܘܡ ܘܗܰܠܶܟ ܥܰܠ ܩܪܺܝܬܳܐ. ܘܗܳܐ ܗܽܘ ܘܥܰܡܳܐ ܕܥܰܡܶܗ ܢܳܦܩܺܝܢ ܠܘܳܬܳܟ. ܥܒܶܕ ܠܗܽܘܢ ܐܰܟܡܳܐ ܕܣܳܦܩܳܐ ܒܺܐܝܕܰܝ̈ܟ.

³⁴ ܘܩܳܡ ܐܰܒܺܝܡܠܶܟ ܘܥܰܡܳܐ ܟܽܠܶܗ ܕܥܰܡܶܗ ܒܠܺܠܝܳܐ. ܘܶܐܬܟܡܶܢܘ ܥܰܠ ܫܟܺܝܡ ܐܰܪܒܥܳܐ ܖ̈ܺܝܫܺܝܢ.

³⁵ ܘܰܢܦܰܩ ܓܳܥܶܠ ܒܰܪ ܥܳܦܳܪ. ܘܩܳܡ ܒܡܰܥܠܳܢܳܐ ܕܬܰܪܥܳܐ ܕܰܩܪܺܝܬܳܐ. ܘܩܳܡ ܐܰܒܺܝܡܠܶܟ ܘܥܰܡܳܐ ܕܥܰܡܶܗ ܡܶܢ ܟܡܺܐܢܳܐ.

³⁶ ܘܰܚܙܳܐ ܓܳܥܶܠ ܠܥܰܡܳܐ ܘܶܐܡܰܪ ܠܙܳܒܳܠ. ܗܳܐ ܥܰܡܳܐ ܢܳܚܬܺܝܢ ܡܶܢ ܖ̈ܺܝܫܰܝ ܛܽܘܪܳܐ. ܘܶܐܡܰܪ ܠܶܗ ܙܳܒܳܠ. ܛܶܠܳܠܳܐ ܗܽܘ ܕܛܽܘܪܳܐ ܚܳܙܶܐ ܐܰܢ̱ܬ ܐܰܝܟ ܐ̱ܢܳܫ̈ܳܐ.

³⁷ ܘܰܐܘܣܶܦ ܓܳܥܶܠ ܘܶܐܡܰܪ ܠܙܳܒܳܠ. ܗܳܐ ܥܰܡܳܐ ܢܳܚܬܺܝܢ ܡܶܢ ܬܽܘܩܢܳܗ̇ ܕܰܐܪܥܳܐ. ܘܪܺܝܫܳܐ ܚܰܕ ܐܳܬܶܐ ܡܶܢ ܐܽܘܪܚܳܐ ܕܒܶܝܬ ܒܰܠܽܘܛܳܐ ܕܰܡܥܽܘܢܺܝܢ.

³⁸ ܐܳܡܰܪ ܠܶܗ ܙܳܒܳܠ. ܐܰܝܟܰܘ ܦܽܘܡܳܟ ܗܰܘ ܕܳܐܡܰܪ ܗܘܳܐ. ܕܡܰܢܽܘ ܐܰܒܺܝܡܠܶܟ ܕܢܶܦܠܚܺܝܘܗܝ. ܠܳܐ ܗܘܳܐ ܗܳܢܳܐ ܥܰܡܳܐ ܕܰܐܣܠܺܝܬ. ܦܽܘܩ ܗܳܫܳܐ ܘܶܐܬܟܰܬܰܫ ܥܰܡܶܗ.

³⁹ ܘܰܢܦܰܩ ܓܳܥܶܠ ܩܕܳܡ ܡܳܖ̈ܶܝܗ̇ ܕܰܫܟܺܝܡ. ܘܶܐܬܟܰܬܫ ܥܰܡ ܐܰܒܺܝܡܠܶܟ.

⁴⁰ ܘܪܰܕܦܶܗ ܐܰܒܺܝܡܠܶܟ ܘܰܥܪܰܩ ܡܶܢ ܩܕܳܡܰܘ̈ܗܝ. ܘܰܢܦܰܠܘ ܩܛܺܝ̈ܠܶܐ ܣܰܓܺܝ̈ܐܶܐ. ܥܕܰܡܳܐ ܠܡܰܥܠܳܢܳܐ ܕܬܰܪܥܳܐ.

⁴¹ ܘܺܝܬܶܒ ܐܰܒܺܝܡܠܶܟ ܒܰܐܕܽܘܡܳܐ. ܘܰܛܪܰܕ ܙܳܒܳܠ ܠܓܳܥܶܠ ܘܠܰܐܚܰܘ̈ܗܝ ܕܠܳܐ ܢܶܬܒܽܘܢ ܒܰܫܟܺܝܡ.

⁴² ܘܰܗܘܳܐ ܡܶܢ ܒܳܬܰܪ ܝܰܘܡܳܐ. ܘܰܢܦܰܩܘ ܥܰܡܳܐ ܠܕܰܒܪܳܐ. ܘܚܰܘܺܝܘ ܠܰܐܒܺܝܡܠܰܟ.

⁴³ ܘܰܕܒܰܪ ܠܥܰܡܳܐ. ܘܦܰܠܶܓ ܐܶܢܽܘܢ ܠܰܬܠܳܬܳܐ ܖ̈ܺܝܫܺܝܢ. ܘܶܐܬܟܡܶܢ ܒܕܰܒܪܳܐ. ܘܰܚܙܳܐ ܘܗܳܐ ܥܰܡܳܐ ܢܳܦܶܩ ܡܶܢ ܩܪܺܝܬܳܐ. ܘܩܳܡ ܥܠܰܝܗܽܘܢ. ܘܩܰܛܶܠ ܐܶܢܽܘܢ.

⁴⁴ ܘܰܐܒܺܝܡܠܶܟ ܘܖ̈ܺܝܫܶܐ ܕܥܰܡܶܗ. ܗܰܠܶܟܘ ܘܩܳܡܘ ܒܡܰܥܠܳܢܳܐ ܕܬܰܪܥܳܐ ܕܰܩܪܺܝܬܳܐ. ܘܰܬܪܶܝܢ ܖ̈ܺܝܫܺܝܢ ܗܰܠܶܟܘ ܥܰܠ ܟܽܠ ܕܰܒܡܰܕܒܪܳܐ ܘܩܰܛܶܠܘ ܐܶܢܽܘܢ.

⁴⁵ ܘܰܐܒܺܝܡܠܶܟ ܐܶܬܟܰܬܰܫ ܒܰܩܪܺܝܬܳܐ ܟܽܠܶܗ ܝܰܘܡܳܐ ܗܰܘ. ܘܟܰܒܫܳܗ̇ ܠܰܩܪܺܝܬܳܐ ܘܰܠܟܽܠܶܗ ܥܰܡܳܐ ܕܺܐܝܬ ܒܳܗ̇ ܩܰܛܶܠ. ܘܥܰܩܪܳܗ̇ ܠܰܩܪܺܝܬܳܐ ܘܙܰܪܥܳܗ̇ ܡܰܠܽܘܚܳܐ.

⁴⁶ ܘܰܫܡܰܥܘ ܟܽܠܗܽܘܢ ܡܳܖ̈ܶܝܗ̇ ܕܡܰܓܕܰܠ ܫܟܺܝܡ. ܘܶܐܬܰܘ ܠܡܶܦܣܰܩ ܒܒܶܝܬ ܐܺܝܠ ܩܝܳܡܳܐ.

⁴⁷ ܘܚܰܘܺܝܘ ܠܰܐܒܺܝܡܠܰܟ ܕܶܐܬܟܰܢܰܫܘ ܟܽܠܗܽܘܢ ܡܳܖ̈ܶܝܗ̇ ܕܡܰܓܕܰܠ ܫܟܺܝܡ.

⁴⁸ ܘܰܣܠܶܩ ܐܰܒܺܝܡܠܶܟ ܠܛܽܘܪܳܐ ܕܨܰܠܡܽܘܢ. ܘܟܽܠܶܗ ܥܰܡܳܐ ܕܥܰܡܶܗ. ܘܰܢܣܰܒ ܐܰܒܺܝܡܠܶܟ ܢܳܪܓܳܐ ܒܺܐܝܕܶܗ. ܘܰܦܣܰܩ ܣܰܘܟܬܳܐ ܕܩܰܝ̈ܣܶܐ. ܘܫܰܩܠܳܗ̇ ܘܣܳܡܳܗ̇ ܥܰܠ ܟܰܬܦܶܗ. ܘܶܐܡܰܪ ܠܥܰܡܳܐ ܕܥܰܡܶܗ. ܡܳܐ ܕܰܚܙܰܝܬܽܘܢ ܕܥܶܒܕܶܬ. ܥܒܶܕܘ ܐܳܦ ܐܰܢ̱ܬܽܘܢ ܒܰܥܓܰܠ ܐܰܟܘܳܬܝ.

⁴⁹ ܘܰܦܣܰܩܘ ܓܒܰܪ ܣܰܘܟܬܶܗ. ܘܶܐܙܰܠ ܒܳܬܰܪ ܐܰܒܺܝܡܠܶܟ. ܘܣܳܡ ܟܳܫܺܝܬܳܐ ܘܰܐܘܩܕܳܗ̇ ܠܰܩܪܺܝܬܳܐ ܒܢܽܘܪܳܐ. ܘܡܺܝܬܘ ܟܽܠܗܽܘܢ ܐ̱ܢܳܫ̈ܳܐ ܕܺܐܝܬ ܒܡܰܓܕܰܠ ܫܟܺܝܡ ܒܢܽܘܪܳܐ. ܐܰܝܟ ܐܳܠܶܦ. ܒܶܝܬ ܓܰܒܖ̈ܶܐ ܠܢܶܫ̈ܶܐ.

⁵⁰ ܘܶܐܙܰܠ ܐܰܒܺܝܡܠܶܟ ܠܬܒܳܨ. ܘܰܫܪܳܐ ܒܬܒܳܨ ܘܰܐܚܕܳܗ̇.

⁵¹ ܘܡܰܓܕܠܳܐ ܥܰܫܺܝܢܳܐ ܗܘܳܐ ܒܓܰܘܳܗ̇ ܕܰܩܪܺܝܬܳܐ. ܘܰܥܪܰܩܘ ܠܬܰܡܳܢ ܟܽܠܗܽܘܢ ܓܰܒܪܳܐ ܘܢܶܫ̈ܶܐ. ܘܟܽܠܗܽܘܢ ܡܳܖ̈ܶܝܗ̇ ܕܰܩܪܺܝܬܳܐ. ܘܶܐܚܰܕܘ ܒܰܐܦܰܝ̈ܗܽܘܢ. ܘܰܣܠܶܩܘ ܠܶܐܓܳܪܳܐ ܕܡܰܓܕܠܳܐ.

⁵² ܘܡܰܛܺܝ ܐܰܒܺܝܡܠܶܟ ܥܕܰܡܳܐ ܠܡܰܓܕܠܳܐ ܘܡܶܬܟܰܬܰܫ ܒܶܗ. ܘܰܩܪܶܒ ܥܕܰܡܳܐ ܠܬܰܪܥܳܐ ܕܡܰܓܕܠܳܐ ܕܢܰܘܩܕܺܝܘܗܝ ܒܢܽܘܪܳܐ.

⁵³ ܘܰܫܕܳܬ ܐܰܢ̱ܬܬܳܐ ܚܕܳܐ ܬܒܳܪܳܐ ܕܪܰܟܒܳܐ ܕܪܰܚܝܳܐ ܥܰܠ ܪܺܝܫܶܗ ܕܰܐܒܺܝܡܠܶܟ. ܘܰܬܒܰܪܬܶܗ ܠܪܺܝܫܶܗ.

⁵⁴ ܘܰܩܪܳܐ ܡܣܰܪܗܒܳܐܺܝܬ ܠܛܰܠܝܳܐ ܫܳܩܶܠ ܡܳܐܢܰܘ̈ܗܝ. ܘܶܐܡܰܪ ܠܶܗ. ܫܡܽܘܛ ܣܰܝܦܳܟ ܘܰܩܛܽܘܠܰܝܢܝ ܒܶܗ. ܕܠܳܐ ܢܺܐܡܪܽܘܢ ܥܠܰܝ ܕܰܐܢ̱ܬܬܳܐ ܩܛܰܠܬܶܗ. ܘܕܰܩܪܶܗ ܥܠܰܝܡܳܐ ܘܡܺܝܬ.

⁵⁵ ܘܰܚܙܰܘ ܒܢܰܝ̈ ܝܺܣܪܳܐܶܝܠ ܕܡܺܝܬ ܠܶܗ ܐܰܒܺܝܡܠܶܟ. ܘܶܐܙܰܠܘ ܐ̱ܢܳܫ ܠܰܐܬܪܶܗ.

⁵⁶ ܘܦܰܪܥܶܗ ܐܰ‌ܠܳܗܳܐ ܒܺܝܫܬܳܐ ܠܰܐܒܺܝܡܠܶܟ ܕܰܥܒܰܕ ܠܰܐܒܽܘܗܝ. ܘܩܰܛܶܠ ܠܫܰܒܥܺܝܢ ܐܰܚܰܘ̈ܗܝ.

⁵⁷ ܘܟܽܠܳܗ̇ ܒܺܝܫܬܳܐ ܕܰܥܒܰܕܘ ܐ̱ܢܳܫܰܝ̈ ܫܟܺܝܡ. ܐܰܗܦܶܟ ܐܰ‌ܠܳܗܳܐ ܒܪܺܝܫܗܽܘܢ. ܘܶܐܬܳܬ ܥܠܰܝܗܽܘܢ ܟܽܠܳܗ̇ ܠܰܘܛܬܶܗ ܕܝܽܘܬܳܡ ܒܰܪ ܢܕܽܘܒܥܺܝܠ.