Salmi תהילים (Tehillim) 58

¹ לַמְנַצֵּחַ אַל־תַּשְׁחֵת לְדָוִד מִכְתָּֽם׃

² הַאֻמְנָם אֵלֶם צֶדֶק תְּדַבֵּרוּןמֵישָׁרִים תִּשְׁפְּטוּ בְּנֵי אָדָֽם׃

³ אַף־בְּלֵב עוֹלֹת תִּפְעָלוּןבָּאָרֶץ חֲמַס יְדֵיכֶם תְּפַלֵּסֽוּן׃

⁴ זֹרוּ רְשָׁעִים מֵרָחֶםתָּעוּ מִבֶּטֶן דֹּבְרֵי כָזָֽב׃

⁵ חֲמַת־לָמוֹ כִּדְמוּת חֲמַת־נָחָשׁכְּמוֹ־פֶתֶן חֵרֵשׁ יַאְטֵם אׇזְנֽוֹ׃

⁶ אֲשֶׁר לֹֽא־יִשְׁמַע לְקוֹל מְלַחֲשִׁיםחוֹבֵר חֲבָרִים מְחֻכָּֽם׃

⁷ אֱֽלֹהִים הֲרׇס־שִׁנֵּימוֹ בְּפִימוֹמַלְתְּעוֹת כְּפִירִים נְתֹץ ׀ יְהֹוָֽה׃

⁸ יִמָּאֲסוּ כְמוֹ־מַיִם יִתְהַלְּכוּ־לָמוֹיִדְרֹךְ חִצָּו כְּמוֹ יִתְמֹלָֽלוּ׃

⁹ כְּמוֹ שַׁבְּלוּל תֶּמֶס יַהֲלֹךְנֵפֶל אֵשֶׁת בַּל־חָזוּ שָֽׁמֶשׁ׃

¹⁰ בְּטֶרֶם ׀ יָבִינוּ סִּירֹתֵכֶם אָטָדכְּמוֹ־חַי כְּמוֹ־חָרוֹן יִשְׂעָרֶֽנּוּ׃

¹¹ יִשְׂמַח צַדִּיק כִּי־חָזָה נָקָםפְּעָמָיו יִרְחַץ בְּדַם הָרָשָֽׁע׃

¹² וְיֹאמַר אָדָם אַךְ־פְּרִי לַצַּדִּיקאַךְ יֵשׁ־אֱלֹהִים שֹׁפְטִים בָּאָֽרֶץ׃