Salmi תהילים (Tehillim) 148

Miqra 'al pi ha-Mesorah	Modern Hebrew Bible
¹ הַלְלוּ יָהּ ׀הַֽלְלוּ אֶת־יְהֹוָה מִן־הַשָּׁמַיִםהַֽלְלוּהוּ בַּמְּרוֹמִֽים׃	¹ הללו יה הללו את יהוה מן השמים הללוהו במרומים
² הַֽלְלוּהוּ כׇל־מַלְאָכָיוהַלְלוּהוּ כׇּל־צְבָאָֽו׃	² הללוהו כל מלאכיו הללוהו כל צבאו
³ הַֽלְלוּהוּ שֶׁמֶשׁ וְיָרֵחַהַֽלְלוּהוּ כׇּל־כּוֹכְבֵי אֽוֹר׃	³ הללוהו שמש וירח הללוהו כל כוכבי אור
⁴ הַֽלְלוּהוּ שְׁמֵי הַשָּׁמָיִםוְהַמַּיִם אֲשֶׁר ׀ מֵעַל הַשָּׁמָֽיִם׃	⁴ הללוהו שמי השמים והמים אשר מעל השמים
⁵ יְֽהַלְלוּ אֶת־שֵׁם יְהֹוָהכִּי הוּא צִוָּה וְנִבְרָֽאוּ׃	⁵ יהללו את שם יהוה כי הוא צוה ונבראו
⁶ וַיַּעֲמִידֵם לָעַד לְעוֹלָםחׇק־נָתַן וְלֹא יַעֲבֽוֹר׃	⁶ ויעמידם לעד לעולם חק נתן ולא יעבור
⁷ הַֽלְלוּ אֶת־יְהֹוָה מִן־הָאָרֶץתַּנִּינִים וְכׇל־תְּהֹמֽוֹת׃	⁷ הללו את יהוה מן הארץ תנינים וכל תהמות
⁸ אֵשׁ וּבָרָד שֶׁלֶג וְקִיטוֹררוּחַ סְעָרָה עֹשָׂה דְבָרֽוֹ׃	⁸ אש וברד שלג וקיטור רוח סערה עשה דברו
⁹ הֶהָרִים וְכׇל־גְּבָעוֹתעֵץ פְּרִי וְכׇל־אֲרָזִֽים׃	⁹ ההרים וכל גבעות עץ פרי וכל ארזים
¹⁰ הַחַיָּה וְכׇל־בְּהֵמָהרֶמֶשׂ וְצִפּוֹר כָּנָֽף׃	¹⁰ החיה וכל בהמה רמש וצפור כנף
¹¹ מַלְכֵי־אֶרֶץ וְכׇל־לְאֻמִּיםשָׂרִים וְכׇל־שֹׁפְטֵי אָֽרֶץ׃	¹¹ מלכי ארץ וכל לאמים שרים וכל שפטי ארץ
¹² בַּחוּרִים וְגַם־בְּתוּלוֹתזְקֵנִים עִם־נְעָרִֽים׃	¹² בחורים וגם בתולות זקנים עם נערים
¹³ יְהַלְלוּ ׀ אֶת־שֵׁם יְהֹוָהכִּֽי־נִשְׂגָּב שְׁמוֹ לְבַדּוֹהוֹדוֹ עַל־אֶרֶץ וְשָׁמָֽיִם׃	¹³ יהללו את שם יהוה כי נשגב שמו לבדו הודו על ארץ ושמים
¹⁴ וַיָּרֶם קֶרֶן ׀ לְעַמּוֹ תְּהִלָּה לְֽכׇל־חֲסִידָיולִבְנֵי יִשְׂרָאֵל עַם קְרֹבוֹהַֽלְלוּ־יָֽהּ׃	¹⁴ וירם קרן לעמו תהלה לכל חסידיו לבני ישראל עם קרבו הללו יה