Yermĭyahu ( ירמיהו) - Geremia 3

MODERN HEBREW BIBLE	STUTTGARTENSIA-DELITZSCH
1 בני תורתי אל תשכח ומצותי יצר לבך	1 בְּנִי תֹּורָתִי אַל־תִּשְׁכָּח וּמִצְוֹתַי יִצֹּר לִבֶּךָ
2 כי ארך ימים ושנות חיים ושלום יוסיפו לך	2 כִּי אֹרֶךְ יָמִים וּשְׁנֹות חַיִּים וְשָׁלֹום יֹוסִיפוּ לָךְ
3 חסד ואמת אל יעזבך קשרם על גרגרותיך כתבם על לוח לבך	3 חֶסֶד וֶאֱמֶת אַל־יַעַזְבֻךָ קָשְׁרֵם עַל־גַּרְגְּרֹותֶיךָ כָּתְבֵם עַל־לוּחַ לִבֶּךָ
4 ומצא חן ושכל טוב בעיני אלהים ואדם	4 וּמְצָא־חֵן וְשֵׂכֶל־טֹוב בְּעֵינֵי אֱלֹהִים וְאָדָם׃ פ
5 בטח אל יהוה בכל לבך ואל בינתך אל תשען	5 בְּטַח אֶל־יְהוָה בְּכָל־לִבֶּךָ וְאֶל־בִּינָתְךָ אַל־תִּשָּׁעֵן
6 בכל דרכיך דעהו והוא יישר ארחתיך	6 בְּכָל־דְּרָכֶיךָ דָעֵהוּ וְהוּא יְיַשֵּׁר אֹרְחֹתֶיךָ
7 אל תהי חכם בעיניך ירא את יהוה וסור מרע	7 אַל־תְּהִי חָכָם בְּעֵינֶיךָ יְרָא אֶת־יְהוָה וְסוּר מֵרָע
8 רפאות תהי לשרך ושקוי לעצמותיך	8 רִפְאוּת תְּהִי לְשָׁרֶּךָ וְשִׁקּוּי לְעַצְמֹותֶיךָ
9 כבד את יהוה מהונך ומראשית כל תבואתך	9 כַּבֵּד אֶת־יְהוָה מֵהֹונֶךָ וּמֵרֵאשִׁית כָּל־תְּבוּאָתֶךָ
10 וימלאו אסמיך שבע ותירוש יקביך יפרצו	10 וְיִמָּלְאוּ אֲסָמֶיךָ שָׂבָע וְתִירֹושׁ יְקָבֶיךָ יִפְרֹצוּ׃ פ
11 מוסר יהוה בני אל תמאס ואל תקץ בתוכחתו	11 מוּסַר יְהוָה בְּנִי אַל־תִּמְאָס וְאַל־תָּקֹץ בְּתֹוכַחְתֹּו
12 כי את אשר יאהב יהוה יוכיח וכאב את בן ירצה	12 כִּי אֶת אֲשֶׁר יֶאֱהַב יְהוָה יֹוכִיחַ וּכְאָב אֶת־בֵּן יִרְצֶה
13 אשרי אדם מצא חכמה ואדם יפיק תבונה	13 אַשְׁרֵי אָדָם מָצָא חָכְמָה וְאָדָם יָפִיק תְּבוּנָה
14 כי טוב סחרה מסחר כסף ומחרוץ תבואתה	14 כִּי טֹוב סַחְרָהּ מִסְּחַר־כָּסֶף וּמֵחָרוּץ תְּבוּאָתָהּ
15 יקרה היא מפניים וכל חפציך לא ישוו בה	15 יְקָרָה הִיא [מִפְּנִיִּים כ] (מִפְּנִינִים ק) וְכָל־חֲפָצֶיךָ לֹא יִשְׁווּ־בָהּ
16 ארך ימים בימינה בשמאולה עשר וכבוד	16 אֹרֶךְ יָמִים בִּימִינָהּ בִּשְׂמֹאולָהּ עֹשֶׁר וְכָבֹוד
17 דרכיה דרכי נעם וכל נתיבותיה שלום	17 דְּרָכֶיהָ דַרְכֵי־נֹעַם וְכָל־נְתִיבֹותֶיהָ שָׁלֹום
18 עץ חיים היא למחזיקים בה ותמכיה מאשר	18 עֵץ־חַיִּים הִיא לַמַּחֲזִיקִים בָּהּ וְתֹמְכֶיהָ מְאֻשָּׁר׃ פ
19 יהוה בחכמה יסד ארץ כונן שמים בתבונה	19 יְהוָה בְּחָכְמָה יָסַד־אָרֶץ כֹּונֵן מַיִם בִּתְבוּנָה
20 בדעתו תהומות נבקעו ושחקים ירעפו טל	20 בְּדַעְתֹּו תְּהֹומֹות נִבְקָעוּ וּשְׁחָקִים יִרְעֲפוּ־טָל
21 בני אל ילזו מעיניך נצר תשיה ומזמה	21 בְּנִי אַל־יָלֻזוּ מֵעֵינֶיךָ נְצֹר תֻּשִׁיָּה וּמְזִמָּה
22 ויהיו חיים לנפשך וחן לגרגרתיך	22 וְיִהְיוּ חַיִּים לְנַפְשֶׁךָ וְחֵן לְגַרְגְּרֹתֶיךָ
23 אז תלך לבטח דרכך ורגלך לא תגוף	23 אָז תֵּלֵךְ לָבֶטַח דַּרְכֶּךָ וְרַגְלְךָ לֹא תִגֹּוף
24 אם תשכב לא תפחד ושכבת וערבה שנתך	24 אִם־תִּשְׁכַּב לֹא־תִפְחָד וְשָׁכַבְתָּ וְעָרְבָה שְׁנָתֶךָ
25 אל תירא מפחד פתאם ומשאת רשעים כי תבא	25 אַל־תִּירָא מִפַּחַד פִּתְאֹם וּמִשֹּׁאַת רְשָׁעִים כִּי תָבֹא
26 כי יהוה יהיה בכסלך ושמר רגלך מלכד	26 כִּי־יְהוָה יִהְיֶה בְכִסְלֶךָ וְשָׁמַר רַגְלְךָ מִלָּכֶד
27 אל תמנע טוב מבעליו בהיות לאל ידיך לעשות	27 אַל־תִּמְנַע־טֹוב מִבְּעָלָיו בִּהְיֹות לְאֵל [יָדֶיךָ כ] (יָדְךָ ק) לַעֲשֹׂות
28 אל תאמר לרעיך לך ושוב ומחר אתן ויש אתך	28 אַל־תֹּאמַר [לְרֵעֶיךָ כ] (לְרֵעֲךָ ׀ ק) לֵךְ וָשׁוּב וּמָחָר אֶתֵּן וְיֵשׁ אִתָּךְ
29 אל תחרש על רעך רעה והוא יושב לבטח אתך	29 אַל־תַּחֲרֹשׁ עַל־רֵעֲךָ רָעָה וְהוּא־יֹושֵׁב לָבֶטַח אִתָּךְ
30 אל תרוב עם אדם חנם אם לא גמלך רעה	30 אַל־ [תָּרֹוב כ] (תָּרִיב ק) עִם־אָדָם חִנָּם אִם־לֹא גְמָלְךָ רָעָה
31 אל תקנא באיש חמס ואל תבחר בכל דרכיו	31 אַל־תְּקַנֵּא בְּאִישׁ חָמָס וְאַל־תִּבְחַר בְּכָל־דְּרָכָיו
32 כי תועבת יהוה נלוז ואת ישרים סודו	32 כִּי תֹועֲבַת יְהוָה נָלֹוז וְאֶת־יְשָׁרִים סֹודֹו
33 מארת יהוה בבית רשע ונוה צדיקים יברך	33 מְאֵרַת יְהוָה בְּבֵית רָשָׁע וּנְוֵה צַדִּיקִים יְבָרֵךְ
34 אם ללצים הוא יליץ ולעניים יתן חן	34 אִם־לַלֵּצִים הוּא־יָלִיץ [וְלַעֲנִיִּים כ] (וְלַעֲנָוִים ק) יִתֶּן־חֵן
35 כבוד חכמים ינחלו וכסילים מרים קלון	35 כָּבֹוד חֲכָמִים יִנְחָלוּ וּכְסִילִים מֵרִים קָלֹון׃ פ