Numeri ܡܢܝܢܐ 32

¹ ܘܩܶܢܝܳܢܳܐ ܪܰܒܳܐ ܗܘܳܐ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ. ܕܛܳܒ ܥܰܫܺܝܢ. ܘܰܚܙܰܐܗ̇ ܠܝܰܥܙܺܝܪ. ܘܠܰܐܪܥܳܐ ܕܓܶܠܥܳܕ. ܐܰܬܪܳܐ ܕܳܐܙܶܠ ܠܒܶܝܬ ܩܶܢܝܳܢܳܐ.

² ܘܶܐܬܰܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ. ܘܶܐܡܰܪܘ ܠܡܽܘܫܶܐ ܘܠܶܐܠܺܝܥܳܙܳܪ ܟܳܗܢܳܐ. ܘܰܠܪܰܘܖ̈ܒܳܢܶܐ ܕܰܟܢܽܘܫܬܳܐ.

³ ܥܶܛܪܽܘܬ. ܘܪܺܝܒܽܘܢ. ܘܝܰܥܙܺܝܪ. ܘܢܰܡܪܳܐ. ܘܚܶܫܒܽܘܢ. ܘܰܐܠܥܰܠܳܐ. ܘܰܫܒܳܐ. ܘܢܳܒܽܘ. ܘܒܰܥܽܘܢ.

⁴ ܐܰܪܥܳܐ ܕܰܚܪܶܒ ܡܳܪܝܳܐ ܩܕܳܡ ܒܢܰܝ̈ ܝܺܣܪܳܐܶܝܠ. ܐܰܪܥܳܐ ܗ̱ܝ ܕܳܐܙܠܳܐ ܠܒܶܝܬ ܩܶܢܝܳܢܳܐ. ܘܰܠܥܰܒ̈ܕܰܝܟ ܐܺܝܬ ܩܶܢܝܳܢܳܐ.

⁵ ܘܶܐܡܰܪܘ. ܐܶܢ ܐܶܫܟܰܚܢ ܖ̈ܰܚܡܶܐ ܩܕܳܡܰܝܟ. ܬܶܬܺܝܗܶܒ ܐܰܪܥܳܐ ܗܳܕܶܐ ܠܥܰܒܕܰܝ̈ܟ ܝܽܘܪܬܳܢܳܐ. ܘܠܳܐ ܬܰܥܒܪܰܢ ܝܽܘܪܕܢܳܢ.

⁶ ܘܶܐܡܰܪ ܡܽܘܫܶܐ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ. ܐܰܚܰܝ̈ܟܽܘܢ ܢܳܦܩܺܝܢ ܠܰܩܪܳܒܳܐ. ܘܰܐܢ̱ܬܽܘܢ ܝܳܬܒܺܝܬܽܘܢ ܗܳܪܟܳܐ.

⁷ ܠܡܳܢܳܐ ܬܳܒܪܺܝܢ ܐ̱ܢܬܽܘܢ ܠܶܒܳܐ ܕܰܐܚܰܝ̈ܟܽܘܢ ܒܢܰܝ̈ ܝܺܣܪܳܐܶܝܠ ܕܠܳܐ ܢܶܥܒܪܽܘܢ ܠܰܐܪܥܳܐ ܕܝܰܗܒ ܠܗܽܘܢ ܡܳܪܝܳܐ.

⁸ ܗܳܟܰܢܳܐ ܥܒܰܕܘ ܐܰܒܳܗܰܝ̈ܟܽܘܢ ܟܰܕ ܫܰܕܪܶܬ ܐܶܢܽܘܢ ܡܶܢ ܪܩܶܡ ܕܓܰܐܝܳܐ ܠܡܶܓܰܫ ܐܰܪܥܳܐ.

⁹ ܘܰܣܠܶܩܘ ܥܕܰܡܳܐ ܠܢܰܚܠܳܐ ܕܰܣܓܽܘܠܳܐ. ܘܰܚܙܰܐܗ̇ ܠܰܐܪܥܳܐ. ܘܰܬܒܰܪܘ ܠܶܒܳܐ ܕܰܒܢܰܝ̈ ܝܺܣܪܳܐܶܝܠ. ܕܠܳܐ ܢܶܥܠܽܘܢ ܠܰܐܪܥܳܐ ܕܝܰܗܒ ܠܗܽܘܢ ܡܳܪܝܳܐ.

¹⁰ ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܠܰܝܗܽܘܢ ܒܝܰܘܡܳܐ ܗܰܘ. ܘܺܝܡܳܐ. ܘܶܐܡܰܪ.

¹¹ ܕܠܳܐ ܢܶܚܙܽܘܢ ܓܰܒܖ̈ܶܐ ܕܰܣܠܶܩܘ ܡܶܢ ܡܶܨܪܶܝܢ ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ ܐܰܪܥܳܐ ܕܺܝܡܺܝܬ ܠܰܐܒܪܳܗܳܡ. ܘܠܺܐܝܣܚܳܩ ܘܰܠܝܰܥܩܽܘܒ. ܡܶܛܽܠ ܕܠܳܐ ܫܰܡܠܺܝܘ ܒܳܬܰܪܝ.

¹² ܐܶܠܳܐ ܐܶܢ ܟܳܠܳܒ ܒܰܪ ܝܽܘܦܢܳܐ ܩܰܢܙܳܝܳܐ. ܘܝܶܫܽܘܥ ܒܰܪܢܽܘܢ. ܕܫܰܡܠܺܝܘ ܒܳܬܰܪ ܡܳܪܝܳܐ.

¹³ ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ ܥܰܠ ܝܺܣܪܳܐܶܝܠ. ܘܰܐܛܥܺܝ ܐܶܢܽܘܢ ܒܡܰܕܒܪܳܐ ܐܰܪܒܥܺܝܢ ܫܢܺܝ̈ܢ. ܥܕܰܡܳܐ ܕܣܳܦܘ ܟܽܠܶܗ ܕܳܪܳܐ ܕܰܥܒܰܕܘ ܒܺܝܫܬܳܐ ܩܕܳܡ ܡܳܪܝܳܐ.

¹⁴ ܘܗܳܐ ܩܳܡܬܽܘܢ ܐܳܦ ܐܰܢ̱ܬܽܘܢ ܝܰܘܡܳܢܳܐ ܚܠܳܦ ܐܰܒܳܗܰܝ̈ܟܽܘܢ ܬܰܪܒܺܝܬܳܐ ܕܓܰܒܖ̈ܶܐ ܚܰܛܳܝ̈ܶܐ. ܕܬܰܘܣܦܽܘܢ ܬܽܘܒ ܪܽܘܓܙܶܗ ܕܡܳܪܝܳܐ ܥܰܠ ܝܺܣܪܳܐܶܝܠ.

¹⁵ ܘܶܐܢ ܬܶܗܦܟܽܘܢ ܬܽܘܒ ܡܶܢ ܡܳܪܝܳܐ. ܢܰܘܣܶܦ ܬܽܘܒ ܠܡܰܛܥܳܝܽܘܬܟܽܘܢ ܒܡܰܕܒܪܳܐ. ܘܰܡܚܰܒܠܺܝܢ ܐ̱ܢܬܽܘܢ ܥܰܠ ܗܳܢܳܐ ܟܽܠܶܗ ܥܰܡܳܐ.

¹⁶ ܘܰܩܪܶܒܘ ܠܘܳܬܶܗ ܘܶܐܡܰܪܘ. ܛܝܳܖ̈ܶܐ ܕܥܳܢ̈ܳܐ ܢܶܒܢܶܐ ܠܩܶܢܝܳܢܰܢ ܗܳܪܟܳܐ. ܘܩܽܘܖ̈ܝܳܐ ܠܺܝܩܰܪܬܰܢ.

¹⁷ ܘܰܚܢܰܢ ܢܶܙܕܰܝܰܢ. ܘܢܺܐܙܰܠ ܩܕܳܡ ܒܢܰܝ̈ ܝܺܣܪܳܐܶܝܠ. ܥܕܰܡܳܐ ܕܢܰܥܶܠ ܐܶܢܽܘܢ ܠܰܐܬܪܗܽܘܢ. ܘܺܝܩܰܪܬܰܢ ܬܶܬܶܒ ܒܩܽܘܖ̈ܝܳܐ ܥܰܫܺܝ̈ܢܳܬܳܐ ܡܶܢ ܩܕܳܡ ܥܳܡܽܘܖ̈ܶܝܗ̇ ܕܰܐܪܥܳܐ.

¹⁸ ܠܳܐ ܢܶܗܦܽܘܟ ܠܒܳܬܰܝ̈ܢ. ܥܕܰܡܳܐ ܕܢܺܐܪܬܽܘܢ ܒܢܰܝ̈ ܝܺܣܪܳܐܶܝܠ. ܐ̱ܢܳܫ ܝܳܪܬܽܘܬܶܗ.

¹⁹ ܘܠܳܐ ܢܺܐܪܰܬ ܥܰܡܗܽܘܢ ܡܶܢ ܥܶܒܪܳܐ ܕܝܽܘܪܕܢܳܢ ܘܰܠܗܰܠ. ܡܶܛܽܠ ܕܩܰܒܶܠܢ ܝܳܪܬܽܘܬܰܢ ܡܶܢ ܥܶܒܪܳܐ ܕܝܽܘܪܕܢܳܢ ܡܶܢ ܡܰܕܢܚܳܐ.

²⁰ ܘܶܐܡܰܪ ܠܗܽܘܢ ܡܽܘܫܶܐ. ܐܶܢ ܥܳܒܕܺܝܬܽܘܢ ܦܶܬܓܳܡܳܐ ܗܳܢܳܐ. ܘܡܶܙܕܰܝܢܺܝܢ ܐ̱ܢܬܽܘܢ ܩܕܳܡ ܡܳܪܝܳܐ ܠܰܩܪܳܒܳܐ.

²¹ ܘܥܳܒܪܺܝܢ ܐ̱ܢܬܽܘܢ ܝܽܘܪܕܢܳܢ ܟܽܠܟܽܘܢ ܟܰܕ ܡܙܰܝܢܺܝܢ ܐ̱ܢܬܽܘܢ ܩܕܳܡ ܡܳܪܝܳܐ ܠܰܩܪܳܒܳܐ. ܥܕܰܡܳܐ ܕܢܰܘܒܶܕ ܒܥܶܠܕܒܳܒܰܘ̈ܗܝ ܡܶܢ ܩܕܳܡܰܘܗܝ.

²² ܘܬܶܬܟܒܶܫ ܐܰܪܥܳܐ ܩܕܳܡ ܡܳܪܝܳܐ. ܗܳܝܕܶܝܢ ܬܶܗܦܟܽܘܢ. ܘܬܶܬܚܰܣܽܘܢ ܡܶܢ ܡܳܪܝܳܐ. ܘܡܶܢ ܝܺܣܪܳܐܶܝܠ. ܘܬܶܗܘܶܐ ܠܟܽܘܢ ܐܰܪܥܳܐ ܗܳܕܶܐ ܠܝܳܪܬܽܘܬܳܐ. ܩܕܳܡ ܡܳܪܝܳܐ.

²³ ܘܶܐܢ ܠܳܐ ܥܳܒܕܺܝܬܽܘܢ ܗܳܟܰܢܳܐ. ܚܳܛܶܝܢ ܐ̱ܢܬܽܘܢ ܠܡܳܪܝܳܐ. ܘܕܰܥܘ ܕܰܚܛܳܗܰܝ̈ܟܽܘܢ ܡܰܕܪܟܺܝܢ ܠܟܽܘܢ.

²⁴ ܒܢܰܘ ܠܟܽܘܢ ܩܽܘܖ̈ܝܳܐ ܠܺܝܩܰܪܬܟܽܘܢ. ܘܰܛܝܳܖ̈ܶܐ ܠܥܳܢ̈ܟܽܘܢ. ܘܡܶܕܶܡ ܕܰܢܦܰܩ ܡܶܢ ܦܽܘܡܟܽܘܢ ܥܒܶܕܘ.

²⁵ ܘܶܐܡܰܪܘ ܒܢܰܝ̈ ܪܽܘܒܺܝܠ ܘܰܒܢܰܝ̈ ܓܳܕ ܠܡܽܘܫܶܐ. ܥܰܒܕܰܝ̈ܟ ܢܶܥܒܕܽܘܢ ܐܰܝܟ ܕܡܳܪܰܢ ܦܳܩܰܕ.

²⁶ ܝܺܩܰܪܬܰܢ. ܘܢܶܫܰܝ̈ܢ. ܘܩܶܢܝܳܢܰܢ. ܘܟܽܠܶܗ ܒܥܺܝܪܰܢ. ܢܶܗܘܽܘܢ ܒܩܽܘܖ̈ܝܳܐ ܕܓܶܠܥܳܕ.

²⁷ ܘܥܰܒܕܰܝ̈ܟ ܢܶܥܒܪܽܘܢ ܟܰܕ ܡܙܰܝܢܺܝܢ ܒܚܰܝܠܳܐ ܩܕܳܡ ܡܳܪܝܳܐ ܠܰܩܪܳܒܳܐ ܐܰܝܟ ܕܡܳܪܰܢ ܐܶܡܰܪ.

²⁸ ܘܦܰܩܶܕ ܥܰܠ ܟܽܠܗܽܘܢ ܡܽܘܫܶܐ. ܠܶܐܠܺܝܥܳܙܳܪ ܟܳܗܢܳܐ. ܘܰܠܝܶܫܽܘܥ ܒܰܪܢܽܘܢ. ܘܰܠܖ̈ܺܝܫܶܐ ܕܫܰܒ̈ܛܶܐ ܕܰܐܒܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ.

²⁹ ܘܶܐܡܰܪ ܠܗܽܘܢ ܡܽܘܫܶܐ. ܐܶܢ ܥܳܒܪܺܝܢ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ ܥܰܡܟܽܘܢ ܝܽܘܪܕܢܳܢ ܟܰܕ ܡܙܰܝܢܺܝܢ ܩܕܳܡ ܡܳܪܝܳܐ ܠܰܩܪܳܒܳܐ. ܘܬܶܬܟܒܶܫ ܐܰܪܥܳܐ ܩܕܳܡܰܝܟܽܘܢ. ܬܶܬܠܽܘܢ ܠܗܽܘܢ ܐܰܪܥܳܐ ܕܓܶܠܥܳܕ ܝܽܘܪܬܳܢܳܐ.

³⁰ ܘܶܐܢ ܠܳܐ ܢܶܥܒܪܽܘܢ ܥܰܡܟܽܘܢ ܟܰܕ ܡܙܰܝܢܺܝܢ. ܢܺܐܪܬܽܘܢ ܥܰܡܟܽܘܢ ܐܰܪܥܳܐ ܕܰܟܢܰܥܢ.

³¹ ܘܰܥܢܰܘ ܒܢܰܝ̈ ܪܽܘܒܺܝܠ. ܘܰܒܢܰܝ̈ ܓܳܕ. ܘܶܐܡܰܪܘ ܠܡܽܘܫܶܐ. ܐܰܝܟ ܕܶܐܡܰܪ ܡܳܪܝܳܐ ܠܥܰܒܕܰܝ̈ܟ ܗܳܟܰܢܳܐ ܢܶܥܒܶܕ.

³² ܚܢܰܢ ܢܶܥܒܰܪ ܟܰܕ ܡܙܰܝܢܺܝܢ ܚܢܰܢ ܩܕܳܡ ܡܳܪܝܳܐ ܠܰܐܪܥܳܐ ܕܰܟܢܰܥܢ. ܘܕܺܝܠܰܢ ܐܽܘܚܕܳܢܳܐ ܕܝܳܪܬܽܘܬܰܢ ܒܥܶܒܪܳܐ ܕܝܽܘܪܕܢܳܢ.

³³ ܘܝܰܗܒ ܠܗܽܘܢ ܡܽܘܫܶܐ ܠܰܒܢܰܝ̈ ܪܽܘܒܺܝܠ. ܘܠܰܒܢܰܝ̈ ܓܳܕ. ܘܰܠܦܶܠܓܶܗ ܕܫܰܒܛܳܐ ܕܰܡܢܰܫܶܐ ܒܰܪ ܝܰܘܣܶܦ. ܡܰܠܟܽܘܬܶܗ ܕܣܺܝܚܽܘܢ ܡܰܠܟܳܐ ܕܰܐܡܽܘܖ̈ܳܝܶܐ. ܘܡܰܠܟܽܘܬܶܗ ܕܥܽܘܓ ܡܰܠܟܳܐ ܕܡܰܬܢܺܝܢ. ܐܰܪܥܳܐ ܟܽܠܳܗ̇. ܘܩܽܘܖ̈ܝܳܗ̇ ܒܰܬܚܽܘܡܶܝ̈ܗ̇. ܘܩܽܘܖ̈ܝܳܐ ܕܰܐܪܥܳܐ ܕܰܚܕܺܝܖ̈ܳܢ ܠܳܗ̇.

³⁴ ܘܰܒܢܰܘ ܒܢܰܝ̈ ܓܳܕ ܠܪܺܝܒܽܘܢ. ܘܰܠܥܰܛܪܽܘܬ. ܘܰܠܥܰܕܽܘܥܺܝܪ.

³⁵ ܘܰܠܥܰܛܪܽܘܬ ܫܽܘܦܳܡ. ܘܰܠܝܰܥܙܺܝܪ. ܘܰܠܝܰܒܓܗܳܐ.

³⁶ ܘܰܠܒܶܝܬ ܢܰܡܪܳܐ. ܘܰܠܒܶܝܬ ܗܳܪܳܢ. ܩܽܘܖ̈ܝܳܐ ܥܰܫܺܝ̈ܢܳܬܳܐ. ܘܰܛܝܳܖ̈ܶܐ ܕܥܳܢ̈ܳܐ.

³⁷ ܘܰܒܢܰܝ̈ ܪܽܘܒܺܝܠ ܒܢܰܘ ܠܚܶܫܒܽܘܢ. ܘܠܰܐܠܥܰܠܳܐ. ܘܰܠܩܽܘܪܝܰܬܺܝܡ.

³⁸ ܘܰܠܢܳܒܽܘ. ܘܠܰܒܥܶܠܡܽܘܢ. ܕܰܢܣܺܝ̈ܒܳܢ ܗܘܰܝ̈ ܫܡܳܐ. ܘܰܠܣܰܒܡܳܐ. ܘܰܩܪܰܘ ܫܡܳܗܰܝ̈ܗܶܝܢ ܥܰܠ ܫܡܳܗ̈ܶܐ ܕܩܽܘܖ̈ܝܳܐ ܕܰܒܢܰܘ.

³⁹ ܘܶܐܙܰܠ ܒܢܰܝ̈ ܡܳܟܺܝܪ ܒܰܪ ܡܢܰܫܶܐ ܠܓܶܠܥܳܕ ܘܟܰܒܫܽܘܗ̇. ܘܰܐܘܒܶܕܘ ܠܳܐܡܽܘܖ̈ܳܝܶܐ ܕܒܳܗ̇.

⁴⁰ ܘܝܰܗܒܳܗ̇ ܡܽܘܫܶܐ ܠܓܶܠܥܳܕ. ܠܡܳܟܺܝܪ ܒܰܪ ܡܢܰܫܶܐ. ܘܺܝܬܶܒ ܒܳܗ̇.

⁴¹ ܘܝܳܐܺܝܪ ܒܰܪ ܡܢܰܫܶܐ. ܐܶܙܰܠ ܘܰܟܒܰܫ ܟܰܦܖ̈ܽܘܢܰܝܗܶܝܢ. ܘܰܩܪܳܐ ܐܶܢܶܝܢ ܟܰܦܖ̈ܽܘܢܶܐ ܕܝܳܐܺܝܪ ܥܕܰܡܳܐ ܠܝܰܘܡܳܢܳܐ.

⁴² ܘܰܢܟܳܚ ܐܶܙܰܠ ܘܰܟܒܰܫ ܠܩܺܝܬ. ܘܰܠܟܰܦܖ̈ܽܘܢܶܝܗ̇. ܘܰܩܪܳܗ̇ ܒܰܫܡܶܗ ܢܟܳܚ.