Numeri ܡܢܝܢܐ 14

¹ ܘܰܐܪܺܝܒܰܬ ܟܽܠܳܗ̇ ܟܢܽܘܫܬܳܐ. ܘܰܐܪܺܝܡܘ ܩܳܠܗܽܘܢ ܒܰܒܟܳܬܳܐ. ܘܰܒܟܰܘ ܥܰܡܳܐ ܒܠܺܠܝܳܐ ܗܰܘ ܒܟܳܬܳܐ ܪܰܒܬܳܐ.

² ܘܰܪܛܶܢܘ ܒܝܰܘܡܳܐ ܗܰܘ ܥܰܠ ܡܽܘܫܶܐ. ܘܥܰܠ ܐܰܗܪܽܘܢ. ܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܶܐܡܰܪܘ ܠܗܽܘܢ ܟܽܠܳܗ̇ ܟܢܽܘܫܬܳܐ. ܐܶܫܬܽܘܦ ܕܶܝܢ ܡܺܝܬܰܢ ܒܺܐܝܕܶܗ ܕܡܳܪܝܳܐ ܒܰܐܪܥܳܐ ܕܡܶܨܪܶܝܢ. ܐܰܘ ܒܡܰܕܒܪܳܐ ܗܳܢܳܐ ܐܶܫܬܽܘܦ ܕܶܝܢ ܡܺܝܬܰܢ.

³ ܠܡܳܢܳܐ ܡܰܥܶܠ ܠܰܢ ܡܳܪܝܳܐ ܠܰܐܪܥܳܐ ܗܳܕܶܐ ܕܢܶܦܶܠ ܒܚܰܪܒܳܐ. ܘܢܶܫܰܝ̈ܢ ܘܺܝܩܰܪܬܰܢ ܢܶܗܘ̈ܝܳܢ ܠܒܶܙܬܳܐ. ܦܰܩܳܚ ܗܘܳܐ ܠܰܢ ܟܰܕ ܝܳܬܒܺܝܢ ܗܘܰܝܢ ܒܡܶܨܪܶܝܢ.

⁴ ܘܶܐܡܰܪ ܐ̱ܢܳܫ ܠܰܐܚܽܘܗܝ. ܬܰܘ ܢܶܥܒܶܕ ܠܰܢ ܪܺܝܫܳܐ. ܘܢܶܗܦܽܘܟ ܠܡܶܨܪܶܝܢ.

⁵ ܘܰܢܦܰܠܘ ܡܽܘܫܶܐ ܘܰܐܗܪܽܘܢ ܥܰܠ ܐܰܦܰܝ̈ܗܽܘܢ. ܩܕܳܡ ܟܽܠܶܗ ܟܶܢܫܳܐ ܕܰܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ.

⁶ ܘܝܶܫܽܘܥ ܒܰܪ ܢܽܘܢ. ܘܟܳܠܳܒ ܒܰܪ ܝܽܘܦܢܳܐ. ܡܶܢ ܓܫܽܘ̈ܫܶܐ ܕܰܐܪܥܳܐ. ܨܰܪܺܝܘ ܢܰܚܬܰܝ̈ܗܽܘܢ.

⁷ ܘܶܐܡܰܪܘ ܠܟܽܠܳܗ̇ ܟܢܽܘܫܬܳܐ. ܕܰܒܢܰܝ̈ ܝܺܣܪܳܐܶܝܠ. ܐܰܪܥܳܐ ܕܰܥܒܰܪܢ ܒܳܗ̇ ܠܡܶܓܫܳܗ̇. ܛܳܒܳܐ ܗ̱ܝ ܐܰܪܥܳܐ ܛܳܒ.

⁸ ܐܶܢ ܨܳܒܶܐ ܒܰܢ ܡܳܪܝܳܐ ܘܡܰܥܶܠ ܠܰܢ ܠܰܐܪܥܳܐ ܗܳܕܶܐ ܘܝܳܗܶܒ ܠܳܗ̇ ܠܰܢ. ܐܰܪܥܳܐ ܗ̱ܝ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.

⁹ ܒܰܠܚܽܘܕ ܥܰܠ ܡܳܪܝܳܐ ܠܳܐ ܬܶܡܪܕܽܘܢ. ܘܰܐܢ̱ܬܽܘܢ ܠܳܐ ܬܶܕܚܠܽܘܢ ܡܶܢ ܥܰܡܳܐ ܕܰܐܪܥܳܐ. ܡܶܛܽܠ ܕܠܰܚܡܰܢ ܐܶܢܽܘܢ. ܥܳܒܰܪ ܠܶܗ ܓܶܝܪ ܥܽܘܫܢܗܽܘܢ ܡܶܢܗܽܘܢ. ܘܡܳܪܝܳܐ ܥܰܡܰܢ ܗܽܘ. ܠܳܐ ܬܶܕܚܠܽܘܢ ܡܶܢܗܽܘܢ.

¹⁰ ܘܶܐܡܰܪܘ ܟܽܠܳܗ̇ ܟܢܽܘܫܬܳܐ ܠܡܶܪܓܰܡ ܐܶܢܽܘܢ ܒܟܺܐܦ̈ܶܐ. ܘܫܽܘܒܚܶܗ ܕܡܳܪܝܳܐ ܐܶܬܓܠܺܝ ܒܰܥܢܳܢܳܐ ܒܡܰܫܟܰܢܙܰܒܢܳܐ. ܠܥܺܝܢ ܟܽܠܗܽܘܢ ܒܢܰܝ̈ ܝܺܣܪܳܐܶܝܠ.

¹¹ ܘܶܐܡܰܪ ܡܳܪܝܳܐ ܠܡܽܘܫܶܐ. ܥܕܰܡܳܐ ܠܶܐܡܰܬܝ ܡܰܪܓܙܺܝܢ ܠܺܝ ܥܰܡܳܐ ܗܳܢܳܐ. ܘܰܥܕܰܡܳܐ ܠܶܐܡܰܬܝ ܠܳܐ ܡܗܰܝܡܢܺܝܢ ܠܺܝ. ܒܟܽܠܗܽܘܢ ܐܳܬܘ̈ܳܬܳܐ ܕܥܶܒܕܶܬ ܒܰܝܢܳܬܗܽܘܢ.

¹² ܐܶܡܚܶܐ ܐܶܢܽܘܢ ܒܡܰܘܬܳܢܳܐ. ܘܰܐܘܒܶܕ ܐܶܢܽܘܢ. ܘܶܐܥܒܕܳܟ ܠܥܰܡܳܐ ܕܪܰܒ ܘܥܰܫܺܝܢ ܡܶܢܗܽܘܢ.

¹³ ܘܶܐܡܰܪ ܡܽܘܫܶܐ ܠܡܳܪܝܳܐ. ܢܶܫܡܥܽܘܢ ܡܶܨܖ̈ܳܝܶܐ. ܕܰܐܣܶܩܬ ܒܚܰܝܠܳܟ ܠܥܰܡܳܐ ܗܳܢܳܐ ܡܶܢ ܒܰܝܢܳܬܗܽܘܢ.

¹⁴ ܘܢܺܐܡܪܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܗܳܕܶܐ. ܕܰܫܡܰܥܘ ܕܰܐܢ̱ܬ ܗܽܘ ܡܳܪܝܳܐ ܒܓܰܘܶܗ ܕܥܰܡܳܐ ܗܳܢܳܐ. ܕܥܺܝܢ ܒܥܺܝܢ ܐܶܬܚܙܺܝܬ ܡܳܪܝܳܐ. ܘܰܥܢܳܢܳܟ ܩܳܝܡܳܐ ܠܥܶܠ ܡܶܢܗܽܘܢ. ܘܰܒܥܰܡܽܘܕܳܐ ܕܰܥܢܳܢܳܐ ܐܶܙܰܠܬ ܩܕܳܡܰܝܗܽܘܢ ܒܺܐܝܡܳܡܳܐ. ܘܰܒܥܰܡܽܘܕܳܐ ܕܢܽܘܪܳܐ ܒܠܺܠܝܳܐ.

¹⁵ ܘܡܳܐ ܕܰܩܛܰܠܬܳܝܗܝ ܠܥܰܡܳܐ ܗܳܢܳܐ ܐܰܝܟ ܚܰܕ ܓܒܰܪ. ܢܺܐܡܪܽܘܢ ܥܰܡ̈ܡܶܐ ܕܰܫܡܰܥܘ ܫܶܡܥܳܟ.

¹⁶ ܡܶܛܽܠ ܕܠܳܐ ܐܶܫܟܰܚ ܡܳܪܝܳܐ ܕܢܰܥܠܺܝܘܗܝ ܠܥܰܡܳܐ ܗܳܢܳܐ ܠܰܐܪܥܳܐ ܕܺܝܡܳܐ ܠܰܐܒܳܗܰܝ̈ܗܽܘܢ. ܥܰܠ ܗܰܘ ܗܽܘ ܢܰܟܶܣ ܐܶܢܽܘܢ ܒܡܰܕܒܪܳܐ.

¹⁷ ܘܗܳܫܳܐ ܢܺܐܪܰܒ ܚܰܝܠܳܟ ܡܳܪܝܳܐ. ܐܰܝܟ ܕܡܰܠܶܠܬ ܘܶܐܡܰܪܬ.

¹⁸ ܡܳܪܝܳܐ ܢܰܓܺܝܪܳܐ ܪܽܘܚܳܟ. ܘܣܰܓܺܝܐܳܐ ܛܰܝܒܽܘܬܳܟ. ܘܫܳܒܶܩ ܐܰܢ̱ܬ ܠܥܰܘܠܳܐ ܘܠܰܚܛܺܝܬܳܐ. ܘܰܡܙܰܟܳܝܽܘ ܠܳܐ ܡܙܰܟܶܐ ܐܰܢ̱ܬ. ܦܳܩܶܕ ܐܰܢ̱ܬ ܚܰܘ̈ܒܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ. ܘܥܰܠ ܒܢܰܝ̈ ܒܢܰܝ̈ܳܐ. ܥܰܠ ܬܠܳܬܳܐ ܘܥܰܠ ܐܰܪܒܥܳܐ ܕܳܖ̈ܺܝܢ.

¹⁹ ܫܒܽܘܩ ܗܳܫܳܐ ܠܥܰܘܠܶܗ ܕܥܰܡܳܐ ܗܳܢܳܐ ܐܰܝܟ ܣܽܘܓܐܳܐ ܕܛܰܝ̈ܒܘܳܬܳܟ. ܘܰܐܝܟ ܕܰܫܒܰܩܬ ܠܗܽܘܢ ܡܶܢ ܡܶܨܪܶܝܢ ܘܰܥܕܰܡܳܐ ܠܗܳܫܳܐ.

²⁰ ܘܶܐܡܰܪ ܡܳܪܝܳܐ ܠܡܽܘܫܶܐ. ܫܶܒܩܶܬ ܠܗܽܘܢ ܐܰܝܟ ܡܶܠܬܳܟ.

²¹ ܒܪܰܡ ܕܶܝܢ ܚܰܝ ܐ̱ܢܳܐ. ܘܶܐܬܡܠܺܝ ܫܽܘܒܚܶܗ ܕܡܳܪܝܳܐ ܒܰܐܪܥܳܐ ܟܽܠܳܗ̇.

²² ܘܟܽܠܗܽܘܢ ܓܰܒܖ̈ܶܐ ܕܰܚܙܰܘ ܫܽܘܒܚܝ. ܘܳܐܬܘ̈ܳܬܳܐ ܕܥܶܒܕܶܬ ܒܡܶܨܪܶܝܢ ܘܰܒܡܰܕܒܪܳܐ. ܘܢܰܣܝܽܘܢܝ ܗܳܐ ܥܣܰܪ ܙܰܒܢܺܝ̈ܢ ܘܠܳܐ ܫܡܰܥܘ ܒܩܳܠܝ.

²³ ܐܶܢ ܢܶܚܙܽܘܢܳܗ̇ ܠܰܐܪܥܳܐ ܕܺܝܡܺܝܬ ܠܰܐܒܳܗܰܝ̈ܗܽܘܢ. ܟܽܠ ܡܰܖ̈ܓܙܳܢܰܝ ܠܳܐ ܢܶܚܙܘܢܳܗ̇.

²⁴ ܘܥܰܒܕܝ ܟܳܠܳܒ. ܚܠܳܦ ܕܰܗܘܳܬ ܪܽܘܚܝ ܥܰܡܶܗ. ܘܫܰܡܠܺܝ ܒܳܬܰܪܝ. ܐܰܥܠܺܝܘܗܝ ܠܰܐܪܥܳܐ ܕܥܰܠ ܠܬܰܡܳܢ. ܘܙܰܪܥܶܗ ܢܺܐܪܬܺܝܗ̇.

²⁵ ܘܥܰܡܠܩܳܝ̈ܶܐ ܘܰܟܢܰܥ̈ܢܳܝܶܐ ܝܳܬܒܺܝܢ ܒܛܽܘܪܳܐ. ܡܚܳܪ ܐܶܬܦܢܰܘ ܘܰܫܩܽܘܠܘ ܠܟܽܘܢ ܠܡܰܕܒܪܳܐ ܠܽܐܘܪܚܳܐ ܕܝܰܡܳܐ ܕܣܽܘܦ.

²⁶ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪ ܠܗܽܘܢ.

²⁷ ܥܕܰܡܳܐ ܠܶܐܡܰܬܝ ܟܢܽܘܫܬܳܐ ܗܳܕܶܐ ܒܺܝܫܬܳܐ ܪܳܛܢܺܝܢ ܩܕܳܡܰܝ. ܪܶܛܢܳܐ ܕܪܳܛܢܺܝܢ ܩܕܳܡܰܝ ܒܢܰܝ̈ ܝܺܣܪܳܐܶܝܠ ܫܶܡܥܶܬ.

²⁸ ܐܶܡܰܪ ܠܗܽܘܢ. ܚܰܝ ܐ̱ܢܳܐ ܐܳܡܰܪ ܡܳܪܝܳܐ. ܐܶܠܳܐ ܐܰܝܟ ܕܶܐܡܰܪܬܽܘܢ ܩܕܳܡܰܝ. ܗܳܟܰܢܳܐ ܐܶܥܒܶܕ ܠܟܽܘܢ.

²⁹ ܒܡܰܕܒܪܳܐ ܗܳܢܳܐ ܢܶܦ̈ܠܳܢ ܫܠܰܕܰܝ̈ܟܽܘܢ. ܘܟܽܠܶܗ ܡܶܢܝܳܢܟܽܘܢ. ܘܟܽܠܶܗ ܚܽܘܫܒܳܢܟܽܘܢ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܥܰܠ ܕܰܪܛܶܢܬܽܘܢ ܥܠܰܝ.

³⁰ ܠܳܐ ܬܶܥܠܽܘܢ ܠܰܐܪܥܳܐ ܕܰܐܪܺܝܡܶܬ ܐܺܝܕܝ ܠܡܰܫܪܝܽܘܬܟܽܘܢ ܒܳܗ̇. ܐܶܠܳܐ ܐܶܢ ܟܳܠܳܒ ܒܰܪ ܝܽܘܦܢܳܐ. ܘܝܶܫܽܘܥ ܒܰܪܢܽܘܢ.

³¹ ܘܺܝܩܰܪܬܟܽܘܢ ܕܶܐܡܰܪܬܽܘܢ. ܠܒܶܙܬܳܐ ܬܶܗܘܶܐ. ܘܰܒܢܰܝ̈ܟܽܘܢ ܕܠܳܐ ܝܺܕܰܥܘ ܝܰܘܡܳܢܳܐ ܛܳܒܬܳܐ ܘܒܺܝܫܬܳܐ. ܗܶܢܽܘܢ ܢܶܥܠܽܘܢ ܠܰܐܪܥܳܐ. ܘܰܐܝܬܶܐ ܐܶܢܽܘܢ ܘܢܶܕܥܽܘܢܳܗ̇ ܠܰܐܪܥܳܐ ܕܰܐܣܠܺܝܬܽܘܢ.

³² ܘܰܫܠܰܕܰܝ̈ܟܽܘܢ ܕܺܝܠܟܽܘܢ ܢܶܦ̈ܠܳܢ ܒܡܰܕܒܪܳܐ ܗܳܢܳܐ.

³³ ܘܰܒܢܰܝ̈ܟܽܘܢ ܢܶܗܘܽܘܢ ܪܳܥܶܝܢ ܒܡܰܕܒܪܳܐ ܗܳܢܳܐ ܐܰܪܒܥܺܝܢ ܫܢܺܝ̈ܢ. ܘܰܢܩܰܒܠܽܘܢ ܙܳܢܝܽܘܬܟܽܘܢ. ܥܕܰܡܳܐ ܕܰܢܣܽܘ̈ܦܳܢ ܫܠܰܕܰܝ̈ܟܽܘܢ ܒܡܰܕܒܪܳܐ ܗܳܢܳܐ.

³⁴ ܒܡܶܢܝܳܢܳܐ ܕܝܰܘ̈ܡܳܬܳܐ ܕܓܰܫܬܽܘܢܳܗ̇ ܠܰܐܪܥܳܐ ܐܰܪܒܥܺܝܢ ܝܰܘܡܺܝ̈ܢ. ܝܰܘܡܳܐ ܠܫܰܢ̱ܬܳܐ ܬܩܰܒܠܽܘܢ ܥܰܘܠܟܽܘܢ ܐܰܪܒܥܺܝܢ ܫܢܺܝ̈ܢ. ܘܬܶܕܥܽܘܢ ܕܥܰܠ ܕܰܪܛܶܢܬܽܘܢ ܩܕܳܡܰܝ.

³⁵ ܐܶܢܳܐ ܡܳܪܝܳܐ ܐܶܡܪܶܬ. ܕܗܳܟܰܢܳܐ ܐܶܥܒܶܕ ܠܳܗ̇ ܠܟܽܠܳܗ̇ ܟܢܽܘܫܬܳܐ ܗܳܕܶܐ ܒܺܝܫܬܳܐ ܕܶܐܬܘܰܥܰܕܬܽܘܢ ܩܕܳܡܰܝ. ܒܡܰܕܒܪܳܐ ܗܳܢܳܐ ܢܣܽܘܦܽܘܢ. ܘܬܰܡܳܢ ܢܡܽܘܬܽܘܢ.

³⁶ ܘܓܰܒܖ̈ܶܐ ܕܫܰܕܰܪ ܡܽܘܫܶܐ ܠܡܶܓܰܫ ܐܰܪܥܳܐ. ܗܦܰܟܘ ܐܰܪܛܶܢܘ ܥܠܰܘܗܝ ܟܽܠܳܗ̇ ܟܢܽܘܫܬܳܐ. ܕܢܰܦܩܽܘܢ ܛܶܒܳܐ ܒܺܝܫܳܐ ܥܰܠ ܐܰܪܥܳܐ.

³⁷ ܘܡܺܝܬܘ ܓܰܒܖ̈ܶܐ ܕܰܐܦܶܩܘ ܛܶܒܳܐ ܒܺܝܫܳܐ ܥܰܠ ܐܰܪܥܳܐ ܒܡܰܘܬܳܢܳܐ ܕܡܶܢ ܫܶܠܝܳܐ ܩܕܳܡ ܡܳܪܝܳܐ.

³⁸ ܘܝܶܫܽܘܥ ܒܰܪܢܽܘܢ. ܘܟܳܠܳܒ ܒܰܪ ܝܽܘܦܢܳܐ ܚܝܰܘ ܡܶܢ ܓܰܒܖ̈ܶܐ ܗܳܢܽܘܢ ܕܶܐܙܰܠܘ ܠܡܶܓܰܫ ܐܰܪܥܳܐ.

³⁹ ܘܶܐܡܰܪ ܡܽܘܫܶܐ ܦܶܬܓܳܡ̈ܶܐ ܗܳܠܶܝܢ ܠܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܺܝܬܶܒܘ ܥܰܡܳܐ ܒܶܐܒܠܳܐ ܪܰܒܳܐ.

⁴⁰ ܘܩܰܕܶܡܘ ܒܨܰܦܪܳܐ. ܘܰܣܠܶܩܘ ܠܪܺܝܫ ܛܽܘܪܳܐ. ܘܶܐܡܰܪܘ. ܗܳܐ ܣܳܠܩܺܝܢܰܢ ܠܰܐܬܪܳܐ ܕܶܐܡܰܪ ܠܰܢ ܡܳܪܝܳܐ ܥܰܠ ܕܰܚܛܰܝܢ.

⁴¹ ܘܶܐܡܰܪ ܠܗܽܘܢ ܡܽܘܫܶܐ. ܠܡܳܢܳܐ ܥܒܰܪܬܽܘܢ ܥܰܠ ܡܠܰܬ ܦܽܘܡܶܗ ܕܡܳܪܝܳܐ. ܡܶܛܽܠ ܗܳܢܳܐ ܠܳܐ ܡܰܣܩܺܝܢ ܐܢ̱ܬܽܘܢ ܠܪܺܝܫ.

⁴² ܠܳܐ ܬܶܣܩܽܘܢ ܡܶܛܽܠ ܕܠܳܐ ܗܘܳܐ ܥܰܡܟܽܘܢ ܡܳܪܝܳܐ. ܕܠܳܐ ܬܶܬܰܒܪܽܘܢ ܩܕܳܡ ܒܥܶܠܕܒܳܒܰܝ̈ܟܽܘܢ.

⁴³ ܡܶܛܽܠ ܕܰܟܢܰܥ̈ܢܳܝܶܐ ܘܥܰܡܠܩܳܝ̈ܶܐ. ܐܺܝܬ ܬܰܡܳܢ ܩܕܳܡܰܝܟܽܘܢ. ܘܬܶܦܠܽܘܢ ܒܚܰܪܒܳܐ. ܥܰܠ ܕܰܗܦܰܟܬܽܘܢ ܡܶܢ ܒܳܬܰܪ ܡܳܪܝܳܐ. ܘܠܳܐ ܢܶܗܘܶܐ ܡܳܪܝܳܐ ܥܰܡܟܽܘܢ.

⁴⁴ ܘܫܰܪܺܝܘ ܠܡܶܣܰܩ ܠܪܺܝܫ ܛܽܘܪܳܐ. ܘܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ ܘܡܽܘܫܶܐ. ܠܳܐ ܦܪܰܩܘ ܡܶܢ ܓܰܘ ܡܰܫܪܺܝܬܳܐ.

⁴⁵ ܘܰܢܚܶܬܘ ܥܰܡܠܩܳܝ̈ܶܐ ܘܰܟܢܰܥ̈ܢܳܝܶܐ ܕܝܳܬܒܺܝܢ ܒܛܽܘܪܳܐ ܗܰܘ. ܘܰܚܪܰܒܘ ܐܶܢܽܘܢ. ܘܰܪܕܰܦܘ ܐܶܢܽܘܢ ܥܕܰܡܳܐ ܠܚܶܪܡܳܐ.