Numeri ܡܢܝܢܐ 21

¹ ܘܰܫܡܰܥ ܟܢܰܥܢܳܝܳܐ ܡܰܠܟܳܐ ܕܓܳܕܳܪ. ܕܥܳܡܰܪ ܒܬܰܝܡܢܳܐ. ܕܶܐܬܳܐ ܝܺܣܪܳܐܶܝܠ ܒܽܐܘܪܚܳܐ ܕܓܳܫܽܘ̈ܫܶܐ. ܘܶܐܬܟܰܬܰܫ ܥܰܡ ܝܺܣܪܳܐܶܝܠ. ܘܰܫܒܳܐ ܡܶܢܗܽܘܢ ܫܒܺܝܬܳܐ.

² ܘܰܢܕܰܪ ܝܺܣܪܳܐܶܝܠ ܢܶܕܪܳܐ ܠܡܳܪܝܳܐ. ܘܶܐܡܰܪ. ܐܶܢ ܡܰܫܠܳܡܽܘ ܬܰܫܠܶܡ ܥܰܡܳܐ ܗܳܢܳܐ ܒܺܐܝܕܰܝ̈. ܐܰܚܪܶܡ ܐܶܢܶܝܢ ܩܽܘܖ̈ܝܗܶܝܢ.

³ ܘܰܫܡܰܥ ܡܳܪܝܳܐ ܒܩܳܠܶܗ ܕܺܝܣܪܳܐܶܝܠ. ܘܰܐܫܠܶܡ ܐܶܢܽܘܢ ܠܰܟܢܰܥܢܳܝ̈ܶܐ ܒܺܐܝܕܰܝ̈ܗܽܘܢ. ܘܰܚܪܰܒܘ ܐܶܢܽܘܢ. ܘܰܐܚܪܶܡܘ ܐܶܢܽܘܢ. ܘܰܠܩܽܘܖ̈ܝܗܶܝܢ. ܘܰܩܪܰܘ ܫܡܶܗ ܕܰܐܬܪܳܐ ܗܰܘ ܚܶܪܡܳܐ.

⁴ ܕܥܰܠ ܚܶܘܝܳܐ ܕܰܢܚܳܫܳܐ. ܘܰܫܩܰܠܘ ܡܶܢ ܗܽܘܪ ܛܽܘܪܳܐ ܒܽܐܘܪܚܳܐ ܕܝܰܡܳܐ ܕܣܽܘܦ. ܠܡܶܬܟܪܳܟܽܘܬܳܗ̇ ܠܰܐܪܥܳܐ ܕܰܐܕܽܘܡ. ܘܶܐܬܬܥܺܝܩܰܬ ܢܰܦܫܶܗ ܕܥܰܡܳܐ ܒܽܐܘܪܚܳܐ.

⁵ ܘܰܪܛܶܢܘ ܥܰܡܳܐ ܥܰܠ ܐܰ‌ܠܳܗܳܐ. ܘܥܰܠ ܡܽܘܫܶܐ. ܘܶܐܡܰܪ. ܠܡܳܢܳܐ ܐܰܣܶܩܬܳܢ ܡܶܢ ܡܶܨܪܶܝܢ ܕܰܢܡܽܘܬ ܒܡܰܕܒܪܳܐ. ܡܶܛܽܠ ܕܠܰܝܬ ܠܰܚܡܳܐ ܘܠܳܐ ܡܰܝ̈ܳܐ. ܘܢܰܦܫܰܢ ܥܳܩܰܬ ܒܠܰܚܡܳܐ ܙܥܽܘܪܳܐ.

⁶ ܘܫܰܕܰܪ ܡܳܪܝܳܐ ܥܰܠ ܥܰܡܳܐ ܚܘܰܘ̈ܳܬܳܐ ܚܰܖ̈ܡܳܢܶܐ. ܘܢܰܟܬܽܘܗܝ ܠܥܰܡܳܐ. ܘܡܺܝܬܘ ܥܰܡܳܐ ܣܰܓܺܝܐܳܐ ܡܶܢ ܝܺܣܪܳܐܶܝܠ.

⁷ ܘܶܐܬܰܘ ܥܰܡܳܐ ܠܘܳܬ ܡܽܘܫܶܐ. ܘܶܐܡܰܪܘ ܠܶܗ. ܚܛܰܝܢ ܥܰܠ ܕܰܪܛܶܢܢ ܥܰܠ ܡܳܪܝܳܐ. ܘܳܐܦ ܥܠܰܝܟ. ܨܰܠܳܐ ܩܕܳܡ ܡܳܪܝܳܐ ܘܢܰܦܪܶܩ ܡܶܢܰܢ ܚܘܰܘ̈ܳܬܳܐ. ܘܨܰܠܺܝ ܡܽܘܫܶܐ ܥܰܠ ܥܰܡܳܐ.

⁸ ܘܶܐܡܰܪ ܡܳܪܝܳܐ ܠܡܽܘܫܶܐ. ܥܒܶܕ ܠܳܟ ܚܶܘܝܳܐ ܚܰܪܡܳܢܳܐ ܕܰܢܚܳܫܳܐ. ܘܣܺܝܡܳܝܗܝ ܠܳܐܬܳܐ. ܘܟܽܠ ܡܰܢ ܕܢܳܟܶܬ ܠܶܗ ܚܶܘܝܳܐ. ܢܶܚܙܶܝܘܗܝ ܘܢܺܚܶܐ.

⁹ ܘܰܥܒܰܕ ܡܽܘܫܶܐ ܚܶܘܝܳܐ ܕܰܢܚܳܫܳܐ. ܘܣܳܡܶܗ ܠܳܐܬܳܐ. ܘܡܳܐ ܕܢܳܟܶܬ ܚܶܘܝܳܐ ܠܓܰܒܪܳܐ. ܚܳܐܰܪ ܒܚܶܘܝܳܐ ܕܰܢܚܳܫܳܐ ܘܚܳܝܶܐ.

¹⁰ ܘܰܫܩܰܠܘ ܒܢܰܝ̈ ܝܺܣܪܳܐܶܝܠ ܘܰܫܪܰܘ ܒܳܐܒܽܘܬ.

¹¹ ܘܰܫ̣ܩܰܠܘ ܡܶܢ ܐܳܒܽܘܬ. ܘܰܫܪܰܘ ܒܥܰܝܢܳܐ ܕܥܶܒܖ̈ܳܝܶܐ. ܒܡܰܕܒܪܳܐ ܕܰܩܕܳܡ ܡܽܘܐܳܒ. ܡܶܢ ܡܰܕܢܚܳܐ ܡܶܢ ܡܰܕܢܳܚܰܝ̈ ܫܶܡܫܳܐ.

¹² ܘܡܶܢ ܬܰܡܳܢ ܫܩܰܠܘ. ܘܰܫܪܰܘ ܒܢܰܚܠܳܐ ܕܰܙܕܳܪ.

¹³ ܘܡܶܢ ܬܰܡܳܢ ܫܩܰܠܘ. ܘܰܫܪܰܘ ܒܥܶܒܪܳܐ ܕܰܐܪܢܽܘܢ. ܒܡܰܕܒܪܳܐ ܕܢܳܦܶܩ ܡܶܢ ܬܚܽܘܡܳܐ ܕܳܐܡܽܘܖ̈ܳܝܶܐ. ܡܶܛܽܠ ܕܰܐܪܢܽܘܢ ܬܚܽܘܡܳܐ ܗܽܘ ܕܡܽܘܐܳܒܳܝ̈ܶܐ. ܒܶܝܬ ܡܽܘܐܳܒܳܝ̈ܶܐ ܠܒܶܝܬ ܐܰܡܽܘܖ̈ܳܝܶܐ.

¹⁴ ܡܶܛܽܠ ܗܳܢܳܐ ܡܶܬܐܡܰܪ ܒܰܣܦܰܪ ܩܖ̈ܳܒܰܘܗܝ ܕܡܳܪܝܳܐ. ܫܰܠܗܶܒܺܝܬܳܐ ܒܥܰܠܥܳܠܳܐ. ܘܰܒܢܰܚܠܳܐ ܕܰܐܪܢܽܘܢ.

¹⁵ ܘܰܐܬܩܶܢ ܢܰܚ̈ܠܶܐ ܕܰܨܠܶܝܢ ܗܘܰܘ ܠܝܰܬܒܳܐ ܕܥܳܕ. ܘܣܳܡܟܺܝܢ ܗܘܰܘ ܥܰܠ ܬܚܽܘܡܳܐ ܕܡܽܘܐܳܒܳܝ̈ܶܐ.

¹⁶ ܘܬܰܡܳܢ ܒܺܪܳܐ. ܗܳܝ ܒܺܪܳܐ ܕܶܐܡܰܪ ܡܳܪܝܳܐ ܠܡܽܘܫܶܐ. ܟܰܢܶܫ ܠܺܝ ܥܰܡܳܐ ܘܶܐܬܶܠ ܠܗܽܘܢ ܡܰܝ̈ܳܐ.

¹⁷ ܗܳܝܕܶܝܢ ܫܰܒܰܚ ܝܺܣܪܳܐܶܝܠ ܬܶܫܒܽܘܚܬܳܐ ܗܳܕܶܐ. ܣܰܩܝ ܒܺܪܳܐ. ܥܰܢܰܘ ܠܳܗ̇.

¹⁸ ܒܺܪܳܐ ܕܚܰܦܪܽܘܗ̇ ܪܘܰܖ̈ܒܳܢܶܐ. ܘܚܰܛܽܘܗ̇ ܫܰܠܺܝܛܳܢ̈ܶܐ ܕܥܰܡܳܐ. ܘܒܰܕܩܽܘܗ̇ ܒܚܽܘܛܖ̈ܰܝܗܽܘܢ. ܘܡܶܢ ܡܰܕܒܪܳܐ ܐܶܬܝܰܗܒܰܬ ܠܡܰܬܢ̈ܶܐ.

¹⁹ ܘܡܶܢ ܡܰܬܢ̈ܶܐ ܠܢܰܚܠܳܐܶܝܠ. ܘܡܶܢ ܢܰܚܠܳܐܶܝܠ. ܠܒܶܡܽܘܬ.

²⁰ ܘܡܶܢ ܒܶܡܽܘܬ ܕܢܰܚܠܳܐ ܕܰܒܚܰܩܠܳܐ ܕܡܽܘܐܳܒ. ܠܪܺܝܫ ܪܳܡܬܳܐ ܕܡܶܬܚܰܙܝܳܐ ܠܽܘܩܒܰܠ ܐܰܫܺܝܡܽܘܢ.

²¹ ܘܫܰܕܰܪ ܝܺܣܪܳܐܶܝܠ ܐܺܝܙ̈ܓܰܕܶܐ ܠܘܳܬ ܣܺܝܚܽܘܢ ܡܰܠܟܳܐ ܕܰܐܡܽܘܖ̈ܳܝܶܐ. ܘܶܐܡܰܪ ܠܶܗ.

²² ܐܶܥܒܰܪ ܒܰܐܪܥܳܟ. ܘܠܳܐ ܢܶܣܛܶܐ ܒܚܰܩܠܳܐ ܘܰܒܟܰܪܡܳܐ. ܘܠܳܐ ܢܶܫܬܶܐ ܡܶܢ ܡܰܝ̈ܳܐ ܕܓܽܘ̈ܒܶܐ. ܐܶܠܳܐ ܒܽܐܘܪܰܚ ܡܰܠܟܳܐ ܢܺܐܙܰܠ. ܥܕܰܡܳܐ ܕܢܶܥܒܰܪ ܬܚܽܘܡܳܟ.

²³ ܘܠܳܐ ܫܒܰܩ ܣܺܝܚܽܘܢ ܠܺܝܣܪܳܐܶܝܠ ܕܢܶܥܒܰܪ ܒܰܬܚܽܘܡܶܗ. ܘܟܰܢܶܫ ܣܺܝܚܽܘܢ ܠܟܽܠܶܗ ܚܰܝܠܶܗ. ܘܰܢܦܰܩ ܠܽܐܘܪܥܳܐ ܕܺܝܣܪܳܐܶܝܠ ܠܡܰܕܒܪܳܐ. ܘܶܐܬܳܐ ܠܝܳܗܳܨ. ܘܶܐܬܟܰܬܰܫ ܥܰܡ ܝܺܣܪܳܐܶܝܠ.

²⁴ ܘܰܡܚܳܝܗܝ ܝܺܣܪܳܐܶܝܠ ܒܦܽܘܡܳܐ ܕܚܰܪܒܳܐ. ܘܺܝܪܶܬ ܐܰܪܥܶܗ. ܡܶܢ ܐܰܪܢܽܘܢ ܘܰܥܕܰܡܳܐ ܠܝܳܒܳܩ. ܘܰܥܕܰܡܳܐ ܠܰܒܢܰܝ̈ ܥܰܡܽܘܢ. ܡܶܛܽܠ ܕܥܰܫܺܝܢ ܗܘܰܘ ܬܚܽܘܡܳܐ ܕܰܒܢܰܝ̈ ܥܰܡܽܘܢ.

²⁵ ܘܰܢܣܰܒ ܝܺܣܪܳܐܶܝܠ ܗܳܠܶܝܢ ܟܽܠܗܶܝܢ ܩܽܘܖ̈ܝܳܐ. ܘܺܝܬܶܒ ܝܺܣܪܳܐܶܝܠ ܒܟܽܠܗܶܝܢ ܩܽܘܖ̈ܝܳܐ ܕܰܐܡܽܘܖ̈ܳܝܶܐ. ܒܚܶܫܒܽܘܢ ܘܰܒܟܽܠܗܽܘܢ ܟܰܦܖ̈ܽܘܢܶܝܗ̇.

²⁶ ܡܶܛܽܠ ܕܚܶܫܒܽܘܢ ܩܪܺܝܬܶܗ ܗܺܝ ܕܣܺܝܚܽܘܢ ܡܰܠܟܳܐ ܕܰܐܡܽܘܖ̈ܳܝܶܐ. ܘܗܽܘ ܐܶܬܟܰܬܰܫ ܥܰܡ ܡܰܠܟܳܐ ܕܡܽܘܐܳܒ ܩܰܕܡܳܝܳܐ. ܘܰܢܣܰܒ ܟܽܠܳܗ̇ ܐܰܪܥܶܗ. ܡܶܢ ܬܚܽܘܡܶܗ ܘܰܥܕܰܡܳܐ ܠܰܐܪܢܽܘܢ.

²⁷ ܡܶܛܽܠ ܗܳܢܳܐ ܐܳܡܪܺܝܢ ܒܡܰܬܠܳܐ. ܥܽܘܠܘ ܠܚܶܫܒܽܘܢ. ܬܶܬܒܢܶܐ ܘܬܶܬܩܰܢ ܩܪܺܝܬܶܗ ܕܣܺܝܚܽܘܢ.

²⁸ ܡܶܛܽܠ ܕܢܽܘܪܳܐ ܢܶܦܩܰܬ ܡܶܢ ܚܶܫܒܽܘܢ. ܘܫܰܠܗܶܒܺܝܬܳܐ ܡܶܢ ܟܰܪܟܳܐ ܕܣܺܝܚܽܘܢ. ܘܶܐܟܠܰܬ ܠܥܳܕ ܕܡܽܘܐܳܒ. ܘܰܠܦܳܠܚܰܝ̈ ܥܠܰܘ̈ܳܬܳܐ ܕܰܐܪܢܽܘܢ.

²⁹ ܘܳܝ ܠܳܟ ܐܰܪܢܽܘܢ. ܘܳܝܠܳܟ ܡܽܘܐܳܒ ܐܶܒܰܕܬ. ܥܰܡܳܐ ܕܟܳܡܽܘܫ ܝܳܗܶܒ ܒܢܰܘ̈ܗܝ ܒܰܗܡܰܝܖ̈ܶܐ. ܘܰܒ̈ܢܳܬܶܗ ܒܫܶܒܝܳܐ ܠܣܺܝܚܽܘܢ ܡܰܠܟܳܐ ܕܰܐܡܽܘܖ̈ܳܝܶܐ.

³⁰ ܘܚܰܩ̈ܠܳܬܳܐ ܕܚܶܫܒܽܘܢ ܐܶܒܰܕ̈ܝ ܥܕܰܡܳܐ ܠܪܺܝܒܽܘܢ. ܘܰܨ̈ܕܺܝ ܥܕܰܡܳܐ ܠܰܢܟܳܚ ܕܰܒܡܰܕܒܪܳܐ.

³¹ ܘܺܝܬܶܒ ܝܺܣܪܳܐܶܝܠ ܒܰܐܪܥܳܐ ܕܰܐܡܽܘܖ̈ܳܝܶܐ.

³² ܘܫܰܕܰܪ ܡܽܘܫܶܐ ܠܡܶܓܰܫ ܠܝܰܥܙܺܝܪ. ܘܰܟܒܰܫ ܟܰܦܖ̈ܽܘܢܶܝܗ̇. ܘܰܐܘܒܶܕ ܠܳܐܡܽܘܖ̈ܳܝܶܐ ܕܬܰܡܳܢ.

³³ ܘܰܗܦܰܟܘ ܣܠܶܩܘ ܠܰܐܪܥܳܐ ܕܡܰܬܢܺܝܢ. ܘܰܢܦܰܩ ܥܽܘܓ ܡܰܠܟܳܐ ܕܡܰܬܢܺܝܢ ܠܽܐܘܪܥܗܽܘܢ. ܗܽܘ ܘܟܽܠܶܗ ܥܰܡܶܗ ܠܰܩܪܳܒܳܐ ܒܰܐܪܕܥܺܝ.

³⁴ ܘܶܐܡܰܪ ܡܳܪܝܳܐ ܠܡܽܘܫܶܐ. ܠܳܐ ܬܕܚܰܠ ܡܶܢܶܗ. ܡܶܛܽܠ ܕܒܺܐܝܕܰܝ̈ܟ ܡܰܫܠܶܡ ܐ̱ܢܳܐ ܠܶܗ. ܘܰܠܟܽܠܶܗ ܥܰܡܶܗ. ܘܰܠܟܽܠܳܗ̇ ܐܰܪܥܶܗ. ܘܰܥܒܶܕ ܠܶܗ ܐܰܝܟ ܕܰܥܒܰܕܬ ܠܣܺܝܚܽܘܢ ܡܰܠܟܳܐ ܕܰܐܡܽܘܖ̈ܳܝܶܐ ܕܝܳܬܶܒ ܗܘܳܐ ܒܚܶܫܒܽܘܢ.

³⁵ ܘܚܰܪܒܽܘܗܝ ܠܶܗ. ܘܠܰܒܢܰܘ̈ܗܝ. ܘܰܠܟܽܠܶܗ ܥܰܡܶܗ. ܘܠܳܐ ܫ̣ܒܰܩܘ ܠܶܗ ܣܪܺܝܕܳܐ. ܘܺܝܪܶܬܘ ܐܰܪܥܶܗ.