Levitico ܟܗ̈ܢܐ 24

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

² ܦܰܩܶܕ ܠܰܒܢܰܝ̈ ܝܺܣܪܳܐܶܝܠ. ܘܢܰܝܬܽܘܢ ܠܳܟ ܡܶܫܚܳܐ ܕܙܰܝܬܳܐ ܕܰܟܝܳܐ ܥܨܺܝܪܳܐ. ܠܡܰܢܗܳܪܽܘ ܫܖ̈ܳܓܶܐ ܐܰܡܺܝܢܳܐܺܝܬ.

³ ܠܒܰܪ ܡܶܢ ܐܰܦܰܝ̈ ܬܰܪܥܳܐ ܕܣܳܗܕܽܘܬܳܐ. ܒܡܰܫܟܰܢ ܙܰܒܢܳܐ. ܘܢܶܗܘܶܐ ܣܳܕܰܪ ܠܗܽܘܢ ܐܰܗܪܽܘܢ ܡܶܢ ܪܰܡܫܳܐ ܘܰܥܕܰܡܳܐ ܠܨܰܦܪܳܐ ܩܕܳܡ ܡܳܪܝܳܐ ܐܰܡܺܝܢܳܐܺܝܬ. ܢܳܡܽܘܣܳܐ ܠܥܳܠܰܡ ܠܕܳܖ̈ܰܝܟܽܘܢ.

⁴ ܥܰܠ ܡܢܳܪܬܳܐ ܪܰܒܬܳܐ ܢܶܗܘܶܐ ܣܳܕܰܪ ܫܖ̈ܳܓܶܐ ܩܕܳܡ ܡܳܪܝܳܐ ܐܰܡܺܝܢܳܐܺܝܬ.

⁵ ܘܣܰܒ ܢܰܫܺܝܦܳܐ. ܘܶܐܦܺܝ ܬܰܪܬܰܥܶܣܖ̈ܶܐ ܚܳܚܖ̈ܳܢ. ܡܶܢ ܬܪܶܝܢ ܥܶܣܖ̈ܽܘܢܺܝܢ ܚܳܚܽܘܪܬܳܐ ܚܕܳܐ.

⁶ ܘܰܣܕܽܘܪ ܐܶܢܶܝܢ ܬܪܶܝܢ ܣܶܕܖ̈ܺܝܢ. ܫܶܬ ܫܶܬ ܒܣܶܕܪܳܐ. ܥܰܠ ܦܳܬܽܘܪܳܐ ܕܰܟܝܳܐ ܩܕܳܡ ܡܳܪܝܳܐ.

⁷ ܘܣܺܝܡ ܥܰܠ ܣܶܕܪܳܐ ܠܒܽܘܢܬܳܐ ܕܟܺܝܬܳܐ ܩܕܳܡ ܡܳܪܝܳܐ. ܘܢܶܗܘܶܐ ܠܠܰܚܡܳܐ ܕܽܘܟܪܳܢܳܐ ܘܩܽܘܪܒܳܢܳܐ ܠܡܳܪܝܳܐ.

⁸ ܒܝܰܘܡܳܐ ܕܶܫܬܳܐ ܢܶܗܘܶܐ ܣܳܕܰܪ ܠܗܽܘܢ ܐܰܗܪܽܘܢ ܩܕܳܡ ܡܳܪܝܳܐ ܐܰܡܺܝܢܳܐܺܝܬ. ܡܶܢ ܠܘܳܬ ܒܢܰܝ̈ ܝܺܣܪܳܐܶܝܠ. ܩܝܳܡܳܐ ܠܥܳܠܰܡ.

⁹ ܢܶܗܘܶܐ ܠܰܐܗܪܽܘܢ ܘܠܰܒܢܰܘ̈ܗܝ. ܘܢܶܐܟܠܽܘܢܶܗ ܒܰܐܬܪܳܐ ܩܰܕܺܝܫܳܐ. ܡܶܛܽܠ ܕܰܩܕܽܘܫܩܽܘ̈ܕܫܺܝܢ ܗܽܘ ܠܶܗ ܡܶܢ ܩܽܘܖ̈ܒܳܢܰܘܗܝ ܕܡܳܪܝܳܐ. ܢܳܡܽܘܣܳܐ ܠܥܳܠܰܡ.

¹⁰ ܘܰܢܦܰܩ ܒܰܪ ܐܰܢ̱ܬܬܳܐ ܐܺܝܣܰܪܠܳܝܬܳܐ. ܘܗܽܘ ܒܰܪ ܓܰܒܪܳܐ ܗܘܳܐ ܡܶܨܪܳܝܳܐ ܒܰܝܢܳܬ ܒܢܰܝ̈ ܝܺܣܪܳܐܶܝܠ. ܘܰܢܨܰܘ ܒܡܰܫܪܺܝܬܳܐ ܒܰܪ ܐܺܝܣܰܪܠܳܝܬܳܐ. ܘܓܰܒܪܳܐ ܐܺܝܣܰܪܠܳܝܳܐ.

¹¹ ܘܰܦܪܰܫ ܒܰܪ ܐܰܢ̱ܬܬܳܐ ܐܺܝܣܰܪܠܳܝܬܳܐ ܫܡܳܐ. ܘܨܰܚܺܝ. ܘܰܐܝܬܝܽܘܗܝ ܠܘܳܬ ܡܽܘܫܶܐ. ܘܰܫܡܳܐ ܕܶܐܡܶܗ ܫܳܠܽܘܡܺܝܬ ܒܰܪܬ ܕܰܒܪܺܝ. ܡܶܢ ܫܰܒܛܳܐ ܕܕܳܢ.

¹² ܘܚܰܒܫܽܘܗܝ ܒܶܝܬ ܢܛܽܘܪܬܳܐ. ܕܢܶܬܦܰܫܰܩ ܠܗܽܘܢ ܡܶܢ ܦܽܘܡܶܗ ܕܡܳܪܝܳܐ.

¹³ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

¹⁴ ܐܰܦܩܽܘܗܝ ܠܗܰܘ ܕܨܰܚܺܝ ܠܒܰܪ ܡܶܢ ܡܰܫܪܺܝܬܳܐ. ܘܟܽܠ ܕܫܰܡܥܽܘܗܝ. ܢܣܺܝܡܽܘܢ ܐܺܝܕܰܝ̈ܗܽܘܢ ܥܰܠ ܪܺܝܫܶܗ. ܘܢܶܪܓܡܽܘܢܶܗ ܟܽܠܳܗ̇ ܟܢܽܘܫܬܳܐ.

¹⁵ ܘܥܰܡ ܒܢܰܝ̈ ܝܺܣܪܳܐܶܝܠ ܡܰܠܶܠ. ܘܶܐܡܰܪ ܠܗܽܘܢ. ܓܒܰܪ ܓܒܰܪ ܟܰܕ ܢܨܰܚܶܐ ܠܰܐܠܳܗܶܗ. ܢܩܰܒܶܠ ܚܛܳܗܶܗ.

¹⁶ ܘܡܰܢ ܕܢܶܦܪܽܘܫ ܫܡܶܗ ܕܡܳܪܝܳܐ. ܡܶܬܩܛܳܠܽܘ ܢܶܬܩܛܶܠ. ܘܡܶܪܓܰܡ ܢܶܪܓܡܽܘܢܶܗ ܟܽܠܳܗ̇ ܟܢܽܘܫܬܳܐ. ܐܰܝܢܳܐ ܕܡܶܬܦܢܶܐ ܠܘܳܬܝ. ܐܰܘ ܒܰܪ ܝܺܣܪܳܐܶܝܠ. ܡܳܐ ܕܰܦܪܰܫ ܫܶܡܝ. ܢܶܬܩܛܶܠ.

¹⁷ ܘܓܰܒܪܳܐ ܐܶܢ ܢܶܩܛܽܘܠ ܟܽܠ ܢܰܦܫܳܐ ܕܒܰܪܢܳܫܳܐ. ܡܶܬܩܛܳܠܽܘ ܢܶܬܩܛܶܠ.

¹⁸ ܘܰܕܢܶܩܛܽܘܠ ܢܰܦܫܳܐ ܕܰܒܥܺܝܪܳܐ. ܢܶܦܪܽܘܥ ܢܰܦܫܳܐ ܚܠܳܦ ܢܰܦܫܳܐ.

¹⁹ ܘܓܰܒܪܳܐ ܐܶܢ ܢܶܥܒܶܕ ܡܽܘܡܳܐ ܒܚܰܒܪܶܗ. ܐܰܝܟ ܕܰܥܒܰܕ ܡܽܘܡܳܐ ܒܚܰܒܪܶܗ. ܗܳܟܰܢܳܐ ܢܶܬܥܒܶܕ ܠܶܗ.

²⁰ ܬܒܳܪܳܐ ܚܠܳܦ ܬܒܳܪܳܐ. ܥܰܝܢܳܐ ܚܠܳܦ ܥܰܝܢܳܐ. ܫܶܢܳܐ ܚܠܳܦ ܫܶܢܳܐ. ܐܰܝܟ ܕܰܥܒܰܕ ܡܽܘܡܳܐ ܒܚܰܒܪܶܗ. ܗܳܟܰܢܳܐ ܢܶܬܥܒܶܕ ܠܶܗ.

²¹ ܘܰܕܢܶܩܛܽܘܠ ܒܥܺܝܪܳܐ. ܢܶܦܪܥܺܝܗ̇. ܘܰܕܢܶܩܛܽܘܠ ܢܰܦܫܳܐ. ܢܶܬܩܛܶܠ.

²² ܕܺܝܢܳܐ ܚܰܕ ܢܶܗܘܶܐ ܠܟܽܘܢ. ܘܠܰܐܝܢܳܐ ܕܡܶܬܦܢܶܐ ܠܘܳܬܝ. ܘܰܠܒܰܪ ܝܺܣܪܳܐܶܝܠ. ܗܳܟܰܢܳܐ ܢܶܗܘܶܐ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.

²³ ܘܶܐܡܰܪ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ. ܘܰܐܦܩܽܘܗܝ ܠܗܰܘ ܕܨܰܚܺܝ. ܠܒܰܪ ܡܶܢ ܡܰܫܪܺܝܬܳܐ. ܘܪܰܓܡܽܘܗܝ ܒܟܺܐܦ̈ܶܐ ܘܡܺܝܬ. ܘܰܥܒܰܕܘ ܒܢܰܝ̈ ܝܺܣܪܳܐܶܝܠ ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.