Levitico ܟܗ̈ܢܐ 20

¹ ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.

² ܐܡܪ ܠܒܢ̈ܝ ܐܝܣܪܝܠ. ܓܒܪ ܓܒܪ ܡܢ ܒܢ̈ܝ ܐܝܣܪܝܠ ܘܡܢ ܐܝܠܝܢ ܕܡܬܦܢܝܢ ܠܘܬܝ ܕܥܡ̇ܪܝܢ ܒܐܝܣܪܝܠ. ܕܢܪܡܐ ܡܢ ܙܪܥܗ ܒܢܘܟܪܝܬܐ ܡܬܩܛܠܘ ܢܬܩܛܠ ܓܒܪܐ ܗ̇ܘ . ܘܥܡܐ ܕܐܪܥܐ ܢܪܓܡܘܢܗ ܒܟܐ̈ܦܐ.

³ ܘܐܢܐ ܐܬܠ ܪܘܓܙܝ ܒܓܒܪܐ ܗ̇ܘ ܘܐܘܒܕܝܘܗܝ ܡܢ ܓܘ ܥܡܗ. ܥܠ ܕܐܪܡܝ ܡܢ ܙܪܥܗ ܒܢܘܟܪܝܬܐ. ܕܢܛܡܐ ܡܩܕܫܝ ܘܢܛܡܐ ܫܡܐ ܕܩܘܕܫܝ.

⁴ ܘܐܢ ܢܪܟܢܘܢ ܥܝܢ̈ܝܗܘܢ ܥܡܐ ܕܐܪܥܐ. ܡܢ ܓܒܪܐ ܗ̇ܘ ܕܐܪܡܝ ܡܢ ܙܪܥܗ ܒܢܘܟܪܝܬܐ ܕܠܐ ܢܩܛܠܘܢܗ.

⁵ ܐܥܒܕ ܐܢܐ ܪܘܓܙܝ ܒܓܒܪܐ ܗ̇ܘ ܘܒܫܪܒܬܗ. ܘܐܘܒܕܝܘܗܝ ܘܠܟܠ ܕܛܥ̇ܝܢ ܒܬܪܗ. ܥܠ ܕܛܥ̇ܝܢ ܒܬܪ ܢܘܟܪ̈ܝܬܐ ܡܢ ܓܘ ܥܡܗܘܢ.

⁶ ܘܢܦܫܐ ܕܬܐܙܠ ܒܬܪ ܙܟܘܪ̈ܐ ܘܝܕܘ̈ܥܐ. ܘܬܛܥܐ ܒܬܪܗܘܢ. ܐܬܠ ܪܘܓܙܝ ܒܢܦܫܐ ܗ̇ܝ. ܘܐܘܒܕܝܗ̇ ܡܢ ܓܘ ܥܡܗ̇.

⁷ ܐܬܩܕܫܘ ܘܗܘܘ ܩܕܝܫ̈ܝܢ. ܡܛܠ ܕܐܢܐ ܐܢܐ ܡܪܝܐ ܐܠܗܟܘܢ.

⁸ ܛܪܘ ܦܘܩ̈ܕܢܝ ܘܥܒܕܘ ܐܢܘܢ. ܐܢܐ ܐܢܐ ܡܪܝܐ ܕܡܩܕܫ ܐܢܐ ܠܟܘܢ.

⁹ ܘܓܒܪܐ ܕܢܨܚܐ ܠܐܒܘܗܝ ܘܠܐܡܗ ܡܬܩܛܠܘ ܢܬܩܛܠ. ܠܐܒܘܗܝ ܘܠܐܡܗ ܨܚܝ ܕܡܗ ܥܠܘܗܝ .

¹⁰ ܘܓܒܪܐ ܕܢܓܘܪ ܐܢܬܬ ܓܒܪܐ. ܘܢܓܘܪ ܐܢܬܬ ܚܒܪܗ. ܡܬܩܛܠܘ ܢܬܩܛܠܘܢ . ܓܝܪܐ ܘܓܝܪܬܐ.

¹¹ ܘܓܒܪܐ ܕܢܕܡܟ ܥܡ ܐܢܬܬ ܐܒܘܗܝ. ܦܘܪܣܝܐ ܕܐܒܘܗܝ ܓܠܐ ܡܬܩܛܠܘ ܢܬܩܛܠܘܢ ܬܪ̈ܝܗܘܢ. ܘܕܡܗܘܢ ܥܠܝܗܘܢ.

¹² ܘܓܒܪܐ ܕܢܕܡܟ ܥܡ ܟܠܬܗ. ܡܬܩܛܠܘ ܢܬܩܛܠܘܢ ܬܪ̈ܝܗܘܢ. ܡܛܠ ܕܚܛܝܬܐ ܥܒܕܘ ܕܡܗܘܢ ܥܠܝܗܘܢ.

¹³ ܘܓܒܪܐ ܕܢܕܡܟ ܥܡ ܕܟܪܐ ܡܕܡܟܐ ܕܐܢܬܬܐ. ܛܢܦܘܬܐ ܥܒܕܘ. ܬܪ̈ܝܗܘܢ ܡܬܩܛܠܘ ܢܬܩܛܠܘܢ. ܘܕܡܗܘܢ ܥܠܝܗܘܢ.

¹⁴ ܘܓܒܪܐ ܕܢܣܒ ܐܢܬܬܐ ܘܐܡܗ̇ ܚܛܝܬܐ ܗܝ. ܒܢܘܪܐ ܢܘܩܕܘܢܗ ܠܗ ܘܠܗܝܢ. ܘܠܐ ܬܗܘܐ ܚܛܝܬܐ ܒܝܢܬܟܘܢ.

¹⁵ ܘܓܒܪܐ ܕܢܕܡܟ ܥܡ ܒܥܝܪܐ ܡܬܩܛܠܘ ܢܬܩܛܠ. ܘܐܦ ܗܝ ܒܥܝܪܐ ܬܬܪܓܡ .

¹⁶ ܘܐܢܬܬܐ ܕܬܬܩܪܒ ܠܘܬ ܒܥܝܪܐ ܕܬܬܪܟܒ ܡܢܗ̇. ܩܛܘܠܘ ܠܐܢܬܬܐ ܘܐܦ ܠܒܥܝܪ̈ܐ. ܡܬܩܛܠܘ ܢܬܩܛܠܘܢ ܘܕܡܗܘܢ ܥܠܝܗܘܢ.

¹⁷ ܘܓܒܪܐ ܕܢܣܒ ܚܬܗ ܒܪܬ ܐܒܘܗܝ ܐܘ ܒܪܬ ܐܡܗ ܘܢܚܙܐ ܦܘܪܣܝܗ̇. ܘܐܦ ܗܝ ܬܚܙܐ ܦܘܪܣܝܗ. ܚܣܕܐ ܗܘ. ܢܐܒܕܘܢ ܩܕܡ ܒܢ̈ܝ ܥܡܗܘܢ. ܦܘܪܣܝܐ ܕܚܬܗ ܓܠܐ ܥܘܠܗܘܢ ܢܩܒܠܘܢ.

¹⁸ ܘܓܒܪܐ ܕܢܕܡܟ ܥܡ ܐܢܬܬܐ ܟܦܣܢܝܬܐ. ܘܢܓܠܐ ܦܘܪܣܝܗ̇ ܡܒܘܥܗ̇ ܓܠܐ. ܘܗܝ ܓܠܬ ܡܒܘܥܐ ܕܕܡܗ̇. ܢܐܒܕܘܢ ܬܪ̈ܝܗܘܢ ܡܢ ܓܘ ܥܡܗܘܢ.

¹⁹ ܦܘܪܣܝܐ ܕܚܬܗ̇ ܕܐܡܟ ܘܕܚܬܗ ܕܐܒܘܟ ܠܐ ܬܓܠܐ. ܡܛܠ ܕܩܪ̈ܝܒܢ ܐ̈ܢܝܢ. ܦܘܪܣܝ ܥܘܠܗܘܢ ܢܩܒܠܘܢ.

²⁰ ܘܓܒܪܐ ܕܢܕܡܟ ܥܡ ܐܢܬܬ ܕܕܗ. ܦܘܪܣܝܐ ܕܕܕܗ ܓܠܐ. ܚܛܝܬܗܘܢ ܢܩܒܠܘܢ ܘܕܠܐ ܒ̈ܢܝܢ ܢܡܘܬܘܢ.

²¹ ܘܓܒܪܐ ܕܢܣܒ ܐܢܬܬ ܐܚܘܗܝ ܥܘܠܐ ܗܘ. ܡܛܠ ܕܦܘܪܣܝܐ ܕܐܚܘܗܝ ܓܠܐ. ܕܠܐ ܒ̈ܢܝܢ ܢܗܘܘܢ .

²² ܛܪܘ ܟܠܗܘܢ ܦܘܩ̈ܕܢܝ ܘܕܝܢ̈ܝ ܘܥܒܕܘ ܐܢܘܢ. ܘܠܐ ܬܣܪܩܟܘܢ ܐܪܥܐ ܕܡ̇ܥܠ ܐܢܐ ܠܟܘܢ ܠܗ̇ ܠܡܬܒ ܒܗ̇.

²³ ܘܠܐ ܬܗܠܟܘܢ ܒܢܡܘ̈ܣܐ ܕܥܡ̈ܡܐ ܕܫ̇ܕܐ ܐܢܐ ܡܢ ܩܕܡܝܟܘܢ. ܡܛܠ ܕܗܠܝܢ ܟܠܗܝܢ ܥܒܕܘ ܘܥܩܬ ܠܝ ܒܗܘܢ.

²⁴ ܘܐܡ̇ܪܬ ܠܟܘܢ. ܕܐܢܬܘܢ ܬܐܪܬܘܢ ܐܪܥܗܘܢ. ܘܐܢܐ ܐܬܠܝܗ̇ ܠܟܘܢ ܘܬܐܪܬܘܢܗ̇. ܐܪܥܐ ܕܡܪܕܝܐ ܚܠܒܐ ܘܕܒܫܐ. ܐܢܐ ܐܢܐ ܡܪܝܐ ܐܠܗܟܘܢ ܕܦܪܫܬܟܘܢ ܡܢ ܥܡ̈ܡܐ.

²⁵ ܦܪܘܫܘ ܒܝܬ ܒܥܝܪ̈ܐ ܕܟܝܬܐ ܠܛܡܐܬܐ. ܘܒܝܬ ܦܪܚܬܐ ܕܟܝܬܐ ܠܛܡܐܬܐ. ܘܠܐ ܬܛܡܐܘܢ ܢܦܫ̈ܬܟܘܢ ܒܒܥܝܪ̈ܐ ܘܒܦܪܚܬܐ. ܘܒܟܠܗ ܪܚܫܐ ܕܐܪܥܐ ܕܦܪܫ̇ܬ ܠܟܘܢ ܠܛܡܐܘܬܐ.

²⁶ ܘܬܗܘܘܢ ܩܕܝܫ̈ܝܢ . ܡܛܠ ܕܐܢܐ ܐܢܐ ܡܪܝܐ ܩܕܝܫ ܐܢܐ. ܘܦܪܫ̇ܬܟܘܢ ܡܢ ܥܡ̈ܡܐ ܕܬܗܘܘܢ ܠܝ.

²⁷ ܘܓܒܪܐ ܐܘ ܐܢܬܬܐ ܕܐܝܬ ܒܗܘܢ ܙܟܘܪܐ ܐܘ ܝܕܘ̈ܥܐ. ܡܬܩܛܠܘ ܢܬܩܛܠܘܢ. ܘܒܟܐ̈ܦܐ ܢܪܓܡܘܢ ܐܢܘܢ. ܘܕܡܗܘܢ ܥܠܝܗܘܢ.