1 Samuele ܫܡܘܐܝܠ 15

¹ ܘܶܐܡܰܪ ܫܡܽܘܐܶܝܠ ܠܫܳܐܘܳܠ. ܠܺܝ ܫܰܕܰܪ ܡܳܪܝܳܐ ܠܡܶܡܫܚܳܟ. ܕܬܰܡܠܶܟ ܥܰܠ ܝܺܣܪܳܐܶܝܠ ܥܰܡܶܗ. ܗܳܫܳܐ ܫܡܰܥ ܠܩܳܠ ܦܶܬܓܳܡܰܘ̈ܗܝ ܕܡܳܪܝܳܐ.

² ܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ. ܕܟܺܝܪ ܐ̱ܢܳܐ ܟܽܠܡܶܕܶܡ ܕܰܥܒܰܕ ܥܡܳܠܺܝܩ ܠܺܝܣܪܳܐܶܝܠ ܒܽܐܘܪܚܳܐ. ܟܰܕ ܣܳܠܩܺܝܢ ܗܘܰܘ ܡܶܢ ܡܶܨܪܶܝܢ.

³ ܗܳܫܳܐ ܙܶܠ ܚܪܽܘܒ ܠܰܥܡܳܠܺܝܩ. ܘܰܐܘܒܶܕ ܠܟܽܠ ܕܺܐܝܬ ܠܗܽܘܢ. ܘܠܳܐ ܬܚܽܘܣ ܥܠܝܗܽܘܢ. ܘܩܰܛܶܠ ܡܶܢ ܓܰܒܖ̈ܶܐ ܘܰܥܕܰܡܳܐ ܠܢܶܫ̈ܶܐ. ܘܡܶܢ ܥܠܰܝ̈ܡܶܐ ܘܰܥܕܰܡܳܐ ܠܝܰܠܽܘܕ̈ܶܐ. ܘܡܶܢ ܬܰܘܖ̈ܶܐ ܘܰܥܕܰܡܳܐ ܠܶܐܡܖ̈ܶܐ. ܘܡܶܢ ܓܰܡ̈ܠܶܐ ܘܰܥܕܰܡܳܐ ܠܚܶܡܖ̈ܳܐ.

⁴ ܘܰܐܫܡܰܥ ܫܳܐܘܳܠ ܠܟܽܠܶܗ ܥܰܡܳܐ ܠܰܩܪܳܒܳܐ. ܘܰܡܢܳܐ ܐܶܢܽܘܢ ܒܰܛܠܳܝ̈ܶܐ. ܡܰܐܬܶܝܢ ܐܰܠܦܺܝ̈ܢ ܖ̈ܶܓܠܳܝܺܝܢ. ܘܥܶܣܪܳܐ ܐܰܠܦܺܝ̈ܢ ܥܰܡ ܓܰܒܖ̈ܶܐ ܕܺܝܗܽܘܕܳܐ.

⁵ ܘܶܐܬܳܐ ܫܳܐܘܳܠ ܥܕܰܡܳܐ ܠܰܩܪܺܝܬܳܐ ܕܰܥܡܳܠܺܝܩ. ܘܕܳܢ ܒܢܰܚܠܳܐ.

⁶ ܘܶܐܡܰܪ ܫܳܐܘܳܠ ܠܩܺܝܢܳܝ̈ܶܐ. ܣܛܰܘ ܘܙܶܠܘ ܘܚܽܘܬܘ ܡܶܢ ܓܰܘ ܥܰܡܠ̈ܩܳܝܶܐ. ܕܠܳܐ ܐܰܘܒܶܕܟܽܘܢ ܥܰܡܗܽܘܢ. ܘܰܐܢ̱ܬܽܘܢ ܥܒܰܕܬܽܘܢ ܛܰܝܒܽܘܬܳܐ ܥܰܡ ܟܽܠܗܽܘܢ ܕܒܶܝܬ ܝܺܣܪܳܐܶܝܠ. ܟܰܕ ܣܳܠܩܺܝܢ ܗܘܰܘ ܡܶܢ ܡܶܨܪܶܝܢ. ܘܰܣܛܰ ܩܺܝ̈ܢܳܝܶܐ ܡܶܢ ܓܰܘ ܥܰܡܠ̈ܩܳܝܶܐ.

⁷ ܘܰܡܚܳܐ ܫܳܐܘܳܠ ܠܰܥܡܳܠܺܝܩ. ܡܶܢ ܚܘܺܝܠܳܐ ܕܰܒܡܰܥܠܳܢܳܐ ܕܫܽܘܕ ܕܰܩܕܳܡ ܡܶܨܪܶܝܢ.

⁸ ܘܶܐܚܰܕ ܠܳܐܓܳܓ ܡܰܠܟܳܐ ܕܰܥܡܳܠܺܝܩ ܟܰܕ ܚܰܝ. ܘܰܠܟܽܠܶܗ ܥܰܡܳܐ ܐܰܘܒܶܕ ܒܦܽܘܡܳܐ ܕܚܰܪܒܳܐ.

⁹ ܘܚܳܣ ܫܳܐܘܳܠ ܘܥܰܡܳܐ ܥܰܠ ܐܳܓܳܓ ܡܰܠܟܳܐ. ܘܥܰܠ ܫܽܘܦܪܳܐ ܕܥܳܢ̈ܳܐ. ܘܰܕܬܰܘܖ̈ܶܐ. ܘܰܕܫܰܡܺܝܢ̈ܶܐ. ܘܕܰܡܦܰܛ̈ܡܶܐ. ܘܥܰܠ ܟܽܠܳܗ̇ ܛܳܒܬܳܐ. ܘܠܳܐ ܨܒܰܘ ܕܢܶܚܪܒܽܘܢ ܐܶܢܽܘܢ. ܘܟܽܠܳܗ̇ ܥܒܺܝܕܬܳܐ ܕܫܺܝܛܳܐ ܘܡܰܣܠܝܳܐ ܒܥܰܝܢܰܝ̈ܗܽܘܢ. ܠܳܗ̇ ܐܰܘܒܶܕܘ.

¹⁰ ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܫܡܽܘܐܶܝܠ ܠܡܺܐܡܰܪ.

¹¹ ܐܶܬܬܘܺܝܬ ܕܰܐܡܠܟܶܬ ܠܫܳܐܘܳܠ ܡܰܠܟܳܐ. ܕܰܗܦܰܟ ܡܶܢ ܒܳܬܰܪܝ. ܘܡܶܠܰܝ̈ ܠܳܐ ܐܰܩܺܝܡ. ܘܶܐܬܶܒܐܶܫ ܠܰܫܡܽܘܐܶܝܠ. ܘܨܰܠܺܝ ܩܕܳܡ ܡܳܪܝܳܐ ܟܽܠܶܗ ܠܺܠܝܳܐ.

¹² ܘܩܰܕܶܡ ܫܡܽܘܐܶܝܠ ܒܨܰܦܪܳܐ ܠܽܐܘܪܥܶܗ ܕܫܳܐܘܳܠ. ܘܶܐܬܚܰܘܺܝ ܠܰܫܡܽܘܐܶܝܠ ܕܶܐܬܳܐ ܫܳܐܘܳܠ ܠܟܰܪܡܠܳܐ. ܘܗܳܐ ܡܰܬܩܶܢ ܠܶܗ ܐܰܬܪܳܐ. ܘܶܐܬܦܢܺܝ ܘܰܥܒܰܪ ܘܰܢܚܶܬ ܠܓܰܠܓܳܠܳܐ.

¹³ ܘܶܐܬܳܐ ܫܡܽܘܐܶܝܠ ܠܘܳܬ ܫܳܐܘܳܠ. ܘܶܐܡܰܪ ܠܶܗ ܫܳܐܘܳܠ. ܒܪܺܝܟ ܗܽܘ ܡܳܪܝܳܐ ܕܰܐܩܺܝܡ ܦܶܬܓܳܡܶܗ.

¹⁴ ܘܶܐܡܰܪ ܫܡܽܘܐܶܝܠ. ܡܳܢܰܘ ܩܳܠܳܐ ܗܳܢܳܐ ܕܥܳܢ̈ܳܐ ܒܶܐܕܢܰܝ̈. ܘܩܳܠܳܐ ܕܬܰܘܖ̈ܶܐ ܕܫܳܡܰܥ ܐ̱ܢܳܐ.

¹⁵ ܘܶܐܡܰܪ ܠܶܗ ܫܳܐܘܳܠ. ܡܶܢ ܥܡܳܠܺܝܩ ܐܰܝܬܺܝܘ ܐܶܢܽܘܢ. ܡܶܛܽܠ ܕܚܳܣ ܥܰܡܳܐ ܥܰܠ ܫܽܘܦܪܳܐ ܕܥܳܢ̈ܳܐ. ܘܰܕܬܰܘܖ̈ܶܐ. ܘܰܐܝܬܺܝܘ ܕܰܢܕܰܒܚܽܘܢ ܠܡܳܪܝܳܐ ܐܰܠܳܗܳܟ. ܘܫܰܪܟܳܐ ܚܪܰܒܢ.

¹⁶ ܘܶܐܡܰܪ ܫܡܽܘܐܶܝܠ ܠܫܳܐܘܳܠ. ܫܬܽܘܩ ܘܶܐܚܰܘܶܝܟ ܡܶܕܶܡ ܕܶܐܡܰܪ ܠܺܝ ܡܳܪܝܳܐ ܒܠܺܠܝܳܐ ܘܶܐܡܰܪ ܠܶܗ ܫܳܐܘܳܠ ܐܶܡܰܪ.

¹⁷ ܘܶܐܡܰܪ ܫܡܽܘܐܶܝܠ ܠܫܳܐܘܳܠ. ܗܳܐ ܐܶܢ ܙܥܽܘܪ ܐܰܢ̱ܬ ܒܥܰܝܢܰܝ̈ܟ. ܪܺܝܫ ܫܰܒ̈ܛܶܐ ܐܰܢ̱ܬ ܕܺܝܣܪܳܐܶܝܠ. ܘܡܰܫܚܳܟ ܡܳܪܝܳܐ ܕܬܰܡܠܶܟ ܥܰܠ ܝܺܣܪܳܐܶܝܠ.

¹⁸ ܘܫܰܕܪܳܟ ܡܳܪܝܳܐ ܒܽܐܘܪܚܳܐ ܘܶܐܡܰܪ. ܙܶܠ ܚܪܽܘܒ ܠܚܰܛܳܝܳܐ ܥܡܳܠܺܝܩ. ܘܶܐܬܟܰܬܫ ܥܰܡܗܽܘܢ ܥܕܰܡܳܐ ܕܰܬܓܰܡܰܪ ܐܶܢܽܘܢ.

¹⁹ ܐܰܝܟܰܘ ܠܳܐ ܫܡܰܥܬ ܒܩܳܠܶܗ ܕܡܳܪܝܳܐ. ܐܶܠܳܐ ܐܶܬܦܢܺܝܬ ܥܰܠ ܒܶܙܬܳܐ. ܘܰܥܒܰܕܬ ܕܒܺܝܫ ܩܕܳܡ ܡܳܪܝܳܐ.

²⁰ ܘܶܐܡܰܪ ܫܳܐܘܳܠ ܠܰܫܡܽܘܐܶܝܠ. ܫܶܡܥܶܬ ܒܩܳܠܶܗ ܕܡܳܪܝܳܐ ܘܶܐܙܶܠܬ ܒܽܐܘܪܚܳܐ ܕܫܰܕܪܰܢܝ. ܘܰܐܝܬܺܝܬ ܠܳܐܓܳܓ ܡܰܠܟܳܐ ܕܰܥܡܳܠܺܝܩ. ܘܥܰܡܠܩܳܝ̈ܶܐ ܐܰܘܒܕܶܬ.

²¹ ܘܰܕܒܰܪܘ ܥܰܡܳܐ ܡܶܢ ܒܶܙܬܳܐ ܥܳܢ̈ܳܐ ܘܬܰܘܖ̈ܶܐ ܪܺܝܫܺܝܬܳܐ ܕܚܶܪܡܳܐ. ܕܰܢܕܰܒܚܽܘܢ ܠܡܳܪܝܳܐ ܐܰܠܳܗܳܟ ܒܓܰܠܓܳܠܳܐ.

²² ܘܶܐܡܰܪ ܫܡܽܘܐܶܝܠ. ܠܳܐ ܨܳܒܶܐ ܡܳܪܝܳܐ ܒܰܥ̈ܠܰܘܳܬܳܐ ܘܰܒܕܶܒܚ̈ܶܐ ܐܰܝܟ ܡܰܢ ܕܫܳܡܰܥ ܒܩܳܠܶܗ. ܗܳܐ ܫܶܡܥܳܐ ܡܶܢ ܕܶܒܚ̈ܶܐ ܛܳܒ. ܘܠܰܡܨܳܬ ܡܶܢ ܬܰܪܒܳܐ ܕܕܶܟܖ̈ܶܐ.

²³ ܡܶܛܽܠ ܕܰܚܛܺܝܬܶܗ ܕܩܶܨܡܳܐ ܡܡܰܪܡܪܳܢܽܘܬܳܐ. ܘܩܶܨܡܳܐ ܥܰܘܠܳܐ ܡܰܥܫܢܳܐ. ܥܰܠ ܕܰܐܣܠܺܝܬ ܠܡܶܠܬܶܗ ܕܡܳܪܝܳܐ. ܢܰܣܠܶܝܟ ܡܶܢ ܡܰܠܟܽܘܬܳܐ.

²⁴ ܘܶܐܡܰܪ ܫܳܐܘܳܠ ܠܰܫܡܽܘܐܶܝܠ. ܚܛܺܝܬ ܥܰܠ ܕܥܶܒܪܶܬ ܥܰܠ ܡܶܠܰܬ ܦܽܘܡܶܗ ܕܡܳܪܝܳܐ. ܘܥܰܠ ܡܶܠܰܝ̈ܟ. ܡܶܛܽܠ ܕܕܶܚܠܶܬ ܡܶܢ ܥܰܡܳܐ ܘܫܶܡܥܶܬ ܒܩܳܠܗܽܘܢ.

²⁵ ܗܳܫܳܐ ܫܒܽܘܩ ܠܰܚܛܺܝܬܝ. ܘܰܗܦܽܘܟ ܥܰܡܝ. ܘܶܐܣܓܽܘܕ ܠܡܳܪܝܳܐ.

²⁶ ܘܶܐܡܰܪ ܫܡܽܘܐܶܝܠ ܠܫܳܐܘܳܠ. ܠܳܐ ܐܶܗܦܽܘܟ ܥܰܡܳܟ. ܥܰܠ ܕܰܐܣܠܺܝܬ ܡܶܠܬܶܗ ܕܡܳܪܝܳܐ. ܐܰܣܠܝܳܟ ܡܳܪܝܳܐ ܕܠܳܐ ܬܶܗܘܶܐ ܡܰܠܟܳܐ ܥܰܠ ܝܺܣܪܳܐܶܝܠ.

²⁷ ܘܶܐܬܦܢܺܝ ܫܡܽܘܐܶܝܠ ܠܡܺܐܙܰܠ. ܘܶܐܚܰܕ ܫܳܐܘܳܠ ܒܟܶܢܦܳܐ ܕܰܦܪܺܝܣܶܗ ܘܰܨܪܳܝܗܝ.

²⁸ ܘܶܐܡܰܪ ܠܶܗ ܫܡܽܘܐܶܝܠ. ܨܪܳܗ̇ ܡܳܪܝܳܐ ܡܰܠܟܽܘܬܳܐ ܕܺܝܣܪܳܐܶܝܠ ܡܶܢܳܟ ܝܰܘܡܳܢܳܐ. ܘܝܰܗܒܳܗ̇ ܠܚܰܒܪܳܟ ܕܛܳܒ ܡܶܢܳܟ.

²⁹ ܘܳܐܦ ܢܰܨܺܝܚܶܗ ܕܺܝܣܪܳܐܶܝܠ. ܠܳܐ ܡܕܰܓܶܠ ܘܳܐܦܠܳܐ ܡܶܬܡܠܶܟ. ܡܶܛܽܠ ܕܠܳܐ ܗܘܳܐ ܒܰܪܢܳܫܳܐ ܕܢܶܬܡܠܶܟ.

³⁰ ܘܶܐܡܰܪ ܫܳܐܘܳܠ. ܚܛܺܝܬ. ܗܳܫܳܐ ܝܰܩܰܪܰܝܢܝ ܩܕܳܡ ܣܳܒ̈ܶܐ ܕܥܰܡܝ. ܘܰܩܕܳܡ ܝܺܣܪܳܐܶܝܠ. ܘܰܗܦܽܘܟ ܥܰܡܝ. ܘܶܐܣܓܽܘܕ ܠܡܳܪܝܳܐ ܐܰܠܳܗܳܟ.

³¹ ܘܰܗܦܰܟ ܫܡܽܘܐܶܝܠ ܒܳܬܰܪ ܫܳܐܘܳܠ. ܘܰܣܓܶܕ ܫܳܐܘܳܠ ܠܡܳܪܝܳܐ.

³² ܘܶܐܡܰܪ ܫܡܽܘܐܶܝܠ ܩܰܪܶܒܳܝܗܝ ܠܺܝ ܠܐܳܓܳܓ ܡܰܠܟܳܐ ܕܰܥܡܳܠܺܝܩ. ܘܶܐܡܰܪ ܐܳܓܳܓ ܫܰܪܺܝܪܳܐܺܝܬ ܡܰܪܺܝܪ ܡܰܘܬܳܐ.

³³ ܘܶܐܡܰܪ ܫܡܽܘܐܶܝܠ. ܐܰܝܟܰܢܳܐ ܕܓܰܙܝܰܬ ܢܶܫ̈ܶܐ ܚܰܪܒܳܟ. ܗܳܟܰܢܳܐ ܬܶܬܓܰܙܶܐ ܐܶܡܳܟ ܡܶܢ ܢܶܫ̈ܶܐ. ܘܦܰܫܰܚ ܫܡܽܘܐܶܝܠ ܠܳܐܓܳܓ ܡܰܠܟܳܐ ܩܕܳܡ ܡܳܪܝܳܐ ܒܓܰܠܓܳܠܳܐ. ܘܶܐܙܰܠ ܫܡܽܘܐܶܝܠ ܠܪܳܡܬܳܐ.

³⁴ ܘܫܳܐܘܳܠ ܣܠܶܩ ܠܒܰܝܬܶܗ ܠܪܳܡܬܳܐ ܕܫܳܐܘܳܠ. ܘܠܳܐ ܐܰܘܣܶܦ ܬܽܘܒ ܫܡܽܘܐܶܝܠ. ܠܡܶܚܙܝܶܗ ܠܫܳܐܘܳܠ ܥܕܰܡܳܐ ܠܝܰܘܡܳܐ ܕܡܺܝܬ. ܡܶܛܽܠ ܕܶܐܬܐܒܶܠ ܫܡܽܘܐܶܝܠ ܥܰܠ ܫܳܐܘܳܠ.

³⁵ ܘܡܳܪܝܳܐ ܐܶܬܬܘܺܝ ܥܰܠ ܕܰܐܡܠܶܟ ܠܫܳܐܘܳܠ ܥܰܠ ܝܺܣܪܳܐܶܝܠ.