Baruch ܒܪܘܟ ܒܪ ܢܪܝܐ 1

1 2 3 4 5
Libro non riconosciuto. Prova con un'abbreviazione valida (es. Gen, Es, Gv, Sal).
Versetti esaminati

Torna indietro

Peshitta ܦܫܝܼܛܬܵܐ Bibbia Diodati
1 ܘܗܠܝܢ ܡ̈ܠܝܗ̇ ܕܐܓܪܬܐ ܗܕܐ. ܕܟܬ̣ܒ ܒܪܘܟ ܒܪ. ܢܪܝܐ ܒܪ ܡܥܣܝܐ̇. ܒܪ ܨܕܩܝܐ ܒܪ ܫ̣ܪܝܐ ܒܪ ܚܠܩܝܐ. ܗܠܝܢ ܟܬ̣ܒ ܠܒܒܠ̇
2 ܒܫܢܬ ܚܡܫ ܒܫܒܥܬܐ ܒܝܪܚܐ. ܒܙܒܢܐ ܗ̇ܘ ܕܫܒܘ ܟ̈ܠܕܝܐ ܠܐܘܪܫܠܡ. ܘܐܘܩܕܘܗ̇ ܒܢܘܪܐ
3 ܘܩ̣ܪܐ ܒܪܘܟ ܦܬ̈ܓܡܐ ܗܠܝܢ ܕܟܬܝܒܝܢ ܒܟܪܟܐ ܗܢܐ̇. ܒܐ̈ܕܢܝ ܝܘܟܢܝܐ ܒܪ ܝܘܝܩܝܡ ܡ̇ܠܟܐ ܕܝܗܘܕܐ. ܘܒܐ̈ܕܢܝ ܟܠܗ ܥܡܐ ܕܐܬ̇ܝܢ ܠܡܫܡܥ ܠܗܢܐ ܟܪܟܐ
4 ܘܒܐ̈ܕܢܝ ܪ̈ܘܪܒܢܐ ܪ̈ܘܪܒܢܝ ܡ̇ܠܟܐ. ܘܒܐ̈ܕܢܝ ܣ̈ܒܐ. ܘܒܐ̈ܕܢܝ ܟܠܗ ܥܡܐ. ܡܢ ܙܥܘܪܐ̣ ܘܥܕܡܐ ܠܪܒܐ. ܟܠܗܘܢ ܐܝܠܝܢ ܕܥܡܪܝܢ ܒܒܒܠ. ܘܥܠ ܢܗܪܐ ܕܨܘܪ
5 ܘܒ̇ܟܝܢ ܗܘܘ̇ ܘܨܝܡܝ̣ܢ ܘܡܨܠܝܢ ܩܕܡ ܡܪܝܐ
6 ܘܟܢ̇ܫ ܟܣܦܐ ܐܢܫ ܐܝܟ ܕܡ̇ܛܐ ܗܘܐ ܒܐ̈ܝܕܘܗܝ. ܘܐܝܟ ܕܡܫܟܚܝ̣
7 ܘܫܕܪ ܠܐܘܪܫܠܡ ܠܝܘܝܩܝܡ ܒܪ ܚܠܩܝܐ ܒܪ ܫܠܘܡ ܟܗܢܐ. ܘܠܘܬ ܟܗ̈ܢܐ̣ ܘܠܘܬ ܟܠܗ ܥܡܐ̇. ܐܝܠܝܢ ܕܐܫܬܟ̣ܚܘ ܥܡܗ ܒܐܘܪܫܠܡ̇
8 ܟܕ ܫܩ̣ܠ ܡܐ̈ܢܐ ܕܒܝܬܗ ܕܡܪܝܐ ܐܝܠܝܢ ܕܐܦܩ ܡܢ ܗܝܟܠܐ̇. ܐܝܟ ܕܢܗܦܟ ܐܢܘܢ ܠܐܪܥܐ ܕܝܗܘܕܐ ܒܥܣܪܬܐ ܒܢܝܣܢ. ܡܐ̈ܢܐ ܕܥܒ̣ܕ ܨܕܩܝܐ ܒܪ ܝܘܫܝܐ ܡ̇ܠܟܐ ܕܝܗܘܕܐ
9 ܡܢ ܒܬܪ ܕܫܒ̣ܐ ܢܒܘܟܕܢܨܪ ܡ̇ܠܟܐ ܠܝܘܟܢܝܐ̇. ܘܠܪ̈ܘܪܒܢܐ ܘܠܕܚܫ̈ܐ̇. ܘܠܐܘ̈ܡܢܐ ܘܠܚ̈ܝܠܘܬܐ ܕܡܢ ܐܘܪܫܠܡ̇. ܘܐܘܒܠ̣ ܐܢܘܢ ܠܒܒܠ
10 ܘܐܡܪܝܢ. ܗܐ ܫܕܪܢ ܠܟܘܢ ܟܣܦܐ. ܙܒܢ̣ܘ ܒܟܣܦܐ ܝܩܕܐ ܫܠܡܐ ܚܠܦ ܚܛܗܐ ܘܠܒܘܢܬܐ̣. ܘܥܒܕܘ ܩܘܪܒܢܐ̣ ܘܐܣܩܘ ܥܠ ܡܕܒܚܗ ܕܡܪܝܐ ܐܠܗܢ
11 ܘܨܠܘ ܥܠ ܚ̈ܝܘܗܝ ܕܢܒܘܟܕܢܨܪ ܡ̇ܠܟܐ ܕܒܒܠ̣. ܘܥܠ ܚ̈ܝܘܗܝ ܕܒܠܛܫܨܪ ܒܪܗ̣. ܕܢܗܘܘܢ ܝܘܡ̈ܬܗܘܢ. ܥܠ ܐܪܥܐ̣ ܐܝܟ ܝܘܡ̈ܬܐ ܕܫܡܝܐ
12 ܘܢܬܠ ܠܢ ܡܪܝܐ ܚܝܠܐ ܕܢܦܠܚܝܘܗܝ̣ ܘܢܢܗܪ̈ܢ ܥܝܢ̈ܝܢ. ܘܢܚ̣ܐ ܬܚܝܬ ܛܠܠܗ ܕܢܒܘܟܕܢܨܪ ܡ̇ܠܟܐ ܕܒܒܠ̣ ܘܕܒܠܛܫܨܪ ܒܪܗ. ܘܕܢܦܠܘܚ ܐܢܘܢ ܝܘܡ̈ܬܐ ܣ̈ܓܝܐܐ̣. ܘܢܫܟ̣ܚ ܪ̈ܚܡ̣ܐ ܩܕܡܝܗܘܢ
13 ܘܨܠܘ̣ ܘܒܥ̣ܘ ܥܠܝܢ ܡܢ ܡܪܝܐ ܐܠܗܢ. ܡܛܠ ܕܚ̣ܛܝܢ ܩܕܡ ܡܪܝܐ ܐܠܗܢ̣. ܘܠܐ ܗܦ̣ܟܬ ܚܡܬܗ ܕܡܪܝܐ ܐ̇ܠܗܢ ܘܪܘܓܙܗ ܡܢܢ̇. ܥܕܡܐ ܠܝܘܡܐ ܕܝܘܡܢܐ
14 ܘܬܩܪܘܢ ܟܪܟܐ ܗܢܐ ܕܫܕܪܢ ܠܘܬܟܘܢ̣. ܘܬܘܕܘܢ ܚܠܦܝܢ ܒܒܝܬܗ ܕܡܪܝܐ ܩܕܡ ܡܪܝܐ̇. ܒܝܘܡܐ ܕܥܕܥܐܕܐ ܘܒܝ̈ܘܡܬܗ ܕܡܪܝܐ
15 ܘܬܐܡܪܘܢ ܕܕܡܪܝܐ ܗܝ ܐܠܗܢ ܙܕܝܩܘܬܐ. ܘܕܝܠܢ ܒܗܬܬ ܐ̈ܦܐ̣ ܐܝܟ ܝܘܡܐ ܗܢܐ ܕܝܘܡܢܐ. ܠܓܒܪ̈ܐ ܕܝܗܘܕܐ̣ ܘܠܥܡܘܪ̈ܝܗ̇ ܕܐܘܪܫܠܡ
16 ܘܠܡ̈ܠܟܝ̇ܢ ܘܠܪ̈ܘܪܒܢܝܢ. ܘܠܟܗ̈ܢܝ̇ܢ ܘܠܢܒ̈ܝܝ̣ܢ ܘܠܐܒ̈ܗܝܢ
17 ܐܝܠܝܢ ܕܚ̣ܛܝܢ ܩܕܡ ܡܪܝܐ ܐܠܗܢ
18 ܘܠܐ ܫܡܥܢܝܗܝ̣ ܘܫܛܢ ܦܘܩ̈ܕܢܘܗܝ. ܘܠܐ ܐܬܛܦܝܣܢ̣ ܘܠܐ ܫܡܥ̣ܢ ܒܩܠܗ ܕܡܪܝܐ ܐܠܗܢ̇. ܕܢܗ̇ܠܟ ܒܦܘܩ̈ܕܢܘܗܝ ܕܡܪܝܐ ܐܠܗܢ ܕܝܗ̣ܒ ܩܕܡ ܐ̈ܦܝܢ
19 ܡܛܠ ܕܡܢ ܝܘܡܐ ܕܐܦܩ ܡܪܝܐ ܠܐ̈ܒܗܝܢ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܐ ܗܢܐ̣. ܗܘ̣ܝܢ ܗܘܝ̣ܢ ܕܠܐ ܡܬܛܦܝܣܝܢ ܠܡܪܝܐ ܐܠܗܢ. ܘܡܪܕܢ̣ ܐܝܟ ܕܠܐ ܢܫܡ̣ܥ ܒܩܠܗ
20 ܘܐܬܬ ܥܠܝܢ ܒܝܫ̣ܬ̣ܐ ܘܠܘܛܬܐ̇. ܗ̇ܝ ܕܦܩ̇ܕ ܡܪܝܐ ܠܡܘܫܐ ܥܒܕܗ̇. ܒܝܘܡܐ ܕܐܦ̣ܩ ܠܐ̈ܒܗܬܢ ܡܢ ܐܪܥܐ ܕܡܨܪܝܢ̇. ܠܡܬܠ ܠܢ ܐܪܥܐ ܕܡܪܕܝܐ ܚܠܒܐ ܘܕܒܫܐ
21 ܘܠܐ ܫܡ̣ܥܢ ܒܩܠܗ ܕܡܪܝܐ ܐܠܗܢ̇. ܠܡܥܒܕ ܟܠܗܘܢ ܦܬ̈ܓܡܐ ܕܥܒ̣̈ܕܘܗܝ ܢܒ̈ܝܐ ܕܫܕܪ ܠܘܬܢ
22 ܘܗܠܟܢ ܐܢܫ ܐܢܫ ܒܨܒܝܢ̈ܝ ܠܒܗ ܒܝ̣ܫܐ̇. ܠܡ̇ܦܠܚ ܠܐ̈ܠܗܐ ܢܘܟܪ̈ܝܐ̇. ܕܢܥܒܕ ܒܝܫ̣ܬܐ ܩܕܡ ܥܝ̈ܢܘܗܝ ܕܡܪܝܐ ܐܠܗܢ.