Esdra ܥܙܪܐ 6

¹ ܗܝܕܝܢ ܕܪܝܘܫ ܡܠܟܐ ܦ̣ܩܕ ܘܩ̣ܪܐ ܒܟܬܒܐ ܕܐܝܬ ܒܝܬ ܓܙܐ ܬܡܢ ܒܒܒܠ

² ܘܐܫܟܚ ܒܐܚܡܬܢ ܡܕܝܢܬܐ ܕܐܝܬ ܒܡܕܝ ܡܕܝܢܬܐ ܡܓܠܬܐ ܚܕܐ ܘܗܟܢܐ ܟܬܝܒ ܒܓܘܗ ܕܟܪܟܐ

³ ܒܫܢܬ ܚܕܐ ܠܟܘܪܫ ܡܠܟܐ ܟܘܪܫ ܡܠܟܐ ܣܡ ܢܡܘܣܐ ܘܦ̣ܩܕ ܕܒܝܬܐ ܕܐܠܗܐ ܕܐܝܬ ܒܐܘܪܫܠܡ ܢܬܒܢܐ ܐܬܪܐ ܕܕܒ̈ܚܐ ܕܒܚܝܢ ܘܫܬܐ̈ܣܘܗܝ ܪ̈ܡܢ ܪܘܡܗ ܐܡ̈ܝܢ ܫܬܝܢ ܘܦܬܝܗ ܐܡ̈ܝܢ ܥܣܪܝܢ

⁴ ܡܪ̈ܒܒܐ ܕܟܐ̈ܦܐ ܬܠܬܐ ܘܬܪ̈ܥܐ ܕܩܝܣܐ ܚܕ̈ܬܐ ܘܢܦܩܬܐ ܡܢ ܒܝܬ ܡܠܟܐ ܡܬܝܗܒܐ

⁵ ܘܐܦ ܡܐ̈ܢܐ ܕܒܝܬ ܐܠܗܐ ܕܕܗܒܐ ܘܕܣܐܡܐ ܕܐܦܩ ܢܒܘܟܕܢܨܪ ܡܢ ܗܝܟܠܐ ܕܒܐܘܪܫܠܡ ܘܐܘܒܠ ܐܢܘܢ ܠܒܒܠ ܐܬܝܗܒܘ ܘܐܬܘ ܠܕܘܟܬܗܘܢ ܠܗܝܟܠܐ ܕܒܐܘܪܫܠܡ ܠܐܬܪܗܘܢ ܘܐܬܚܡܠܘ ܒܒܝܬܐ ܕܐܠܗܐ

⁶ ܡܟܝܠ ܬܬܢܝ ܫܠܝܛܐ ܕܒܥܒܪ ܢܗܪܐ ܘܐܫܬܢܒܘܙܢ ܘܚܒܪ̈ܘܗܝ ܫܠܝ̈ܛܐ ܕܒܥܒܪ ܢܗܪܐ ܪܚܝܩܝܢ ܗܘܘ ܡܢ ܬܡܢ

⁷ ܫܒܘܩܘ ܠܥܒܝܕܬܐ ܕܒܝܬ ܐܠܗܐ ܕܢܥܒܕܘܢܗ̇ ܝܗܘܕ̈ܝܐ ܘܠܫܒܝܬܐ ܕܝܗܘ̈ܕܝܐ ܕܒܝܬ ܐܠܗܐ ܢܬܒܢܐ ܥܠ ܐܬܪܗ

⁸ ܘܡܢ ܩܕܡܝ ܣܝܡ ܢܡܘܣܐ ܠܡܐ ܕܝܢ ܬܗܪܘܢ ܥܡ ܫܒܝܬܐ ܕܝܗܘ̈ܕܝܐ ܗ̇ܢܘܢ ܠܡܒܢܐ ܒܝܬܐ ܕܐܠܗܐ ܗ̇ܘ ܘܡܢ ܢܟ̈ܣܝ ܡܠܟܐ ܘܡܕܬܐ ܕܒܥܒܪ ܢܗܪܐ ܬܗܘܐ ܢܦܩܬܐ ܢܦܩܐ ܘܡܬܝܗܒܐ ܠܓܒܪ̈ܐ ܗܠܝܢ ܘܥܒ̇ܕܐ ܠܐ ܢܗܘܘܢ ܡܒܛܠܝܢ

⁹ ܘܡܕܡ ܕܨܒܝܢ ܗܒܘ ܠܗܘܢ ܘܡܕܡ ܠܐ ܬܚܣܪܘܢ ܠܗܘܢ ܒܢ̈ܝ ܬܘܪ̈ܐ ܘܕܟܪ̈ܐ ܘܐܡܪ̈ܐ ܠܥܠܬܐ ܠܐܠܗ ܫܡܝܐ ܚ̈ܛܐ ܘܡܠܚܐ ܘܚܡܪܐ ܘܡܫܚܐ ܐܝܟܢܐ ܕܦܩܕܝܢ ܟܘܡܪ̈ܐ ܕܒܐܘܪܫܠܡ ܢܗܘܘܢ ܡܝܬܝܢ ܠܗܘܢ ܟܠ ܝܘܡ ܒܝܘܡ ܘܠܐ ܢܗܘܘܢ ܛܥܝܢ

¹⁰ ܘܗܢܘܢ ܢܗܘܘܢ ܡܩܪܒܝܢ ܩܘܪ̈ܒܢܐ ܠܐܠܗ ܫܡܝܐ ܘܡܨܠܝܢ ܥܠ ܡܠܟܐ ܘܒܢ̈ܘܗܝ

¹¹ ܘܡܢ ܩܕܡܝ ܣܝܡ ܢܡܘܣܐ ܕܟܠ ܐܢܫ ܕܢܫ̇ܢܐ ܦܬܓܡܐ ܗܢܐ ܢܫܬܡܛ ܩܝܣܐ ܡܢ ܒܝܬܗ ܘܢܥ̇ܒܕܘܢ ܠܗ ܙܩܝܦܐ ܘܢܙܩܦܘܢܗ ܥܠܘܗܝ ܘܒܝܬܗ ܠܒܙܬܐ ܢܬܝܗܒ ܡܛܠ ܗܕܐ

¹² ܘܐܠܗܐ ܕܐܫܟܚܢ ܫܡܗ ܬܡܢ ܢܥܡܪ ܘܟܠ ܡܠܟܐ ܘܥܡܐ ܕܢܘܫܛ ܐܝܕܗ ܠܡܫܢܝܘ ܘܠܡܚܒܠܘ ܒܝܬܐ ܗܢܐ ܕܐܠܗܐ ܕܒܐܘܪܫܠܡ ܐܢܐ ܕܪܝܘܫ ܣܡ̇ܬ ܢܡܘܣܐ ܕܒܥܓܠ ܢܐܒܕ

¹³ ܗܝܕܝܢ ܬܬܢܝ ܫܠܝܛܐ ܕܒܥܒܪ ܢܗܪܐ ܘܐܫܬܢܒܘܙܢ ܘܚܒܪ̈ܘܗܝ ܡܕܡ ܕܫ̣ܠܚ ܐܝܟ ܢܡܘܣܐ ܒܥܓܠ ܥܒܕܘ

¹⁴ ܘܫܒܝܬܐ ܕܝܗܘ̈ܕܝܐ ܥܒܕܝܢ ܘܡܣܩܝܢ ܠܪܝܫ ܒܢܒܝܘܬܗ ܕܚܓܝ ܢܒܝܐ ܘܕܙܟܪܝܐ ܒܪ ܥܕܘ ܘܒܢܘ ܘܫܟܠܠܘ ܡܢ ܢܡܘܣܐ ܕܐܠܗܐ ܕܐܝܣܪܝܠ ܘܡܢ ܢܡܘܣܐ ܕܟܘܪܫ ܘܕܕܪܝܘܫ ܘܡܢ ܢܡܘܣܐ ܕܐܪܛܚܫܫܬ ܡܠܟܐ ܕܦܪܣ

¹⁵ ܘܓ̣ܡܪ ܒܝܬܐ ܗܢܐ ܒܝܘܡ ܬܠܬܐ ܒܐܝܪܚ ܐܕܪ ܗܝ ܗܝ ܫܢܬ ܫܬ ܠܡܠܟܘܬܗ ܕܕܪܝܘܫ ܡܠܟܐ

¹⁶ ܘܥܒܕܘ ܒܢ̈ܝ ܐܝܣܪܐܝܠ ܟܘܡܪ̈ܐ ܘܠܘ̈ܝܐ ܘܫܪܟܐ ܕܒܢ̈ܝ ܝܗܘܕܐ ܥܐܕܐ ܠܒܝܬܐ ܗܢܐ ܕܒܝܬ ܐܠܗܐ ܗܢܐ ܒܚܕܘܬܐ

¹⁷ ܘܩܪܒܘ ܠܥܐܕܐ ܕܒܝܬܐ ܕܐܠܗܐ ܬܘܪ̈ܐ ܡܐܐ ܘܕܟܪ̈ܐ ܡܐܬܝܢ ܐܡܪ̈ܐ ܐܪ̈ܒܥܡܐܐ ܨܦܪ̈ܝܐ ܕܥ̈ܙܐ ܠܡܫܒܩ ܚܛܗ̈ܐ ܕܐܝܣܪܝܠ ܬܪܥܣܪ ܒܡܢܝܢܐ ܕܫܒ̈ܛܐ ܕܐܝܣܪܝܠ

¹⁸ ܘܐܩܝܡܘ ܠܟܘܡܪ̈ܐ ܒܬܫܡ̈ܫܬܗܘܢ ܘܠܠܘ̈ܝܐ ܒܬܫܡ̈ܫܬܗܘܢ ܥܠ ܥܒ̈ܝܕܬܐ ܕܒܝܬܐ ܕܐܠܗܐ ܕܒܐܪܫܠܡ ܐܝܟ ܕܟܬܝܒ ܒܟܬܒܐ ܕܢܡܘܣܐ ܕܡܘܫܐ

¹⁹ ܘܥܒܕܘ ܒܢ̈ܝ ܫܒܝܬܐ ܦܣܟ ܒܐܪܒܥܣܪ̈ܐ ܒܝܪܚܐ ܩܕܡܝܐ

²⁰ ܡܛܘܠ ܕܐܬܕܟܝܘ ܟܘܡܪ̈ܐ ܘܠܘ̈ܝܐ ܐܟܚܕܐ ܘܟܘܠܗܘܢ ܐܬܕܟܝܘ ܘܩܛܠܘ ܐܡܪ̈ܐ ܒܦܨܚܐ ܠܟܠ ܒܢ̈ܝ ܫܒܝܬܐ ܘܠܐܚܝ̈ܗܘܢ ܟܘܡܪ̈ܐ ܘܐܦ ܠܗܘܢ

²¹ ܘܐܟܠܘ ܒܢ̈ܝ ܐܝܣܪܝܠ ܐܝܠܝܢ ܕܣܠܩܘ ܡܢ ܫܒܝܬܐ ܕܒܒܠ ܟܠ ܕܦ̣ܪܫ ܡܢ ܛܡܐܘܬܐ ܕܥܡ̈ܡܐ ܕܐܪܥܐ ܠܡܨܠܝܘ ܩܕܡ ܡܪܝܐ ܐܠܗܐ ܕܐܝܣܪܝܠ

²² ܘܥܒܕܘ ܥܐܕܐ ܕܦܛܝܪ̈ܐ ܫܒܥܐ ܝܘܡ̈ܝܢ ܒܚܕܘܬܐ ܡܛܘܠ ܕܚܕܝ ܐܢܘܢ ܡܪܝܐ ܘܐܗܦܟ ܠܒܐ ܕܡܠܟ̈ܐ ܕܐܬܘܪ ܠܘܬܗܘܢ ܠܡܚܙܩܘ ܐܝ̈ܕܝܗܘܢ ܒܥܒ̇ܕܐ ܕܒܝܬܐ ܕܡܪܝܐ ܐܠܗܐ ܕܐܝܣܪܝܠ