Primo libro dei Re ܡܠܟܐ 15

¹ ܘܒܫܢܬ ܬܡܢܥܣܪܐ ܕܡܠܟܐ ܝܘܪܒܥܡ ܒܪ ܢܒܛ ܐܡܠܟ ܐܒܝܐ ܥܠ ܝܗܘܕܐ

² ܬܠܬ ܫ̈ܢܝܢ ܒܐܘܪܫܠܡ ܘܫܡܐ ܕܐܡܗ ܡܥܟܐ ܒܪܬ ܥܒܕܫܠܘܡ

³ ܘܗܠܟ ܒܟܠܗܘܢ ܚ̈ܛܗܘܗܝ ܕܐܒܘܗܝ ܕܥܒܕ ܩܕܡܘܗܝ ܘܠܐ ܗܘܐ ܠܒܗ ܫܠܡ ܥܡ ܡܪܝܐ ܐܠܗܗ ܐܝܟ ܠܒܐ ܕܕܘܝܕ ܐܒܘܗܝ

⁴ ܘܡܛܠ ܕܘܝܕ ܐܒܘܗܝ ܝܗܒ ܠܗ ܡܪܝܐ ܐܠܗܐ ܫܪܓܐ ܒܐܘܪܫܠܡ ܕܢܩܝܡ ܒܬܪܗ ܒܪܗ ܘܢܩܝܡܝܘܗܝ ܒܐܘܪܫܠܡ

⁵ ܡܛܠ ܕܥܒܕ ܕܘܝܕ ܕܫܦܝܪ ܩܕܡ ܡܪܝܐ ܐܠܗܗ ܘܠܐ ܣܛܐ ܡܢ ܟܠ ܡܕܡ ܕܦܩܕܗ ܟܠ ܝܘ̈ܡܝ ܚ̈ܝܘܗܝ ܒܠܚܘܕ ܐܠܐ ܐܢ ܒܨܒܘܬܐ ܕܐܘܪܝܐ ܚܬܝܐ

⁶ ܘܩܪܒܐ ܗܘܐ ܒܝܬ ܐܒܝܐ ܒܪ ܪܚܒܥܡ ܘܒܝܬ ܝܘܪܒܥܡ ܟܠ ܝܘ̈ܡܝ ܚ̈ܝܝܗܘܢ

⁷ ܘܫܪܟܐ ܕܦܬ̈ܓܡܘܗܝ ܕܐܒܝܐ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ

⁸ ܘܫܟܒ ܐܒܝܐ ܥܡ ܐ̈ܒܗܘܗܝ ܘܐܬܩܒܪ ܒܩܪܝܬܐ ܕܕܘܝܕ ܘܐܡܠܟ ܐܣܐ ܒܪܗ ܒܬܪܗ

⁹ ܘܒܫܢܬ ܥܣܪ̈ܝܢ ܠܝܘܪܒܥܡ ܡܠܟܐ ܕܐܝܣܪܝܠ ܐܡܠܟ ܐܣܐ ܡܠܟܐ ܕܝܗܘܕܐ

¹⁰ ܘܐܪ̈ܒܥܝܢ ܘܚܕܐ ܫ̈ܢܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܡܥܟܐ ܒܪܬ ܥܒܕܫܠܘܡ

¹¹ ܘܥܒܕ ܐܣܐ ܕܫܦܝܪ ܩܕܡ ܡܪܝܐ ܐܝܟ ܕܘܝܕ ܐܒܘܗܝ

¹² ܘܐܥܒܪ ܙܢ̈ܝܐ ܡܢ ܐܪܥܐ ܘܐܥܒܪ ܟܠܗܘܢ ܦܬܟܪ̈ܐ ܕܥܒܕܘ ܐ̈ܒܗܘܗܝ

¹³ ܘܐܦ ܠܡܥܟܐ ܐܡܗ ܐܥܒܪܗ ܡܢ ܪܒܘܬܗ ܥܠ ܕܥܒܕܐ ܗܘܬ ܥܐܕܐ ܠܕܚܠܬܗ ܘܦܣܩܗ ܐܣܐ ܠܦܬܟܪܬܗ ܘܐܘܩܕܗ ܒܢܚܠܐ ܕܩܕܪܘܢ

¹⁴ ܘܥ̈ܠܘܬܐ ܠܐ ܐܥܒܪ ܒܪܡ ܠܒܗ ܕܐܣܐ ܫܠܡ ܗܘܐ ܥܡ ܡܪܝܐ ܐܠܗܗ ܟܠܗܘܢ ܝܘܡ̈ܬܗ

¹⁵ ܘܐܝܬܝ ܩܘܕܫ̈ܐ ܕܐ̈ܒܗܘܗܝ ܘܩ̈ܘܕܫܘܗܝ ܠܒܝܬܗ ܕܡܪܝܐ ܟܣܦܐ ܘܕܗܒܐ ܘܡܐ̈ܢܐ

¹⁶ ܘܩܪܒܐ ܗܘܐ ܒܝܬ ܐܣܐ ܠܒܝܬ ܒܥܫܐ ܡܠܟܐ ܕܐܝܣܪܝܠ ܟܠܗܘܢ ܝܘܡ̈ܬܗܘܢ

¹⁷ ܗܝܕܝܢ ܣܠܩ ܒܥܫܐ ܡܠܟܐ ܕܐܝܣܪܝܠ ܥܠ ܝܗܘܕܐ ܘܒܢܐ ܠܪܡܬܐ ܘܠܐ ܫܒܩ ܕܢܦܩ ܘܕܥܐܠ ܠܐܣܐ ܡܠܟܐ ܕܝܗܘܕܐ

¹⁸ ܘܢܣܒ ܐܣܐ ܟܠܗ ܟܣܦܐ ܘܕܗܒܐ ܕܐܫܬܚܪ ܒܒܝܬܗ ܕܡܪܝܐ ܘܒܓܙܐ ܕܒܝܬ ܡܠܟܐ ܘܝܗܒ ܒܐܝܕܐ ܕܥܒ̈ܕܘܗܝ ܘܫܕܪ ܐܢܘܢ ܐܣܐ ܡܠܟܐ ܕܝܗܘܕܐ ܠܘܬ ܒܪܗܕܕ ܒܪ ܛܒܪ ܐܡܘܢ ܒܪ ܚܙܝܘܢ ܡܠܟܐ ܕܐܕܘܡ ܕܝܬܒ ܒܕܪܡܣܘܩ ܠܡܐܡܪ

¹⁹ ܩܝܡܐ ܒܝܢܝ ܘܠܟ ܘܒܝܬ ܐܒܝ ܠܐܒܘܟ ܗܐ ܫܕܪܬ ܠܟ ܫܘܚܕܐ ܟܣܦܐ ܘܕܗܒܐ ܙܠ ܒܛܠ ܩܝܡܟ ܕܥܡ ܒܥܫܐ ܡܠܟܐ ܕܐܝܣܪܝܠ ܘܢܫܩܘܠ ܡܢܝ

²⁰ ܘܫܡܥ ܒܪܗܕܕ ܡܢ ܐܣܐ ܘܫܕܪ ܠܪ̈ܒܝ ܚ̈ܝܠܐ ܕܝܠܗ ܥܠ ܩܘܪ̈ܝܐ ܕܐܝܣܪܝܠ ܘܚܪܒܘ ܠܥܝܘܢ ܘܠܕܢ ܘܠܐܒܠ ܒܝܬ ܡܥܟܐ ܘܠܟܠܗܝܢ ܩܘܪ̈ܝܐ ܕܒܟܠܗ ܐܪܥܐ ܕܢܦܬܠܝ

²¹ ܘܟܕ ܫܡܥ ܒܥܫܐ ܦܫ ܡܢ ܕܢܒܢܝܗ ܠܪܡܬܐ ܘܝܬܒ ܒܬܪܨܐ

²² ܘܡܠܟܐ ܐܣܐ ܐܫܡܥ ܠܟܠܗ ܝܗܘܕܐ ܘܠܝܬ ܕܚܣܝܟ ܘܫܩܠܘ ܟܐ̈ܦܐ ܕܪܡܬܐ ܘܩܝ̈ܣܐ ܕܒܢܐ ܒܥܫܐ ܘܒܢܐ ܒܗܘܢ ܡܠܟܐ ܐܣܐ ܠܓܒܥ ܕܒܢܝܡܝܢ ܘܠܡܨܦܝܐ

²³ ܘܫܪܟܐ ܕܦܬ̈ܓܡܘܗܝ ܕܐܣܐ ܘܟܠܗ ܓܢܒܪܘܬܗ ܘܟܠܡܕܡ ܕܥܒܕ ܘܩܘܪ̈ܝܐ ܕܒܢܐ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ. ܘܒܙܒܢܐ ܕܣܝܒܘܬܗ ܕܐܣܐ ܐܬܟܪܗ ܡܢ ܪ̈ܓܠܘܗܝ

²⁴ ܘܫܟܒ ܐܣܐ ܥܡ ܐ̈ܒܗܘܗܝ ܘܐܬܩܒܪ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ ܐܒܘܗܝ ܘܐܡܠܟ ܝܘܫܦܛ ܒܪܗ ܒܬܪܗ

²⁵ ܘܢܕܒ ܒܪ ܝܘܪܒܥܡ ܐܡܠܟ ܥܠ ܐܝܣܪܝܠ ܒܫܢܬ ܬܪ̈ܬܝܢ ܠܐܣܐ ܡܠܟܐ ܕܝܗܘܕܐ ܘܐܡܠܟ ܥܠ ܐܝܣܪܝܠ ܬܪ̈ܬܝܢ ܫ̈ܢܝܢ

²⁶ ܘܥܒܕ ܕܒܝܫ ܩܕܡ ܡܪܝܐ ܘܗܠܟ ܒܐܘܪܚܐ ܕܐܒܘܗܝ ܘܒܚ̈ܛܗܘܗܝ ܕܐܚܛܝ ܠܐܝܣܪܝܠ

²⁷ ܘܡܪܕ ܥܠܘܗܝ ܒܥܫܐ ܒܪ ܐܚܝܐ ܡܢ ܒܝܬ ܐܝܣܟܪ ܘܩܛܠܗ ܒܓܬ ܕܦܠܫ̈ܬܝܐ ܘܢܕܒ ܘܟܠܗ ܐܝܣܪܝܠ ܟܪܝܟܝܢ ܥܠ ܓܬ

²⁸ ܘܩܛܠܗ ܒܥܫܐ ܒܫܢܬ ܬܠܬ ܠܐܣܐ ܡܠܟܐ ܕܝܗܘܕܐ ܘܐܡܠܟ ܒܬܪܗ

²⁹ ܘܟܕ ܐܡܠܟ ܡܚܐ ܠܟܠܗ ܒܝܬ ܝܘܪܒܥܡ ܘܠܐ ܫܒܩ ܟܠ ܢܫܡܐ ܠܒܝܬ ܝܘܪܒܥܡ ܥܕܡܐ ܕܐܘܒܕܗ ܐܝܟ ܦܬܓܡܗ ܕܡܪܝܐ ܕܡܠܠ ܒܐܝܕܐ ܕܥܒܕܗ ܐܚܝܐ ܢܒܝܐ ܫܝܠܘܢܝܐ

³⁰ ܥܠ ܝܘܪܒܥܡ ܒܪ ܢܒܛ ܘܥܠ ܚ̈ܛܗܘܗܝ ܕܚܛܐ ܘܐܚܛܝ ܠܐܝܣܪܐܝܠ ܒܪܘܓܙܐ ܪܒܐ ܕܐܪܓܙ ܠܡܪܝܐ ܐܠܗܐ ܕܐܝܣܪܝܠ

³¹ ܘܫܪܟܐ ܕܦܬ̈ܓܡܘܗܝ ܕܢܕܒ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܐܝܠ

³² ܘܩܪܒܐ ܗܘܐ ܒܝܬ ܒܥܫܐ ܘܒܝܬ ܐܣܐ ܡܠܟܐ ܕܝܗܘܕܐ ܟܠܗܘܢ ܝܘܡ̈ܬܗܘܢ

³³ ܘܒܫܢܬ ܬܠܬ ܠܐܣܐ ܡܠܟܐ ܕܝܗܘܕܐ ܐܡܠܟ ܒܥܫܐ ܒܪ ܐܚܝܐ ܥܠ ܟܠܗ ܐܝܣܪܝܠ ܒܬܪܨܐ ܥܣܪ̈ܝܢ ܘܐܪ̈ܒܥ ܫ̈ܢܝܢ

³⁴ ܘܥܒܕ ܕܒܝܫ ܩܕܡ ܡܪܝܐ ܘܗܠܟ ܒܐܘܪ̈ܚܬܗ ܕܝܘܪܒܥܡ ܒܪ ܢܒܛ ܘܒܚ̈ܛܗܘܗܝ ܕܐܚܛܝ ܠܐܝܣܪܝܠ