Levitico ܟܗ̈ܢܐ 2

¹ ܘܢܰܦܫܳܐ ܟܰܕ ܬܩܰܪܶܒ ܩܽܘܪܒܳܢܳܐ ܕܰܣܡܺܝܕܳܐ ܠܡܳܪܝܳܐ. ܢܰܫܺܝܦܳܐ ܢܶܗܘܶܐ ܩܽܘܪܒܳܢܶܗ. ܘܢܶܣܽܘܟ ܥܠܰܘܗܝ ܡܶܫܚܳܐ. ܘܰܢܣܺܝܡ ܥܠܰܘܗܝ ܠܒܽܘܢܬܳܐ.

² ܘܢܰܝܬܶܝܘܗܝ ܠܘܳܬ ܟܳܗܢܳܐ ܒܰܪ ܐܰܗܪܽܘܢ. ܘܢܶܙܘܰܪ ܡܶܢ ܬܰܡܳܢ ܡܠܶܐ ܙܘܳܪܶܗ. ܡܶܢ ܢܰܫܺܝܦܳܐ. ܘܡܶܢ ܡܶܫܚܳܐ. ܕܥܰܠ ܟܽܠܳܗ̇ ܠܒܽܘܢܬܳܐ. ܘܢܰܣܶܩ ܟܳܗܢܳܐ ܕܽܘܟܪܳܢܶܗ ܥܰܠ ܡܰܕܒܚܳܐ. ܩܽܘܪܒܳܢܳܐ ܠܪܺܝܚ ܣܘܳܬܳܐ ܠܡܳܪܝܳܐ.

³ ܘܰܕܡܶܫܬܚܰܪ ܡܶܢ ܣܡܺܝܕܳܐ ܠܰܐܗܪܽܘܢ ܘܠܰܒܢܰܘ̈ܗܝ. ܩܕܽܘܫܩܽܘܕ̈ܫܺܝܢ ܗܘ ܡܶܢ ܩܽܘܖ̈ܒܳܢܰܘܗܝ ܕܡܳܪܝܳܐ.

⁴ ܘܟܰܕ ܬܩܰܪܶܒ ܩܽܘܪܒܳܢܳܐ ܕܰܣܡܺܝܕܳܐ ܕܡܶܬܶܐܦܶܐ ܒܬܰܢܽܘܪܳܐ. ܢܰܫܺܝܦܳܐ ܚܳܚܖ̈ܳܬܳܐ ܦܰܛܺܝܖ̈ܳܬܳܐ ܕܦܺܝ̈ܠܳܢ ܒܡܶܫܚܳܐ. ܘܠܶܓܢ̈ܶܐ ܦܰܛܺܝܖ̈ܶܐ ܕܦܺܝܠܺܝܢ ܒܡܶܫܚܳܐ.

⁵ ܘܶܐܢ ܣܡܺܝܕܳܐ ܕܥܰܠ ܛܺܝܓܢܳܐ ܩܽܘܪܒܳܢܳܟ. ܢܰܫܺܝܦܳܐ ܦܰܛܺܝܪܳܐ ܕܦܺܝܠ ܒܡܶܫܚܳܐ ܢܶܗܘܶܐ.

⁶ ܘܦܽܘܬܳܝܗܝ ܦܶܬ̈ܶܐ. ܘܣܽܘܟ ܥܠܰܘܗܝ ܡܶܫܚܳܐ ܥܰܠ ܣܡܺܝܕܳܐ ܗܰܘ.

⁷ ܘܶܐܢ ܣܡܺܝܕܰܐ ܗܘ ܕܰܛܪܳܛܩܶܠ ܩܽܘܪܒܳܢܳܟ. ܣܡܺܝܕܳܐ ܢܰܫܺܝܦܳܐ ܒܡܶܫܚܳܐ ܢܶܬܥܒܶܕ.

⁸ ܘܬܰܝܬܶܐ ܣܡܺܝܕܳܐ ܕܡܶܬܥܒܶܕ ܡܶܢ ܗܳܠܶܝܢ ܠܡܳܪܝܳܐ. ܘܰܬܩܰܪܒܺܝܘܗܝ ܠܟܳܗܢܳܐ. ܘܢܰܣܩܺܝܘܗܝ ܠܡܰܕܒܚܳܐ ܠܡܳܪܝܳܐ.

⁹ ܘܢܶܦܪܽܘܫ ܟܳܗܢܳܐ ܡܶܢ ܣܡܺܝܕܳܐ ܕܽܘܟܪܳܢܶܗ. ܘܢܰܣܶܩ ܠܡܰܕܒܚܳܐ. ܩܽܘܪܒܳܢܳܐ ܠܪܺܝܚ ܣܘܳܬܳܐ ܠܡܳܪܝܳܐ.

¹⁰ ܘܰܕܡܶܫܬܚܰܪ ܡܶܢ ܣܡܺܝܕܳܐ ܠܰܐܗܪܽܘܢ ܘܠܰܒܢܰܘ̈ܗܝ. ܩܕܽܘܫܩܽܘܕ̈ܫܺܝܢ ܡܶܢ ܩܽܘܖ̈ܒܳܢܰܘܗܝ ܕܡܳܪܝܳܐ.

¹¹ ܟܽܠ ܣܡܺܝܕܳܐ ܕܰܬܩܰܪܒܽܘܢ ܠܡܳܪܝܳܐ. ܠܳܐ ܢܶܬܥܒܶܕ ܚܰܡܺܝܥܳܐ. ܡܶܛܽܠ ܕܟܽܠ ܚܡܺܝܪ. ܘܟܽܠ ܕܒܶܫ. ܠܳܐ ܬܰܣܩܽܘܢ ܡܶܢܶܗ ܩܽܘܪܒܳܢܳܐ ܠܡܳܪܝܳܐ.

¹² ܩܽܘܖ̈ܒܳܢܶܐ ܖ̈ܺܝܫܝܳܬܳܐ ܬܩܰܪܒܽܘܢ ܐܶܢܽܘܢ ܠܡܳܪܝܳܐ. ܘܥܰܠ ܡܰܕܒܚܳܐ ܠܳܐ ܢܰܣܩܽܘܢ ܪܺܝܚ ܣܘܳܬܳܐ.

¹³ ܘܟܽܠܶܗ ܩܽܘܪܒܳܢܳܐ ܕܰܣܡܺܝܕܳܐ ܒܡܶܠܚܳܐ ܬܶܡܠܽܘܚ. ܠܳܐ ܬܒܰܛܶܠ ܡܶܠܚܳܐ ܕܰܩܝܳܡܶܗ ܕܰܐܠܳܗܳܟ ܡܶܢ ܣܡܺܝܕܳܟ. ܥܰܠ ܟܽܠ ܩܽܘܖ̈ܒܳܢܰܝܟ ܬܩܰܪܶܒ ܡܶܠܚܳܐ.

¹⁴ ܘܶܐܢ ܬܩܰܪܶܒ ܩܽܘܪܒܳܢܳܐ ܕܒܰܟܳܖ̈ܶܐ ܠܡܳܪܝܳܐ. ܟܰܦܳܐ ܕܰܡܚܰܪܟܳܐ ܒܢܽܘܪܳܐ. ܦܖ̈ܺܝܟܳܬܳܐ ܡܕܰܟܝ̈ܳܬܳܐ ܬܩܰܪܶܒ ܩܽܘܪܒܳܢܳܐ ܕܒܰܟܳܖ̈ܰܝܟ.

¹⁵ ܘܬܶܬܶܠ ܡܶܫܚܳܐ ܥܠܰܘܗܝ. ܘܰܠܒܽܘܢܬܳܐ. ܩܽܘܪܒܳܢܰܐ ܗܘ.

¹⁶ ܘܢܰܣܶܩ ܟܳܗܢܳܐ ܕܽܘܟܪܳܢܶܗ ܡܶܢ ܦܖ̈ܺܝܟܳܬܳܐ. ܘܡܶܢ ܡܶܫܚܳܐ. ܥܰܠ ܟܽܠܳܗ̇ ܠܒܽܘܢܬܳܐ ܩܽܘܪܒܳܢܳܐ ܠܡܳܪܝܳܐ.