Levitico ܟܗ̈ܢܐ 17

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

² ܡܰܠܶܠ ܥܰܡ ܐܰܗܪܽܘܢ ܘܥܰܡ ܒܢܰܘ̈ܗܝ. ܘܥܰܡ ܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܗܳܢܰܘ ܦܶܬܓܳܡܳܐ ܕܦܰܩܶܕ ܡܳܪܝܳܐ ܠܡܺܐܡܰܪ.

³ ܓܒܰܪ ܓܒܰܪ ܡܶܢ ܒܶܝܬ ܝܺܣܪܳܐܶܝܠ. ܕܢܶܟܽܘܣ ܬܰܘܪܳܐ. ܐܰܘ ܐܶܡܪܳܐ. ܐܰܘ ܥܶܙܳܐ ܒܡܰܫܪܺܝܬܳܐ. ܐܰܘ ܕܢܶܟܽܘܣ ܠܒܰܪ ܡܶܢ ܡܰܫܪܺܝܬܳܐ.

⁴ ܘܰܠܬܰܪܥܳܐ ܕܡܰܫܟܰܢ ܙܰܒܢܳܐ ܠܳܐ ܐܰܝܬܝܶܗ̇. ܕܰܢܩܰܪܒܺܝܘܗܝ ܩܽܘܪܒܳܢܳܐ ܠܡܳܪܝܳܐ ܩܕܳܡ ܡܰܫܟܢܶܗ ܕܡܳܪܝܳܐ. ܕܡܳܐ ܢܶܬܚܰܫܰܒ ܥܰܠ ܓܰܒܪܳܐ ܗܰܘ. ܡܶܛܽܠ ܕܰܕܡܳܐ ܐܶܫܰܕ. ܘܢܺܐܒܰܕ ܓܰܒܪܳܐ ܗܰܘ ܡܶܢ ܓܰܘ ܥܰܡܶܗ.

⁵ ܡܶܛܽܠ ܕܢܶܗܘܽܘܢ ܡܰܝܬܶܝܢ ܒܢܰܝ̈ ܝܺܣܪܳܐܶܝܠ ܕܶܒܚܰܝ̈ܗܽܘܢ ܕܕܳܒܚܺܝܢ ܥܰܠ ܐܰܦܰܝ̈ ܚܰܩܠܳܐ. ܘܢܰܝܬܽܘܢ ܐܶܢܽܘܢ ܩܕܳܡ ܡܳܪܝܳܐ. ܘܰܠܬܰܪܥܳܐ ܕܡܰܫܟܰܢ ܙܰܒܢܳܐ ܠܘܳܬ ܟܳܗܢܳܐ. ܘܰܢܕܰܒܚܽܘܢ ܐܶܢܽܘܢ ܕܶܒܚ̈ܶܐ ܫܰܠ̈ܡܶܐ ܠܡܳܪܝܳܐ.

⁶ ܘܢܶܪܽܘܣ ܟܳܗܢܳܐ ܕܡܳܐ ܥܰܠ ܡܰܕܒܚܶܗ ܕܡܳܪܝܳܐ. ܒܬܰܪܥܳܐ ܕܡܰܫܟܰܢ ܙܰܒܢܳܐ. ܘܢܰܣܶܩ ܬܰܪܒܳܐ ܠܪܺܝܚ ܣܘܳܬܳܐ ܠܡܳܪܝܳܐ.

⁷ ܘܬܽܘܒ ܠܳܐ ܢܕܰܒܚܽܘܢ ܕܶܒܚܰܝ̈ܗܽܘܢ ܠܫܺܐܕ̈ܶܐ ܕܛܳܥܶܝܢ ܒܳܬܰܪܗܽܘܢ. ܗܳܢܳܐ ܢܳܡܽܘܣܳܐ ܠܥܳܠܰܡ ܢܶܗܘܶܐ ܠܗܽܘܢ ܠܕܳܖ̈ܰܝܗܽܘܢ.

⁸ ܘܶܐܡܰܪ ܠܗܽܘܢ. ܓܒܰܪ ܓܒܰܪ ܡܶܢ ܕܒܶܝܬ ܝܺܣܪܳܐܶܝܠ. ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ. ܕܥܳܡܪܺܝܢ ܒܰܝܢܳܬܟܽܘܢ. ܕܢܰܣܶܩ ܝܰܩܕܳܐ ܫܰܠܡܳܐ. ܐܰܘ ܕܶܒܚܳܐ.

⁹ ܘܰܠܬܰܪܥܳܐ ܕܡܰܫܟܰܢ ܙܰܒܢܳܐ ܠܳܐ ܢܰܝܬܶܝܘܗܝ ܕܰܢܩܰܪܒܺܝܘܗܝ ܩܕܳܡ ܡܳܪܝܳܐ. ܢܺܐܒܰܕ ܓܰܒܪܳܐ ܗܰܘ ܡܶܢ ܓܰܘ ܥܰܡܶܗ.

¹⁰ ܘܰܓܒܰܪ ܓܒܰܪ ܡܶܢ ܒܢܰܝ̈ ܝܺܣܪܳܐܶܝܠ. ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܟܽܘܢ. ܕܢܶܐܟܽܘܠ ܕܡܳܐ. ܐܶܬܶܠ ܪܽܘܓܙܝ ܒܢܰܦܫܳܐ ܕܳܐܟܠܳܐ ܕܡܳܐ. ܘܰܐܘܒܕܺܝܗ̇ ܡܶܢ ܓܰܘ ܥܰܡܳܗ̇.

¹¹ ܡܶܛܽܠ ܕܢܰܦܫܳܐ ܕܟܽܠ ܒܣܰܪ ܕܡܳܐ ܗܽܘ. ܘܶܐܢܳܐ ܝܰܗܒܬܶܗ ܠܟܽܘܢ ܥܰܠ ܡܰܕܒܚܳܐ ܠܚܽܘܣܳܝܳܐ ܕܢܰܦ̈ܫܳܬܟܽܘܢ. ܡܶܛܽܠ ܕܰܕܡܳܐ ܗܽܘ ܡܚܰܣܶܐ ܥܰܠ ܢܰܦܫܳܐ.

¹² ܡܶܛܽܠ ܗܳܢܳܐ ܐܶܡܪܶܬ ܠܰܒܢܰܝ̈ ܝܺܣܪܳܐܶܝܠ. ܕܟܽܠ ܢܰܦܫܳܐ ܡܶܢܟܽܘܢ ܠܳܐ ܬܶܐܟܽܘܠ ܕܡܳܐ. ܘܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܥܰܡܟܽܘܢ. ܠܳܐ ܢܶܐܟܠܽܘܢ ܕܡܳܐ.

¹³ ܘܰܓܒܰܪ ܓܒܰܪ ܡܶܢ ܒܢܰܝ̈ ܝܺܣܪܳܐܶܝܠ. ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܟܽܘܢ. ܕܰܢܨܽܘܕ ܨܰܝܕܳܐ ܕܚܰܝܽܘܬܳܐ. ܐܰܘ ܕܦܳܪܰܚܬܳܐ ܕܡܶܬܐܰܟܠܳܐ. ܢܶܐܫܽܘܕ ܕܡܳܗ̇ ܘܰܢܟܰܣܶܝܘܗܝ ܒܥܰܦܪܳܐ.

¹⁴ ܡܶܛܽܠ ܕܢܰܦܫܳܐ ܕܟܽܠ ܒܣܰܪ ܕܡܳܐ ܗܽܘ. ܘܶܐܡܰܪ ܠܰܒܢܰܝ̈ ܝܺܣܪܳܐܶܝܠ. ܕܡܳܐ ܕܟܽܠ ܒܣܰܪ ܠܳܐ ܬܶܐܟܠܽܘܢ. ܡܶܛܽܠ ܕܢܰܦܫܳܐ ܕܟܽܠ ܒܣܰܪ ܕܡܳܐ ܗܽܘ. ܘܟܽܠܡܰܢ ܕܳܐܟܶܠ ܠܶܗ ܢܺܐܒܰܕ.

¹⁵ ܘܟܽܠ ܢܰܦܫܳܐ ܕܬܶܐܟܽܘܠ ܦܰܓܪܳܐ. ܐܰܘ ܕܰܬܒܺܝܪ ܠܚܰܝܽܘܬܳܐ. ܒܟܽܘܢ ܘܒܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܟܽܘܢ. ܢܚܰܠܶܠ ܡܳܐܢܰܘ̈ܗܝ. ܘܢܶܣܚܶܐ ܒܡܰܝ̈ܳܐ. ܘܢܶܗܘܶܐ ܛܡܰܐ ܥܕܰܡܳܐ ܠܪܰܡܫܳܐ. ܘܢܶܬܕܰܟܶܐ.

¹⁶ ܘܶܐܢ ܠܳܐ ܢܚܰܠܶܠ ܡܳܐܢܰܘ̈ܗܝ. ܘܒܶܣܪܶܗ ܠܳܐ ܢܰܣܚܶܐ. ܢܩܰܒܶܠ ܚܛܳܗܶܗ.