Deuteronomio ܬܢܝܢ ܢܡܘܣܐ 20

¹ ܘܟܰܕ ܬܶܦܽܘܩ ܠܰܩܪܳܒܳܐ ܥܰܠ ܒܥܶܠܕܒܳܒܰܝ̈ܟ. ܘܬܶܚܙܶܐ ܖ̈ܰܟܫܳܐ. ܘܡܰܖ̈ܟܒܳܬܳܐ. ܥܰܡܳܐ ܕܣܰܓܺܝ ܡܶܢܳܟ. ܠܳܐ ܬܶܕܚܰܠ ܡܶܢܗܽܘܢ. ܡܶܛܽܠ ܕܡܳܪܝܳܐ ܐܰܠܳܗܳܟ ܐܳܙܶܠ ܥܰܡܳܟ. ܕܰܐܣܩܳܟ ܡܶܢ ܐܰܪܥܳܐ ܕܡܶܨܪܶܝܢ.

² ܘܡܳܐ ܕܰܩܪܶܒܬܽܘܢ ܠܰܩܪܳܒܳܐ. ܢܶܩܪܽܘܒ ܟܳܗܢܳܐ. ܘܢܺܐܡܰܪ ܠܥܰܡܳܐ.

³ ܫܡܰܥ ܝܺܣܪܳܐܶܝܠ. ܐܰܢ̱ܬܽܘܢ ܩܳܪܒܺܝܬܽܘܢ ܝܰܘܡܳܢܳܐ ܠܰܩܪܳܒܳܐ ܥܰܠ ܒܥܶܠܕܒܳܒܰܝ̈ܟܽܘܢ. ܠܳܐ ܢܶܬܬܒܰܪ ܠܶܒܟܽܘܢ. ܘܠܳܐ ܬܶܕܚܠܽܘܢ. ܘܠܳܐ ܬܙܽܘܥܽܘܢ. ܘܠܳܐ ܬܶܬܪܰܗܒܽܘܢ ܡܶܢ ܩܕܳܡܰܝܗܽܘܢ.

⁴ ܡܶܛܽܠ ܕܡܳܪܝܳܐ ܐܰܠܳܗܳܟ ܐܳܙܶܠ ܥܰܡܳܟ ܕܰܐܣܩܳܟ ܡܶܢ ܐܰܪܥܳܐ ܕܡܶܨܪܶܝܢ. ܘܗܽܘ ܢܶܬܟܰܬܰܫ ܥܰܠ ܐܰܦܰܝ̈ܟܽܘܢ ܥܰܡ ܒܥܶܠܕܒܳܒܰܝ̈ܟܽܘܢ. ܘܢܶܦܪܽܘܩܟܽܘܢ.

⁵ ܘܢܺܐܡܪܽܘܢ ܣܳܦܖ̈ܶܐ ܠܥܰܡܳܐ. ܡܰܢܽܘ ܓܰܒܪܳܐ ܕܰܒܢܳܐ ܒܰܝܬܳܐ ܚܰܕܬܳܐ ܘܠܳܐ ܚܰܕܬܶܗ. ܢܶܗܦܽܘܟ ܢܺܐܙܰܠ ܠܒܰܝܬܶܗ. ܕܰܠܡܳܐ ܢܶܬܩܛܶܠ ܒܰܩܪܳܒܳܐ. ܘܓܰܒܪܳܐ ܐ̱ܚܪܺܢܳܐ ܢܚܰܕܬܺܝܘܗܝ.

⁶ ܘܡܰܢܽܘ ܓܰܒܪܳܐ ܕܰܢܨܰܒ ܟܰܪܡܳܐ ܘܠܳܐ ܥܨܰܪ ܡܶܢܶܗ. ܢܶܗܦܽܘܟ ܢܺܐܙܰܠ ܠܒܰܝܬܶܗ. ܕܰܠܡܳܐ ܢܶܬܩܛܶܠ ܒܰܩܪܳܒܳܐ. ܘܓܰܒܪܳܐ ܐ̱ܚܪܺܢܳܐ ܢܶܥܨܪܺܝܘܗܝ.

⁷ ܘܡܰܢܽܘ ܓܰܒܪܳܐ ܕܰܡܟܰܪ ܐܰܢ̱ܬܬܳܐ ܘܠܳܐ ܢܰܣܒܳܗ̇. ܢܶܗܦܽܘܟ ܢܺܐܙܰܠ ܠܒܰܝܬܶܗ. ܕܰܠܡܳܐ ܢܶܬܩܛܶܠ ܒܰܩܪܳܒܳܐ. ܘܓܰܒܪܳܐ ܐ̱ܚܪܺܢܳܐ ܢܶܣܒܺܝܗ̇.

⁸ ܘܢܰܘܣܦܽܘܢ ܣܳܦܖ̈ܶܐ ܘܢܺܐܡܪܽܘܢ ܠܥܰܡܳܐ. ܡܰܢܽܘ ܓܰܒܪܳܐ ܕܕܰܚܺܝܠ ܘܪܰܬܺܝܬ ܠܶܒܶܗ. ܢܶܗܦܽܘܟ ܢܺܐܙܰܠ ܠܒܰܝܬܶܗ. ܕܰܠܡܳܐ ܢܶܬܬܒܰܪ ܠܶܒܳܐ ܕܰܐܚܰܘ̈ܗܝ ܐܰܝܟ ܕܠܶܒܶܗ.

⁹ ܘܡܳܐ ܕܫܰܠܶܡܘ ܣܳܦܖ̈ܶܐ ܠܡܺܐܡܰܪ ܠܥܰܡܳܐ. ܢܩܽܘܡܽܘܢ ܖ̈ܺܝܫܰܝ ܚܰܝ̈ܠܰܘܳܬܐ ܒܪܺܝܫ ܥܰܡܳܐ.

¹⁰ ܘܡܳܐ ܕܩܳܪܶܒ ܐܰܢ̱ܬ ܠܰܩܪܺܝܬܳܐ ܠܡܶܬܟܰܬܳܫܽܘ ܥܠܶܝܗ̇. ܐܰܟܪܶܙ ܥܠܶܝܗ̇ ܫܠܳܡܳܐ.

¹¹ ܘܶܐܢ ܫܠܳܡܳܐ ܬܶܥܢܶܝܟ ܘܬܶܦܬܰܚ ܠܳܟ. ܟܽܠ ܥܰܡܳܐ ܕܡܶܫܬܟܰܚ ܒܳܗ̇. ܢܶܗܘܽܘܢ ܠܳܟ ܥܰܒ̈ܕܶܐ ܡܰܣܩܰܝ̈ ܡܰܕܰܐܬܳܐ. ܘܢܶܦܠܚܽܘܢܳܟ.

¹² ܘܶܐܢ ܠܳܐ ܬܰܫܠܶܡ ܠܳܟ. ܘܬܶܥܒܶܕ ܥܰܡܳܟ ܩܪܳܒܳܐ. ܐܰܠܽܘܨܶܝܗ̇.

¹³ ܘܢܰܫܠܡܺܝܗ̇ ܡܳܪܝܳܐ ܐܰܠܳܗܳܟ ܒܺܐܝ̈ܕܰܝܟ. ܘܩܰܛܶܠ ܟܽܠܗܽܘܢ ܕܶܟܖ̈ܶܝܗ̇ ܒܦܽܘܡܳܐ ܕܚܰܪܒܳܐ.

¹⁴ ܒܰܠܚܽܘܕ ܢܶܫ̈ܶܐ. ܘܺܝܩܰܪܬܳܐ. ܘܰܒܥܺܝܪܳܐ. ܘܟܽܠ ܕܺܐܝܬ ܒܰܩܪܺܝܬܳܐ. ܘܟܽܠ ܒܶܙܬܳܐ ܒܽܘܙ ܠܳܟ. ܘܰܐܟܽܘܠ ܡܶܢ ܒܶܙܬܳܐ ܕܰܒܥܶܠܕܒܳܒܰܝ̈ܟ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.

¹⁵ ܗܳܟܰܢܳܐ ܥܒܶܕ ܠܟܽܠܗܶܝܢ ܩܽܘܖ̈ܝܳܐ ܕܖ̈ܰܚܺܝܩܳܢ ܡܶܢܳܟ ܛܳܒ. ܕܠܳܐ ܗܘܰܝ̈ ܡܶܢ ܩܽܘܪܝܳܐ ܕܥܰܡ̈ܡܶܐ ܗܳܠܶܝܢ.

¹⁶ ܒܰܠܚܽܘܕ ܡܶܢ ܩܽܘܖ̈ܝܳܐ ܕܗܳܠܶܝܢ ܥܰܡ̈ܡܶܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܝܽܘܪܬܳܢܳܐ ܠܳܐ ܬܰܚܶܐ ܟܽܠ ܢܶܫܡܳܐ.

¹⁷ ܐܶܠܳܐ ܡܶܚܪܰܒ ܚܪܽܘܒ ܐܶܢܽܘܢ ܠܚܺܝܬܳܝ̈ܶܐ. ܘܠܳܐܡܽܘܖ̈ܳܝܶܐ. ܘܠܰܟܢܰܥܢܳܝ̈ܶܐ. ܘܰܠܦܰܪܙܳܝ̈ܶܐ. ܘܰܠܚܳܘܳܝ̈ܶܐ. ܘܰܠܝܰܒܽܘܣܳܝ̈ܶܐ. ܐܰܝܟ ܕܦܰܩܕܳܟ ܡܳܪܝܳܐ ܐܰܠܳܗܳܟ.

¹⁸ ܕܠܳܐ ܢܰܠܦܽܘܢܳܟ ܠܡܶܥܒܰܕ ܐܰܝܟ ܟܽܠܳܗ̇ ܛܰܢܦܽܘܬܗܽܘܢ ܕܥܳܒܕܺܝܢ ܗܘܰܘ ܠܰܐܒܳܗܰܝ̈ܗܽܘܢ. ܘܬܶܚܛܽܘܢ ܩܕܳܡ ܡܳܪܝܳܐ ܐܰܠܳܗܟܽܘܢ.

¹⁹ ܘܟܰܕ ܬܶܐܠܨܺܝܗ̇ ܠܰܩܪܺܝܬܳܐ ܝܰܘ̈ܡܳܬܳܐ ܣܰܓܺܝ̈ܐܶܐ ܠܡܶܬܟܰܬܳܫܽܘ ܥܠܶܝܗ̇ ܘܰܠܡܶܟܒܫܳܗ̇. ܠܳܐ ܬܚܰܒܶܠ ܐܺܝܠܳܢܶܝ̈ܗ̇. ܘܠܳܐ ܬܰܪܡܶܐ ܥܠܰܝܗܽܘܢ ܦܰܪܙܠܳܐ. ܡܶܛܽܠ ܕܡܶܢܗܽܘܢ ܐܳܟܶܠ ܐܰܢ̱ܬ. ܘܰܠܗܽܘܢ ܦܳܣܶܩ ܐܰܢ̱ܬ.ܡܶܛܽܠ ܕܺܐܝܠܳܢܳܐ ܕܚܰܩܠܳܐ ܠܳܐ ܗܘܳܐ ܐܰܝܟ ܒܰܪܢܳܫܳܐ ܕܢܶܥܪܽܘܩ ܡܶܢ ܩܕܳܡܰܝܟ ܒܽܐܘܠܨܳܢܳܐ.

²⁰ ܒܰܠܚܽܘܕ ܕܶܝܢ ܐܺܝܠܳܢܳܐ ܐܰܝܢܳܐ ܕܝܳܕܰܥ ܐܰܢ̱ܬ ܕܠܳܐ ܗܘܳܐ ܐܺܝܠܳܢܳܐ ܕܡܶܐܟܽܘܠܬܳܐ. ܠܶܗ ܚܰܒܶܠ ܘܰܦܣܽܘܩ. ܘܰܒܢܺܝ ܩܰܠܩܽܘܡ̈ܶܐ ܥܰܠ ܩܪܺܝܬܳܐ ܕܥܳܒܕܳܐ ܥܰܡܳܟ ܩܪܳܒܳܐ. ܥܕܰܡܳܐ ܕܬܶܟܒܫܺܝܗ̇.