Deuteronomio ܬܢܝܢ ܢܡܘܣܐ 12

¹ ܗܳܠܶܝܢ ܢܳܡܽܘܣ̈ܶܐ ܘܕܺܝܢ̈ܶܐ ܕܬܶܛܪܽܘܢ ܘܬܶܥܒܕܽܘܢ ܒܰܐܪܥܳܐ ܕܝܳܗܶܒ ܠܟܽܘܢ ܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ ܠܡܺܐܪܬܳܗ̇ ܟܽܠܗܽܘܢ ܝܰܘ̈ܡܳܬܳܐ ܕܚܰܝܺܝܢ ܐ̱ܢܬܽܘܢ ܒܰܐܪܥܳܐ.

² ܐܰܘܒܶܕܘ ܟܽܠܗܽܘܢ ܐܰܬܖ̈ܰܘܳܬܳܐ. ܕܰܦܠܰܚܘ ܬܰܡܳܢ ܥܰܡ̈ܡܶܐ ܕܝܳܪܬܺܝܢ ܐ̱ܢܬܽܘܢ ܠܗܽܘܢ. ܘܠܰܐܠܳܗܰܝ̈ܗܽܘܢ. ܥܰܠ ܛܽܘܖ̈ܶܐ ܖ̈ܳܡܶܐ. ܘܥܰܠ ܖ̈ܳܡܳܬܳܐ. ܘܰܬܚܶܝܬ ܟܽܠ ܐܺܝܠܳܢ ܕܡܰܛܶܠ.

³ ܘܬܶܥܩܪܽܘܢ ܡܰܕܒܚܰܝ̈ܗܽܘܢ. ܘܬܶܬܒܪܽܘܢ ܩܳܝ̈ܡܳܬܗܽܘܢ. ܘܚܶܫ̈ܠܳܬܗܽܘܢ ܬܰܘܩܕܽܘܢ ܒܢܽܘܪܳܐ. ܘܰܐܠܳܗܰܝ̈ܗܽܘܢ ܓܠܺܝ̈ܦܶܐ ܬܶܬܒܪܽܘܢ. ܘܬܰܘܒܕܽܘܢ ܗܳܟܰܢܳܐ ܫܶܡܗܽܘܢ ܡܶܢ ܐܰܬܪܳܐ ܗܰܘ.

⁴ ܘܰܐܢ̱ܬܽܘܢ ܠܳܐ ܬܶܥܒܕܽܘܢ ܗܳܟܰܢܳܐ ܠܡܳܪܝܳܐ ܐܰܠܳܗܟܽܘܢ.

⁵ ܐܶܠܳܐ ܒܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܟܽܘܢ ܡܶܢ ܟܽܠ ܫܰܒܛܰܝ̈ܟܽܘܢ ܠܰܡܣܳܡ ܫܡܶܗ ܬܰܡܳܢ. ܠܒܶܝܬ ܡܰܫܪܝܶܗ ܗܘܰܝܬܽܘܢ ܡܥܰܩܒܺܝܢ. ܘܳܐܙܺܠܝܢ ܠܬܰܡܳܢ.

⁶ ܘܰܐܘܒܶܠܘ ܠܬܰܡܳܢ ܝܰܩܕܰܝ̈ܟܽܘܢ ܫܰܠ̈ܡܶܐ. ܘܕܶܒܚܰܝ̈ܟܽܘܢ. ܘܡܰܥܣܳܖ̈ܰܝܟܽܘܢ. ܘܦܽܘܖ̈ܫܳܢܶܐ ܕܺܐܝܕܰܝ̈ܟܽܘܢ. ܘܢܶܕܖ̈ܰܝܟܽܘܢ. ܘܩܽܘܖ̈ܒܢܰܝ̈ܟܽܘܢ. ܘܒܽܘܟܖ̈ܶܐ ܕܬܰܘܖ̈ܰܝܟܽܘܢ. ܘܰܕܥܳܢ̈ܟܽܘܢ.

⁷ ܘܰܐܟܽܘܠܘ ܬܰܡܳܢ ܩܕܳܡ ܡܳܪܝܳܐ ܐܰܠܳܗܟܽܘܢ. ܘܰܚܕܰܘ ܒܟܽܠܡܶܕܶܡ ܕܡܰܘܫܛܺܝܢ ܐ̱ܢܬܽܘܢ ܐܺܝܕܰܝ̈ܟܽܘܢ. ܐܰܢ̱ܬܽܘܢ ܘܐ̱ܢܳܫܰܝ̈ ܒܳܬܰܝ̈ܟܽܘܢ. ܕܰܢܒܰܪܶܟܟܽܘܢ ܡܳܪܝܳܐ ܐܰܠܳܗܟܽܘܢ.

⁸ ܠܳܐ ܬܶܥܒܕܽܘܢ ܐܰܝܟ ܕܥܳܒܕܺܝܢ ܚ̱ܢܰܢ ܗܳܪܟܳܐ ܝܰܘܡܳܢܳܐ. ܐ̱ܢܳܫ ܐܰܝܟ ܕܫܰܦܺܝܪ ܒܥܰܝܢܰܘ̈ܗܝ.

⁹ ܡܶܛܽܠ ܕܠܳܐ ܥܕܰܟܺܝܠ ܡܰܛܺܝܬܽܘܢ ܠܒܶܝܬ ܡܰܫܪܝܳܐ ܘܰܠܝܳܪܬܽܘܬܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.

¹⁰ ܘܰܥܒܰܪܘ ܝܽܘܪܕܢܳܢ. ܘܬܶܒܘ ܒܰܐܪܥܳܐ ܕܡܰܘܪܶܬ ܠܟܽܘܢ ܡܳܪܝܳܐ ܐܰܠܳܗܟܽܘܢ. ܘܰܡܢܺܝܚ ܠܟܽܘܢ ܡܶܢ ܟܽܠܗܽܘܢ ܒܥܶܠܕܒܳܒܰܝ̈ܟܽܘܢ ܕܰܚܕܺܝܪܺܝܢ ܠܟܽܘܢ. ܘܬܶܒܘ ܒܣܰܒܪܳܐ.

¹¹ ܘܰܐܬܪܳܐ ܕܢܶܓܒܶܐ ܡܳܪܝܳܐ ܐܰܠܳܗܟܽܘܢ ܕܢܰܫܪܶܐ ܒܶܗ ܫܡܶܗ. ܠܬܰܡܳܢ ܐܰܝܬܰܘ ܟܽܠܡܶܕܶܡ ܕܰܡܦܰܩܶܕ ܐ̱ܢܳܐ ܠܟܽܘܢ. ܝܰܩܕܰܝ̈ܟܽܘܢ ܫܰܠ̈ܡܶܐ. ܘܕܶܒܚܰܝ̈ܟܽܘܢ. ܘܡܰܥܣܳܖ̈ܰܝܟܽܘܢ. ܘܦܽܘܖ̈ܫܳܢܶܐ ܕܺܐܝܕܰܝ̈ܟܽܘܢ. ܘܟܽܠܶܗ ܓܶܒܝܳܐ ܕܢܶܕܖ̈ܰܝܟܽܘܢ ܕܢܳܕܪܺܝܢ ܐ̱ܢܬܽܘܢ ܠܡܳܪܝܳܐ.

¹² ܘܰܚܕܰܘ ܩܕܳܡ ܡܳܪܝܳܐ ܐܰܠܳܗܟܽܘܢ. ܐܰܢ̱ܬܽܘܢ ܘܰܒܢܰܝ̈ܟܽܘܢ ܘܰܒ̈ܢܳܬܟܽܘܢ. ܘܥܰܒܕܰܝ̈ܟܽܘܢ ܘܰܐܡ̈ܗܳܬܟܽܘܢ. ܘܠܶܘ̈ܳܝܶܐ ܕܰܒܩܽܘܖ̈ܝܟܽܘܢ. ܡܶܛܽܠ ܕܠܰܝܬ ܠܗܽܘܢ ܝܳܪܬܽܘܬܳܐ ܘܦܳܠܓܽܘܬܳܐ ܥܰܡܟܽܘܢ.

¹³ ܐܶܙܕܰܗܪܘ ܕܠܳܐ ܬܰܣܶܩ ܝܰܩܕܰܝ̈ܟ ܫܰܠ̈ܡܶܐ ܒܟܽܠ ܐܰܬܰܪ ܕܨܳܒܶܐ ܐܰܢ̱ܬ.

¹⁴ ܐܶܠܳܐ ܐܶܢ ܒܰܐܬܪܳܐ ܕܢܶܓܒܶܐ ܡܳܪܝܳܐ ܒܚܰܕ ܡܶܢ ܫܰܒܛܰܝ̈ܟ. ܬܰܡܳܢ ܬܰܣܶܩ ܝܰܩ̈ܕܰܝܟ ܫܰܠ̈ܡܶܐ. ܘܬܰܡܳܢ ܬܶܥܒܶܕ ܟܽܠܡܶܕܶܡ ܕܰܡܦܰܩܶܕ ܐ̱ܢܳܐ ܠܳܟ.

¹⁵ ܒܰܠܚܽܘܕ ܒܟܽܠ ܪܶܓܬܳܐ ܕܢܰܦܫܳܟ ܟܽܘܣ ܘܰܐܟܽܘܠ ܒܶܣܪܳܐ. ܐܰܝܟ ܒܽܘܪܟܬܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܒܟܽܠܗܶܝܢ ܩܽܘܖ̈ܝܳܟ. ܕܰܛܡܰܐ ܘܕܰܕܟܶܐ ܢܶܐܟܠܽܘܢ. ܐܰܝܟ ܛܰܒܝܳܐ. ܘܰܐܝܟ ܐܰܝܠܳܐ.

¹⁶ ܒܰܠܚܽܘܕ ܕܡܳܐ ܠܳܐ ܬܶܐܟܠܽܘܢ. ܐܶܠܳܐ ܥܰܠ ܐܰܪܥܳܐ ܐܰܫܽܘܕܳܝܗܝ ܐܰܝܟ ܡܰܝ̈ܳܐ.

¹⁷ ܠܳܐ ܬܶܫܬܰܠܰܛ ܠܡܶܐܟܰܠ ܒܩܽܘܖ̈ܝܟܽܘܢ. ܡܰܥܣܳܖ̈ܶܐ ܕܰܥܒܽܘܪܟܽܘܢ. ܘܰܕܚܰܡܪܟܽܘܢ. ܘܰܕܡܶܫܚܟܽܘܢ. ܘܒܽܘܟܖ̈ܶܐ ܕܬܰܘܖ̈ܰܝܟܽܘܢ. ܘܰܕܥܳܢ̈ܟܽܘܢ. ܘܟܽܠ ܢܶܕܖ̈ܰܝܟܽܘܢ ܕܬܶܕܪܽܘܢ. ܘܩܽܘܖ̈ܒܳܢܰܝܟܽܘܢ. ܘܦܽܘܖ̈ܫܳܢܶܐ ܕܺܐܝܕܰܝ̈ܟܽܘܢ.

¹⁸ ܐܶܠܳܐ ܩܕܳܡ ܡܳܪܝܳܐ ܐܰܠܳܗܳܟ ܬܶܐܟܠܺܝܘܗܝ ܕܰܫܢܳܐ ܒܰܫܢܳܐ. ܒܰܐܬܪܳܐ ܕܢܶܓܒܶܐ ܠܶܗ ܡܳܪܝܳܐ ܐܰܠܳܗܳܟ. ܐܰܢ̱ܬ ܘܰܒܪܳܟ. ܘܒܰܪܬܳܟ. ܘܥܰܒܕܳܟ. ܘܰܐܡܬܳܟ. ܘܠܶܘܳܝܳܐ ܕܰܒܩܽܘܖ̈ܝܳܟ. ܘܬܶܚܕܶܐ ܩܕܳܡ ܡܳܪܝܳܐ ܐܰܠܳܗܳܟ. ܒܟܽܠܡܶܕܶܡ ܕܡܰܘܫܶܛ ܐܰܢ̱ܬ ܐܺܝܕܳܟ.

¹⁹ ܐܶܙܕܰܗܪ ܕܠܳܐ ܬܶܫܒܽܘܩ ܠܠܶܘܳܝܳܐ ܟܽܠܗܽܘܢ ܝܰܘ̈ܡܰܝܟ ܒܰܐܪܥܳܐ.

²⁰ ܘܟܰܕ ܢܪܰܘܰܚ ܡܳܪܝܳܐ ܐܰܠܳܗܳܟ ܬܚܽܘܡܳܟ ܐܰܝܟ ܕܶܐܡܰܪ ܠܳܟ. ܘܬܺܐܡܰܪ ܐܶܟܽܘܠ ܒܶܣܪܳܐ. ܡܶܛܽܠ ܕܪܳܓܳܐ ܢܰܦܫܳܟ ܠܡܶܐܟܰܠ ܒܶܣܪܳܐ. ܒܟܽܠܗܶܝܢ ܖ̈ܓܺܝܓܳܬܳܐ ܕܢܰܦܫܳܟ ܬܶܐܟܽܘܠ ܒܶܣܪܳܐ.

²¹ ܘܶܐܢ ܪܰܚܺܝܩ ܗܽܘ ܡܶܢܳܟ ܐܰܬܪܳܐ ܕܢܶܓܒܶܐ ܡܳܪܝܳܐ ܐܰܠܳܗܳܟ ܕܰܢܣܺܝܡ ܫܡܶܗ ܬܰܡܳܢ. ܟܽܘܣ ܡܶܢ ܬܰܘܖ̈ܰܝܟ. ܘܡܶܢ ܥܳܢ̈ܳܟ. ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܐܰܝܟ ܕܦܰܩܕܳܟ. ܘܰܐܟܽܘܠ ܒܩܽܘܖ̈ܝܳܟ. ܒܟܽܠܗܶܝܢ ܖ̈ܓܺܝܓܳܬܳܐ ܕܢܰܦܫܳܟ.

²² ܒܪܰܡ ܕܶܝܢ ܐܰܝܟ ܕܡܶܬܐܟܶܠ ܛܰܒܝܳܐ ܘܰܐܝܠܳܐ. ܗܳܟܰܢܳܐ ܬܶܐܟܠܺܝܘܗܝ. ܕܰܛܡܰܐ ܘܕܰܕܟܶܐ ܐܰܟܚܕܳܐ ܬܶܐܟܠܽܘܢܶܗ.

²³ ܒܰܠܚܽܘܕ ܐܶܬܚܰܝܰܠܘ ܕܠܳܐ ܬܶܐܟܠܽܘܢ ܕܡܳܐ. ܡܶܛܽܠ ܕܰܕܡܳܐ ܢܰܦܫܳܐ ܗܽܘ. ܠܳܐ ܬܶܐܟܽܘܠ ܢܰܦܫܳܐ ܥܰܡ ܒܶܣܪܳܐ.

²⁴ ܠܳܐ ܬܶܐܟܠܺܝܘܗܝ. ܐܶܠܳܐ ܐܰܫܽܘܕܳܝܗܝ ܥܰܠ ܐܰܪܥܳܐ ܐܰܝܟ ܡܰܝ̈ܳܐ.

²⁵ ܠܳܐ ܬܶܐܟܠܺܝܘܗܝ. ܕܢܰܛܐܶܒ ܠܳܟ ܘܠܰܒܢܰܝ̈ܟ ܡܶܢ ܒܳܬܪܳܟ. ܟܰܕ ܬܶܥܒܶܕ ܕܫܰܦܺܝܪ ܩܕܳܡ ܡܳܪܝܳܐ ܐܰܠܳܗܳܟ.

²⁶ ܒܰܠܚܽܘܕ ܩܽܘܕܫܰܝ̈ܟ ܕܢܶܗܘܽܘܢ ܠܳܟ. ܘܢܶܕܖ̈ܰܝܟ. ܫܩܽܘܠ ܘܬܳܐ ܠܰܐܬܪܳܐ ܕܢܶܓܒܶܐ ܡܳܪܝܳܐ.

²⁷ ܘܰܥܒܶܕ ܝܰܩܕܳܟ ܫܰܠܡܳܐ ܒܶܣܪܳܐ ܘܰܕܡܳܐ ܥܰܠ ܡܰܕܒܚܶܗ ܕܡܳܪܝܳܐ ܐܰܠܳܗܳܟ. ܘܰܕܡܳܐ ܕܕܶܒܚܰܝ̈ܟ ܢܶܬܐܫܶܕ ܥܰܠ ܡܰܕܒܚܶܗ ܕܡܳܪܝܳܐ ܐܰܠܳܗܳܟ. ܘܒܶܣܪܳܐ ܐܰܟܽܘܠ.

²⁸ ܛܰܪ ܘܰܫܡܰܥ ܗܳܠܶܝܢ ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܕܢܰܛܐܶܒ ܠܳܟ ܘܠܰܒܢܰܝ̈ܟ ܡܶܢ ܒܳܬܪܳܟ ܠܥܳܠܰܡ. ܟܰܕ ܬܶܥܒܶܕ ܕܛܳܒ ܘܰܕܫܰܦܺܝܪ ܩܕܳܡ ܡܳܪܝܳܐ ܐܰܠܳܗܳܟ.

²⁹ ܘܟܰܕ ܢܰܘܒܶܕ ܡܳܪܝܳܐ ܐܰܠܳܗܳܟ ܥܰܡ̈ܡܶܐ ܕܳܐܙܶܠ ܐܰܢ̱ܬ ܠܘܳܬܗܽܘܢ. ܘܢܰܘܒܶܕ ܐܶܢܽܘܢ ܡܶܢ ܩܕܳܡܰܝܟ. ܘܬܺܐܪܰܬ ܐܶܢܽܘܢ ܘܬܶܬܶܒ ܒܰܐܪܥܗܽܘܢ .

³⁰ ܐܶܙܕܰܗܪ ܕܠܳܐ ܬܶܛܥܶܐ ܒܳܬܰܪܗܽܘܢ. ܡܶܢ ܒܳܬܰܪ ܕܡܰܘܒܶܕ ܠܗܽܘܢ ܡܳܪܝܳܐ ܡܶܢ ܩܕܳܡܰܝܟ. ܘܠܳܐ ܬܫܰܐܶܠ ܥܰܠ ܐܰܠܳܗܰܝ̈ܗܽܘܢ. ܘܬܺܐܡܰܪ ܐܰܝܟܰܢܳܐ ܦܳܠܚܺܝܢ ܗܘܰܘ ܥܰܡ̈ܡܶܐ ܗܳܠܶܝܢ ܠܰܐܠܳܗܰܝ̈ܗܽܘܢ. ܕܶܐܥܒܶܕ ܐܳܦ ܐܶܢܳܐ ܐܰܟܘܳܬܗܽܘܢ.

³¹ ܐܰܢ̱ܬ ܕܶܝܢ ܠܳܐ ܬܶܥܒܶܕ ܗܳܟܰܢܳܐ ܠܡܳܪܝܳܐ ܐܰܠܳܗܳܟ. ܡܶܛܽܠ ܕܟܽܠ ܕܰܣܢܳܐ ܘܰܐܣܠܺܝ ܡܳܪܝܳܐ ܥܒܰܕܘ ܠܰܐܠܳܗܰܝ̈ܗܽܘܢ. ܘܳܐܦ ܒܢܰܝ̈ܗܽܘܢ ܘܰܒ̈ܢܳܬܗܽܘܢ ܐܰܘܩܶܕܘ ܒܢܽܘܪܳܐ ܠܰܐܠܳܗܰܝ̈ܗܽܘܢ.

³² ܟܽܠ ܦܶܬܓܳܡܳܐ ܕܰܡܦܰܩܶܕ ܐ̱ܢܳܐ ܠܳܟ. ܠܶܗ ܛܰܪ ܘܰܥܒܶܕ. ܠܳܐ ܬܰܘܣܶܦ ܥܠܰܘܗܝ. ܘܠܳܐ ܬܒܰܨܰܪ ܡܶܢܶܗ.