Deuteronomio ܬܢܝܢ ܢܡܘܣܐ 25

¹ ܘܶܐܢ ܢܶܗܘܶܐ ܕܺܝܢܳܐ ܒܶܝܬ ܓܰܒܪܳܐ ܠܚܰܒܪܶܗ ܢܶܩܪܒܽܘܢ ܠܘܳܬ ܕܰܝܳܢ̈ܶܐ ܘܰܢܕܽܘܢܽܘܢ ܐܶܢܽܘܢ. ܘܰܢܙܰܟܽܘܢ ܠܙܰܟܳܝܳܐ. ܘܰܢܚܰܝܒܽܘܢ ܠܚܰܝܳܒܳܐ.

² ܘܶܐܢ ܚܰܝܳܒ ܡܰܪܕܽܘܬܳܐ ܚܰܝܳܒܳܐ. ܢܰܪܡܶܝܘܗܝ ܕܰܝܳܢܳܐ. ܘܰܢܢܰܓܕܺܝܘܗܝ ܩܕܳܡܰܘܗܝ ܐܰܝܟ ܙܶܕܩܳܐ ܕܣܰܟܠܽܘܬܶܗ.

³ ܒܡܶܢܝܳܢܳܐ ܐܰܪܒܥܺܝܢ ܢܢܰܓܕܽܘܢܶܗ. ܘܠܳܐ ܢܰܘܣܦܽܘܢ. ܕܠܳܐ ܟܰܕ ܢܰܘܣܦܽܘܢ ܢܢܰܓܕܽܘܢܶܗ ܝܰܬܺܝܪ ܥܰܠ ܗܳܢܳܐ ܢܶܓܕܳܐ. ܢܶܬܩܠܶܐ ܐܰܚܽܘܟ ܠܥܺܝ̈ܢܰܝܟ.

⁴ ܠܳܐ ܬܶܒܠܽܘܡ ܬܰܘܪܳܐ ܒܰܕܪܳܟܬܳܐ.

⁵ ܘܟܰܕ ܢܶܬܒܽܘܢ ܐܰܚ̈ܶܐ ܐܰܟܚܕܳܐ. ܘܰܢܡܽܘܬ ܚܰܕ ܡܶܢܗܽܘܢ. ܘܠܰܝܬ ܠܶܗ ܒܪܳܐ. ܠܳܐ ܬܶܗܘܶܐ ܐܰܢ̱ܬܬܶܗ ܕܡܺܝܬܳܐ ܠܓܰܒܪܳܐ ܢܽܘܟܪܳܝܳܐ. ܐܶܠܳܐ ܝܰܒܡܳܗ̇ ܢܶܣܒܺܝܗ̇. ܘܬܶܗܘܶܐ ܠܶܗ ܐܰܢ̱ܬܬܳܐ ܘܰܢܝܰܒܡܺܝܗ̇.

⁶ ܘܒܽܘܟܪܳܐ ܕܝܳܠܕܳܐ. ܢܶܫܬܰܡܶܐ ܥܰܠ ܫܡܳܐ ܕܰܐܚܽܘܗܝ ܡܺܝܬܳܐ. ܕܠܳܐ ܢܶܬܛܥܶܐ ܫܡܶܗ ܡܶܢ ܝܺܣܪܳܐܶܝܠ.

⁷ ܘܶܐܢ ܠܳܐ ܨܳܒܶܐ ܓܰܒܪܳܐ ܕܢܶܣܰܒ ܐܰܢ̱ܬܰܬ ܐܰܚܽܘܗܝ. ܬܶܣܰܩ ܐܰܢ̱ܬܰܬ ܐܰܚܽܘܗܝ ܠܬܰܪܥܳܐ ܠܘܳܬ ܣܳܒ̈ܶܐ. ܘܬܺܐܡܰܪ. ܠܳܐ ܨܳܒܶܐ ܝܰܒܡ̱ܝ ܕܰܢܩܺܝܡ ܠܰܐܚܽܘܗܝ ܫܡܳܐ ܒܺܝܣܪܳܐܶܝܠ. ܘܠܳܐ ܨܳܒܶܐ ܠܡܶܣܒܢܰܝ.

⁸ ܢܶܩܪܽܘܢܶܗ ܣܳܒ̈ܶܐ ܕܰܩܪܺܝܬܶܗ ܘܰܢܡܰܠܠܽܘܢ ܥܰܡܶܗ. ܘܶܐܢ ܢܩܽܘܡ ܘܢܺܐܡܰܪ ܕܠܳܐ ܢܳܣܶܒ ܐ̱ܢܳܐ ܠܳܗ̇.

⁹ ܬܶܩܪܽܘܒ ܝܺܒܰܡܬܶܗ ܠܘܳܬܶܗ ܩܕܳܡ ܣܳܒ̈ܶܐ. ܘܬܶܫܪܶܐ ܡܣܳܢܶܗ ܡܶܢ ܪܶܓܠܶܗ. ܘܬܶܪܽܘܩ ܒܰܐܦܰܘ̈ܗܝ. ܘܬܺܐܡܰܪ. ܗܳܟܰܢܳܐ ܢܶܬܥܒܶܕ ܠܓܰܒܪܳܐ ܕܠܳܐ ܢܶܒܢܶܐ ܒܰܝܬܳܐ ܠܰܐܚܽܘܗܝ.

¹⁰ ܘܢܶܬܩܪܶܐ ܫܡܶܗ ܒܺܝܣܪܳܐܶܝܠ ܒܶܝܬ ܫܳܪܶܐ ܡܣܳܢ̈ܶܐ.

¹¹ ܘܟܰܕ ܢܶܨܽܘܢ ܓܰܒܪܳܐ ܘܰܐܚܽܘܗܝ ܚܰܕ ܥܰܡ ܚܰܕ. ܘܬܶܩܪܽܘܒ ܐܰܢ̱ܬܰܬ ܚܰܕ ܡܶܢܗܽܘܢ ܠܰܡܦܰܨܳܝܽܘ ܒܰܥܠܳܗ̇ ܡܶܢ ܐܺܝܕܰܝ̈ ܡܰܢ ܕܡܶܬܟܰܬܰܫ ܥܰܡܶܗ. ܘܬܰܘܫܶܛ ܐܺܝܕܳܗ̇ ܘܬܶܐܚܽܘܕ ܒܚܰܢܶܗ.

¹² ܦܣܽܘܩ ܐܺܝܕܳܗ̇. ܘܠܳܐ ܬܚܽܘܣ ܥܰܝܢܳܟ ܥܠܶܝܗ̇.

¹³ ܠܳܐ ܢܶܗܘܶܐ ܠܳܟ ܒܡܰܪܣܽܘܦܳܟ ܡܰܬܩܳܠܳܐ ܘܡܰܬܩܳܠܳܐ. ܪܰܒܳܐ ܘܰܙܥܽܘܪܳܐ.

¹⁴ ܠܳܐ ܬܶܗܘܶܐ ܠܳܟ ܒܒܰܝܬܳܟ ܟܝܳܠܬܳܐ ܘܰܟܝܳܠܬܳܐ. ܪܰܒܬܳܐ ܘܰܙܥܽܘܪܬܳܐ.

¹⁵ ܡܰܬܩܳܠܳܐ ܫܰܠܡܳܐ ܕܙܰܕܺܝܩܽܘܬܳܐ ܢܶܗܘܶܐ ܠܳܟ. ܘܰܟܝܳܠܬܳܐ ܬܪܺܝܨܬܳܐ ܕܙܰܕܺܝܩܽܘܬܳܐ ܬܶܗܘܶܐ ܠܳܟ. ܕܢܶܣܓܽܘܢ ܝܰܘ̈ܡܰܝܟ ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ.

¹⁶ ܡܶܛܽܠ ܕܰܛܡܰܐ ܗܽܘ ܩܕܳܡ ܡܳܪܝܳܐ ܐܰܠܳܗܳܟ ܟܽܠܡܰܢ ܕܥܳܒܶܕ ܗܳܠܶܝܢ. ܘܟܽܠ ܡܰܢ ܕܥܳܒܶܕ ܥܰܘܠܳܐ.

¹⁷ ܐܶܬܕܰܟܪ ܟܽܠܡܶܕܶܡ ܕܰܥܒܰܕ ܠܳܟ ܥܡܳܠܺܝܩ ܒܽܐܘܪܚܳܐ. ܟܰܕ ܢܦܰܩܬܽܘܢ ܡܶܢ ܡܶܨܪܶܝܢ.

¹⁸ ܕܶܐܪܰܥܟܽܘܢ ܒܚܰܪܒܳܐ. ܘܩܰܛܶܠ ܒܟܽܘܢ ܟܽܠ ܕܦܳܫ ܒܳܬܪܟܽܘܢ. ܘܰܐܢ̱ܬ ܡܛܰܪܰܦ ܘܰܠܐܶܐ. ܘܠܳܐ ܕܚܶܠ ܡܶܢ ܩܕܳܡ ܡܳܪܝܳܐ ܐܰܠܳܗܳܟ.

¹⁹ ܘܡܳܐ ܕܰܐܢܺܝܚ ܠܳܟ ܡܳܪܝܳܐ ܐܰܠܳܗܳܟ ܡܶܢ ܟܽܠܗܽܘܢ ܒܥܶܠܕܒܳܒܰܝ̈ܟ ܕܒܰܚܕܳܖ̈ܰܝܟ. ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܝܽܘܪܬܳܢܳܐ. ܥܛܺܝ ܕܽܘܟܪܳܢܶܗ ܕܰܥܡܳܠܺܝܩ ܡܶܢ ܬܚܶܝܬ ܫܡܰܝܳܐ. ܘܠܳܐ ܬܶܛܥܶܐ.