Deuteronomio ܬܢܝܢ ܢܡܘܣܐ 16

¹ ܛܪ ܝܪܚܐ ܕܗ̈ܒܒܐ ܘܥܒܕ ܦܨܚܐ ܠܡܪܝܐ ܐܠܗܟ. ܡܛܠ ܕܒܝܪܚܐ ܕܗ̈ܒܒܐ ܐܦܩܟ ܡܪܝܐ ܐܠܗܟ ܡܢ ܡܨܪܝܢ ܒܠܠܝܐ.

² ܘܟܘܣ ܦܨܚܐ ܠܡܪܝܐ ܐܠܗܟ ܡܢ ܥܢܐ ܘܡܢ ܬܘܪ̈ܐ. ܒܐܬܪܐ ܕܓ̇ܒܐ ܡܪܝܐ ܐܠܗܟ. ܠܡܫܪܝܘ ܫܡܗ ܬܡܢ.

³ ܠܐ ܬܐܟܘܠ ܥܠܘܗܝ ܚܡܝܥܐ. ܐܠܐ ܫܒܥܐ ܝܘܡ̈ܝܢ ܐܟܘܠ ܥܠܘܗܝ ܦܛܝܪܐ ܠܚܡܐ ܡܡܟܟܐ. ܡܛܠ ܕܒܣܘܪܗܒܐ ܢܦܩܬܘܢ ܡܢ ܡܨܪܝܢ. ܕܬܗܘܐ ܡܬܕܟܪ ܝܘܡܐ ܕܢܦܩܬ ܒܗ ܡܢ ܡܨܪܝܢ. ܟܠܗܘܢ ܝܘܡ̈ܝ ܚܝ̈ܝܟ.

⁴ ܘܠܐ ܢܬܚܙܐ ܚܡܝܥܐ ܒܟܘܠܗ ܬܚܘܡܟ ܫܒܥܐ ܝܘܡ̈ܝܢ. ܘܠܐ ܢܒܘܬ ܡܢ ܒܣܪܐ ܕܢ̇ܟܣ ܐܢܬ ܒܪܡܫܐ. ܒܝܘܡܐ ܩܕܡܝܐ ܠܨܦܪܐ.

⁵ ܠܐ ܫܠܝܛ ܠܟ ܠܡܟܣ ܦܨܚܐ ܒܚܕܐ ܡܢ ܩܘܪ̈ܝܟ ܕܝ̇ܗܒ ܠܟ ܡܪܝܐ ܐܠܗܟ.

⁶ ܐܠܐ ܒܐܬܪܐ ܕܢܓܒܐ ܡܪܝܐ ܐܠܗܟ ܠܡܫܪܝܘ ܫܡܗ. ܬܡܢ ܟܘܣ ܦܨܚܐ. ܒܪܡܫܐ ܒܡܥܪ̈ܒܝ ܫܡܫܐ. ܐܝܟ ܙܒܢܐ ܕܢܦܩܬ ܡܢ ܡܨܪܝܢ.

⁷ ܘܒܫܠ ܘܐܟܘܠ ܒܐܬܪܐ ܕܓ̇ܒܐ ܠܗ ܡܪܝܐ ܐܠܗܟ. ܘܗܦܘܟ ܒܨܦܪܐ ܙܠ ܠܡܫܟܢܟ.

⁸ ܫܬܐ ܝܘܡ̈ܝܢ ܬܐܟܘܠ ܦܛܝܪܐ. ܘܝܘܡܐ ܕܫܒܥܐ ܟܢܘܫܝܐ ܗܘ ܠܡܪܝܐ ܐܠܗܟܘܢ. ܠܐ ܬܥܒܕܘܢ ܒܗ ܥܒ̇ܕܐ.

⁹ ܫܒܥܐ ܫܒ̈ܘܥܝܢ ܬܡܢܐ ܠܟ. ܡܐ ܕܡܫܪܐ ܐܢܬ ܡܓܠܐ ܒܩ̇ܝܡܬܐ. ܫ̇ܪܐ ܠܡܡܢܐ ܫܒܥܐ ܫܒ̈ܘܥܝܢ.

¹⁰ ܘܥܒܕ ܥܕܥܐܕܐ ܕܫܒ̈ܘܥܐ ܠܡܪܝܐ ܐܠܗܟ. ܡܣܬ ܦܘܪܫܢܐ ܕܐ̈ܝܕܝܟ ܕܦ̇ܪܫ ܐܢܬ. ܐܝܟ ܕܒܪܟܟ ܡܪܝܐ ܐܠܗܟ.

¹¹ ܘܚܕܝ ܩܕܡ ܡܪܝܐ ܐܠܗܟ. ܐܢܬ ܘܒܪܟ ܘܒܪܬܟ. ܘܥܒܕܟ ܘܐܡܬܟ. ܘܠܘܝܐ ܕܒܩܘܪ̈ܝܟ. ܘܥܡܘܪܐ ܘܝܬܡܐ ܘܐܪܡܠܬܐ ܕܒܓܘܟ. ܒܐܬܪܐ ܕܓ̇ܒܐ ܡܪܝܐ ܐܠܗܟ. ܠܡܫܪܝܘ ܫܡܗ ܬܡܢ.

¹² ܘܐܬܕܟܪ ܕܥܒ̣ܕܐ ܗܘܝܬ ܒܡܨܪܝܢ. ܛܪ ܘܥܒܕ ܗܠܝܢ ܟܠܗܘܢ ܢܡ̈ܘܣܐ.

¹³ ܥܕܥܐܕܐ ܕܡ̈ܛܠܠܐ ܥܒܕ ܠܟ ܫܒܥܐ ܝܘܡ̈ܝܢ. ܡܐ ܕܚ̇ܡܠ ܐܢܬ ܡܢ ܐܕܪܐ ܘܡܢ ܡܥܨܪܬܐ.

¹⁴ ܘܚܕܝ ܒܥܕܥܐܕܟ ܐܢܬ ܘܒܪܟ ܘܒܪܬܟ. ܘܥܒܕܟ ܘܐܡܬܟ. ܘܠܘܝܐ ܘܝܬܡܐ ܘܐܪܡܠܬܐ ܘܥܡܘܪܐ ܕܒܩܘܪ̈ܝܟ.

¹⁵ ܫܒܥܐ ܝܘܡ̈ܝܢ ܥܒܕ ܥܕܥܐܕܐ ܠܡܪܝܐ ܐܠܗܟ. ܒܐܬܪܐ ܕܓ̇ܒܐ ܡܪܝܐ . ܕܢܒܪܟܟ ܡܪܝܐ ܐܠܗܟ ܒܟܠܗ̇ ܥܠܠܬܟ. ܘܒܟܠܗ ܥܒ̇ܕܐ ܕܐ̈ܝܕܝܟ. ܘܬܗܘܐ ܚ̇ܕܐ.

¹⁶ ܬܠܬ ܙܒܢܝ̈ܢ ܒܫܢܬܐ ܢܬܚܙܘܢ ܕܘܟܪ̈ܢܝܟ ܩܕܡ ܡܪܝܐ ܐܠܗܟ. ܒܐܬܪܐ ܕܓ̇ܒܐ ܒܥܕܥܐܕܐ ܕܦܛܝܪ̈ܐ ܘܒܥܕܥܐܕܐ ܕܫܒ̈ܘܥܐ ܘܒܥܕܥܐܕܐ ܕܡ̈ܛܠܠܐ. ܘܠܐ ܬܬܚܙܐ ܩܕܡ ܡܪܝܐ ܐܠܗܟ ܣܪܝܩܐܝܬ.

¹⁷ ܐܠܐ ܐܢܫ ܐܝܟ ܡܘܗܒܬܐ ܕܐܝܕܗ. ܐܝܟ ܒܘܪܟܬܐ ܕܝ̇ܗܒ ܠܟ ܡܪܝܐ ܐܠܗܟ.

¹⁸ ܕܝ̇ܢ̈ܐ ܘܣܦܪ̈ܐ ܥܒ̣ܕ ܠܟ ܒܟܠܗܝܢ ܩܘܪ̈ܝܟ. ܕܝ̇ܗܒ ܠܟ ܡܪܝܐ ܐܠܗܟ ܠܫ̈ܒܛܝܟ. ܘܢܕܘܢܘܢ ܠܥܡܐ ܕܝ̈ܢ̣ܐ ܕܙܕܝܩܘܬܐ.

¹⁹ ܘܠܐ ܬܨܠܐ ܕܝܢ̣ܐ. ܘܠܐ ܬܣܒ ܒܐ̈ܦܐ. ܘܠܐ ܬܩܒܠ ܫܘܚܕܐ. ܡܛܠ ܕܫܘܚܕܐ ܡܥܘܪ ܥܝ̈ܢܝܗܘܢ ܕܚ̈ܟܝܡܐ ܒܕܝܢ̣ܐ. ܘܡܗܦܟ ܡ̈ܠܝܗܘܢ ܕܙܟ̈ܝܐ.

²⁰ ܐܠܐ ܒܙܕܝܩܘܬܐ ܕܘܢ ܚܒܪܟ. ܕܬܚܐ ܘܬܥܘܠ ܘܬܐܪܬ ܐܪܥܐ ܕܝ̇ܗܒ ܠܟ ܡܪܝܐ ܐܠܗܟ.

²¹ ܠܐ ܬܨܘܒ ܠܟ ܫ̈ܬܠܬܐ ܕܟܠ ܐܝܠܢ. ܥܠ ܓܢܒ ܡܕܒܚܐ ܕܡܪܝܐ ܐܠܗܟ ܕܬܥܒܕ ܠܟ.

²² ܘܠܐ ܬܩܝܡ ܠܟ ܩܝܡܬܐ ܡܕܡ ܕܣ̇ܢܐ ܡܪܝܐ ܐܠܗܟ.