Giosuè ܝܫܘܥ ܒܪܢܘܢ 11

¹ ܘܟܕ ܫܡܥ ܢܒܝܢ ܡܠܟܐ ܕܚܨܘܪ ܫܕܪ ܥܠ ܝܘܒܒ ܡܠܟܐ ܕܡܪܘܢ ܘܥܠ ܡܠܟܐ ܕܫܡܪܝܢ ܘܥܠ ܡܠܟܐ ܕܐܟܫܦ

² ܘܥܠ ܡ̈ܠܟܐ ܕܠܓܪܒܝܐ ܡܢܗ ܕܒܛܘܪܐ ܘܒܬܝܡܢܐ ܘܒܦܩܥܬܐ ܕܟܢܪܬ ܘܒܦܩ̈ܥܬܗ̇ ܘܒܢܦܬܕܘܪ ܕܡܢ ܡܥܪܒܐ

³ ܘܠܟܢ̈ܥܢܝܐ ܕܡܢ ܡܕܢܚܐ ܘܡܢ ܡܥܪܒܐ ܘܐܡܘܪ̈ܝܐ ܘܚ̈ܬܝܐ ܘܦܪ̈ܙܝܐ ܘܝܒ̈ܘܣܝܐ ܕܒܛܘܪܐ ܘܠܚ̈ܘܝܐ ܕܬܚܝܬ ܛܘܪܐ ܕܚܪܡܘܢ ܕܒܐܪܥܐ ܕܕܘܩ̈ܐ

⁴ ܘܢܦܩܘ ܗܢܘܢ ܘܟܠܗܝܢ ܡܫܪ̈ܝܬܗܘܢ ܥܡܗܘܢ ܣܓܝܐܝܢ ܐܝܟ ܚܠܐ ܕܥܠ ܣܦܬܗ ܕܝܡܐ ܘܪ̈ܟܫܐ ܘܩܪ̈ܘܟܐ ܣܘܓܐܐ ܕܛܒ

⁵ ܘܐܬܘܥܕܘ ܟܠܗܘܢ ܡ̈ܠܟܐ ܗܠܝܢ ܘܫܪܘ ܐܝܟ ܚܕܐ ܥܠ ܡ̈ܝܐ ܕܡܪܘܢ ܘܐܬܛܝܒܘ ܠܡܥܒܕ ܩܪܒܐ ܥܡ ܐܝܣܪܐܝܠ

⁶ ܘܐܡܪ ܡܪܝܐ ܠܝܫܘܥ ܠܐ ܬܕܚܠ ܡܢܗܘܢ ܡܛܠ ܕܡܚܪ ܠܥܕܢܐ ܗܢܐ ܥ̇ܒܕ ܐܢܐ ܠܗܘܢ ܠܟܠܗܘܢ ܟܕ ܚܪܝܒܝܢ ܩܕܡ ܒܢ̈ܝ ܐܝܣܪܝܠ ܘܪܟܫܗܘܢ ܐܓܡܪ ܘܩܪ̈ܘܟܝܗܘܢ ܐܘܩܕ ܒܢܘܪܐ

⁷ ܘܐܬܐ ܝܫܘܥ ܠܡ̈ܝܐ ܕܡܪܘܢ ܡܢ ܫܠܝܐ ܗܘ ܘܟܠܗ ܥܡܐ ܥ̇ܒ̈ܕܝ ܩܪܒܐ ܕܐܝܬ ܗܘܐ ܥܡܗ ܘܢܦܠܘ ܒܗܘܢ

⁸ ܘܐܫܠܡ ܐܢܘܢ ܡܪܝܐ ܒܐܝܕܐ ܕܐܝܣܪܝܠ ܘܚܪܒܘ ܐܢܘܢ ܘܪܕܦܘ ܐܢܘܢ ܥܕܡܐ ܠܨܝܕܘܢ ܪܒܐ ܘܥܕܡܐ ܠܒܝܬ ܟܢܫܐ ܕܡ̈ܝܐ ܘܥܕܡܐ ܠܦܩܥܬܐ ܕܡܨܦܝܐ ܕܒܡܕܢܚܐ ܘܚܪܒܘ ܐܢܘܢ ܘܠܐ ܫܒܩ ܡܢܗܘܢ ܣܪܝܕܐ

⁹ ܘܥܒܕ ܠܗܘܢ ܝܫܘܥ ܐܝܟ ܕܐܡܪ ܠܗ ܡܪܝܐ ܪ̈ܟܫܗܘܢ ܓܡܪ ܘܩܪ̈ܘܟܝܗܘܢ ܐܘܩܕ ܒܢܘܪܐ

¹⁰ ܘܗܦܟ ܝܫܘܥ ܒܙܒܢܐ ܗ̇ܘ ܘܟܒܫ ܠܚܨܘܪ ܘܠܡܠܟܗ̇ ܩܛܠ ܒܚܪܒܐ ܡܛܠ ܕܡܢ ܩܕܝܡ ܚܨܘܪ ܗܘܬ ܪܫܗܝܢ ܕܡ̈ܠܟܘܬܐ ܗܠܝܢ

¹¹ ܘܚܪܒ ܠܟܠ ܢܦܫ̈ܬܐ ܕܒܗ̇ ܒܦܘܡܐ ܕܚܪܒܐ ܘܠܐ ܫܒܩ ܡܢܗܝܢ ܢܫܡܬܐ ܘܠܚܨܘܪ ܐܘܩܕ ܒܢܘܪܐ

¹² ܘܠܟܠܗܝܢ ܡܕܝܢ̈ܬܐ ܕܡ̈ܠܟܐ ܗܠܝܢ ܘܠܡ̈ܠܟܝܗܝܢ ܟܒܫ ܝܫܘܥ ܘܚܪܒ ܐܢܘܢ ܒܦܘܡܐ ܕܚܪܒܐ ܐܝܟܢܐ ܕܦܩܕܗ ܡܘܫܐ ܥܒܕܗ ܕܡܪܝܐ

¹³ ܘܠܟܠܗܝܢ ܩܘܪ̈ܝܐ ܕܩܝ̈ܡܢ ܥܠ ܬ̈ܠܠܐ ܐܘܩܕ ܐܢܝ̈ܢ ܐܝܣܪܝܠ ܘܠܚܨܘܪ ܐܘܩܕ ܝܫܘܥ

¹⁴ ܘܠܟܠܗ̇ ܒܙܬܐ ܕܡܕܝܢ̈ܬܐ ܗܠܝܢ ܘܒܥܝܪܐ ܒܙܘ ܠܗܘܢ ܒܢ̈ܝ ܐܝܣܪܝܠ ܘܠܟܠܗܘܢ ܒܢ̈ܝ ܐܢܫܐ ܚܪܒܘ ܒܦܘܡܐ ܕܣܝܦܐ ܥܕܡܐ ܕܓܡܪܘ ܐܢܘܢ ܘܠܐ ܫܒܩܘ ܡܢܗܘܢ ܢܫܡܬܐ

¹⁵ ܐܝܟܢܐ ܕܦܩܕ ܡܪܝܐ ܠܡܘܫܐ ܥܒܕܗ ܗܟܢܐ ܦܩܕܗ ܡܘܫܐ ܠܝܫܘܥ ܘܗܟܢܐ ܥܒܕ ܝܫܘܥ ܘܠܐ ܒܛܠ ܡܠܬܐ ܡܢ ܟܠ ܡܕܡ ܕܦܩܕ ܡܪܝܐ ܠܡܘܫܐ

¹⁶ ܘܢܣܒܗ̇ ܝܫܘܥ ܠܟܠܗ̇ ܐܪܥܐ ܗܕܐ ܕܛܘܪ̈ܐ ܘܠܟܠܗ̇ ܬܝܡܢܐ ܘܠܟܠܗ̇ ܐܪܥܐ ܕܦܩܥܬܐ ܘܠܛܘܪ̈ܐ ܟܠܗܘܢ ܘܠܦܩ̈ܥܬܗܘܢ

¹⁷ ܡܢ ܛܘܪܐ ܕܦ̇ܠܓ ܘܣ̇ܠܩ ܠܣܥܝܪ ܘܥܕܡܐ ܠܓܕܓܕ ܕܦܩܥܬܐ ܕܠܒܢܢ ܕܬܚܝܬ ܛܘܪܐ ܕܚܪܡܘܢ ܘܠܟܘܠܗܘܢ ܡܠܟܝ̈ܗܘܢ ܟܒܫ ܘܩܛܠ ܐܢܘܢ ܝܫܘܥ

¹⁸ ܘܝܘܡ̈ܬܐ ܣ̈ܓܝܐܐ ܥܒܕ ܝܫܘܥ ܩܪܒܐ ܥܡ ܡ̈ܠܟܐ ܟܠܗܘܢ ܗܠܝܢ

¹⁹ ܘܠܐ ܐܫܬܚܪܬ ܩܪܝܬܐ ܕܠܐ ܐܫܬܠܡܬ ܠܒܢ̈ܝ ܐܝܣܪܝܠ ܘܚܪܒܘܗ̇ ܐܠܐ ܐܢ ܚ̈ܘܝܐ ܕܝ̇ܬܒܝܢ ܒܓܒܥܘܢ ܕܐܚܝ ܐܢܘܢ ܝܫܘܥ ܘܫܒܩ ܐܢܘܢ ܝܫܘܥ ܕܢܦܠܚܘܢ ܠܐܝܣܪܝܠ ܘܠܟܠܗܝܢ ܡ̈ܠܟܘܬܐ ܗܠܝܢ ܫܒܐ ܐܢܝ̈ܢ ܝܫܘܥ ܘܚܪܒ ܐܢܝ̈ܢ

²⁰ ܡܛܠ ܕܡܢ ܩܕܡ ܡܪܝܐ ܗܘܬ ܗܕܐ ܕܢܬܚܝܠ ܠܒܗܘܢ ܕܢܦܩܘܢ ܠܩܪܒܐ ܥܠ ܐܝܣܪܝܠ ܡܛܠ ܕܢܚܪܒܘܢ ܐܢܘܢ ܘܠܐ ܬܗܘܐ ܥܠܝܗܘܢ ܬܟܫܦܬܐ ܡܛܠ ܕܐܘܒܕ ܐܢܘܢ ܐܝܟܢܐ ܕܦܩܕ ܡܪܝܐ ܠܡܘܫܐ

²¹ ܘܐܬܐ ܝܫܘܥ ܒܙܒܢܐ ܗ̇ܘ ܘܚܪܒ ܠܓܢܒܪ̈ܐ ܕܒܛܘܪܐ ܡܢ ܚܒܪܘܢ ܘܡܢ ܕܒܝܪ ܘܡܢ ܓܒܠ ܘܡܢ ܟܠܗ ܛܘܪܐ ܕܝܗܘܕܐ ܘܡܢ ܟܘܠܗ ܛܘܪܐ ܕܐܝܣܪܝܠ ܥܡ ܡܕܝܢ̈ܬܗܘܢ ܚܪܒ ܐܢܘܢ ܝܫܘܥ

²² ܘܠܐ ܐܫܬܚܪ ܓܒܪܐ ܒܐܪܥܐ ܕܒܢ̈ܝ ܐܝܣܪܝܠ ܐܠܐ ܐܢ ܒܥܐܙܐ ܘܒܓܬ ܘܒܐܫܕܘܕ ܕܐܫܬܚܪܘ

²³ ܘܢܣܒܗ̇ ܝܫܘܥ ܠܟܠܗ̇ ܐܪܥܐ ܐܝܟ ܕܐܡܪ ܡܪܝܐ ܠܡܘܫܐ ܘܝܗܒܗ̇ ܝܫܘܥ ܝܪܬܘܬܐ ܠܐܝܣܪܝܠ ܒܦܠܓ̈ܘܬܐ ܠܫܒ̈ܛܝܗܘܢ ܘܐܪܥܐ ܐܬܬܢܝܚܬ ܡܢ ܩܪܒܐ