Esodo ܡܦܩܢܐ 22

¹ ܟܰܕ ܢܶܓܢܽܘܒ ܓܰܒܪܳܐ ܬܰܘܪܳܐ. ܐܰܘ ܢܶܩܝܳܐ. ܘܢܶܟܽܘܣ ܐܶܢܽܘܢ. ܐܰܘ ܢܙܰܒܶܢ ܐܶܢܽܘܢ. ܚܰܡܫܳܐ ܬܰܘܖ̈ܺܝܢ ܢܶܬܶܠ ܚܠܳܦ ܬܰܘܪܳܐ. ܘܰܐܪܒܰܥ ܢܩܰܘ̈ܳܢ ܢܶܬܶܠ ܚܠܳܦ ܢܶܩܝܳܐ.

² ܘܶܐܢ ܒܦܽܘܠܫܬܳܐ ܢܶܫܬܟܰܚ ܓܰܢܳܒܳܐ. ܘܢܶܒܠܰܥ ܘܰܢܡܽܘܬ. ܠܰܝܬ ܠܶܗ ܥܝܳܪܬܳܐ.

³ ܘܶܐܢ ܕܶܢܚܰܬ ܥܠܰܘܗ̱ܝ ܫܶܡܫܳܐ. ܐܺܝܬ ܠܶܗ ܥܝܳܪܬܳܐ. ܘܡܶܦܪܰܥ ܢܶܦܪܽܘܥ. ܘܶܐܢ ܠܰܝܬ ܠܶܗ. ܢܶܙܕܰܒܰܢ ܒܰܓܢܽܘܒܬܶܗ.

⁴ ܘܶܐܢ ܡܶܫܬܟܳܚܽܘ ܬܶܫܬܟܰܚ ܒܺܐܝܕܰܘ̈ܗܝ ܓܢܽܘܒܬܳܐ. ܡܶܢ ܬܰܘܪܳܐ. ܘܠܰܚܡܳܪܳܐ. ܘܰܥܕܰܡܳܐ ܠܢܶܩܝܳܐ ܟܰܕ ܚܰܝܺܝܢ. ܚܰܕ ܒܰܬܪܶܝܢ ܢܫܰܠܶܡ.

⁵ ܘܟܰܕ ܢܰܘܟܶܠ ܓܰܒܪܳܐ ܚܰܩܠܳܐ ܐܰܘ ܟܰܪܡܳܐ. ܘܰܢܫܰܡܰܪ ܒܥܺܝܪܶܗ ܘܢܰܘܟܶܠ ܒܚܰܩܠܳܐ ܐ̱ܚܪܺܬܳܐ ܡܶܢ ܛܳܒܳܐ ܕܚܰܩܠܶܗ. ܘܡܶܢ ܛܳܒܳܐ ܕܟܰܪܡܶܗ ܢܶܦܪܽܘܥ.

⁶ ܘܟܰܕ ܬܶܦܽܘܩ ܢܽܘܪܳܐ ܘܬܶܫܟܰܚ ܟܽܘ̈ܒܶܐ. ܘܬܶܐܟܽܘܠ ܓܕܺܝ̈ܫܶܐ. ܐܰܘ ܩܳܝ̈ܡܳܬܳܐ. ܐܰܘ ܚܰܩܠܳܐ. ܡܫܰܠܳܡܽܘ ܢܫܰܠܶܡ ܡܰܢ ܕܰܐܘܩܶܕ ܝܰܩܕܳܢܳܐ.

⁷ ܘܟܰܕ ܢܶܬܶܠ ܓܰܒܪܳܐ ܠܚܰܒܪܶܗ ܟܶܣܦܳܐ. ܐܰܘ ܡܳܐܢ̈ܶܐ ܠܡܶܛܰܪ. ܘܢܶܬܓܢܶܒ ܡܶܢ ܒܶܝܬ ܓܰܒܪܳܐ. ܐܶܢ ܢܶܫܬܟܰܚ ܓܰܢܳܒܳܐ. ܢܫܰܠܶܡ ܚܰܕ ܬܪܶܝܢ.

⁸ ܘܶܐܢ ܠܳܐ ܢܶܫܬܟܰܚ ܓܰܢܳܒܳܐ. ܢܶܩܪܽܘܒ ܡܳܪܶܗ ܕܒܰܝܬܳܐ ܠܘܳܬ ܕܰܝܳܢ̈ܶܐ. ܐܶܢ ܠܳܐ ܐܰܘܫܶܒ ܐܺܝܕܶܗ ܒܰܥܒܺܝܕܬܳܐ ܕܚܰܒܪܶܗ.

⁹ ܥܰܠ ܟܽܠ ܡܶܕܶܡ ܕܰܚܛܳܐ ܥܰܠ ܬܰܘܪܳܐ. ܘܥܰܠ ܚܡܳܪܳܐ. ܘܥܰܠ ܐܶܡܪܳܐ. ܘܥܰܠ ܠܒܽܘܫܳܐ. ܘܥܰܠ ܟܽܠ ܐܶܒܰܕܬܳܐ. ܕܢܺܐܡܰܪ ܗܳܕܳܐ ܗ̱ܝ . ܩܕܳܡ ܕܰܝܳܢ̈ܶܐ ܢܶܥ̈ܠܳܢ ܡ̈ܶܠܶܐ ܕܰܬܖ̈ܰܝܗܽܘܢ ܘܰܠܡܰܢ ܕܰܢܚܰܝܒܽܘܢ ܕܰܝܳܢ̈ܶܐ. ܢܫܰܠܶܡ ܚܰܕ ܬܪܶܝܢ ܠܚܰܒܪܶܗ.

¹⁰ ܘܟܰܕ ܢܶܬܶܠ ܓܰܒܪܳܐ ܠܚܰܒܪܶܗ ܚܡܳܪܳܐ. ܐܰܘ ܬܰܘܪܳܐ. ܐܰܘ ܐܶܡܪܳܐ. ܐܰܘ ܟܽܠ ܒܥܺܝܪܳܐ. ܠܡܶܛܰܪ. ܘܰܢܡܽܘܬ. ܐܰܘ ܢܶܬܬܒܰܪ. ܐܰܘ ܢܶܫܬܒܶܐ. ܘܠܰܝܬ ܐ̱ܢܳܫ ܕܰܚܙܳܐ.

¹¹ ܡܰܘܡܳܬܶܗ ܕܡܳܪܝܳܐ ܬܶܗܘܶܐ ܒܶܝܬ ܬܖ̈ܰܝܗܽܘܢ. ܘܶܐܢ ܠܳܐ ܐܰܘܫܶܒ ܐܺܝܕܶܗ ܒܰܥܒܺܝܕܬܳܐ ܕܚܰܒܪܶܗ ܘܰܢܩܰܒܶܠ ܡܳܪܗܽܘܢ ܡܰܘܡܳܬܳܐ. ܘܠܳܐ ܢܫܰܠܶܡ.

¹² ܘܶܐܢ ܡܶܬܓܢܳܒܽܘ ܢܶܬܓܢܶܒ ܡܶܢܶܗ. ܢܫܰܠܶܡ ܠܡܳܖ̈ܰܘܗܝ.

¹³ ܘܶܐܢ ܡܶܬܬܒܳܪܽܘ ܢܶܬܬܒܰܪ. ܘܢܰܝܬܶܝܘܗܝ ܠܣܳܗܕܽܘܬܳܐ. ܕܰܬܒܺܝܪܳܐ ܠܳܐ ܢܫܰܠܶܡ.

¹⁴ ܘܟܰܕ ܢܶܫܐܰܠ ܓܰܒܪܳܐ ܡܶܢ ܚܰܒܪܶܗ ܒܥܺܝܪܳܐ. ܘܰܢܡܽܘܬ. ܐܰܘ ܢܶܬܬܒܰܪ. ܘܡܳܪܶܗ ܠܳܐ ܗܘܳܐ ܥܰܡܶܗ ܡܫܰܠܳܡܽܘ ܢܫܰܠܶܡ.

¹⁵ ܘܶܐܢ ܡܳܪܶܗ ܥܰܡܶܗ. ܠܳܐ ܢܫܰܠܶܡ. ܘܶܐܢ ܐܰܓܺܝܪܰܐ ܗ̱ܘ. ܒܠܰܥ ܒܰܐܓܪܶܗ.

¹⁶ ܘܟܰܕ ܢܫܰܕܶܠ ܓܰܒܪܳܐ ܒܬܽܘܠܬܳܐ ܕܠܳܐ ܗ̱ܘܳܬ ܡܟܺܝܪܳܐ. ܘܢܶܕܡܰܟ ܥܰܡܳܗ̇. ܡܶܣܰܒ ܢܶܣܒܺܝܗ̇ ܠܶܗ ܐܰܢ̱ܬܬܳܐ.

¹⁷ ܘܶܐܢ ܠܳܐ ܨܳܒܶܐ ܐܰܒܽܘܗ̇ ܕܢܶܬܠܺܝܗ̇ ܠܶܗ. ܟܶܣܦܳܐ ܢܶܬܩܽܘܠ ܐܰܝܟ ܡܰܗܪܳܗ̇ ܕܰܒܬܽܘܠܬܳܐ.

¹⁸ ܚܰܪܳܫܳܐ ܠܳܐ ܬܰܚܶܐ.

¹⁹ ܘܟܽܠ ܡܰܢ ܕܢܶܕܡܰܟ ܥܰܡ ܒܥܺܝܪܳܐ. ܡܶܬܩܛܳܠܽܘ ܢܶܬܩܛܶܠ.

²⁰ ܕܰܢܕܰܒܰܚ ܠܕܶܚ̈ܠܳܬܳܐ ܢܺܐܒܰܕ. ܐܶܠܳܐ ܠܡܳܪܝܳܐ ܒܰܠܚܽܘܕܰܘܗܝ.

²¹ ܘܰܠܥܳܡܽܘܪܳܐ ܠܳܐ ܬܰܗܪܽܘܢ. ܘܠܳܐ ܬܥܺܝܩܽܘܢ. ܡܶܛܽܠ ܕܥܳܡܽܘܖ̈ܶܐ ܗܘܰܝܬܽܘܢ ܒܰܐܪܥܳܐ ܕܡܶܨܪܶܝܢ.

²² ܘܟܽܠ ܐܰܪܡܰܠܬܳܐ ܘܝܰܬܡܳܐ ܠܳܐ ܬܰܗܪܽܘܢ.

²³ ܘܶܐܢ ܡܰܗܪܺܝܢ ܐܢ̱ܬܽܘܢ ܠܗܽܘܢ. ܘܰܡܨܰܠܶܝܢ ܩܕܳܡܰܝ. ܡܶܫܡܰܥ ܐܶܫܡܰܥ ܨܠܽܘܬܗܽܘܢ.

²⁴ ܘܢܶܬܩܰܦ ܪܽܘܓܙܝ. ܘܶܐܩܰܛܶܠܟܽܘܢ ܒܚܰܪܒܳܐ. ܘܢܶܗܘ̈ܝܳܢ ܢܶܫܰܝ̈ܟܽܘܢ ܐܰܖ̈ܡܠܳܢ. ܘܰܒܢܰܝ̈ܟܽܘܢ ܢܶܗܘܽܘܢ ܝܰܬܡܺܝ̈ܢ.

²⁵ ܘܶܐܢ ܟܶܣܦܳܐ ܬܰܘܙܶܦ ܒܥܰܡܝ ܠܡܶܣܟܺܢܳܐ ܕܥܰܡܳܟ. ܠܳܐ ܬܶܗܘܶܐ ܠܶܗ ܐܰܝܟ ܡܳܪܶܐ ܚܰܘܒܳܐ. ܘܠܳܐ ܬܶܣܰܒ ܡܶܢܶܗ ܪܶܒܺܝܬܳܐ.

²⁶ ܘܶܐܢ ܬܶܣܰܒ ܡܶܫܟܳܢܳܐ ܠܒܳܫܶܗ ܕܚܰܒܪܳܟ. ܒܡܰܥܖ̈ܳܒܰܝ ܫܶܡܫܳܐ ܗܰܒܳܝܗܝ ܠܶܗ.

²⁷ ܡܶܛܽܠ ܕܗܽܘܝܽܘ ܠܒܳܫܶܗ ܒܰܠܚܽܘܕܰܘܗܝ. ܘܗܽܘܝܽܘ ܬܰܟܣܺܝܬܶܗ ܠܒܶܣܪܶܗ ܒܡܳܢܳܐ ܢܶܕܡܰܟ. ܘܶܐܢ ܢܨܰܠܶܐ ܩܕܳܡܰܝ. ܐܶܫܡܥܺܝܘܗܝ. ܡܶܛܽܠ ܕܰܡܪܰܚܡܳܢܳܐ ܐ̱ܢܳܐ.

²⁸ ܠܕܰܝܳܢܳܐ ܠܳܐ ܬܨܰܚܶܐ. ܘܰܠܪܺܝܫܳܐ ܕܥܰܡܳܟ ܠܳܐ ܬܠܽܘܛ.

²⁹ ܪܺܝܫ ܥܰܠ̈ܠܳܬܶܗ ܕܶܐܕܪܳܟ ܘܪܺܝܫ ܡܰܥܨܖ̈ܳܬܳܟ ܠܳܐ ܬܫܰܘܚܰܪ. ܒܽܘܟܪܳܐ ܕܰܒܢܰܝ̈ܟ ܬܶܬܶܠ ܠܺܝ.

³⁰ ܘܗܳܟܰܢܳܐ ܬܶܥܒܶܕ ܠܬܰܘܖ̈ܰܝܟ ܘܰܠܥܳܢ̈ܟ. ܫܰܒܥܳܐ ܝܰܘܡܺܝ̈ܢ ܢܶܗܘܶܐ ܥܰܡ ܐܶܡܶܗ. ܘܰܒܝܰܘܡܳܐ ܬܡܺܝܢܳܝܳܐ ܬܶܬܠܺܝܘܗܝ ܠܺܝ.

³¹ ܘܐ̱ܢܳܫܺܝ̈ܢ ܩܰܕܺܝܫܺܝ̈ܢ ܬܶܗܘܢ ܠܺܝ. ܘܒܶܣܪܳܐ ܕܰܢܬܺܝܫ ܡܶܢ ܚܰܝܘܬܳܐ ܚܰܝܬܳܐ ܠܳܐ ܬܶܐܟܠܽܘܢ. ܠܟܰܠ̈ܒܶܐ ܬܶܫܕܽܘܢܶܗ.