Numeri ܡܢܝܢܐ 15

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

² ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܡܳܐ ܕܥܰܠܬܽܘܢ ܠܰܐܪܥܳܐ ܕܒܶܝܬ ܡܰܥܡܰܪܟܽܘܢ ܕܝܳܗܶܒ ܐ̱ܢܳܐ ܠܟܽܘܢ ܝܽܘܪܬܳܢܳܐ.

³ ܩܰܪܶܒܘ ܩܽܘܪܒܳܢܳܐ ܠܡܳܪܝܳܐ ܥܠܳܬܳܐ. ܐܰܘ ܕܶܒܚܳܐ. ܦܪܽܘܫܘ ܢܶܕܪܳܐ. ܐܰܘ ܦܽܘܪܫܳܢܳܐ ܐܰܘ ܒܥܰܕܥܺܐܕܰܝ̈ܟܽܘܢ. ܘܰܥܒܶܕܘ ܪܺܝܚܳܐ ܕܰܣܘܳܬܳܐ ܠܡܳܪܝܳܐ ܡܶܢ ܬܰܘܖ̈ܶܐ ܘܡܶܢ ܥܳܢ̈ܳܐ.

⁴ ܘܰܢܩܰܪܶܒ ܗܰܘ ܕܰܡܩܰܪܶܒ ܩܽܘܪܒܳܢܶܗ ܠܡܳܪܝܳܐ. ܣܡܺܝܕܳܐ ܢܰܫܺܝܦܳܐ. ܥܶܣܪܽܘܢܳܐ ܕܦܺܝܠ ܒܪܽܘܒܥܶܗ ܕܗܶܡܺܝܢܳܐ ܕܡܶܫܚܳܐ.

⁵ ܘܚܰܡܪܳܐ ܠܢܽܘܩܳܝܳܐ. ܪܽܘܒܥܶܗ ܕܗܶܡܺܝܢܳܐ ܩܰܪܶܒ ܥܰܠ ܥܠܳܬܳܐ. ܐܰܘ ܠܕܶܒܚܳܐ ܕܶܐܡܪܳܐ ܚܰܕ.

⁶ ܐܰܘ ܠܕܶܟܪܳܐ ܚܰܕ. ܘܰܥܒܶܕ ܩܽܘܪܒܳܢܳܐ ܢܰܫܺܝܦܳܐ. ܬܪܶܝܢ ܥܶܣܖ̈ܽܘܢܺܝܢ. ܕܦܺܝܠܺܝܢ ܒܡܶܫܚܳܐ. ܬܽܘܠܬܶܗ ܕܗܶܡܺܝܢܳܐ.

⁷ ܘܚܰܡܪܳܐ ܠܢܽܘܩܳܝܳܐ ܬܽܘܠܬܶܗ ܕܗܶܡܺܝܢܳܐ. ܩܰܪܶܒ ܪܺܝܚܳܐ ܕܰܣܘܳܬܳܐ ܠܡܳܪܝܳܐ.

⁸ ܘܶܐܢ ܡܩܰܪܶܒ ܐܰܢ̱ܬ ܒܰܪ ܒܰܩܪܳܐ ܝܰܩܕܳܐ ܫܰܠܡܳܐ. ܐܰܘ ܕܶܒܚܳܐ ܠܡܶܦܪܰܫ ܢܶܕܪܳܐ. ܐܰܘ ܫܰܠܡܳܐ ܠܡܳܪܝܳܐ.

⁹ ܩܰܪܶܒ ܥܰܠ ܒܰܪ ܒܰܩܪܳܐ ܩܽܘܪܒܳܢܳܐ ܢܰܫܺܝܦܳܐ. ܬܠܳܬܳܐ ܥܶܣܖ̈ܽܘܢܺܝܢ ܕܦܺܝܠܺܝܢ ܒܡܶܫܚܳܐ ܦܶܠܓܶܗ ܕܗܶܡܺܝܢܳܐ.

¹⁰ ܘܚܰܡܪܳܐ ܩܰܪܶܒ ܠܢܽܘܩܳܝܳܐ ܦܶܠܓܶܗ ܕܗܶܡܺܝܢܳܐ. ܩܽܘܪܒܳܢܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ.

¹¹ ܗܳܟܰܢܳܐ ܥܒܶܕܘ ܠܬܰܘܪܳܐ ܚܰܕ. ܘܰܠܕܶܟܪܳܐ ܚܰܕ. ܐܰܘ ܠܶܐܡܪܳܐ ܡܶܢ ܐܶܡܖ̈ܶܐ. ܐܰܘ ܡܶܢ ܥܶܙ̈ܶܐ.

¹² ܐܰܝܟ ܡܶܢܝܳܢܳܐ ܕܥܳܒܕܺܝܢ ܐܢ̱ܬܽܘܢ. ܗܳܟܰܢܳܐ ܥܒܶܕܘ ܠܚܰܕ ܚܰܕ ܒܡܶܢܝܳܢܗܽܘܢ.

¹³ ܟܽܠܗܽܘܢ ܕܒܶܝܬ ܝܺܣܪܳܐܶܝܠ ܢܶܥܒܕܽܘܢ ܗܳܠܶܝܢ ܗܳܟܰܢܳܐ. ܘܰܢܩܰܪܒܽܘܢ ܩܽܘܪܒܳܢܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ.

¹⁴ ܘܶܐܢ ܢܶܥܡܰܪ ܥܰܡܟܽܘܢ ܐܰܝܢܳܐ ܕܡܶܬܦܢܶܐ ܠܘܳܬܝ. ܐܰܘ ܒܰܝܢܳܬܟܽܘܢ ܠܕܳܖ̈ܰܝܟܽܘܢ. ܘܢܶܥܒܶܕ ܩܽܘܪܒܳܢܳܐ ܕܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܐܰܝܟ ܕܥܳܒܕܺܝܢ ܐܢ̱ܬܽܘܢ ܗܳܟܰܢܳܐ ܢܶܥܒܶܕ.

¹⁵ ܢܳܡܽܘܣܳܐ ܚܰܕ ܢܶܗܘܶܐ ܠܟܽܘܢ. ܘܠܰܐܝܢܳܐ ܕܡܶܬܦܢܶܐ ܠܘܳܬܝ ܕܥܳܡܰܪ ܥܰܡܟܽܘܢ. ܢܳܡܽܘܣܳܐ ܠܥܳܠܰܡ ܠܕܳܖ̈ܰܝܟܽܘܢ. ܐܰܝܢܳܐ ܕܡܶܬܦܢܶܐ ܠܘܳܬܝ. ܐܰܟܘܳܬܟܽܘܢ ܢܶܗܘܶܐ ܩܕܳܡ ܡܳܪܝܳܐ.

¹⁶ ܢܳܡܽܘܣܳܐ ܚܰܕ ܘܕܺܝܢܳܐ ܚܰܕ ܢܶܗܘܶܐ ܠܟܽܘܢ. ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܥܰܡܟܽܘܢ.

¹⁷ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

¹⁸ ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܡܳܐ ܕܥܰܠܬܽܘܢ ܠܰܐܪܥܳܐ ܕܡܰܥܶܠ ܐ̱ܢܳܐ ܠܟܽܘܢ ܠܬܰܡܳܢ.

¹⁹ ܡܳܐ ܕܳܐܟܠܺܝܢ ܐ̱ܢܬܽܘܢ ܡܶܢ ܠܰܚܡܳܐ ܕܰܐܪܥܳܐ. ܦܪܽܘܫܘ ܦܽܘܪܫܳܢܳܐ ܠܡܳܪܝܳܐ.

²⁰ ܡܶܢ ܪܺܝܫ ܐܳܨ̈ܘܳܬܟܽܘܢ. ܚܳܚܽܘܪܬܳܐ ܦܪܽܘܫܘ ܦܽܘܪܫܳܢܳܐ ܠܡܳܪܝܳܐ. ܐܝܟ ܦܽܘܪܫܳܢܳܐ ܕܶܐܕܪܳܐ ܗܳܟܰܢܳܐ ܦܽܘܪܫܽܘܗ̇.

²¹ ܪܺܝܫ ܐܳܨܘ̈ܳܬܟܽܘܢ ܗܰܒܘ ܦܽܘܪܫܳܢܳܐ ܠܡܳܪܝܳܐ ܠܕܳܖ̈ܰܝܟܽܘܢ.

²² ܘܶܐܢ ܬܶܛܥܽܘܢ ܘܠܳܐ ܬܶܥܒܕܽܘܢ ܗܳܠܶܝܢ ܟܽܠܗܽܘܢ ܦܽܘܩ̈ܕܳܢܶܐ ܕܡܰܠܶܠ ܡܳܪܝܳܐ ܥܰܡ ܡܽܘܫܶܐ.

²³ ܟܽܠܡܶܕܶܡ ܕܦܰܩܶܕ ܡܳܪܝܳܐ ܠܘܳܬܟܽܘܢ ܒܺܐܝܕܳܐ ܕܡܽܘܫܶܐ. ܡܶܢ ܝܰܘܡܳܐ ܕܦܰܩܶܕ ܡܳܪܝܳܐ ܘܰܠܗܰܠ ܠܕܳܖ̈ܰܝܟܽܘܢ.

²⁴ ܘܶܐܢ ܡܶܢ ܩܕܳܡ ܥܰܝ̈ܢܶܝܗ̇ ܕܰܟܢܽܘܫܬܳܐ ܐܶܬܥܰܒܕܰܬ ܛܽܘܥܝܰܝ. ܢܩܰܪܒܽܘܢ ܟܽܠܳܗ̇ ܟܢܽܘܫܬܳܐ. ܬܰܘܪܳܐ ܚܰܕ ܒܰܪ ܒܰܩܪܳܐ. ܠܰܥܠܳܬܳܐ ܠܪܺܝܚܳܐ ܕܰܣܘܳܬܳܐ ܠܡܳܪܝܳܐ. ܘܰܣܡܺܝܕܶܗ. ܘܢܽܘܩܳܝܶܗ ܐܰܝܟ ܙܶܕܩܶܗ. ܘܨܺܦܪܳܝܳܐ ܚܰܕ ܕܥܶܙ̈ܶܐ ܠܰܚܛܳܗܳܐ.

²⁵ ܘܰܢܚܰܣܶܐ ܟܳܗܢܳܐ ܥܰܠ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܘܢܶܫܬܒܶܩ ܠܗܽܘܢ. ܡܶܛܽܠ ܕܛܽܘܥܝܰܝ ܗܺܝ. ܘܗܶܢܽܘܢ ܐܰܝܬܺܝܘ ܩܽܘܖ̈ܒܢܰܝ̈ܗܽܘܢ ܩܽܘܪܒܳܢܳܐ ܠܡܳܪܝܳܐ. ܘܕܰܚܠܳܦ ܚܛܳܗܰܝ̈ܗܽܘܢ ܩܽܘܪܒܳܢܳܐ ܠܡܳܪܝܳܐ ܥܰܠ ܣܰܟ̈ܠܘܳܬܗܽܘܢ.

²⁶ ܘܢܶܫܬܒܶܩ ܠܗܽܘܢ ܠܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܰܪܺܝܢ ܒܺܝܣܪܳܐܶܝܠ. ܡܶܛܽܠ ܕܰܕܟܽܠܶܗ ܗܺܝ ܥܰܡܳܐ ܛܽܘܥܝܰܝ.

²⁷ ܘܶܐܢ ܢܰܦܫܳܐ ܚܕܳܐ ܬܶܚܛܶܐ ܒܛܽܘܥܝܰܝ. ܬܩܰܪܶܒ ܥܶܙܳܐ ܒܰܪܬ ܫܰܢ̱ܬܳܐ ܚܠܳܦ ܚܛܳܗܳܐ.

²⁸ ܘܰܢܚܰܣܶܐ ܟܳܗܢܳܐ ܥܰܠ ܢܰܦܫܳܐ ܕܰܚܛܳܬ ܒܰܚܛܳܗܳܐ ܕܛܽܘܥܝܰܝ ܩܕܳܡ ܡܳܪܝܳܐ. ܘܢܶܬܚܰܣܶܐ ܥܠܰܘܗܝ ܘܢܶܫܬܒܶܩ ܠܶܗ.

²⁹ ܘܠܰܒܢܰܝ̈ ܝܺܣܪܳܐܶܝܠ ܘܠܰܐܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܰܝܢܳܬܟܽܘܢ. ܢܳܡܽܘܣܳܐ ܚܰܕ ܢܶܗܘܶܐ ܠܟܽܘܢ. ܠܡܰܢ ܕܥܳܒܶܕ ܒܛܽܘܥܝܰܝ.

³⁰ ܘܢܰܦܫܳܐ ܕܬܶܥܒܶܕ ܒܺܐܝܕܳܐ ܪܳܡܬܳܐ. ܡܶܢܟܽܘܢ ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ. ܩܕܳܡ ܡܳܪܝܳܐ ܓܰܕܶܦ. ܬܺܐܒܰܕ ܢܰܦܫܳܐ ܗܳܝ ܡܶܢ ܥܰܡܳܗ̇.

³¹ ܡܶܛܽܠ ܕܫܳܛ ܦܶܬܓܳܡܰܘ̈ܗܝ ܕܡܳܪܝܳܐ. ܘܰܠܦܽܘܩܕܳܢܰܘ̈ܗܝ ܒܰܛܶܠ. ܬܺܐܒܰܕ ܢܰܦܫܳܐ ܗܳܝ. ܘܥܰܘܠܳܗ̇ ܥܠܶܝܗ̇.

³² ܘܰܗܘܰܘ ܒܢܰܝ̈ ܝܺܣܪܳܐܶܝܠ ܒܡܰܕܒܪܳܐ. ܘܶܐܫܟܰܚܘ ܓܰܒܪܳܐ ܚܰܕ ܟܰܕ ܠܳܩܶܛ ܩܰܝ̈ܣܶܐ ܒܝܰܘܡܳܐ ܕܫܰܒܬܳܐ.

³³ ܘܩܰܪܒܽܘܗܝ ܗܳܢܽܘܢ ܕܶܐܫܟܚܽܘܗܝ ܟܰܕ ܠܳܩܶܛ ܩܰܝ̈ܣܶܐ. ܠܘܳܬ ܡܽܘܫܶܐ ܘܰܠܘܳܬ ܐܰܗܪܽܘܢ ܘܰܠܘܳܬ ܟܽܠܳܗ̇ ܟܢܽܘܫܬܳܐ.

³⁴ ܘܚܰܒܫܽܘܗܝ ܒܶܝܬ ܢܛܽܘܪܬܳܐ. ܡܶܛܽܠ ܕܠܳܐ ܥܕܰܟܺܝܠ ܐܶܬܦܰܫܰܩ ܡܳܢܳܐ ܢܶܬܥܒܶܕ ܠܶܗ.

³⁵ ܘܶܐܡܰܪ ܡܳܪܝܳܐ ܠܡܽܘܫܶܐ. ܡܶܬܩܛܳܠܽܘ ܢܶܬܩܛܶܠ ܓܰܒܪܳܐ. ܘܡܶܪܓܰܡ ܢܶܪܓܡܽܘܢܶܗ ܟܽܠܳܗ̇ ܟܢܽܘܫܬܳܐ ܒܟܺܐܦ̈ܶܐ ܠܒܰܪ ܡܶܢ ܡܰܫܪܺܝܬܳܐ.

³⁶ ܘܰܐܦܩܽܘܗܝ ܟܽܠܳܗ̇ ܟܢܽܘܫܬܳܐ ܠܒܰܪ ܡܶܢ ܡܰܫܪܺܝܬܳܐ. ܘܪܰܓܡܽܘܗܝ ܒܟܺܐܦ̈ܶܐ ܘܡܺܝܬ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.

³⁷ ܢܳܡܽܘܣܳܐ ܕܥܰܠ ܨܽܘ̈ܨܝܳܬܳܐ. ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

³⁸ ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܘܢܶܥܒܕܽܘܢ ܠܗܽܘܢ ܨܽܘܨ̈ܝܳܬܳܐ ܥܰܠ ܟܶܢ̈ܦܶܐ ܕܡܰܖ̈ܛܽܘܛܰܝܗܽܘܢ. ܠܕܳܖ̈ܰܝܗܽܘܢ. ܘܢܶܥܒܕܽܘܢ ܒܨܽܘܨ̈ܝܳܬܳܐ ܕܟܶܢ̈ܦܰܝܗܽܘܢ ܚܽܘܛܳܐ ܕܬܶܟܠܬܳܐ.

³⁹ ܘܢܶܗܘ̈ܝܳܢ ܠܟܽܘܢ ܨܽܘܨ̈ܝܳܬܳܐ. ܕܬܶܚܙܽܘܢ ܐܶܢܶܝܢ. ܘܬܶܬܕܰܟܪܽܘܢ ܟܽܠܗܽܘܢ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܟܽܘܢ. ܘܬܶܥܒܕܽܘܢ ܐܶܢܽܘܢ. ܘܠܳܐ ܬܶܛܥܽܘܢ ܒܳܬܰܪ ܠܶܒܰܝ̈ܟܽܘܢ. ܘܒܳܬܰܪ ܖ̈ܶܥܝܳܢܰܝܟܽܘܢ. ܕܛܳܥܶܝܢ ܐ̱ܢܬܽܘܢ ܒܳܬܰܪܗܽܘܢ.

⁴⁰ ܘܬܶܬܕܰܟܪܽܘܢ ܘܬܶܥܒܕܽܘܢ ܟܽܠܗܽܘܢ ܦܽܘܩܕܳܢܰܝ̈. ܘܬܶܗܘܢ ܩܰܕܺܝܫܺܝܢ ܠܰܐܠܳܗܟܽܘܢ.

⁴¹ ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ. ܕܰܐܦܶܩܬܟܽܘܢ ܡܶܢ ܐܰܪܥܳܐ ܕܡܶܨܪܶܝܢ. ܕܶܐܗܘܶܐ ܠܟܽܘܢ ܐܰ‌ܠܳܗܳܐ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.