Giudici ܕܝ̈ܢܐ 15

¹ ܘܰܗܘܳܐ ܡܶܢ ܒܳܬܰܪ ܝܰܘ̈ܡܳܬܳܐ ܒܙܰܒܢܳܐ ܕܰܚܨܳܕܳܐ ܕܚ̈ܶܛܶܐ. ܘܶܐܬܕܰܟܪܳܗ̇ ܫܶܡܫܽܘܢ. ܠܰܐܢ̱ܬܬܶܗ ܒܓܰܕܝܳܐ ܕܥܶܙ̈ܶܐ. ܘܶܐܡܰܪ ܐܺܙܰܠ ܠܘܳܬ ܐܰܢ̱ܬܰܬܝ ܠܩܰܝܛܽܘܢܳܐ ܘܠܳܐ ܫܰܒ̣ܩܶܗ ܐܰܒܽܘܗ̇ ܠܡܶܥܰܠ.

² ܘܶܐܡܰܪ ܠܶܗ ܐܰܒܽܘܗ̇. ܣܳܒܰܪ ܗܘܺܝ݀ܬ ܕܡܶܣܢܳܐ ܣܢܰܝܬܳܗ̇. ܘܝܰܗܒܬܳܗ̇ ܠܫܰܘܫܒܺܝܢܳܟ ܗܳܐ ܚܳܬܳܗ̇ ܙܥܽܘܪܬܳܐ ܕܛܳܒܳܐ ܡܶܢܳܗ̇. ܬܶܗܘܶܐ ܠܳܟ ܚܠܳܦܶܝܗ̇.

³ ܘܶܐܡܰܪ ܠܗܽܘܢ ܫܶܡܫܽܘܢ. ܙܰܟܳܝ ܐ̱ܢܳܐ ܡܶܢ ܦܠܶܫܬܳܝ̈ܶܐ. ܡܶܛܽܠ ܕܥܳܒܶܕ ܐ̱ܢܳܐ ܥܰܡܟܽܘܢ ܒܺܝܫܬܳܐ.

⁴ ܘܶܐܙܰܠ ܫܶܡܫܽܘܢ ܘܶܐܚܰܕ ܬܠܳܬ ܡܳܐܐ ܬܰܥ̈ܠܺܝܢ. ܘܰܢܣܰܒ ܠܰܡܦܺܝ̈ܕܶܐ. ܘܶܐܣܰܪ ܒܕܽܘܢ̈ܒܝܳܬܗܽܘܢ. ܬܪܶܝܢ ܬܪܶܝܢ ܬܰܥ̈ܠܺܝܢ ܐܰܟܚܕܳܐ. ܘܶܐܣܰܪ ܚܰܕ ܚܰܕ ܠܰܡܦܺܝܕܳܐ ܒܶܝܬ ܬܪܶܝܢ ܬܰܥ̈ܠܺܝܢ. ܒܰܝܢܳܬ ܬܰܪܬܶܝܢ ܕܽܘܢ̈ܒܝܳܬܗܽܘܢ.

⁵ ܘܰܐܘܚܶܕ ܢܽܘܪܳܐ ܒܠܰܡܦܺܝ̈ܕܶܐ. ܘܰܫܒܰܩ ܒܩܳܝ̈ܡܳܬܳܐ ܕܰܦܠܶܫܬܳܝ̈ܶܐ. ܘܰܐܘܩܶܕ ܡܶܢ ܓܕܺܝ̈ܫܶܐ. ܘܰܥܕܰܡܳܐ ܠܩܳܝ̈ܡܳܬܳܐ. ܘܰܥܕܰܡܳܐ ܠܟܰܖ̈ܡܶܐ. ܘܰܥܕܰܡܳܐ ܠܙܰܝ̈ܬܶܐ.

⁶ ܘܳܐܡܪܺܝܢ ܦܠܶܫܬܳܝ̈ܶܐ. ܡܰܢܽܘ ܥܒܰܕ ܗܳܟܰܢܳܐ. ܐܳܡܪܺܝܢ ܫܶܡܫܽܘܢ ܚܰܬܢܶܗ ܕܬܰܡܢܰܡ. ܥܰܠ ܕܰܢܣܰܒ ܐܰܢ̱ܬܬܶܗ ܘܝܰܗܒܳܗ̇ ܠܫܰܘܫܒܺܝܢܶܗ. ܘܰܣܠܶܩܘ ܦܠܶܫܬܳܝ̈ܶܐ. ܘܰܐܘܩܕܽܘܗ̇ ܠܳܗ̇ ܘܰܠܒܶܝܬ ܐܰܒܽܘܗ̇ ܒܢܽܘܪܳܐ.

⁷ ܘܶܐܡܰܪ ܠܗܽܘܢ ܫܶܡܫܽܘܢ. ܐܳܦܶܢ ܬܶܥܒܕܽܘܢ ܗܳܟܰܢܳܐ. ܡܶܬܢܰܩܰܡ ܐ̱ܢܳܐ ܡܶܢܟܽܘܢ. ܘܗܳܝܕܶܝܢ ܫܳܠܶܐ ܐ̱ܢܳܐ.

⁸ ܘܰܡ̣ܚܳܐ ܐܶܢܽܘܢ ܒܰܡܚܽܘܬܳܐ. ܡܶܢ ܫܳܩܰܝ̈ܗܽܘܢ ܘܰܥܕܰܡܳܐ ܠܚܰܨܰܝ̈ܗܽܘܢ. ܡܚܽܘܬܳܐ ܪܰܒܬܳܐ ܘܶܐܙܰܠ ܘܺܝܬܶܒ ܒܣܳܚܳܦ ܕܒܰܫܩܺܝܦܳܐ ܕܥܰܛܡܺܝܢ.

⁹ ܘܰܣܠܶܩܘ ܦܠܶܫܬܳܝ̈ܶܐ ܘܰܫܪܰܘ ܒܺܝܗܽܘܕܳܐ.

¹⁰ ܘܳܐܡܪܺܝܢ ܓܰܒܖ̈ܶܐ ܕܺܝܗܽܘܕܳܐ ܠܡܳܢܳܐ ܣܠܶܩܬܽܘܢ. ܐܳܡܪܺܝܢ ܕܢܶܐܣܽܘܪ ܠܫܶܡܫܽܘܢ ܣܠܶܩܢ. ܕܢܶܥܒܶܕ ܠܶܗ ܐܰܝܟ ܕܰܥܒܰܕ ܠܰܢ.

¹¹ ܘܰܢܚܶܬܘ ܬܠܳܬܳܐ ܐܰܠܦܺܝ̈ܢ ܓܰܒܖ̈ܺܝܢ ܡܶܢ ܝܺܗܽܘܕܳܐ. ܠܣܳܚܳܦ ܕܒܰܫܩܺܝܦܳܐ ܕܥܰܛܡܺܝܢ. ܘܳܐܡܪܺܝܢ ܠܫܶܡܫܽܘܢ. ܠܳܐ ܝܳܕܰܥ ܐܰܢ̱ܬ ܕܫܰܠܺܝܛܺܝܢ ܒܰܢ ܦܠܶܫܬܳܝ̈ܶܐ. ܡܶܛܽܠ ܡܳܢܳܐ ܥܒܰܕܬ ܠܰܢ ܗܳܟܰܢܳܐ. ܐܳܡܰܪ ܠܗܽܘܢ. ܐܰܝܟ ܡܳܐ ܕܰܥܒܰܕܘ. ܗܳܟܰܢܳܐ ܥܶܒ̣ܕܶܬ ܠܗܽܘܢ.

¹² ܐܳܡܪܺܝܢ ܠܗ. ܠܡܶܐܣܪܳܟ ܢܚܶܬܢ ܘܰܠܡܰܫܠܳܡܽܘܬܳܟ ܒܺܐܝܕܳܐ ܕܰܦܠܶܫܬܳܝ̈ܶܐ ܐܳܡܰܪ ܠܗܽܘܢ. ܝܺܡܰܘ ܠܺܝ ܕܠܳܐ ܬܰܗܪܽܘܢܳܢܝ ܐܰܢ̱ܬܽܘܢ.

¹³ ܐܳܡܪܺܝܢ ܠܶܗ ܠܳܐ. ܐܶܠܳܐ ܡܶܐܣܰܪ ܐܳܣܪܺܝܢܰܢ ܠܳܟ. ܘܡܰܫܠܡܺܝܢ ܚܢܰܢ ܒܺܐܝܕܰܝ̈ܗܽܘܢ. ܘܡܶܩܛܰܠ ܠܳܐ ܩܳܛܠܺܝܢܰܢ ܠܳܟ. ܘܰܐܣܪܽܘܗܝ ܒܬܰܪܬܶܝܢ ܫܺܫ̈ܠܳܬܳܐ ܚܰܕ̈ܬܳܬܳܐ. ܘܰܐܣܩܽܘܗܝ ܡܶܢ ܫܩܺܝܦܳܐ ܗܰܘ.

¹⁴ ܘܡܰܛܺܝ ܥܕܰܡܳܐ ܠܰܠܚܺܝ. ܘܰܦܠܶܫܬܳܝ̈ܶܐ ܩܳܡ̣ܘ ܠܡܶܩܛܠܶܗ. ܘܰܐܨܠܚܰܬ ܥܠܰܘܗܝ ܪܽܘܚܶܗ ܕܡܳܪܝܳܐ. ܘܰܗܘܰܝ̈ ܫܺܫ̈ܠܳܬܳܐ ܕܥܰܠ ܐܺܝܕܰܘ̈ܗܝ. ܐܰܝܟ ܟܶܬܳܢܳܐ ܕܣܶܦܰܬ ܒܶܗ ܢܽܘܪܳܐ. ܘܶܐܫܬܪܺܝܘ ܐܰܣܽܘܖ̈ܶܐ ܡܶܢ ܐܺܝܕܰܘ̈ܗܝ.

¹⁵ ܘܶܐܫܟܰܚ ܦܰܟܳܐ ܕܰܚܡܳܪܳܐ ܛܰܪܽܘܢܳܐ. ܘܰܐܘܫܶܛ ܐܺܝܕܶܗ ܘܢܰܣܒܶܗ. ܘܩܰܛܶܠ ܒܶܗ ܐܳܠܶܦ ܓܰܒܖ̈ܺܝܢ.

¹⁶ ܘܶܐܡܰܪ ܫܶܡܫܽܘܢ. ܒܦܰܟܳܐ ܕܰܚܡܳܪܳܐ ܟܳܫ̈ܝܳܬܳܐ ܟܫܺܝܬ ܡܶܢܗܽܘܢ. ܒܦܰܟܳܐ ܕܰܚܡܳܪܳܐ ܩܰܛܠܶܬ ܐܳܠܶܦ ܓܰܒܖ̈ܺܝܢ.

¹⁷ ܘܟܰܕ ܫܰܠܶܡ ܠܰܡܡܰܠܶܠܘ. ܫܕܳܝܗܝ ܦܰܟܳܐ ܡܶܢ ܐܺܝܕܶܗ. ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܕܡܳܐ ܕܦܰܟܳܐ.

¹⁸ ܘܰܨܗܺܝ ܛܳܒ. ܘܰܩܪܳܐ ܠܡܳܪܝܳܐ ܘܶܐܡܰܪ. ܐܰܢ̱ܬ ܝܰܗܒ̣ܬ ܒܺܐܝܕܶܗ ܕܥܰܒܕܳܟ ܢܶܨܚܳܢܳܐ ܗܳܢܳܐ ܪܰܒܳܐ. ܘܗܳܫܳܐ ܐܶܡܽܘܬ ܠܨܶܗܝܳܐ. ܘܶܐܦܶܠ ܒܺܐܝܕܳܐ ܕܥܽܘܖ̈ܠܶܐ ܗܳܠܶܝܢ.

¹⁹ ܘܒܰܙܰܥ ܡܳܪܝܳܐ ܐܰ‌ܠܳܗܳܐ ܠܽܘܓܡܳܐ ܕܦܰܟܳܐ ܕܰܚܡܳܪܳܐ. ܘܰܢܦܰܩܘ ܡܶܢܶܗ ܡܰܝ̈ܳܐ. ܘܶܐܫܬܺܝ ܘܶܐܬܦܰܢܝܰܬ ܪܽܘܚܶܗ. ܡܶܛܽܠ ܗܳܢܳܐ ܩ̣ܪܳܐ ܫܡܶܗ ܕܰܐܬܪܳܐ ܗܰܘ. ܥܺܝܢ ܩܰܪܢܳܐ ܕܦܰܟܳܐ ܕܰܚܡܳܪܳܐ ܥܕܰܡܳܐ ܠܝܰܘܡܳܢܳܐ.

²⁰ ܘܗܽܘ ܕܳܢ ܠܺܝܣܪܳܐܶܝܠ ܒܝܰܘ̈ܡܳܬܳܐ ܕܰܦܠܶܫܬܳܝ̈ܶܐ ܥܶܣܪܺܝܢ ܫܢܺܝ̈ܢ.