Deuteronomio ܬܢܝܢ ܢܡܘܣܐ 34

¹ ܘܣܠܩ ܡܘܫܐ ܡܢ ܥܪܒܘܬ ܡܘܐܒ ܠܛܘܪܐ ܕܢܒܘ. ܠܪܝܫ ܪܡܬܐ ܕܠܘܩܒܠ ܐܝܪܝܚܘ. ܘܚ̇ܘܝܗ ܡܪܝܐ ܟܠܗ̇ ܐܪܥܐ ܕܓܠܥܕ ܥܕܡܐ ܠܕܢ.

² ܘܟܠܗ̇ ܢܦܬܠܝ. ܘܟܘܠܗ̇ ܐܪܥܐ ܕܐܦܪܝܡ ܘܕܡܢܫܐ. ܘܟܠܗ̇ ܐܪܥܐ ܕܝܗܘܕܐ. ܥܕܡܐ ܠܝܡܐ ܐܚܪܝܐ.

³ ܘܠܬܝܡܢܐ. ܘܠܟܟܪ ܕܒܦܩܥܬܐ ܕܐܝܪܝܚܘ ܩܪܝܬܐ ܕܕܩ̈ܠܐ. ܥܕܡܐ ܠܨܥܪ.

⁴ ܘܐܡܪ ܠܗ ܡܪܝܐ. ܗܕܐ ܗܝ ܐܪܥܐ ܕܝܡܝܬ ܠܐܒܪܗܡ ܘܠܐܝܣܚܩ ܘܠܝܥܩܘܒ. ܘܐܡ̇ܪܬ ܕܠܙܪܥܟ ܐܬܠܝܗ̇. ܚ̇ܘܝܬܗ̇ ܠܟ ܒܥܝܢ̈ܝܟ ܘܠܬܡܢ ܠܐ ܬܥܒܪ .

⁵ ܘܡܝܬ ܬܡܢ ܡܘܫܐ ܥܒܕܗ ܕܡܪܝܐ ܒܐܪܥܐ ܕܡܘܐܒ. ܒܡܠܬ ܦܘܡܗ ܕܡܪܝܐ.

⁶ ܘܩܒܪܗ ܒܢܚܠܐ ܒܐܪܥܐ ܕܡܘܐܒ . ܠܘܩܒܠ ܒܝܬ ܦܥܘܪ. ܘܠܐ ܝܕܥ ܐܢܫ ܩܒܪܗ ܥܕܡܐ ܠܝܘܡܢܐ.

⁷ ܘܡܘܫܐ ܒܪ ܡܐܐ ܗܘܐ ܘܥܣܪ̈ܝܢ ܫ̈ܢܝܢ ܟܕ ܡܝܬ. ܠܐ ܝܩܪܬ ܥܝܢܗ. ܘܠܐ ܐܬܩܡܛܘ ܦܟ̈ܘܗܝ.

⁸ ܘܒܟܐܘܗܝ ܒܢ̈ܝ ܐܝܣܪܐܝܠ ܠܡܘܫܐ ܒܥܪܒܘܬ ܡܘܐܒ ܬܠܬܝܢ ܝܘܡ̈ܝܢ. ܘܫܠܡܘ ܝܘܡ̈ܝ ܒܟܬܐ ܕܐܒܠܗ ܕܡܘܫܐ.

⁹ ܘܝܫܘܥ ܒܪܢܘܢ ܐܬܡܠܝ ܪܘܚܐ ܕܚܟܡܬܐ. ܡܛܘܠ ܕܣܡ ܡܘܫܐ ܐ̈ܝܕܘܗܝ ܥܠܘܗܝ. ܘܫ̇ܡܥܝܢ ܗܘܘ ܠܗ ܒܢ̈ܝ ܐܝܣܪܐܝܠ. ܘܥ̇ܒܕܝܢ ܐܝܟ ܕܦܩܕ ܡܪܝܐ ܠܡܘܫܐ.

¹⁰ ܘܬܘܒ ܠܐ ܩܡ ܢܒܝܐ ܒܐܝܣܪܐܝܠ ܐܝܟ ܡܘܫܐ . ܕܝܕܥܗ ܡܪܝܐ ܐ̈ܦܝܢ ܠܘܩܒܠ ܐ̈ܦܝܢ.

¹¹ ܘܟܠܗܝܢ ܐ̈ܬܘܬܐ ܘܬܕܡܪ̈ܬܐ ܕܫܕܪܗ ܡܪܝܐ ܠܡܥܒܕ ܒܐܪܥܐ ܕܡܨܪܝܢ. ܠܦܪܥܘܢ ܘܠܟܠܗܘܢ ܥܒ̈ܕܘܗܝ ܘܠܟܘܠܗ̇ ܐܪܥܗ.

¹² ܘܠܟܠܗ̇ ܐܝܕܐ ܥܫܝܢܬܐ. ܘܠܟܠܗ ܚܙܘܐ ܪܒܐ ܕܥܒܕ ܡܘܫܐ ܠܥܝܢ ܟܠܗ ܐܝܣܪܐܝܠ.