Numeri ܡܢܝܢܐ 22

¹ ܘܰܫܩܰܠܘ ܒܢܰܝ̈ ܝܺܣܪܳܐܶܝܠ. ܘܰܫܪܰܘ ܒܥܰܪܒܽܘܬ ܡܽܘܐܳܒ ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ.

² ܢܒܺܝܽܘܬܶܗ ܕܒܶܠܥܰܡ. ܘܰܚܙܳܐ ܒܳܠܳܩ ܒܰܪ ܨܶܦܽܘܪ. ܟܽܠ ܕܰܥܒܰܕ ܝܺܣܪܳܐܶܝܠ ܠܳܐܡܽܘܖ̈ܳܝܶܐ.

³ ܘܰܕܚܶܠܘ ܡܽܘܐܳܒܳܝ̈ܶܐ ܡܶܢ ܩܕܳܡ ܥܰܡܳܐ ܛܳܒ. ܡܶܛܽܠ ܕܣܰܓܺܝ ܗܘܳܐ ܛܳܒ. ܘܥܳܩܰܬ ܠܗܽܘܢ ܠܡܽܘܐܳܒܳܝ̈ܶܐ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ.

⁴ ܘܶܐܡܰܪ ܡܽܘܐܳܒ ܠܣܳܒ̈ܶܐ ܕܡܶܕܝܰܢ. ܡܶܟܺܝܠ ܪܳܥܶܝܢ ܟܶܢܫܳܐ ܗܳܢܳܐ ܠܟܽܠܗܽܘܢ ܕܰܚܕܳܪܰܝܢ ܐܰܝܟ ܕܪܳܥܶܐ ܬܰܘܪܳܐ ܠܝܽܘܪܳܩܳܐ ܕܚܰܩܠܳܐ. ܘܒܳܠܳܩ ܗܘܳܐ ܒܰܪ ܨܶܦܽܘܪ ܡܰܠܟܳܐ ܕܡܽܘܐܳܒܳܝ̈ܶܐ ܒܙܰܒܢܳܐ ܗܰܘ.

⁵ ܘܫܰܕܰܪ ܐܺܝܙܓܰܕ̈ܶܐ ܠܘܳܬ ܒܶܠܥܰܡ ܒܰܪ ܒܥܽܘܪ ܦܳܫܽܘܪܳܐ ܕܥܰܠ ܢܰܗܪܳܐ. ܠܰܐܪܥܳܐ ܕܰܒܢܰܝ̈ ܥܰܡܽܘܢ ܠܡܶܩܪܝܶܗ. ܘܰܠܡܺܐܡܰܪ ܠܶܗ. ܗܳܐ ܥܰܡܳܐ ܢܦܰܩ ܡܶܢ ܡܶܨܪܶܝܢ. ܘܟܰܣܺܝ ܐܰܦܶܝ̈ܗ̇ ܕܰܐܪܥܳܐ. ܘܗܳܐ ܫܪܶܝܢ ܠܽܘܩܒܰܠܝ.

⁶ ܡܶܟܺܝܠ ܬܳܐ ܠܽܘܛܳܝܗܝ ܠܺܝ ܠܥܰܡܳܐ ܗܳܢܳܐ. ܡܶܛܽܠ ܕܥܰܫܺܝܢ ܗܽܘ ܡܶܢܝ. ܟܒܰܪ ܢܶܫܟܰܚ ܢܶܚܪܽܘܒ ܡܶܢܶܗ. ܘܢܰܘܒܕܺܝܘܗܝ ܡܶܢ ܐܰܪܥܳܐ. ܡܶܛܽܠ ܕܝܳܕܰܥ ܐ̱ܢܳܐ ܕܰܠܡܰܢ ܕܰܡܒܰܪܶܟ ܐܰܢ̱ܬ ܒܪܺܝܟ ܗ̱ܘ. ܘܰܠܡܰܢ ܕܠܳܐܶܛ ܐܰܢ̱ܬ ܠܺܝܛ ܗܽܘ.

⁷ ܘܶܐܙܰܠܘ ܣܳܒ̈ܶܐ ܕܡܽܘܐܳܒ ܘܣܳܒ̈ܶܐ ܕܡܶܕܶܝܢ. ܘܩܶܨܡܰܝ̈ܗܽܘܢ ܒܺܐܝܕܰܝ̈ܗܽܘܢ. ܘܶܐܬܰܘ ܠܘܳܬ ܒܶܠܥܰܡ. ܘܶܐܡܰܪܘ ܠܶܗ ܡܶܠܰܘ̈ܗܝ ܕܒܳܠܳܩ.

⁸ ܘܶܐܡܰܪ ܠܗܽܘܢ. ܒܽܘܬܘ ܗܳܪܟܳܐ ܒܠܺܠܝܳܐ. ܘܶܐܬܶܠ ܠܟܽܘܢ ܦܶܬܓܳܡܳܐ ܐܰܝܟ ܕܳܐܡܰܪ ܠܺܝ ܡܳܪܝܳܐ. ܘܦܳܫܘ ܪܰܘܖ̈ܒܳܢܶܐ ܕܡܽܘܐܳܒ ܠܘܳܬ ܒܶܠܥܰܡ.

⁹ ܘܶܐܬܳܐ ܐܰ‌ܠܳܗܳܐ ܥܰܠ ܒܶܠܥܰܡ. ܘܶܐܡܰܪ ܠܶܗ. ܡܰܢ ܐܶܢܽܘܢ ܗܳܠܶܝܢ ܓܰܒܖ̈ܶܐ ܕܥܰܡܳܟ.

¹⁰ ܘܶܐܡܰܪ ܒܶܠܥܰܡ ܠܰܐܠܳܗܳܐ. ܒܳܠܳܩ ܒܰܪ ܨܶܦܽܘܪ ܡܰܠܟܳܐ ܕܡܽܘܐܳܒ ܫܰܕܰܪ ܥܠܰܝ. ܘܶܐܡܰܪ ܠܺܝ.

¹¹ ܗܳܐ ܥܰܡܳܐ ܢܦܰܩ ܡܶܢ ܡܶܨܪܶܝܢ. ܘܟܰܣܺܝ ܐܰܦܶܝ̈ܗ̇ ܕܰܐܪܥܳܐ. ܗܳܫܳܐ ܬܳܐ ܠܽܘܛܳܝܗܝ ܠܺܝ. ܟܒܰܪ ܐܶܫܟܰܚ ܠܡܶܬܟܰܬܳܫܽܘ ܥܰܡܶܗ ܘܰܐܘܒܕܺܝܘܗܝ.

¹² ܘܶܐܡܰܪ ܐܰ‌ܠܳܗܳܐ ܠܒܶܠܥܰܡ ܠܳܐ ܬܺܐܙܰܠ ܥܰܡܗܽܘܢ. ܘܠܳܐ ܬܠܽܘܛܺܝܘܗܝ ܠܥܰܡܳܐ ܡܶܛܽܠ ܕܰܒܪܺܝܟ ܗ̱ܘ.

¹³ ܘܩܳܡ ܒܶܠܥܰܡ ܒܨܰܦܪܳܐ. ܘܶܐܡܰܪ ܠܪܰܘܖ̈ܒܳܢܶܐ ܕܒܳܠܳܩ. ܙܶܠܘ ܠܰܐܪܥܟܽܘܢ. ܡܶܛܽܠ ܕܠܳܐ ܨܒܳܐ ܡܳܪܝܳܐ ܠܡܶܫܒܩܰܢܝ ܕܺܐܙܰܠ ܥܰܡܟܽܘܢ.

¹⁴ ܘܩ̣ܳܡܘ ܪܰܘܖ̈ܒܳܢܶܐ ܕܡܽܘܐܳܒ ܘܶܐܬܰܘ ܠܘܳܬ ܒܳܠܳܩ. ܘܳܐܡܪܺܝܢ ܠܶܗ. ܠܳܐ ܨܒܳܐ ܒܶܠܥܰܡ ܠܡܶܐܬܳܐ ܥܰܡܰܢ.

¹⁵ ܘܰܗܦܰܟ ܬܽܘܒ ܒܳܠܳܩ. ܘܫܰܕܰܪ ܐܺܝܙܓܰܕ̈ܶܐ ܕܪܰܘܪܒܺܝܢ ܘܝܰܩܺܝܪܺܝܢ ܡܶܢ ܗܳܠܶܝܢ.

¹⁶ ܘܶܐܬܰܘ ܠܘܳܬ ܒܶܠܥܰܡ. ܘܶܐܡܰܪܘ ܠܶܗ. ܗܳܟܰܢܳܐ ܐܳܡܰܪ ܒܳܠܳܩ ܒܰܪ ܨܶܦܽܘܪ. ܠܳܐ ܬܶܬܟܠܶܐ ܠܡܶܐܬܳܐ ܠܘܳܬܝ.

¹⁷ ܡܶܛܽܠ ܕܰܡܝܰܩܪܽܘ ܐܶܝܰܩܪܳܟ ܛܳܒ. ܘܟܽܠ ܕܬܺܐܡܰܪ ܠܺܝ ܐܶܥܒܶܕ. ܘܬܰܐ ܠܽܘܛ ܠܺܝ ܠܥܰܡܳܐ ܗܳܢܳܐ.

¹⁸ ܘܰܥܢܳܐ ܒܶܠܥܰܡ ܘܶܐܡܰܪ ܠܺܐܝܙܓܰܕܰܘ̈ܗܝ ܕܒܳܠܳܩ. ܐܶܢ ܢܶܬܶܠ ܠܺܝ ܒܳܠܳܩ ܡ̇ܠܶܐ̣ ܒܰܝܬܶܗ ܣܺܐܡܳܐ ܐܰܘ ܕܰܗܒܳܐ. ܠܳܐ ܡܶܫܟܰܚ ܐ̱ܢܳܐ ܕܶܐܥܒܰܪ ܥܰܠ ܡܶܠܰܬ ܦܽܘܡܶܗ ܕܡܳܪܝܳܐ ܐܰܠܳܗܝ. ܠܳܐ ܥܰܠ ܕܰܙܥܽܘܪܝܳܐ ܘܠܳܐ ܥܰܠ ܕܪܰܒܳܐ.

¹⁹ ܡܶܟܺܝܠ ܦܽܘܫܘ ܐܳܦ ܐܰܢ̱ܬܽܘܢ ܗܳܪܟܳܐ ܒܠܺܠܝܳܐ. ܘܶܐܕܰܥ ܡܳܢܳܐ ܡܰܘܣܶܦ ܠܰܡܡܰܠܳܠܽܘ ܥܰܡܝ.

²⁰ ܘܶܐܬܳܐ ܐܰ‌ܠܳܗܳܐ ܥܰܠ ܒܶܠܥܰܡ ܒܠܺܠܝܳܐ. ܘܶܐܡܰܪ ܠܶܗ. ܐܶܢ ܠܡܶܩܪܝܳܟ ܐܶܬܰܘ ܓܰܒܖ̈ܶܐ ܗܳܠܶܝܢ. ܩܽܘܡ ܙܶܠ ܥܰܡܗܽܘܢ. ܒܰܠܚܽܘܕ ܦܶܬܓܳܡܳܐ ܕܳܐܡܰܪ ܐ̱ܢܳܐ ܠܳܟ. ܗܰܘ ܥܒܶܕ.

²¹ ܘܩ̣ܳܡ ܒܶܠܥܰܡ ܒܨܰܦܪܳܐ. ܘܰܐܪܡܺܝ ܥܰܠ ܐܰܬܳܢܶܗ. ܘܶܐܙܰܠ ܥܰܡ ܪܰܘܖ̈ܒܳܢܶܐ ܕܡܽܘܐܳܒ.

²² ܘܶܐܬܚܰܡܰܬ ܪܽܘܓܙܶܗ ܕܰܐ‌ܠܳܗܳܐ ܥܠܰܘܗܝ ܥܰܠ ܕܶܐܙܰܠ. ܘܩܳܡ ܡܰܠܰܐܟܶܗ ܕܡܳܪܝܳܐ ܒܽܐܘܪܚܳܐ ܕܢܶܗܘܶܐ ܠܶܗ ܣܳܛܳܢܳܐ. ܘܗܽܘ ܪܟܺܝܒ ܥܰܠ ܚܡܳܪܶܗ. ܘܬܪܶܝܢ ܥܠܰܝ̈ܡܰܘܗܝ ܥܰܡܶܗ.

²³ ܘܰܚܙܳܬ ܐܰܬܳܢܳܐ ܠܡܰܠܰܐܟܶܗ ܕܡܳܪܝܳܐ ܕܩܳܐܶܡ ܒܽܐܘܪܚܳܐ. ܘܣܰܝܦܶܗ ܫܡܺܝܛ ܘܰܐܚܺܝܕ ܒܺܐܝܕܶܗ. ܘܰܣܛܬ ܐܰܬܳܢܳܐ ܡܶܢ ܐܽܘܪܚܳܐ ܘܶܐܙܰܠܬ ܒܚܰܩܠܳܐ. ܘܰܡܚܳܐ ܒܶܠܥܰܡ ܠܰܐܬܳܢܳܐ ܠܡܰܣܛܳܝܽܘܬܳܗ̇ ܠܽܐܘܪܚܳܐ.

²⁴ ܘܩ̣ܳܡ ܡܰܠܰܐܟܶܗ ܕܡܳܪܝܳܐ ܒܰܫܒܺܝܠܳܐ ܕܟܰܪܡܳܐ. ܕܰܣܝܳܓܳܐ ܡܶܟܳܐ. ܘܰܣܝܳܓܳܐ ܡܶܟܳܐ.

²⁵ ܘܰܚܙܳܬ ܐܰܬܳܢܳܐ ܠܡܰܠܰܐܟܶܗ ܕܡܳܪܝܳܐ. ܘܶܐܬܚܰܒܨܰܬ ܒܶܐܣܬܳܐ. ܘܰܚܒܰܨܬܳܗ̇ ܪܶܓܠܶܗ ܕܒܶܠܥܰܡ ܒܶܐܣܬܳܐ. ܘܰܐܘܣܶܦ ܬܽܘܒ ܠܡܶܡܚܝܳܗ̇.

²⁶ ܘܰܐܘܣܶܦ ܡܰܠܰܐܟܶܗ ܕܡܳܪܝܳܐ. ܘܰܥܒܰܪ ܘܩ̣ܳܡ ܒܰܐܬܪܳܐ ܐܰܠܺܝܨܳܐ. ܐܰܬܰܪ ܕܠܰܝܬ ܐܽܘܪܚܳܐ ܠܡܶܣܛܳܐ. ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ.

²⁷ ܘܰܚܙܳܬ ܐܰܬܳܢܳܐ ܠܡܰܠܰܐܟܶܗ ܕܡܳܪܝܳܐ. ܘܪܶܒܥܰܬ ܬܚܶܝܬ ܒܶܠܥܰܡ. ܘܶܐܬܚܰܡܰܬ ܪܽܘܓܙܶܗ ܕܒܶܠܥܰܡ. ܘܰܡ̣ܚܳܗ̇ ܠܰܐܬܳܢܳܐ ܒܚܽܘܛܪܳܐ.

²⁸ ܘܰܦܬܰܚ ܡܳܪܝܳܐ ܦܽܘܡܳܗ̇ ܕܰܐܬܳܢܳܐ. ܘܶܐܡܪܰܬ ܠܒܶܠܥܰܡ. ܡܳܢܳܐ ܥܶܒ̣ܕܶܬ ܠܳܟ ܕܰܡܚܰܝܬܳܢܝ ܗܳܐ ܬܠܳܬ ܙܰܒܢܺܝ̈ܢ.

²⁹ ܘܶܐܡܰܪ ܒܶܠܥܰܡ ܠܰܐܬܳܢܳܐ. ܥܰܠ ܕܒܰܙܰܚܬܝ ܒܺܝ. ܘܶܐܠܽܘ ܐܺܝܬ ܗܘܳܐ ܣܰܝܦܳܐ ܒܺܐܝܕܰܝ̈ ܗܳܫܳܐ ܩܳܛܶܠ ܗܘܺܝܬ ܠܶܟܝ.

³⁰ ܘܶܐܡܪܰܬ ܐܰܬܳܢܳܐ ܠܒܶܠܥܰܡ. ܠܳܐ ܗܘܺܝܬ ܐܶܢܳܐ ܐܰܬܳܢܳܟ. ܕܰܪܟܺܝܒ ܐܰܢ̱ܬ ܥܠܰܝ ܡܶܢ ܛܰܠܝܽܘܬܳܟ ܘܰܥܕܰܡܳܐ ܠܝܰܘܡܳܢܳܐ. ܕܰܠܡܳܐ ܡܶܢ ܡܬܽܘܡ ܥ̣ܶܒܕܶܬ ܠܳܟ ܗܳܟܰܢܳܐ. ܐܳܡܰܪ ܠܳܗ̇. ܠܳܐ.

³¹ ܘܰܓܠܳܐ ܡܳܪܝܳܐ ܥܰܝܢܰܘ̈ܗܝ ܕܒܶܠܥܰܡ. ܘܰܚܙܳܐ ܠܡܰܠܰܐܟܶܗ ܕܡܳܪܝܳܐ ܩܳܐܶܡ ܒܽܐܘܪܚܳܐ. ܘܣܰܝܦܶܗ ܫܡܺܝܛ ܘܰܐܚܺܝܕ ܒܺܐܝܕܶܗ. ܘܰܩܥܶܕ ܘܰܣܓܶܕ ܥܰܠ ܐܰܦܰܘ̈ܗܝ.

³² ܘܶܐܡܰܪ ܠܶܗ ܡܰܠܰܐܟܶܗ ܕܡܳܪܝܳܐ. ܠܡܳܢܳܐ ܡܚܰܝܬ ܐܰܬܳܢܳܟ ܗܳܐ ܬܠܳܬ ܙܰܒܢܺܝ̈ܢ. ܗܳܐ ܐܶܢܳܐ ܢܶܦܩܶ݀ܬ ܕܶܐܗܘܶܐ ܠܳܟ ܣܳܛܳܢܳܐ. ܥܰܠ ܕܰܬܪܰܨܬ ܐܽܘܪܚܳܐ ܠܽܘܩܒܰܠܝ.

³³ ܘܰܚܙܳܬܰܢܝ ܐܰܬܳܢܳܐ ܘܰܣܛܳܬ ܡܶܢ ܩܕܳܡܰܝ ܗܳܐ ܬܠܳܬ ܙܰܒܢܺܝ̈ܢ. ܐܶܠܽܘܠܳܐ ܣܛܳܬ ܡܶܢ ܩܕܳܡܰܝ. ܗܳܫܳܐ ܠܳܟ ܩܳܛܶܠ ܗܘܺܝ݀ܬ. ܘܠܳܗ̇ ܡܰܚܶܐ ܗܘܺܝ݀ܬ.

³⁴ ܘܶܐܡܰܪ ܒܶܠܥܰܡ ܠܡܰܠܰܐܟܶܗ ܕܡܳܪܝܳܐ. ܚܛܺܝܬ. ܠܳܐ ܝܳܕܰܥ ܗܘܺܝ݀ܬ ܕܰܐܢ̱ܬ ܩܳܐܶܡ ܠܽܘܩܒܰܠܝ ܒܽܐܘܪܚܳܐ. ܗܳܫܳܐ ܐܶܢ ܒܺܝܫ ܒܥܰܝܢܰܝ̈ܟ ܐܶܗܦܽܘܟ ܠܺܝ.

³⁵ ܘܶܐܡܰܪ ܡܰܠܰܐܟܶܗ ܕܡܳܪܝܳܐ ܠܒܶܠܥܰܡ. ܙܶܠ ܥܰܡ ܓܰܒܖ̈ܶܐ ܒܰܠܚܽܘܕ ܦܶܬܓܳܡܳܐ ܕܳܐܡܰܪ ܐ̱ܢܳܐ ܠܳܟ ܗܰܘ ܥܒܶܕ. ܘܶܐܙܰܠ ܒܶܠܥܰܡ ܥܰܡ ܪܰܘܖ̈ܒܳܢܶܐ ܕܒܳܠܳܩ.

³⁶ ܘܰܫ̣ܡܰܥ ܒܳܠܳܩ ܕܶܐܬܳܐ ܒܶܠܥܰܡ. ܘܰܢܦܰܩ ܠܽܐܘܪܥܶܗ ܠܰܩܪܺܝܬܳܐ ܕܡܽܘܐܳܒ. ܕܒܰܬܚܽܘܡܳܐ ܕܰܐܪܢܽܘܢ ܕܒܰܣܦܳܖ̈ܰܝ ܬܚܽܘܡܳܐ.

³⁷ ܘܶܐܡܰܪ ܒܳܠܳܩ ܠܒܶܠܥܰܡ. ܗܳܐ ܫܰܕܪܶܬ ܥܠܰܝܟ ܠܡܶܩܪܝܳܟ. ܐܰܝܟܰܘ ܠܳܐ ܐܶܬܰܝܬ ܠܘܳܬܝ. ܟܒܰܪ ܐܳܡܰܪ ܗܘܰܝܬ ܕܠܳܐ ܡܨܶܐ ܐ̱ܢܳܐ ܒܚܰܝܠܳܐ ܠܰܡܝܰܩܳܪܽܘܬܳܟ.

³⁸ ܘܶܐܡܰܪ ܒܶܠܥܰܡ ܠܒܳܠܳܩ. ܗܳܐ ܐܶܬܺܝܬ ܠܘܳܬܳܟ. ܗܳܫܳܐ ܕܰܠܡܳܐ ܡܶܫܟܳܚܽܘ ܡܶܫܟܰܚ ܐ̱ܢܳܐ ܕܺܐܡܰܪ ܡܶܕܶܡ. ܐܶܠܳܐ ܗܰܘ ܦܶܬܓܳܡܳܐ ܕܣܳܐܶܡ ܐܰ‌ܠܳܗܳܐ ܒܦܽܘܡܝ. ܗܰܘ ܗܽܘ ܐܳܡܰܪ ܐ̱ܢܳܐ.

³⁹ ܘܶܐܙܰܠ ܒܶܠܥܰܡ ܥܰܡ ܒܳܠܳܩ. ܘܰܐܥܠܶܗ ܠܩܽܘܪܝܰܬ ܚܶܨܪܽܘܬ.

⁴⁰ ܘܰܢܟܰܣ ܒܳܠܳܩ ܬܰܘܖ̈ܶܐ ܘܥܳܢ̈ܳܐ. ܘܫܰܕܰܪ ܠܒܶܠܥܰܡ ܘܰܠܪܰܘܖ̈ܒܳܢܶܐ ܕܥܰܡܶܗ.

⁴¹ ܘܟܰܕ ܗܘܳܐ ܨܰܦܪܳܐ. ܕܒܰܪ ܒܳܠܳܩ ܠܒܶܠܥܰܡ. ܘܰܐܣܩܶܗ ܠܒܶܡܽܘܬ ܒܰܥܠܳܐ. ܘܰܚܙܳܐ ܡܶܢ ܬܰܡܳܢ ܣܳܟܶܗ ܕܥܰܡܳܐ.