Giudici ܕܝ̈ܢܐ 11

¹ ܘܢܰܦܬܰܚ ܓܶܠܥܕܳܝܳܐ ܓܰܢ̱ܒܳܪ ܗܘܳܐ ܚܰܝܠܶܗ. ܘܗܽܘ ܒܰܪ ܐܰܢ̱ܬܬܳܐ ܗܘܳܐ ܙܳܢܺܝܬܳܐ. ܘܰܐܘܠܶܕ ܓܶܠܥܳܕ ܠܢܰܦܬܰܚ.

² ܘܝܶܠܕܰܬ ܐܰܢ̱ܬܬܶܗ ܕܓܶܠܥܳܕ ܠܶܗ ܒܢܰܝ̈ܳܐ. ܘܰܪܒܰܘ ܒܢܶܝ̈ܗ̇ ܕܰܐܢ̱ܬܬܳܐ ܘܛܰܪܕܽܘܗܝ ܠܢܰܦܬܰܚ. ܘܳܐܡܪܺܝܢ ܠܳܐ ܢܺܐܪܰܬ ܒܶܝܬ ܐܰܒܽܘܢ. ܡܶܛܽܠ ܕܒܰܪ ܐܰܢ̱ܬܬܳܐ ܗܽܘ ܐ̱ܚܪܺܬܳܐ.

³ ܘܰܥܪܰܩ ܢܰܦܬܰܚ ܡܶܢ ܩܕܳܡ ܐܰܚܰܘ̈ܗܝ. ܘܺܝܬܶܒ ܒܰܐܪܥܳܐ ܛܳܒܬܳܐ. ܘܶܐܬܠܰܩܛܘ ܠܘܳܬ ܢܰܦܬܰܚ ܐ̱ܢܳܫ̈ܳܐ ܣܖ̈ܺܝܩܶܐ. ܘܰܢܦܰܩܘ ܥܰܡܶܗ.

⁴ ܘܰܗܘܳܐ ܡܶܢ ܒܳܬܰܪ ܝܰܘ̈ܡܳܬܳܐ. ܐܶܬܟܰܬܰܫܘ ܒܢܰܝ̈ ܥܰܡܽܘܢ ܥܰܡ ܝܺܣܪܳܐܶܝܠ.

⁵ ܘܟܰܕ ܐܶܬܟܰܬܰܫܘ ܒܢܰܝ̈ ܥܰܡܽܘܢ ܥܰܡ ܒܢܰܝ̈ ܝܺܣܪܳܐܶܝܠ. ܐܶܙܰܠܘ ܩܰܫܺܝ̈ܫܶܐ ܕܓܶܠܥܳܕ ܠܡܶܕܒܪܶܗ ܠܢܰܦܬܰܚ ܡܶܢ ܐܰܪܥܳܐ ܛܳܒܬܳܐ.

⁶ ܘܶܐܡܰܪܘ ܠܢܰܦܬܰܚ. ܬܳܐ ܗܘܺܝ ܠܰܢ ܪܺܝܫܐ. ܘܢܶܬܟܰܬܰܫ ܥܰܡ ܒܢܰܝ̈ ܥܰܡܽܘܢ.

⁷ ܘܶܐܡܰܪ ܢܰܦܬܰܚ ܠܩܰܫܺܝ̈ܫܶܐ ܕܓܶܠܥܳܕ. ܠܳܐ ܐܰܢ̱ܬܽܘܢ ܣܢܰܝܬܽܘܢܳܢܝ ܘܰܛܪܰܕܬܽܘܢܳܢܝ ܡܶܢ ܒܶܝܬ ܐܳܒܝ. ܘܗܳܫܳܐ ܡܳܢܳܐ ܐܶܬܰܝܬܽܘܢ ܠܘܳܬܝ ܟܰܕ ܥܳܩܰܬ ܠܟܽܘܢ.

⁸ ܘܶܐܡܰܪܘ ܠܶܗ ܩܰܫܺܝ̈ܫܶܐ ܕܓܶܠܥܳܕ ܠܢܰܦܬܰܚ. ܡܶܛܽܠ ܗܳܢܳܐ ܗܳܫܳܐ ܗܳܐ ܐܶܬܰܝܢ ܠܘܳܬܳܟ. ܙܶܠ ܥܰܡܰܢ ܘܢܶܬܟܰܬܰܫ ܥܰܡ ܒܢܰܝ̈ ܥܰܡܽܘܢ. ܘܰܗܘܺܝ ܪܺܝܫܳܐ ܠܟܽܠ ܝܳܬܒܰܝ̈ ܓܶܠܥܳܕ.

⁹ ܘܶܐܡܰܪ ܢܰܦܬܰܚ ܠܩܰܫܺܝ̈ܫܶܐ ܕܓܶܠܥܳܕ. ܐܶܢ ܡܰܗܦܟܺܝܢ ܐ̱ܢܬܽܘܢ ܠܺܝ ܕܶܐܬܟܰܬܰܫ ܥܰܡ ܒܢܰܝ̈ ܥܰܡܽܘܢ. ܘܡܰܫܠܶܡ ܠܗܽܘܢ ܡܳܪܝܳܐ ܩܕܳܡܰܝ. ܐܶܢܳܐ ܐܶܗܘܶܐ ܠܟܽܘܢ ܪܺܝܫܳܐ.

¹⁰ ܘܶܐܡܰܪܘ ܠܶܗ ܩܰܫܺܝ̈ܫܶܐ ܕܓܶܠܥܳܕ. ܡܳܪܝܳܐ ܢܶܗܘܶܐ ܫܳܡܽܘܥܳܐ ܒܰܝܢܳܬܰܢ. ܐܶܠܳܐ ܐܰܝܟ ܡܶܠܬܳܟ ܗܳܟܰܢܳܐ ܢܶܥܒܶܕ.

¹¹ ܘܶܐܙܰܠ ܢܰܦܬܰܚ ܥܰܡ ܩܰܫܺܝ̈ܫܶܐ ܕܓܶܠܥܳܕ. ܘܰܐܩܺܝܡܽܘܗܝ ܥܠܰܝܗܽܘܢ ܪܺܝܫܳܐ ܘܫܰܠܺܝܛܳܐ. ܘܶܐܡܰܪ ܢܰܦܬܰܚ ܟܽܠܗܶܝܢ ܡܶܠܰܘ̈ܗܝ ܩܕܳܡ ܡܳܪܝܳܐ ܒܡܰܨܦܝܳܐ.

¹² ܘܫܰܕܰܪ ܢܰܦܬܰܚ ܐܺܝܙܓܰܕ̈ܶܐ ܠܘܳܬ ܡܰܠܟܳܐ ܕܰܒܢܰܝ̈ ܥܰܡܽܘܢ ܠܡܺܐܡܰܪ ܠܶܗ. ܡܳܐ ܠܺܝ ܘܠܳܟ ܕܶܐܬܰܝܬ ܠܡܶܬܟܰܬܳܫܽܘ ܒܰܐܪܥܝ.

¹³ ܘܶܐܡܰܪ ܡܰܠܟܳܐ ܕܰܒܢܰܝ̈ ܥܰܡܽܘܢ ܠܺܐܝܙܓܰܕܰܘ̈ܗܝ ܕܢܰܦܬܰܚ. ܡܶܛܽܠ ܕܰܢܣܰܒܘ ܗܘܰܘ ܒܢܰܝ̈ ܝܺܣܪܳܐܶܝܠ ܐܰܪܥܝ. ܟܰܕ ܣܳܠܩܺܝܢ ܗܘܰܘ ܡܶܢ ܐܰܪܥܳܐ ܕܡܶܨܪܶܝܢ. ܡܶܢ ܐܰܪܢܽܘܢ ܘܰܥܕܰܡܳܐ ܠܳܐܒܳܩ. ܘܰܥܕܰܡܳܐ ܠܝܽܘܪܕܢܳܢ. ܗܳܫܳܐ ܦܰܢܳܐ ܐܶܢܶܝܢ ܠܺܝ ܒܰܫܠܳܡܳܐ.

¹⁴ ܘܰܗܦܰܟ ܬܽܘܒ ܢܰܦܬܰܚ. ܘܫܰܕܰܪ ܐܶܓܖ̈ܳܬܳܐ ܘܺܐܝܙܓܰܕ̈ܶܐ ܠܘܳܬ ܡܰܠܟܳܐ ܕܰܒܢܰܝ̈ ܥܰܡܽܘܢ.

¹⁵ ܘܶܐܡܰܪ ܠܶܗ. ܗܳܟܰܢܳܐ ܐܳܡܰܪ ܢܰܦܬܰܚ. ܠܳܐ ܢܣܰܒ ܝܺܣܪܳܐܶܝܠ ܐܰܪܥܳܐ ܕܡܽܘܐܳܒ. ܘܰܐܪܥܳܐ ܕܰܒܢܰܝ̈ ܥܰܡܽܘܢ.

¹⁶ ܡܶܛܽܠ ܕܟܰܕ ܣܳܠܩܺܝܢ ܗܘܰܘ ܡܶܢ ܡܶܨܪܶܝܢ. ܗܰܠܶܟܘ ܗܘܰܘ ܒܢܰܝ̈ ܝܺܣܪܳܐܶܝܠ ܒܡܰܕܒܪܳܐ. ܥܕܰܡܳܐ ܠܝܰܡܳܐ ܕܣܽܘܦ. ܘܡܰܛܺܝܘ ܠܰܪܩܶܡ.

¹⁷ ܘܫܰܕܰܪ ܗܘܳܐ ܝܺܣܪܳܐܶܝܠ ܐܺܝܙܓܰܕ̈ܶܐ ܠܘܳܬ ܡܰܠܟܳܐ ܕܰܐܕܽܘܡ. ܠܡܺܐܡܰܪ ܠܶܗ. ܢܶܥܒܰܪ ܒܰܐܪܥܳܟ. ܘܠܳܐ ܫ̣ܡܰܥ ܡܰܠܟܳܐ ܕܰܐܕܽܘܡ. ܘܳܐܦ ܠܡܰܠܟܳܐ ܕܡܽܘܐܳܒ ܫܠܰܚ ܘܠܳܐ ܐܶܬܛܦܺܝܣ ܠܶܗ. ܘܺܝܬܶܒ ܝܺܣܪܳܐܶܝܠ ܒܰܪܩܶܡ.

¹⁸ ܘܗܰܠܶܟ ܒܡܰܕܒܪܳܐ. ܘܶܐܬܟܪܶܟ ܐܰܪܥܳܐ ܕܰܐܕܽܘܡ. ܘܰܐܪܥܳܐ ܕܡܽܘܐܳܒ. ܘܰܫܪܰܘ ܒܥܶܒܪܳܐ ܕܰܐܪܢܽܘܢ. ܘܠܳܐ ܥ̣ܰܠܘ ܒܰܬܚܽܘܡܳܐ ܕܡܽܘܐܳܒ. ܡܶܛܽܠ ܕܰܐܪܢܽܘܢ ܬܚܽܘܡܳܐ ܗܘܳܐ ܕܡܽܘܐܳܒ.

¹⁹ ܘܫܰܕܰܪ ܗܘܳܐ ܝܺܣܪܳܐܶܝܠ ܐܺܝܙܓܰܕ̈ܶܐ ܠܘܳܬ ܣܺܝܚܽܘܢ ܡܰܠܟܳܐ ܕܳܐܡܽܘܖ̈ܳܝܶܐ. ܘܡܰܠܟܳܐ ܕܚܶܫܒܽܘܢ. ܘܶܐܡܰܪ ܠܶܗ ܝܺܣܪܳܐܶܝܠ. ܢܶܥܒܰܪ ܒܰܐܪܥܳܟ ܥܕܰܡܳܐ ܠܰܐܪܥܝ.

²⁰ ܘܠܳܐ ܗܰܝܡܶܢ ܣܺܝܚܽܘܢ ܠܺܝܣܪܳܐܶܝܠ ܕܢܶܥܒܰܪ ܒܰܬܚܽܘܡܶܗ. ܘܟܰܢܶܫ ܣܺܝܚܽܘܢ ܠܟܽܠܶܗ ܥܰܡܶܗ. ܘܰܫܪܰܘ ܒܝܳܗܳܨ. ܘܶܐܬܟܰܬܰܫ ܥܰܡ ܝܺܣܪܳܐܶܝܠ.

²¹ ܘܰܐܫܠܶܡ ܡܳܪܝܳܐ ܐܰܠܳܗܰܢ ܠܣܺܝܚܽܘܢ ܘܰܠܟܽܠܶܗ ܥܰܡܶܗ ܒܺܐܝܕܳܐ ܕܺܝܣܪܳܐܶܝܠ. ܘܰܐܘܒܶܕ ܝܺܣܪܳܐܶܝܠ ܐܰܪܥܳܐ ܕܳܐܡܽܘܖ̈ܳܝܶܐ.

²² ܘܺܝܪܶܬܘ ܟܽܠܶܗ ܬܚܽܘܡܗܽܘܢ. ܡܶܢ ܐܰܪܢܽܘܢ ܘܰܥܕܰܡܳܐ ܠܳܐܒܳܩ. ܘܡܶܢ ܡܰܕܒܪܳܐ ܘܰܥܕܰܡܳܐ ܠܝܽܘܪܕܢܳܢ.

²³ ܘܗܳܫܳܐ ܡܳܪܝܳܐ ܐܰ‌ܠܳܗܳܐ ܐܰܘܒܶܕ ܠܳܐܡܽܘܖ̈ܳܝܶܐ ܡܶܢ ܩܕܳܡ ܥܰܡܶܗ ܝܺܣܪܳܐܶܝܠ. ܘܰܐܢ̱ܬ ܝܳܪܶܬ ܐܰܢ̱ܬ ܠܗܽܘܢ.

²⁴ ܠܳܐ ܗܘܳܐ ܡܶܕܶܡ ܕܰܐܘܪܬܳܟ ܟܳܡܽܘܫ ܐܰܠܳܗܳܟ ܝܳܪܶܬ ܐܰܢ̱ܬ. ܘܡܶܕܶܡ ܕܰܐܘܒܶܕ ܡܳܪܝܳܐ ܐܰܠܳܗܰܢ ܡܶܢ ܩܕܳܡܰܝܢ. ܠܶܗ ܗܽܘ ܝܳܪܬܺܝܢܰܢ.

²⁵ ܗܳܫܳܐ ܡܛܳܒ ܛܳܒ ܐܰܢ̱ܬ ܡܶܢ ܒܳܠܳܩ ܒܰܪ ܨܦܽܘܪ ܡܰܠܟܳܐ ܕܡܽܘܐܳܒ. ܕܰܠܡܳܐ ܡܶܬܚܪܳܝܽܘ ܐܶܬܚܪܺܝ ܗܘܳܐ ܥܰܡ ܝܺܣܪܳܐܶܝܠ. ܐܰܘ ܡܶܬܟܰܬܳܫܽܘ ܐܶܬܟܰܬܰܫ ܗܘܳܐ ܥܰܡܗܽܘܢ.

²⁶ ܟܰܕ ܝܺܬܶܒ ܝܺܣܪܳܐܶܝܠ ܒܚܶܫܒܽܘܢ ܘܰܒܟܰܦܖ̈ܽܘܢܶܝܗ̇. ܘܰܒܥܰܕܽܘܥܺܝܪ ܘܰܒܟܰܦܖ̈ܽܘܢܶܝܗ̇. ܘܰܒܟܽܠܗܽܘܢ ܩܽܘܖ̈ܝܳܐ ܕܥܰܠ ܓܶܢ̱ܒ ܐܰܪܢܽܘܢ ܬܠܳܬܡܳܐܐ ܫܢܺܝ̈ܢ. ܠܡܳܢܳܐ ܠܳܐ ܐܰܥܕܺܝܬܽܘܢ ܐܶܢܶܝܢ ܒܙܰܒܢܳܐ ܗܰܘ.

²⁷ ܐܶܠܳܐ ܐܶܢܳܐ ܗܳܫܳܐ ܠܳܐ ܚܛܺܝܬ ܠܳܟ. ܘܰܐܢ̱ܬ ܥܳܒܶܕ ܐܰܢ̱ܬ ܥܰܡܝ ܒܺܝܫܬܳܐ ܠܡܶܬܟܰܬܳܫܽܘ ܥܰܡܝ. ܢܕܽܘܢ ܡܳܪܝܳܐ ܝܰܘܡܳܢܳܐ ܒܰܝ̈ܢܰܝ ܒܢܰܝ̈ ܝܺܣܪܳܐܶܝܠ. ܘܰܠܒܶܝܬ ܒܢܰܝ̈ ܥܰܡܽܘܢ.

²⁸ ܘܠܳܐ ܫ̣ܡܰܥ ܡܰܠܟܳܐ ܕܰܒܢܰܝ̈ ܥܰܡܽܘܢ ܠܡܶܠܰܘ̈ܗܝ ܕܢܰܦܬܰܚ ܕܰܫ̣ܠܰܚ ܠܶܗ.

²⁹ ܘܰܗܘܳܬ ܥܰܠ ܢܰܦܬܰܚ ܪܽܘܚܶܗ ܕܡܳܪܝܳܐ. ܘܰܥ̣ܒܰܪ ܠܓܶܠܥܳܕ ܘܠܰܡܢܰܫܶܐ. ܘܰܥ̣ܒܰܪ ܠܡܰܨܦܝܳܐ ܕܓܶܠܥܳܕ. ܘܡܶܢ ܡܰܨܦܝܳܐ ܕܓܶܠܥܳܕ ܥ̣ܒܰܪ ܠܰܒܢܰܝ̈ ܥܰܡܽܘܢ.

³⁰ ܘܰܢܕܰܪ ܢܰܦܬܰܚ ܢܶܕܪܳܐ ܠܡܳܪܝܳܐ. ܘܶܐܡܰܪ. ܐܶܢ ܡܰܫܠܳܡܽܘ ܬܰܫܠܶܡ ܠܰܒܢܰܝ̈ ܥܰܡܽܘܢ ܒܺܐܝܕܰܝ̈.

³¹ ܡܰܢ ܕܢܳܦܶܩ ܡܶܢ ܬܰܪܥܳܐ ܕܒܰܝܬܝ ܠܽܐܘܪܥܝ. ܡܳܐ ܕܶܐܬܺܝܬ ܒܰܫܠܳܡܳܐ ܡܶܢ ܒܢܰܝ̈ ܥܰܡܽܘܢ. ܢܶܗܘܶܐ ܠܡܳܪܝܳܐ. ܘܰܐܣܩܺܝܘܗܝ ܠܰܥܠܳܬܳܐ.

³² ܘܰܥܒܰܪ ܢܰܦܬܰܚ ܥܰܠ ܒܢܰܝ̈ ܥܰܡܽܘܢ. ܠܡܶܬܟܰܬܳܫܽܘ ܥܰܡܗܽܘܢ. ܘܰܐܫܠܶܡ ܐܶܢܽܘܢ ܡܳܪܝܳܐ ܒܺܐܝܕܶܗ.

³³ ܘܰܡ̣ܚܳܐ ܐܶܢܽܘܢ ܡܶܢ ܥܰܕܽܘܥܺܝܪ ܘܰܥܕܰܡܳܐ ܠܡܰܥܠܳܢܳܐ ܕܡܳܟܺܝܪ. ܥܶܣܪܺܝܢ ܩܽܘܖ̈ܝܳܐ. ܘܰܥܕܰܡܳܐ ܠܳܐܒܶܠ ܟܰܖ̈ܡܺܝܢ. ܡܚܽܘܬܳܐ ܪܰܒܬܳܐ ܕܛܳܒ. ܘܶܐܬܬܒܰܪܘ ܒܢܰܝ̈ ܥܰܡܽܘܢ ܩܕܳܡ ܒܢܰܝ̈ ܝܺܣܪܳܐܶܝܠ.

³⁴ ܘܶܐܬܳܐ ܢܰܦܬܰܚ ܠܡܰܨܦܝܳܐ ܠܒܰܝܬܶܗ. ܘܗܳܐ ܒܰܪܬܶܗ ܢܶܦܩܰܬ ܠܽܐܘܪܥܶܗ ܒܰܦ̈ܠܰܓܶܐ ܘܒܰܖ̈ܒܺܝܥܶܐ. ܘܗܺܝ ܝܺܚܺܝܕܳܝܬܳܐ ܗܘܳܬ ܠܶܗ. ܘܠܰܝܬ ܗܘܳܐ ܠܶܗ ܒܪܳܐ ܐܰܘ ܒܰܪܬܳܐ ܠܒܰܪ ܡܶܢܳܗ̇.

³⁵ ܘܟܰܕ ܚ̣ܙܳܗ̇ ܨܰܪܺܝ ܠܒܽܘܫܰܘ̈ܗܝ. ܘܶܐܡܰܪ. ܐܽܘܗ̇ ܒܪܰܬܝ ܡܶܣܚܰܦ ܣܚܰܦܬܺܝܢܝ. ܘܰܐܢ̱ܬܝ ܗܘܰܝܬܝ ܝܰܘܡܳܢܳܐ ܡܶܢ ܣܳܚܽܘܦܰܝ̈. ܕܗܳܐ ܐܶܢܳܐ ܦܶܬܚܶܬ ܦܽܘܡܝ ܠܘܳܬ ܐܰ‌ܠܳܗܳܐ. ܘܠܳܐ ܡܶܫܟܰܚ ܐ̱ܢܳܐ ܕܶܐܗܦܽܘܟ.

³⁶ ܘܶܐܡܪܰܬ ܠܶܗ ܒܰܪܬܶܗ. ܐܳܒܝ ܦܬܰܚܬ ܦܽܘܡܳܟ ܠܘܳܬ ܐܰ‌ܠܳܗܳܐ. ܥܒܶܕ ܠܺܝ ܐܰܝܟ ܡܶܕܶܡ ܕܰܢ̣ܦܰܩ ܡܶܢ ܦܽܘܡܳܟ. ܡܶܢ ܒܳܬܰܪ ܕܰܥ̣ܒܰܕ ܠܳܟ ܡܳܪܝܳܐ ܢܩܰܡܬܳܐ ܡܶܢ ܒܥܶܠܕܒܳܒܰܝ̈ܟ ܡܶܢ ܒܢܰܝ̈ ܥܰܡܽܘܢ.

³⁷ ܘܳܐܡܪܳܐ ܠܰܐܒܽܘܗܝ. ܒܰܠܚܽܘܕ ܥܒܶܕ ܠܺܝ ܗܳܕܶܐ. ܐܰܪܦܳܢܝ ܬܪܶܝܢ ܝܰܖ̈ܚܺܝܢ. ܘܺܐܙܰܠ ܐܶܗܰܠܶܟ ܥܰܠ ܛܽܘܖ̈ܶܐ. ܘܶܐܒܟܶܐ ܥܰܠ ܒܬܽܘܠܽܘܬܝ ܐܶܢܳܐ ܘܚܰܒܖ̈ܳܬܝ.

³⁸ ܘܶܐܡܰܪ ܠܳܗ̇ ܙܶܠܝ. ܘܫܰܕܪܳܗ̇ ܬܪܶܝܢ ܝܰܖ̈ܚܺܝܢ. ܘܶܐܙܰܠ̱ܬ ܗܺܝ ܘܚܰܒܖ̈ܳܬܳܗ̇. ܘܰܒ̣ܟܳܬ ܥܰܠ ܒܬܽܘܠܽܘܬܳܗ̇ ܥܰܠ ܛܽܘܖ̈ܶܐ.

³⁹ ܘܡܶܢ ܒܳܬܰܪ ܬܪܶܝܢ ܝܰܖ̈ܚܺܝܢ. ܐܶܬܳܬ ܠܘܳܬ ܐܰܒܽܘܗ̇. ܘܰܥ̣ܒܰܕ ܠܳܗ̇ ܐܰܝܟ ܢܶܕܪܳܐ ܕܰܢܕܰܪ. ܘܗܽܘ ܠܳܐ ܚܰܟܡܳܗ̇ ܓܒܰܪ. ܘܰܗܘܳܬ ܠܳܗ̇ ܐܳܬܳܐ ܒܰܝܢܳܬ ܒܢܰܝ̈ ܝܺܣܪܳܐܶܝܠ.

⁴⁰ ܘܡܶܢ ܥܶܕܳܢ ܠܥܶܕܳܢ. ܐܳܙܳܠ̱̈ܢ ܗܘܰܝ̈ ܒ̈ܢܳܬ ܝܺܣܪܳܐܶܝܠ. ܘܒܳܟ̈ܝܳܢ ܘܳܐܠ̈ܝܳܢ ܥܰܠ ܒܰܪܬܶܗ ܕܢܰܦܬܰܚ ܓܶܠܥܕܳܝܳܐ. ܐܰܪܒܥܳܐ ܝܰܘܡܺܝ̈ܢ ܒܫܰܢ̱ܬܳܐ.