Numeri ܡܢܝܢܐ 11

¹ ܘܟܰܕ ܪܛܶܢܘ ܗܘܰܘ ܥܰܡܳܐ. ܐܶܬܒܐܶܫ ܩܕܳܡ ܡܳܪܝܳܐ. ܘܰܫܡܰܥ ܡܳܪܝܳܐ ܘܶܐܬܚܰܡܰܬ ܪܽܘܓܙܶܗ. ܘܣܶܦܰܬ ܒܗܽܘܢ ܢܽܘܪܶܗ ܕܡܳܪܝܳܐ. ܘܶܐܟܰܠܬ ܒܰܚܕܳܖ̈ܶܝܗ̇ ܕܡܰܫܪܺܝܬܳܐ.

² ܘܰܓܥܰܘ ܥܰܡܳܐ ܥܰܠ ܡܽܘܫܶܐ. ܘܨܰܠܺܝ ܡܽܘܫܶܐ ܩܕܳܡ ܡܳܪܝܳܐ. ܘܫܶܠܝܰܬ ܢܽܘܪܳܐ.

³ ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܝܰܩܕܳܢܳܐ. ܡܶܛܽܠ ܕܣܶܦܰܬ ܒܗܽܘܢ ܢܽܘܪܶܗ ܕܡܳܪܝܳܐ.

⁴ ܘܚܰܠܽܘܛܳܐ ܕܺܐܝܬ ܗܘܰܘ ܒܰܝܢܳܬܗܽܘܢ ܪܰܓܘ ܪܶܓܬܳܐ. ܘܰܗܦܰܟܘ ܐܰܒܟܺܝܘ ܐܳܦ ܠܰܒܢܰܝ̈ ܝܺܣܪܳܐܶܝܠ. ܘܳܐܡܪܺܝܢ. ܡܰܢ ܕܶܝܢ ܐܰܘܟܠܰܢ ܒܶܣܪܳܐ.

⁵ ܐܶܬܕܟܰܪܢ ܢܽܘ̈ܢܶܐ ܕܳܐܟܠܺܝܢ ܗܘܰܝܢ ܒܡܶܨܪܶܝܢ ܡܰܓܳܢ. ܘܰܩܛܰܝ̈ܳܐ ܘܦܰܛܺܝܚ̈ܶܐ ܘܟܰܖ̈ܳܬܳܐ. ܘܒܶܨ̈ܠܶܐ. ܘܬܽܘܡܳܐ.

⁶ ܘܗܳܫܳܐ ܗܳܐ ܢܰܚܒܳܐ ܢܰܦܫܰܢ. ܘܠܰܝܬ ܡܶܕܶܡ. ܐܶܠܳܐ ܐܶܢ ܗܳܢܳܐ ܡܰܢܢܳܐ ܕܰܩܕܳܡ ܥܰܝ̈ܢܰܝܢ.

⁷ ܘܡܰܢܢܳܐ ܐܰܝܟ ܙܰܪܥܳܐ ܗܘܳܐ ܕܟܽܘܣܒܰܪܬܳܐ. ܘܥܰܝܢܶܗ ܐܰܝܟ ܥܰܝܢܳܐ ܕܒܶܪܽܘܠܚܳܐ.

⁸ ܘܡܶܬܟܰܪܟܺܝܢ ܥܰܡܳܐ ܘܠܳܩܛܺܝܢ ܠܶܗ. ܘܛܳܚܢܺܝܢ ܠܶܗ ܒܪܰܚܝܳܐ. ܘܕܳܩܺܝܢ ܠܶܗ ܒܰܡܕܳܟܬܳܐ ܘܰܡܒܰܫܠܺܝܢ ܠܶܗ ܒܩܶܕܪܳܐ. ܘܥܳܒܕܺܝܢ ܡܶܢܶܗ ܪܰܥܦܳܐ. ܘܗܳܘܶܐ ܛܰܥܡܶܗ ܐܰܝܟ ܛܰܥܡܳܐ ܕܠܺܝܫ ܒܡܶܫܚܳܐ.

⁹ ܘܡܳܐ ܕܢܳܚܶܬ ܛܰܠܳܐ ܥܰܠ ܡܰܫܪܺܝܬܳܐ ܒܠܺܠܝܳܐ. ܢܳܚܶܬ ܥܠܰܘܗܝ ܡܰܢܢܳܐ.

¹⁰ ܘܰܫܡܰܥ ܡܽܘܫܶܐ ܠܥܰܡܳܐ ܟܰܕ ܒܳܟܶܝܢ ܒܫܰܖ̈ܒܳܬܗܽܘܢ. ܐ̱ܢܳܫ ܒܰܬܪܰܥ ܡܰܫܟܢܶܗ. ܘܶܐܬܚܰܡܰܬ ܪܽܘܓܙܶܗ ܕܡܳܪܝܳܐ. ܘܳܐܦ ܒܥܰܝܢܰܘ̈ܗܝ ܕܡܽܘܫܶܐ ܐܶܬܒܐܶܫ.

¹¹ ܘܶܐܡܰܪ ܡܽܘܫܶܐ ܠܡܳܪܝܳܐ. ܡܳܪܝ. ܠܡܳܢܳܐ ܐܰܒܐܶܫܬ ܠܥܰܒܕܳܟ. ܘܰܠܡܳܢܳܐ ܠܳܐ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ. ܕܰܐܪܡܺܝܬܳܝܗܝ ܥܠܰܝ ܟܽܠܶܗ ܛܰܥܢܶܗ ܕܥܰܡܳܐ ܗܳܢܳܐ.

¹² ܕܰܠܡܳܐ ܐܶܢܳܐ ܒܛܶܢܬܶܗ ܠܗܳܢܳܐ ܟܽܠܶܗ ܥܰܡܳܐ ܐܰܘ ܕܰܠܡܳܐ ܐܶܢܳܐ ܝܺܠܶܕܬܶܗ. ܕܳܐܡܰܪ ܐܰܢ̱ܬ ܠܺܝ ܫܰܩܠܳܝܗܝ ܒܥܽܘܒܳܟ ܐܰܝܟ ܕܰܡܫܰܩܶܠ ܡܪܰܒܝܳܢܳܐ ܠܝܳܠܽܘܕܳܐ. ܠܰܐܪܥܳܐ ܕܺܝܡܰܝܬ ܠܰܐܒܳܗܰܝ̈ܗܽܘܢ.

¹³ ܐܰܝܡܶܟܳܐ ܠܺܝ ܒܶܣܪܳܐ ܕܶܐܬܶܠ ܠܗܳܢܳܐ ܟܽܠܶܗ ܥܰܡܳܐ. ܕܒܳܟܶܝܢ ܥܠܰܝ. ܘܳܐܡܪܺܝܢ. ܗܰܒ ܠܰܢ ܒܶܣܪܳܐ ܕܢܶܐܟܽܘܠ.

¹⁴ ܠܳܐ ܡܶܫܟܰܚ ܐ̱ܢܳܐ ܕܶܐܣܰܝܒܰܪ ܒܰܠܚܽܘܕܰܝ ܠܗܳܢܳܐ ܟܽܠܶܗ ܥܰܡܳܐ. ܡܶܛܽܠ ܕܥܰܫܺܝܢ ܗ̱ܘ ܡܶܢܝ.

¹⁵ ܐܶܢ ܗܳܟܰܢܳܐ ܥܳܒܶܕ ܐܰܢ̱ܬ ܠܺܝ. ܩܛܽܘܠܰܝܢܝ ܡܶܩܛܰܠ. ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ. ܘܠܳܐ ܐܶܚܙܶܐ ܒܒܺܝܫܬܝ.

¹⁶ ܘܶܐܡܰܪ ܡܳܪܝܳܐ ܠܡܽܘܫܶܐ. ܟܰܢܶܫ ܠܺܝ ܫܰܒܥܺܝܢ ܓܰܒܖ̈ܺܝܢ ܡܶܢ ܣܳܒ̈ܶܐ ܕܺܝܣܪܳܐܶܝܠ. ܐܰܝܠܶܝܢ ܕܝܳܕܰܥ ܐܰܢ̱ܬ ܕܗܶܢܽܘܢ ܐܶܢܽܘܢ ܖ̈ܺܝܫܰܘܗܝ ܕܥܰܡܳܐ ܘܣܳܦܖ̈ܰܘܗܝ. ܘܰܕܒܰܪ ܐܶܢܽܘܢ ܠܡܰܫܟܰܢ ܙܰܒܢܳܐ. ܘܢܶܬܛܰܝܒܽܘܢ ܬܰܡܳܢ ܥܰܡܳܟ.

¹⁷ ܘܶܐܚܽܘܬ ܘܶܐܡܰܠܶܠ ܥܰܡܳܟ ܬܰܡܳܢ. ܘܶܐܒܨܽܘܪ ܡܶܢ ܪܽܘܚܳܐ ܕܰܥܠܰܝܟ ܘܶܐܣܺܝܡ ܥܠܰܝܗܽܘܢ. ܘܢܶܫܩܠܽܘܢ ܥܰܡܳܟ ܒܛܰܥܢܶܗ ܕܥܰܡܳܐ ܗܳܢܳܐ. ܘܠܳܐ ܬܶܫܩܽܘܠ ܐܰܢ̱ܬ ܒܰܠܚܽܘܕܰܝܟ.

¹⁸ ܘܶܐܡܰܪ ܡܽܘܫܶܐ ܠܥܰܡܳܐ. ܐܶܬܩܰܕܰܫܘ ܡܚܳܪ ܕܬܶܐܟܠܽܘܢ ܒܶܣܪܳܐ. ܡܶܛܽܠ ܕܰܒܟܰܝܬܽܘܢ ܩܕܳܡ ܡܳܪܝܳܐ ܘܶܐܡܰܪܬܽܘܢ. ܡܰܢ ܕܶܝܢ ܐܰܘܟܠܰܢ ܒܶܣܪܳܐ. ܡܶܛܽܠ ܕܛܳܒ ܗܘܳܐ ܠܰܢ ܒܡܶܨܪܶܝܢ. ܘܢܶܬܶܠ ܠܟܽܘܢ ܡܳܪܝܳܐ ܒܶܣܪܳܐ ܕܬܶܐܟܠܽܘܢ.

¹⁹ ܠܳܐ ܚܰܕ ܝܽܘܡ ܬܶܐܟܠܽܘܢܶܗ. ܘܠܳܐ ܬܪܶܝܢ ܝܰܘܡܺܝ̈ܢ. ܘܠܳܐ ܚܰܡܫܳܐ ܝܰܘܡܺܝ̈ܢ. ܘܳܐܦܠܳܐ ܥܶܣܪܳܐ ܝܰܘܡܺܝ̈ܢ. ܘܠܳܐ ܥܶܣܪܺܝܢ ܝܰܘܡܺܝ̈ܢ.

²⁰ ܥܕܰܡܳܐ ܠܺܝܪܰܚ ܝܰܘܡܺܝ̈ܢ ܬܶܐܟܠܽܘܢܶܗ. ܥܕܰܡܳܐ ܕܢܶܦܽܘܩ ܡܶܢ ܢܚܺܝܖ̈ܰܝܟܽܘܢ ܘܬܶܗܘܶܐ ܠܟܽܘܢ ܐܰܦܬܳܪܳܐ ܥܰܠ ܕܰܐܣܠܺܝܬܽܘܢ ܠܡܳܪܝܳܐ ܕܰܒܟܽܘܢ. ܘܰܒܟܰܝܬܽܘܢ ܩܕܳܡ ܡܳܪܝܳܐ ܘܶܐܡܰܪܬܽܘܢ. ܠܡܳܢܳܐ ܓܶܝܪ ܢܦܰܩܢ ܡܶܢ ܡܶܨܪܶܝܢ.

²¹ ܘܶܐܡܰܪ ܡܽܘܫܶܐ ܩܕܳܡ ܡܳܪܝܳܐ. ܫܶܬܡܳܐܐ ܐܰܠܦܺܝ̈ܢ ܓܰܒܪܳܐ ܖ̈ܶܓܠܳܝܶܐ. ܥܰܡܳܐ ܕܶܐܢܳܐ ܒܰܝܢܳܬܗܽܘܢ. ܘܰܐܢ̱ܬ ܐܶܡܰܪܬ ܕܒܶܣܪܳܐ ܐܶܬܶܠ ܠܗܽܘܢ. ܘܢܶܐܟܠܽܘܢ ܝܺܪܰܚ ܝܰܘܡܺܝ̈ܢ.

²² ܐܶܢ ܥܳܢ̈ܳܐ ܘܬܰܘܖ̈ܶܐ ܡܶܬܢܰܟܣܺܝܢ ܠܗܽܘܢ. ܡܳܢܳܐ ܥܳܒܕܺܝܢ ܠܗܽܘܢ. ܘܶܐܢ ܟܽܠܗܽܘܢ ܢܽܘ̈ܢܶܐ ܕܝܰܡܳܐ ܡܶܬܬܨܺܝܕܺܝܢ ܠܗܽܘܢ. ܠܰܐܝܟܳܐ ܡܡܰܠܶܝܢ ܠܗܽܘܢ.

²³ ܘܶܐܡܰܪ ܡܳܪܝܳܐ ܠܡܽܘܫܶܐ. ܐܺܝܕܶܗ ܕܡܳܪܝܳܐ ܡܡܰܠܝܳܐ. ܗܳܫܳܐ ܬܶܚܙܶܐ ܐܶܢ ܗܳܘܝܳܐ ܡܶܠܰܬܝ ܐܰܘ ܠܳܐ.

²⁴ ܘܰܢܦܰܩ ܡܽܘܫܶܐ. ܘܶܐܡܰܪ ܠܥܰܡܳܐ ܦܶܬܓܳܡܰܘ̈ܗܝ ܕܡܳܪܝܳܐ. ܘܟܰܢܶܫ ܫܰܒܥܺܝܢ ܓܰܒܖ̈ܺܝܢ ܡܶܢ ܣܳܒ̈ܶܐ ܕܥܰܡܳܐ. ܘܰܐܩܺܝܡ ܐܶܢܽܘܢ ܚܕܳܖ̈ܰܘܗܝ ܕܡܰܫܟܢܳܐ.

²⁵ ܘܰܢܚܶܬ ܡܳܪܝܳܐ ܒܰܥܢܳܢܳܐ. ܘܡܰܠܶܠ ܥܰܡܶܗ. ܘܒܰܨܰܪ ܡܶܢ ܪܽܘܚܳܐ ܕܰܥܠܰܘܗܝ. ܘܝܰܗܒ ܥܰܠ ܫܰܒܥܺܝܢ ܓܰܒܖ̈ܺܝܢ ܣܳܒ̈ܶܐ. ܘܟܰܕ ܫܪܳܬ ܥܠܰܝܗܽܘܢ ܪܽܘܚܳܐ. ܐܶܬܢܰܒܺܝܘ ܘܠܳܐ ܐܰܘܣܶܦܘ.

²⁶ ܘܶܐܫܬܚܰܪܘ ܬܪܶܝܢ ܓܰܒܖ̈ܺܝܢ ܒܡܰܫܪܺܝܬܳܐ. ܫܡܶܗ ܕܚܰܕ ܐܶܠܕܳܕ. ܘܰܫܡܶܗ ܕܰܐ̱ܚܪܺܢܳܐ ܡܺܝܕܳܕ. ܘܰܫܪܳܬ ܥܠܰܝܗܽܘܢ ܪܽܘܚܳܐ. ܘܳܐܦ ܗܶܢܽܘܢ ܟܬܺܝܒܺܝܢ ܗܘܰܘ. ܘܠܳܐ ܐܶܬܰܘ ܠܡܰܫܟܢܳܐ. ܘܶܐܬܢܰܒܺܝܘ ܒܡܰܫܪܺܝܬܳܐ.

²⁷ ܘܰܪܗܶܛ ܥܠܰܝܡܳܐ ܘܚܰܘܺܝ ܠܡܽܘܫܶܐ. ܘܶܐܡܰܪ ܠܶܗ. ܐܶܠܕܳܕ ܘܡܺܝܕܳܕ ܗܳܐ ܡܶܬܢܰܒܶܝܢ ܒܡܰܫܪܺܝܬܳܐ.

²⁸ ܘܰܥܢܳܐ ܗܽܘܫܳܥ ܒܰܪܢܽܘܢ. ܡܫܰܡܫܳܢܶܗ ܕܡܽܘܫܶܐ ܡܶܢ ܛܰܠܝܽܘܬܶܗ. ܘܶܐܡܰܪ ܠܶܗ. ܡܳܪܝ ܡܽܘܫܶܐ ܟܠܺܝ ܐܶܢܽܘܢ.

²⁹ ܐܶܡܰܪ ܠܶܗ ܡܽܘܫܶܐ ܠܳܐ ܬܰܛܢܰܢܝ. ܡܰܢ ܕܶܝܢ ܥ̣ܒܰܕ ܟܽܠܶܗ ܥܰܡܶܗ ܕܡܳܪܝܳܐ ܢܒܺܝ̈ܶܐ. ܡܶܛܽܠ ܕܝܰܗܒ ܡܳܪܝܳܐ ܪܽܘܚܶܗ ܥܠܰܝܗܽܘܢ.

³⁰ ܘܥܰܠ ܡܽܘܫܶܐ ܠܡܰܫܪܺܝܬܳܐ ܗܽܘ ܘܣܳܒ̈ܶܐ. ܕܺܝܣܪܳܐܶܝܠ.

³¹ ܘܪܽܘܚܳܐ ܫܶܩܠܰܬ ܡܶܢ ܩܕܳܡ ܡܳܪܝܳܐ. ܘܰܐܣܩܰܬ ܣܰܠܘܰܝ ܡܶܢ ܝܰܡܳܐ. ܘܰܐܪܡܝܰܬ ܥܰܠ ܡܰܫܪܺܝܬܳܐ. ܡܰܪܕܶܐ ܝܰܘܡܳܐ ܠܟܳܐ. ܘܡܰܪܕܶܐ ܝܰܘܡܳܐ ܠܟܳܐ. ܚܕܳܖ̈ܶܝܗ̇ ܕܡܰܫܪܺܝܬܳܐ. ܘܰܐܝܟ ܬܰܪܬܶܝܢ ܐܰܡܺܝ̈ܢ ܥܰܠ ܐܰܦܰܝ̈ ܐܰܪܥܳܐ.

³² ܘܩܳܡ ܥܰܡܳܐ ܟܽܠܶܗ ܐܺܝܡܳܡܳܐ ܗܰܘ. ܘܟܽܠܶܗ ܠܺܠܝܳܐ. ܘܟܽܠܶܗ ܐܺܝܡܳܡܳܐ ܕܒܳܬܪܶܗ. ܘܟܰܢܫܽܘܗ̇ ܠܣܰܠܘܰܝ. ܐܰܝܢܳܐ ܕܰܐܙܥܰܪ ܟܰܢܶܫ ܥܶܣܪܳܐ ܟܖ̈ܰܘܳܢ. ܘܰܫܛܰܚܘ ܠܗܽܘܢ ܡܰܫܛ̈ܚܶܐ ܚܕܳܖ̈ܶܝܗ̇ ܕܡܰܫܪܺܝܬܳܐ.

³³ ܒܶܣܪܳܐ ܥܕܰܟܺܝܠ ܒܶܝܬ ܫܶܢܰܝ̈ܗܽܘܢ. ܘܥܰܕܠܳܐ ܥ̣ܒܰܪ ܬܩܶܦ ܪܽܘܓܙܶܗ ܕܡܳܪܝܳܐ ܥܰܠ ܥܰܡܳܐ. ܘܰܡ̣ܚܳܐ ܡܳܪܝܳܐ ܒܥܰܡܳܐ ܡܚܽܘܬܳܐ ܕܛܳܒ ܪܰܒܳܐ.

³⁴ ܘܰܩܪܳܐ ܫܡܶܗ ܕܰܐܬܪܳܐ ܗܰܘ ܩܰܒܖ̈ܶܐ ܕܪܶܓܬܳܐ. ܡܶܛܽܠ ܕܬܰܡܳܢ ܩܒܰܪܘ ܠܥܰܡܳܐ ܕܪܰܓܘ ܪܶܓܬܳܐ.

³⁵ ܘܡܶܢ ܩܰܒܖ̈ܶܐ ܕܪܶܓܬܳܐ ܫܩܰܠܘ ܥܰܡܳܐ ܠܚܶܨܪܽܘܬ. ܘܰܗܘܰܘ ܒܚܶܨܪܽܘܬ.