Deuteronomio ܬܢܝܢ ܢܡܘܣܐ 8

¹ ܟܽܠܗܽܘܢ ܦܽܘܩ̈ܕܳܢܶܐ ܕܰܡܦܰܩܶܕ ܠܟܽܘܢ ܝܰܘܡܳܢܳܐ. ܛܰܪܘ ܘܰܥܒܶܕܘ ܐܶܢܽܘܢ. ܕܬܺܚܽܘܢ. ܘܬܶܣܓܽܘܢ. ܘܬܶܥܠܽܘܢ. ܘܬܺܐܪܬܽܘܢ ܐܰܪܥܳܐ ܕܺܝܡܳܐ ܡܳܪܝܳܐ ܠܰܐܒܳܗܰܝ̈ܟܽܘܢ.

² ܘܬܶܬܕܰܟܪܽܘܢ ܟܽܠܳܗ̇ ܐܽܘܪܚܳܐ ܕܰܕܒܰܪܟܽܘܢ ܡܳܪܝܳܐ ܐܰܠܳܗܟܽܘܢ. ܗܳܐ ܐܰܪܒܥܺܝܢ ܫܢܺܝ̈ܢ ܒܡܰܕܒܪܳܐ. ܕܰܢܡܰܟܶܟܟܽܘܢ ܘܰܢܢܰܣܶܝܟܽܘܢ. ܘܰܕܢܶܕܰܥ ܡܳܐ ܕܺܐܝܬ ܒܠܶܒܟܽܘܢ. ܐܶܢ ܢܳܛܪܺܝܢ ܐ̱ܢܬܽܘܢ ܦܽܘܩܕܳܢܰܘ̈ܗܝ ܐܰܘ ܠܳܐ.

³ ܘܡܰܟܟܳܟ. ܘܰܐܟܦܢܳܟ. ܘܰܐܘܟܠܳܟ ܡܰܢܢܳܐ ܕܠܳܐ ܝܺܕܰܥܬ. ܘܠܳܐ ܝܰܕܥܽܘܗܝ ܐܰܒܳܗܰܝ̈ܟ. ܕܰܢܚܰܘܶܝܟ ܕܠܳܐ ܗܘܳܐ ܒܠܰܚܡܳܐ ܒܰܠܚܽܘܕ ܚܳܝܶܐ ܒܰܪܢܳܫܳܐ. ܐܶܠܳܐ ܒܟܽܠܡܶܕܶܡ ܕܡܰܦܶܩ ܦܽܘܡܶܗ ܕܡܳܪܝܳܐ ܚܳܝܶܐ ܐ̱ܢܳܫܳܐ.

⁴ ܢܰܚܬܰܝ̈ܟ ܠܳܐ ܒܠܺܝܘ ܡܶܢܳܟ. ܘܖ̈ܶܓܠܰܝܟ ܠܳܐ ܐܰܢܚܶܦܝ̈ ܗܳܐ ܐܰܪܒܥܺܝܢ ܫܢܺܝ̈ܢ.

⁵ ܘܰܕܬܶܕܰܥ ܒܠܶܒܳܟ ܕܰܐܝܟ ܕܪܳܕܶܐ ܓܰܒܪܳܐ ܠܰܒܪܶܗ. ܗܳܟܰܢܳܐ ܪܳܕܶܐ ܠܳܟ ܡܳܪܝܳܐ ܐܰܠܳܗܳܟ.

⁶ ܛܰܪ ܦܽܘܩܕܳܢܰܘ̈ܗܝ ܕܡܳܪܝܳܐ ܐܰܠܳܗܳܟ. ܘܗܰܠܶܟ ܒܽܐܘܖ̈ܚܳܬܶܗ. ܘܰܕܚܰܠ ܡܶܢܶܗ.

⁷ ܡܶܛܽܠ ܕܡܳܪܝܳܐ ܐܰܠܳܗܳܟ ܡܰܥܶܠ ܠܳܟ ܠܰܐܪܥܳܐ ܛܳܒܬܳܐ. ܐܰܪܥܳܐ ܕܖ̈ܶܓ̣ܠܳܬܳܐ ܕܡܰܝ̈ܳܐ. ܘܡܰܒܽܘܥ̈ܶܐ ܘܰܬܗܽܘ̈ܡܶܐ ܕܢܳܦܩܺܝܢ ܒܦܰܩ̈ܥܳܬܳܐ ܘܰܒܛܽܘܖ̈ܶܐ.

⁸ ܐܰܪܥܳܐ ܕܚܶܛ̈ܶܐ. ܘܕܰܣܥܳܖ̈ܶܐ. ܘܰܕܓܽܘܦܢ̈ܶܐ. ܘܰܕܬܺܐܢ̈ܶܐ. ܘܰܕܖ̈ܽܘܡܳܢܶܐ. ܐܰܪܥܳܐ ܕܙܰܝ̈ܬܶܐ. ܘܰܕܡܶܫܚܳܐ. ܘܰܕܕܶܒܫܳܐ.

⁹ ܐܰܪܥܳܐ ܕܠܳܐ ܒܡܶܣܟܺܢܽܘܬܳܐ ܬܶܐܟܽܘܠ ܒܳܗ̇ ܠܰܚܡܳܐ. ܘܠܳܐ ܢܶܚܣܰܪ ܠܳܟ ܒܳܗ̇ ܡܶܕܶܡ. ܐܰܪܥܳܐ ܕܟܺܐܦܶܝ̈ܗ̇ ܦܰܪܙܠܳܐ. ܘܡܶܢ ܛܽܘܖ̈ܶܝܗ̇ ܬܶܦܣܽܘܠ ܢܚܳܫܳܐ.

¹⁰ ܘܬܶܐܟܽܘܠ ܘܬܶܣܒܰܥ. ܘܰܬܒܰܪܶܟ ܠܡܳܪܝܳܐ ܐܰܠܳܗܳܟ. ܒܰܐܪܥܳܐ ܛܳܒܬܳܐ ܕܝܳܗܶܒ ܠܳܟ.

¹¹ ܐܶܙܕܰܗܪ ܠܳܟ ܕܰܠܡܳܐ ܬܶܛܥܶܐ ܠܡܳܪܝܳܐ ܐܰܠܳܗܳܟ. ܐܶܠܳܐ ܛܰܪ ܦܽܘܩܕܳܢܰܘ̈ܗܝ. ܘܕܺܝܢܰܘ̈ܗܝ. ܘܢܳܡܽܘܣܰܘ̈ܗܝ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ.

¹² ܕܠܳܐ ܟܰܕ ܬܶܐܟܽܘܠ ܘܬܶܣܒܰܥ. ܘܒ̈ܳܬܶܐ ܫܰܦܺܝܖ̈ܶܐ ܬܶܒܢܶܐ ܘܬܶܬܶܒ.

¹³ ܘܥܳܢ̈ܳܟ ܘܬܰܘܖ̈ܰܝܟ ܢܶܣܓܽܘܢ. ܘܣܺܐܡܳܐ ܘܕܰܗܒܳܐ ܢܶܣܓܶܐ ܠܳܟ. ܘܟܽܠ ܕܺܐܝܬ ܠܳܟ ܢܶܣܓܶܐ.

¹⁴ ܢܶܬܬܪܺܝܡ ܠܶܒܳܟ. ܘܬܶܛܥܶܐ ܠܡܳܪܝܳܐ ܐܰܠܳܗܳܟ. ܕܰܐܦܩܳܟ ܡܶܢ ܐܰܪܥܳܐ ܕܡܶܨܪܶܝܢ ܡܶܢ ܒܶܝܬ ܥܰܒܕܽܘܬܳܐ.

¹⁵ ܘܕܰܒܪܳܟ ܒܡܰܕܒܪܳܐ ܪܰܒܳܐ ܘܰܕܚܺܝܠܳܐ. ܐܰܬܰܪ ܕܰܚ̈ܘܰܘܳܬܳܐ ܚܰܖ̈ܡܳܢܶܐ ܘܥܶܩܰܖ̈ܒܶܐ. ܘܒܶܝܬ ܨܰܗܘܳܢ̈ܶܐ. ܐܰܬܰܪ ܕܠܰܝܬ ܡܰܝ̈ܳܐ. ܐܰܦܶܩ ܠܳܟ ܡܰܝ̈ܳܐ ܡܶܢ ܟܺܐܦܳܐ ܕܛܰܪܳܢܳܐ.

¹⁶ ܘܰܐܘܟܠܳܟ ܡܰܢܢܳܐ ܒܡܰܕܒܪܳܐ ܕܠܳܐ ܝܰܕܥܽܘܗܝ ܐܰܒܳܗܰܝ̈ܟ. ܕܰܢܡܰܟܟܳܟ ܘܰܢܢܰܣܶܝܟ. ܘܢܰܛܐܶܒ ܠܳܟ ܒܚܰܪܬܳܐ.

¹⁷ ܘܬܺܐܡܰܪ ܒܠܶܒܳܟ ܕܰܒܚܰܠܝ ܘܰܒܥܽܘܫܢܳܐ ܕܺܐܝܕܰܝ̈ ܩܢܺܝܬ ܠܺܝ ܗܳܠܶܝܢ ܢܶܟܣ̈ܶܐ.

¹⁸ ܐܶܬܕܰܟܪ ܠܡܳܪܝܳܐ ܐܰܠܳܗܳܟ ܕܗܽܘܝܽܘ ܝܰܗܒ ܠܳܟ ܚܰܝܠܳܐ ܕܬܶܩܢܶܐ ܢܶܟܣ̈ܶܐ. ܕܰܢܩܺܝܡ ܩܝܳܡܶܗ ܕܺܝܡܳܐ ܠܰܐܒܳܗܰܝ̈ܟ. ܐܰܝܟ ܕܝܰܘܡܳܢܳܐ.

¹⁹ ܘܶܐܢ ܬܶܛܥܶܐ ܠܡܳܪܝܳܐ ܐܰܠܳܗܳܟ. ܘܬܺܐܙܰܠ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ. ܘܬܶܦܠܽܘܚ ܐܶܢܽܘܢ. ܘܬܶܣܓܽܘܕ ܠܗܽܘܢ. ܣܰܗܕܶܬ ܒܟܽܘܢ ܝܰܘܡܳܢܳܐ. ܕܡܺܐܒܰܕ ܐܳܒܕܺܝܢ ܐ̱ܢܬܽܘܢ.

²⁰ ܐܰܝܟ ܥܰܡ̈ܡܶܐ ܕܰܐܘܒܶܕ ܡܳܪܝܳܐ ܡܶܢ ܩܕܳܡܰܝܟܽܘܢ. ܗܳܟܰܢܳܐ ܐܳܒܕܺܝܢ ܐ̱ܢܬܽܘܢ. ܐܶܢ ܠܳܐ ܫܳܡܥܺܝܢ ܐ̱ܢܬܽܘܢ ܒܩܳܠܶܗ ܕܡܳܪܝܳܐ ܐܰܠܳܗܟܽܘܢ.