Numeri ܡܢܝܢܐ 20

¹ ܘܶܐܬܰܘ ܒܢܰܝ̈ ܝܺܣܪܳܐܶܝܠ ܟܽܠܳܗ̇ ܟܢܽܘܫܬܳܐ ܠܡܰܕܒܪܳܐ ܕܨܺܝܢ ܒܝܰܪܚܳܐ ܩܰܕܡܳܝܳܐ. ܘܺܝܬܶܒ ܥܰܡܳܐ ܒܰܪܩܶܡ. ܘܡܺܝܬܬ ܬܰܡܳܢ ܡܰܪܝܰܡ. ܘܶܐܬܩܰܒܪܰܬ ܬܰܡܳܢ.

² ܘܠܰܝܬ ܗܘܳܐ ܡܰܝ̈ܳܐ ܠܥܰܡܳܐ ܕܢܶܫܬܶܐ. ܘܶܐܬܟܰܢܫܘ ܥܰܡܳܐ ܥܰܠ ܡܽܘܫܶܐ ܘܥܰܠ ܐܰܗܪܽܘܢ.

³ ܘܰܢܨܰܘ ܥܰܡܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪܘ ܠܗܽܘܢ. ܐܶܫܬܽܘܦ ܕܶܝܢ ܡܺܝܬܢ ܒܡܰܘܬܳܢܳܐ ܕܰܐܚܰܝ̈ܢ ܩܕܳܡ ܡܳܪܝܳܐ.

⁴ ܠܡܳܢܳܐ ܐܰܝܬܺܝܬܽܘܢ ܟܢܽܘܫܬܶܗ ܕܡܳܪܝܳܐ ܠܡܰܕܒܪܳܐ ܗܳܢܳܐ. ܕܰܢܡܽܘܬ ܬܢܳܢ ܚܢܰܢ ܘܰܒܥܺܝܪܰܢ.

⁵ ܘܰܠܡܳܢܳܐ ܐܰܣܶܩܬܽܘܢܳܢ ܡܶܢ ܡܶܨܪܶܝܢ. ܘܰܐܝܬܺܝܬܽܘܢܳܢ ܠܰܐܬܪܳܐ ܗܳܢܳܐ ܒܺܝܫܳܐ. ܠܳܐ ܐܰܬܪܳܐ ܕܒܶܝܬ ܙܰܪܥܳܐ. ܘܳܐܦܠܳܐ ܕܓܽܘܦ̈ܢܶܐ. ܘܬܺܐܢ̈ܶܐ. ܘܖ̈ܽܘܡܳܢܶܐ. ܘܳܐܦܠܳܐ ܡܰܝ̈ܳܐ ܠܡܶܫܬܳܐ.

⁶ ܘܶܐܬܰܘ ܡܽܘܫܶܐ ܘܰܐܗܪܽܘܢ ܡܶܢ ܩܕܳܡ ܟܢܽܘܫܬܳܐ. ܠܬܰܪܥܳܐ ܕܡܰܫܟܰܢܙܰܒܢܳܐ. ܘܰܢܦܰܠܘ ܥܰܠ ܐܰܦܰܝ̈ܗܽܘܢ. ܘܶܐܬܓܠܺܝ ܥܠܰܝܗܽܘܢ ܫܽܘܒܚܶܗ ܕܡܳܪܝܳܐ.

⁷ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

⁸ ܣܰܒ ܠܳܟ ܫܰܒܛܳܐ. ܘܰܟܢܽܘܫ ܟܢܽܘܫܬܳܐ ܐܰܢ̱ܬ ܘܰܐܗܪܽܘܢ ܐܰܚܽܘܟ. ܘܡܰܠܶܠ ܥܰܠ ܟܺܐܦܳܐ ܠܥܺܢܰܝ̈ܗܽܘܢ. ܘܬܶܬܶܠ ܡܶܝ̈ܗ̇. ܘܰܐܦܶܩ ܠܗܽܘܢ ܡܰܝ̈ܳܐ ܡܶܢ ܟܺܐܦܳܐ. ܘܰܐܫܩܳܗ̇ ܠܰܟܢܽܘܫܬܳܐ ܘܠܰܒܥܺܝܪܗܽܘܢ.

⁹ ܘܰܢ̣ܣܰܒ ܡܽܘܫܶܐ ܫܰܒܛܳܐ ܡܶܢ ܩܕܳܡ ܡܳܪܝܳܐ ܐܰܝܟ ܕܦܰܩܕܶܗ.

¹⁰ ܘܟ̣ܰܢܶܫܘ ܡܽܘܫܶܐ ܘܰܐܗܪܽܘܢ ܠܟܽܠܳܗ̇ ܟܢܽܘܫܬܳܐ ܠܘܳܬ ܟܺܐܦܳܐ. ܘܶܐܡܰܪ ܠܗܽܘܢ. ܫܡ̣ܰܥܘ ܗܳܫܳܐ ܡܡܰܪܡܖ̈ܳܢܶܐ. ܡܶܢ ܗܳܕܶܐ ܟܺܐܦܳܐ ܢܳܦܶܩ ܠܟܽܘܢ ܡܰܝ̈ܳܐ.

¹¹ ܘܰܐܪܺܝܡ ܡܽܘܫܶܐ ܐܺܝܕܶܗ. ܘܰܡܚܳܗ̇ ܠܟܺܐܦܳܐ ܒܫܰܒܛܶܗ ܬܰܪܬܶܝܢ ܙܰܒܢܺܝ̈ܢ. ܘܰܢܦܰܩܘ ܡܰܝ̈ܳܐ ܣܰܓܺܝ̈ܐܶܐ. ܘܶܐܫܬܺܝܘ ܥܰܡܳܐ ܟܽܠܶܗ. ܘܰܒܥܺܝܪܗܽܘܢ.

¹² ܘܶܐܡܰܪ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ. ܥܰܠ ܕܠܳܐ ܗܰܝܡܶܢܬܽܘܢ ܒܺܝ ܠܰܡܩܰܕܳܫܽܘܬܰܢܝ ܩܕܳܡ ܒܢܰܝ̈ ܝܺܣܪܳܐܶܝܠ. ܡܶܛܽܠ ܗܳܢܳܐ ܠܳܐ ܬܰܥܠܽܘܢܳܗ̇ ܠܰܟܢܽܘܫܬܳܐ ܗܳܕܶܐ ܠܰܐܪܥܳܐ ܕܝܶܗܒܶܬ ܠܗܽܘܢ.

¹³ ܗܳܠܶܝܢ ܐܶܢܽܘܢ ܡܰܝ̈ܳܐ ܕܡܰܨܽܘܬܳܐ. ܕܰܢܨܰܘ ܒܢܰܝ̈ ܝܺܣܪܳܐܶܝܠ ܩܕܳܡ ܡܳܪܝܳܐ. ܘܶܐܬܩܰܕܰܫ ܒܗܽܘܢ.

¹⁴ ܘܫܰܕܰܪ ܡܽܘܫܶܐ ܐܺܝܙ̈ܓܰܕܶܐ ܡܶܢ ܪܩܶܡ ܠܘܳܬ ܡܰܠܟܳܐ ܕܰܐܕܽܘܡ. ܗܳܟܰܢܳܐ ܐܳܡܰܪ ܐܰܚܽܘܟ ܝܺܣܪܳܐܶܝܠ. ܐܰܢ̱ܬ ܝܳܕܰܥ ܐܰܢ̱ܬ ܟܽܠܳܗ̇ ܠܶܐܘܬܳܐ ܕܰܐܕܪܶܟܬܰܢ.

¹⁵ ܘܰܢܚܶܬܘ ܐܰܒܳܗܰܝ̈ܢ ܠܡܶܨܪܶܝܢ. ܘܺܝܬܒܢ ܒܡܶܨܪܶܝܢ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܰܐܒܐܶܫܘ ܠܰܢ ܡܶܨܖ̈ܳܝܶܐ. ܘܠܰܐܒܳܗܰܝ̈ܢ.

¹⁶ ܘܨܰܠܺܝܢ ܩܕܳܡ ܡܳܪܝܳܐ ܘܰܫܡܰܥ ܒܩܳܠܰܢ. ܘܫܰܕܰܪ ܡܰܠܰܐܟܳܐ ܘܰܐܦܩܰܢ ܡܶܢ ܡܶܨܪܶܝܢ. ܘܗܳܐ ܚܢܰܢ ܒܰܪܩܶܡ ܩܪܺܝܬܳܐ ܕܰܒܣܽܘܦ ܬܚܽܘܡܳܟ.

¹⁷ ܗܳܫܳܐ ܢܶܥܒܰܪ ܒܰܐܪܥܳܟ. ܠܳܐ ܢܶܥܒܰܪ ܒܚܰܩܠܳܐ ܘܰܒܟܰܪܡܳܐ. ܘܠܳܐ ܢܶܫܬܶܐ ܡܶܢ ܡܰܝ̈ܳܐ ܕܓܽܘ̈ܒܶܐ. ܐܶܠܳܐ ܒܽܐܘܪܚ ܡܰܠܟܳܐ ܢܺܐܙܰܠ. ܘܠܳܐ ܢܶܣܛܶܐ ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ. ܥܕܰܡܳܐ ܕܢܶܥܒܰܪ ܬܚܽܘܡܳܟ.

¹⁸ ܘܶܐܡܰܪ ܠܶܗ ܐܰܕܽܘܡ. ܠܳܐ ܬܶܥܒܰܪ ܒܰܬܚܽܘܡܝ. ܕܠܳܐ ܒܚܰܪܒܳܐ ܐܶܦܽܘܩ ܠܽܐܘܪܥܳܟ.

¹⁹ ܘܶܐܡܰܪܘ ܠܶܗ ܒܢܰܝ̈ ܝܺܣܪܳܐܶܝܠ ܒܰܫܒܺܝܠܳܐ ܢܶܣܰܩ. ܘܶܐܢ ܡܶܢ ܡܰܝ̈ܟ ܢܶܫܬܶܐ ܚܢܰܢ ܘܰܒܥܺܝܪܰܢ. ܢܶܬܶܠ ܕܡܰܝ̈ܗܽܘܢ. ܒܰܠܚܽܘܕ ܒܖ̈ܶܓܠܰܝܢ ܢܶܥܒܰܪ.

²⁰ ܘܶܐܡܰܪ ܠܗܽܘܢ ܐܰܕܽܘܡ. ܠܳܐ ܬܶܥܒܪܽܘܢ. ܘܰܢܦܰܩ ܐܰܕܽܘܡ ܠܽܐܘܪܥܗܽܘܢ ܒܥܰܡܳܐ ܥܰܫܺܝܢܳܐ. ܘܒܺܐܝܕܳܐ ܬܰܩܺܝܦܬܳܐ.

²¹ ܘܠܳܐ ܨܒ̣ܳܐ ܐܰܕܽܘܡ ܠܡܶܫܒܰܩ ܠܰܒܢܰܝ̈ ܝܺܣܪܳܐܶܝܠ ܠܡܶܥܒܰܪ ܒܰܬܚܽܘܡܶܗ. ܘܰܣܛܳܐ ܠܶܗ ܝܺܣܪܳܐܶܝܠ ܡܶܢܶܗ.

²² ܘܰܫܩܰܠܘ ܡܶܢ ܪܩܶܡ. ܘܶܐܬܰܘ ܒܢܰܝ̈ ܝܺܣܪܳܐܶܝܠ ܟܽܠܳܗ ܟܢܽܘܫܬܳܐ ܠܗܽܘܪ ܛܽܘܪܳܐ.

²³ ܡܰܦܩܳܢܶܗ ܕܰܐܗܪܽܘܢ: ܘܶܐܡܰܪ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ ܒܗܽܘܪ ܛܽܘܪܳܐ. ܒܰܬܚܽܘܡܳܐ ܕܰܐܪܥܳܐ ܕܰܐܕܽܘܡ.

²⁴ ܢܶܬܟܢܶܫ ܐܰܗܪܽܘܢ ܠܘܳܬ ܥܰܡܶܗ. ܡܶܛܽܠ ܕܠܳܐ ܢܶܥܽܘܠ ܠܰܐܪܥܳܐ ܕܝܶܗܒܶܬ ܠܰܒܢܰܝ̈ ܝܺܣܪܳܐܶܝܠ. ܥܰܠ ܕܡܰܪܡܰܪܬܽܘܢ ܡܶܠܰܬ ܦܽܘܡܝ ܒܡܰܝ̈ܳܐ ܕܡܰܨܽܘܬܳܐ. ܘܠܳܐ ܩܰܕܶܫܬܽܘܢܳܢܝ ܒܡܰܝ̈ܳܐ ܠܥܺܝ̈ܢܝܰܗܽܘܢ.

²⁵ ܕܒܰܪ ܠܰܐܗܪܽܘܢ ܘܠܶܐܠܺܝܥܳܙܳܪ ܒܪܶܗ. ܘܰܐܣܶܩ ܐܶܢܽܘܢ ܠܗܽܘܪ ܛܽܘܪܳܐ.

²⁶ ܘܰܐܫܠܰܚ ܠܰܐܗܪܽܘܢ ܢܰܚܬܰܘ̈ܗܝ. ܘܰܐܠܒܶܫ ܐܶܢܽܘܢ ܠܶܐܠܺܝܥܳܙܳܪ ܒܪܶܗ. ܘܰܐܗܪܽܘܢ ܢܶܬܟܢܶܫ ܘܰܢܡܽܘܬ ܬܰܡܳܢ.

²⁷ ܘܰܥܒܰܕ ܡܽܘܫܶܐ ܐܰܝܟ ܕܦܰܩܕܶܗ ܡܳܪܝܳܐ. ܘܰܣܠܶܩܘ ܠܗܽܘܪ ܛܽܘܪܳܐ ܠܥܺܝܢ ܟܽܠܳܗ ܟܢܽܘܫܬܳܐ.

²⁸ ܘܰܐܫܠܰܚ ܡܽܘܫܶܐ ܠܰܐܗܪܽܘܢ ܢܰܚܬܰܘ̈ܗܝ. ܘܰܐܠܒܶܫ ܐܶܢܽܘܢ ܠܶܐܠܺܝܥܳܙܳܪ ܒܪܶܗ. ܘܡܺܝܬ ܬܰܡܳܢ ܐܰܗܪܽܘܢ ܒܗܽܘܪ ܛܽܘܪܳܐ. ܘܰܢܚܶܬܘ ܡܽܘܫܶܐ ܘܶܐܠܺܝܥܳܙܳܪ ܡܶܢ ܛܽܘܪܳܐ.

²⁹ ܘܰܚܙܰܘ ܟܽܠܳܗ ܟܢܽܘܫܬܳܐ ܕܡܺܝܬ ܐܰܗܪܽܘܢ. ܘܰܒܟܰܘ ܥܰܠ ܐܰܗܪܽܘܢ ܬܠܳܬܺܝܢ ܝܰܘܡܺܝ̈ܢ. ܟܽܠܗܽܘܢ ܕܒܶܝܬ ܝܺܣܪܳܐܶܝܠ.