Numeri ܡܢܝܢܐ 10

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

² ܥܒܶܕ ܠܳܟ ܬܰܪܬܶܝܢ ܩܰܖ̈ܢܳܬܳܐ ܕܣܺܐܡܳܐ. ܕܢܶܣܟܬܳܐ ܥܒܶܕ ܐܶܢܶܝܢ. ܘܢܶܗܘ̈ܝܳܢ ܠܳܟ ܠܡܶܩܪܳܐ ܟܢܽܘܫܬܳܐ. ܘܰܠܡܰܫܩܳܠܽܘ ܡܰܫܪܺܝܬܳܐ.

³ ܘܢܶܩܪܽܘܢ ܒܗܶܝܢ. ܘܢܶܬܘܰܥܕܽܘܢ ܠܘܳܬܳܟ ܟܽܠܳܗ̇ ܟܢܽܘܫܬܳܐ ܠܬܰܪܥܳܐ ܕܡܰܫܟܰܢܙܰܒܢܳܐ.

⁴ ܘܶܐܢ ܒܰܚܕܳܐ ܢܶܩܪܽܘܢ. ܢܶܬܘܰܥܕܽܘܢ ܠܘܳܬܳܟ ܪܰܘܖ̈ܒܳܢܶܐ ܘܖ̈ܺܝܫܰܝ ܐܰܠܦ̈ܶܐ ܕܺܝܣܪܳܐܶܝܠ.

⁵ ܘܰܢܝܰܒܒܽܘܢ ܒܩܰܪܢܳܐ. ܘܢܶܫܩ̈ܠܳܢ ܡܰܫܖ̈ܝܳܬܳܐ ܕܫܰܖ̈ܝܳܢ ܡܶܢ ܡܰܕܢܚܳܐ.

⁶ ܘܰܢܝܰܒܒܽܘܢ ܒܩܰܪܢܳܐ ܕܬܰܪܬܶܝܢ. ܘܢܶܫܩ̈ܠܳܢ ܡܰܫܖ̈ܝܳܬܳܐ ܕܫܰܖ̈ܝܳܢ ܡܶܢ ܬܰܝܡܢܳܐ. ܒܩܰܪܢܳܐ ܢܶܩܪܽܘܢ ܒܡܰܫܩ̈ܠܳܢܰܝܗܽܘܢ.

⁷ ܘܡܳܐ ܕܟܳܢܫܺܝܢ ܐܢ̱ܬܽܘܢ ܟܢܽܘܫܝܳܐ. ܗܘܰܝܬܽܘܢ ܩܳܪܶܝܢ ܘܠܳܐ ܡܝܰܒܒܺܝܢ.

⁸ ܘܰܒܢܰܝ̈ ܐܰܗܪܽܘܢ ܟܳܗܢܳܐ ܢܶܩܪܽܘܢ ܒܩܰܖ̈ܢܳܬܳܐ. ܘܢܶܗܘ̈ܝܳܢ ܠܟܽܘܢ ܢܳܡܽܘܣܳܐ ܠܥܳܠܰܡ ܠܕܳܖ̈ܰܝܟܽܘܢ.

⁹ ܘܶܐܢ ܢܺܐܬܶܐ ܩܪܳܒܳܐ ܠܰܐܪܥܟܽܘܢ. ܥܰܠ ܐܳܠܽܘܨ̈ܶܐ ܕܳܐܠܨܺܝܢ ܠܟܽܘܢ ܝܰܒܶܒܘ ܒܩܰܖ̈ܢܳܬܳܐ ܘܬܶܬܕܰܟܪܽܘܢ ܩܕܳܡ ܡܳܪܝܳܐ ܐܰܠܳܗܟܽܘܢ. ܘܬܶܬܦܰܨܽܘܢ ܡܶܢ ܒܥܶܠܕܒܳܒܰܝ̈ܟܽܘܢ.

¹⁰ ܘܰܒܝܰܘܡܳܐ ܕܚܰܕܘܰܬܟܽܘܢ ܘܰܕܪܺܝܫ ܝܰܖ̈ܚܰܝܟܽܘܢ ܘܰܕܥܺܐܕܰܝ̈ܟܽܘܢ. ܩܪܰܘ ܒܩܰܖ̈ܢܳܬܳܐ ܥܰܠ ܝܰܩܕܰܝ̈ܟܽܘܢ ܘܥܰܠ ܕܶܒܚܰܝ̈ܟܽܘܢ ܫܰܠ̈ܡܶܐ. ܘܢܶܗܘ̈ܝܳܢ ܠܟܽܘܢ ܠܕܽܘܟܪܳܢܳܐ ܩܕܳܡ ܐܰܠܳܗܟܽܘܢ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ.

¹¹ ܘܰܗܘܳܐ ܒܰܫܢܰܬ ܬܰܪܬܶܝܢ ܒܰܥܣܰܪܬܳܐ ܒܝܰܪܚܳܐ ܕܰܬܪܶܝܢ. ܣܶܠܩܰܬ ܥܢܳܢܳܐ ܡܶܢ ܡܰܫܟܢܳܐ ܕܣܳܗܕܽܘܬܳܐ.

¹² ܘܰܫܩܰܠܘ ܒܢܰܝ̈ ܝܺܣܪܳܐܶܝܠ ܒܡܰܫܩܠܳܢܰܝ̈ܗܽܘܢ ܡܶܢ ܡܰܕܒܪܳܐ ܕܣܺܝܢܰܝ. ܘܰܫܪܳܬ ܥܢܳܢܳܐ ܒܡܰܕܒܪܳܐ ܕܦܳܪܳܢ.

¹³ ܘܰܫܩܰܠܘ ܒܩܰܕܡܳܝܬܳܐ ܒܡܶܠܰܬ ܦܽܘܡܶܗ ܕܡܳܪܝܳܐ ܒܺܐܝܕܳܐ ܕܡܽܘܫܶܐ.

¹⁴ ܘܰܫܩܰܠ ܠܽܘܩܕܳܡ ܛܽܘܠܩܳܐ ܕܡܰܫܪܺܝܬܳܐ ܕܰܒܢܰܝ̈ ܝܺܗܽܘܕܳܐ. ܘܚܰܝܠܗܽܘܢ. ܘܪܰܒ ܚܰܝܠܳܐ ܢܶܚܫܽܘܢ ܒܰܪ ܥܰܡܺܝܢܳܕܳܒ.

¹⁵ ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܐܺܝܣܳܟܳܪ. ܢܰܬܢܺܝܐܶܝܠ ܒܰܪ ܨܽܘܥܳܪ.

¹⁶ ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܙܒܳܘܠܽܘܢ. ܐܶܠܝܰܒ ܒܰܪ ܚܰܠܽܘܢ.

¹⁷ ܘܰܐܚܬܽܘܗܝ ܠܡܰܫܟܢܳܐ. ܘܰܫܩܰܠܘ ܒܢܰܝ̈ ܓܶܪܫܽܘܢ. ܘܰܒܢܰܝ̈ ܡܪܳܪܺܝ ܫܳܩ̈ܠܰܝ ܡܰܫܟܢܳܐ.

¹⁸ ܘܰܫܩܰܠܘ ܛܽܘܠܩܳܐ ܕܡܰܫܪܺܝܬܳܐ ܕܪܽܘܒܺܝܠ. ܘܚܰܝܠܗܽܘܢ. ܘܪܰܒ ܚܰܝܠܳܐ ܐܶܠܺܝܨܽܘܪ ܒܰܪ ܫܰܕܐܽܘܪ.

¹⁹ ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܫܶܡܥܽܘܢ. ܫܰܠܡܽܘܐܶܝܠ ܒܰܪ ܨܽܘܪܺܝܫܰܕܰܝ.

²⁰ ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܓܳܕ. ܐܶܠܝܳܐܣܳܦ ܒܰܪ ܪܥܽܘܐܶܝܠ.

²¹ ܘܫܳܩܠܺܝܢ ܒܢܰܝ̈ ܩܳܗܳܬ ܫܳܩ̈ܠܰܝ ܡܰܫܟܢܳܐ. ܘܰܡܩܺܝܡܺܝܢ ܠܶܗ ܠܡܰܫܟܢܳܐ ܥܰܕ ܐܳܬܶܝܢ.

²² ܘܰܫܩܰܠ ܛܽܘܠܩܳܐ ܕܡܰܫܪܺܝܬܳܐ ܕܰܐܦܪܶܝܡ ܠܚܰܝܠܗܽܘܢ. ܘܪܰܒ ܚܰܝܠܳܐ ܐܶܠܺܝܫܡܰܥ ܒܰܪ ܥܰܡܺܝܗܽܘܕ.

²³ ܘܪܰܒ ܚܰܝܠܳܐ ܕܫܰܒܛܳܐ ܕܰܡܢܰܫܶܐ. ܓܰܡܰܠܺܝܐܶܝܠ ܒܰܪ ܦܰܪܨܽܘܪ.

²⁴ ܘܪܰܒܚܰܝܠܳܐ ܕܫܰܒܛܳܐ ܕܒܶܢܝܳܡܶܝܢ. ܐܳܒܺܝܕܳܢ ܒܰܪ ܓܶܕܥܽܘܢܺܝ.

²⁵ ܘܰܫܩܰܠ ܛܽܘܠܩܳܐ ܕܡܰܫܪܺܝܬܳܐ ܕܰܒܢܰܝ̈ ܕܳܢ. ܘܰܡܟܰܢܶܫ ܠܟܽܠܗܶܝܢ ܡܰܫܖ̈ܝܳܬܳܐ ܘܰܠܚܰܝܠܗܶܝܢ. ܘܪܰܒ ܚܰܝܠܳܐ ܕܫܰܒܛܳܐ ܕܰܒܢܰܝ̈ ܕܳܢ. ܐܰܚܺܝܥܳܙܳܪ ܒܰܪ ܥܰܡܺܝܫܰܕܰܝ.

²⁶ ܘܪܰܒܚܰܝܠܳܐ ܕܫܰܒܛܳܐ ܕܳܐܫܺܝܪ. ܦܰܓܥܳܐܶܝܠ ܒܰܪ ܥܰܟܪܳܢ.

²⁷ ܘܪܰܒܚܰܝܠܳܐ ܕܫܰܒܛܳܐ ܕܢܰܦܬܳܠܺܝ. ܐܰܚܺܝܕܰܥ ܒܰܪ ܥܰܝܢܳܢ.

²⁸ ܗܳܠܶܝܢ ܡܰܫܩ̈ܠܳܢܶܐ ܕܰܒܢܰܝ̈ ܝܺܣܪܳܐܶܝܠ ܠܚܰܝ̈ܠܘܳܬܗܽܘܢ.

²⁹ ܘܶܐܡܰܪ ܡܽܘܫܶܐ ܠܚܽܘܒܳܒ. ܒܰܪ ܪܥܽܘܐܶܝܠ ܡܶܕܝܰܢܳܝܳܐ ܚܡܽܘܗܝ ܕܡܽܘܫܶܐ. ܫܳܩܠܺܝܢܰܢ ܠܰܐܬܪܳܐ ܕܶܐܡܰܪ ܡܳܪܝܳܐ ܠܶܗ ܐܶܬܶܠ ܠܟܽܘܢ. ܬܳܐ ܥܰܡܰܢ ܘܢܶܛܐܰܒ ܠܳܟ. ܡܶܛܽܠ ܕܡܳܪܝܳܐ ܡܰܠܶܠ ܛܳܒܬܳܐ ܥܰܠ ܝܺܣܪܳܐܶܝܠ.

³⁰ ܘܶܐܡܰܪ ܠܶܗ ܠܳܐ ܐܳܙܶܠ ܐ̱ܢܳܐ. ܐܶܠܳܐ ܠܰܐܪܥܝ ܐܳܙܶܠ ܐ̱ܢܳܐ. ܠܰܐܝܟܳܐ ܕܺܝܠܺܝܕ ܐ̱ܢܳܐ.

³¹ ܐܶܡܰܪ ܠܶܗ ܡܽܘܫܶܐ ܠܳܐ ܬܶܫܒܩܰܢ. ܡܶܛܽܠ ܕܰܐܢ̱ܬ ܝܳܕܰܥ ܐܰܢ̱ܬ ܒܶܝܬ ܡܰܫܪܝܰܢ ܕܰܒܡܰܕܒܪܳܐ. ܘܗܳܘܶܐ ܐܰܢ̱ܬ ܠܰܢ ܥܰܝ̈ܢܶܐ.

³² ܘܶܐܢ ܬܺܐܙܰܠ ܥܰܡܰܢ. ܡܶܢ ܗܳܝ ܛܳܒܬܳܐ ܕܡܰܛܐܶܒ ܠܰܢ ܡܳܪܝܳܐ. ܢܰܛܐܶܒ ܠܳܟ.

³³ ܘܰܫܩܰܠܘ ܡܶܢ ܛܽܘܪܶܗ ܕܡܳܪܝܳܐ ܡܰܪܕܶܐ ܬܠܳܬܳܐ ܝܰܘܡܺܝ̈ܢ. ܘܩܺܐܒܽܘܬܳܐ ܕܰܩܝܳܡܶܗ ܕܡܳܪܝܳܐ ܫܶܩܠܰܬ ܡܶܢ ܩܕܳܡܝܗܽܘܢ ܡܰܪܕܶܐ ܝܰܘܡܳܐ ܚܰܕ. ܕܰܬܛܰܝܶܒ ܠܗܽܘܢ ܒܶܝܬ ܡܰܫܪܝܳܐ.

³⁴ ܘܰܥܢܳܢܶܗ ܕܡܳܪܝܳܐ ܠܥܶܠ ܡܶܢܗܽܘܢ ܒܺܐܝܡܳܡܳܐ. ܡܳܐ ܕܫܳܩܠܺܝܢ ܡܶܢ ܡܰܫܪܺܝܬܳܐ.

³⁵ ܘܰܗܘܳܐ ܕܟܰܕ ܫܶܩܠܰܬ ܩܺܐܒܽܘܬܳܐ ܐܶܡܰܪ ܡܽܘܫܶܐ. ܩܽܘܡ ܡܳܪܝܳܐ. ܘܢܶܬܬܰܒܪܽܘܢ ܣܳܢܰܐܝ̈ܟ. ܘܢܶܥܪܩܽܘܢ ܒܥܶܠܕܒܳܒܰܝ̈ܟ ܡܶܢ ܩܕܳܡܰܝܟ.

³⁶ ܘܟܰܕ ܫܪܳܬ ܐܶܡܰܪ. ܐܶܬܦܰܢܝ ܡܳܪܝܳܐ ܥܰܠ ܖ̈ܶܒܘܳܬܳܐ. ܘܥܰܠ ܐܰܠܦ̈ܶܐ ܕܺܝܣܪܳܐܶܝܠ.