Ezechiele ܚܙܩܝܐܝܠ 13

¹ ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

² ܒܪܢܫܐ ܐܬܢܒܐ ܥܠ ܢܒ̈ܝܐ ܕܐܝܣܪܝܠ ܕܡܬܢܒܝܢ ܠܗܘܢ ܘܐܡܪ ܠܐܝܠܝܢ ܕܡܬܢܒܝܢ ܡܢ ܠܒܗܘܢ ܫܡܥܘ ܦܬܓܡܗ ܕܡܪܐ ܡܪ̈ܘܬܐ

³ ܗܟܢܐ ܐܡ̇ܪ ܡܪܐ ܡܪ̈ܘܬܐ ܘܝ ܠܢܒ̈ܝܐ ܫ̈ܛܝܐ ܕܐܙ̇ܠܝܢ ܒܬܪ ܪܘܚܗܘܢ ܕܠܐ ܚܙܘ ܚܙܘܐ

⁴ ܐܝܟ ܬ̈ܥܠܐ ܒܚܪ̈ܒܬܐ ܗܘܘ ܢܒܝܝ̈ܟ ܐܝܣܪܝܠ

⁵ ܠܐ ܣܠܩܬܘܢ ܒܬܘܪܥܬܐ ܐܦ ܠܐ ܣܓܬܘܢ ܣܝܓܐ ܥܠ ܕܒܝܬ ܐܝܣܪܝܠ ܠܡܩܡ ܒܩܪܒܐ ܒܝܘܡܗ ܕܡܪܝܐ

⁶ ܕܐܡ̇ܪܝܢ ܗܟܢܐ ܐܡ̇ܪ ܡܪܝܐ ܘܡܪܝܐ ܠܐ ܫܕܪ ܐܢܘܢ ܘܫܪܝܘ ܠܡܩܡܘ ܡܠܬܐ ܕܓܠܬܐ

⁷ ܚܙܘܐ ܣܪܝܩܐ ܚܙܝܬܘܢ ܘܩܨܡܐ ܕܓܠܐ ܐܡܪܬܘܢ ܘܐܡܪܝܢ ܐܢܬܘܢ ܐܡܪ ܡܪܝܐ ܘܐܢܐ ܠܐ ܐܡ̇ܪܬ

⁸ ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܚܙܝܬܘܢ ܣܪܝܩܘܬܐ ܘܡܠܠܬܘܢ ܕܓܠܘܬܐ ܗܐ ܐܢܐ ܥܠܝܟܘܢ ܐܡ̇ܪ ܡܪܐ ܡܪ̈ܘܬܐ

⁹ ܘܬܗܘܐ ܐܝܕܝ ܥܠ ܢܒܝ̈ܐ ܕܚܙ̇ܝܢ ܣܪܝܩܘܬܐ ܘܩܨܡܝܢ ܕܓܠܘܬܐ ܒܓܘ ܥܡܝ ܠܐ ܢܗܘܘܢ ܘܒܟܬܒܐ ܕܒܝܬ ܐܝܣܪܝܠ ܠܐ ܢܬܟܬܒܘܢ ܘܠܐܪܥܐ ܕܐܝܣܪܝܠ ܠܐ ܢܥܠܘܢ ܘܬܕܥܘܢ ܕܐܢܐ ܐܢܐ ܡܪܐ ܡܪ̈ܘܬܐ

¹⁰ ܥܠ ܕܐܛܥܝܘ ܠܥܡܝ ܘܐܡܪܘ ܫܠܡܐ ܘܠܝܬ ܫܠܡܐ ܘܗܘ ܒܢ̇ܐ ܗܘܐ ܐܣܬܐ ܘܗܢܘܢ ܛܪܝܢ ܠܗ̇ ܕܬܦܠ

¹¹ ܐܡܪ ܠܗ̇ܢܘܢ ܕܛܪܝܢ ܠܗ̇ ܕܬܦܠ ܗܐ ܝܗ̇ܒ ܐܢܐ ܡܛܪܐ ܕܓܪܦ ܘܟܐ̈ܦܐ ܕܕܚܪܐ ܢ̈ܦܠܢ ܘܪܘܚܐ ܕܥܠܥܠܐ

¹² ܘܬܬܪܥ ܘܬܦܠ ܐܣܬܐ ܘܢܬܐܡܪ ܠܟܘܢ ܐܝܟܐ ܗܘ ܛܪܝܐ ܕܛܪܝܬܘܢ

¹³ ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܐܫܒ ܪܘܚܐ ܕܥܠܥܠܐ ܒܚܡܬܝ ܘܡܛܪܐ ܕܓܪܦ ܢܗܘܐ ܒܪܘܓܙܝ ܘܟܐ̈ܦܐ ܕܕܚܪܐ ܒܚܡܬܝ ܢܘܒ̈ܕܢ

¹⁴ ܘܐܣܚܦܝܗ̇ ܠܐܣܬܐ ܕܛܪܝܬܘܢ ܘܬܦܠ ܘܐܪܡܝܗ̇ ܒܐܪܥܐ ܘܢܬ̈ܓܠܝܢ ܫܬ̈ܐܣܝܗ̇ ܘܬܦܠܘܢ ܘܬܣܘܦܘܢ ܒܓܘܗ̇ ܘܬܕܥܘܢ ܕܐܢܐ ܐܢܐ ܡܪܝܐ

¹⁵ ܘܐܫܡܠܐ ܪܘܓܙܝ ܒܐܣܬܐ ܘܒܐܝܠܝܢ ܕܛܪܝܢ ܗܘܘ ܠܗ̇ ܟܕ ܬܦܠ ܘܢܬܐܡܪ ܠܟܘܢ ܐܝܟܐ ܗܝ ܐܣܬܐ ܘܐܝܟܐ ܐܢܘܢ ܗ̇ܢܘܢ ܕܛܪܝܢ ܗܘܘ ܠܗ̇

¹⁶ ܗܠܝܢ ܐܢܘܢ ܢܒ̈ܝܐ ܕܐܝܣܪܝܠ ܕܡܬܢܒܝܢ ܥܠ ܐܘܪܫܠܡ ܘܚܙ̇ܝܢ ܠܗ̇ ܚ̈ܙܘܐ ܕܫܠܡܐ ܘܠܝܬ ܫܠܡܐ ܐܡ̇ܪ ܡܪܐ ܡܪ̈ܘܬܐ

¹⁷ ܘܐܢܬ ܒܪܢܫܐ ܣܝܡ ܐ̈ܦܝܟ ܥܠ ܒܢ̈ܬ ܥܡܟ ܕܡܬܢܒ̈ܝܢ ܡܢ ܠܒܗܝܢ ܘܐܬܢܒܐ ܥܠܝܗܝܢ ܘܐܡܪ ܠܗܝܢ

¹⁸ ܗܟܢܐ ܐܡ̇ܪ ܡܪܐ ܡܪ̈ܘܬܐ ܘܝ ܠܕܚ̈ܝܛܢ ܒܣ̈ܕܘܬܐ ܠܝܨ̈ܝܠܐ ܕܐ̈ܝܕܝܐ ܘܥܒ̈ܕܢ ܬܟܣ̈ܝܬܐ ܠܟܠ ܪܝܫ ܘܠܟܠ ܩܘܡܐ ܠܡܨܕ ܢܦܫ̈ܬܐ ܢܦܫ̈ܬܗ ܕܥܡܝ ܨܝ̈ܕܢ ܐܢܬܝܢ ܘܢܦܫ̈ܬܟܝܢ ܕܝܠܟܝܢ ܡܚ̈ܝܢ ܐܢܬܝܢ

¹⁹ ܘܛܘܫܬܢܝܗܝ ܠܥܡܝ ܒܚ̈ܘܦܢܐ ܕܣܥܪ̈ܐ ܘܒܩܨ̈ܝܐ ܕܠܚܡܐ ܠܡܩܛܠ ܢܦܫܬ̈ܐ ܐܝܠܝܢ ܕܠܐ ܚܝ̈ܒܢ ܗ̈ܘܝ ܠܡܡܬ ܘܠܡܚܝܘ ܢܦܫ̈ܬܐ ܐܝܠܝܢ ܕܠܐ ܚܝ̈ܒܢ ܗ̈ܘܝ ܠܡܚܐ ܘܟܕܒܬܝܢ ܠܥܡܐ ܕܫܡ̇ܥ ܟܕܒܘܬܐ

²⁰ ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠ ܒܣ̈ܕܘܬܟܝܢ ܕܨܝ̈ܕܢ ܐܢܬܝܢ ܒܗܘܢ ܢܦܫ̈ܬܐ ܘܐܨܪܐ ܐܢܘܢ ܡܢ ܕܪ̈ܥܝܟܝܢ ܘܐܫܪܐ ܢܦܫ̈ܬܐ ܐܝܠܝܢ ܕܨܝ̈ܕܢ ܐܢܬܝܢ ܘܐܦܪܚ ܐ̈ܢܝܢ

²¹ ܘܐܨܪܐ ܡܐܢܝ̈ܟܝܢ ܘܐܦܨܐ ܠܥܡܝ ܡܢ ܐ̈ܝܕܝܟܝܢ ܘܬܘܒ ܠܐ ܢܫܬܠܡܘܢ ܒܡܨܝܕܬܐ ܒܐ̈ܝܕܝܟܝܢ ܘܬܕܥ̈ܢ ܕܐܢܐ ܐܢܐ ܡܪܝܐ

²² ܥܠ ܕܡܚܝ̈ܬܝܢ ܠܒܗ ܕܙܕܝܩܐ ܒܕܓܠܘܬܐ ܘܐܢܐ ܠܐ ܐܟܐܒܬܗ ܘܚܡܣܢܬܝܢ ܐ̈ܝܕܝܐ ܕܥ̇ܘ̈ܠܐ ܕܠܐ ܢܗܦܟܘܢ ܡܢ ܐܘܪ̈ܚܬܗܘܢ ܒܝܫܬ̈ܐ ܘܢܚܘܢ

²³ ܡܟܝܠ ܣܪܝܩܘܬܐ ܠܐ ܬܚ̈ܙܝܢ ܘܬܘܒ ܩܨܡܐ ܠܐ ܬܩܨ̈ܡܢ ܘܐܦܨܐ ܠܥܡܝ ܡܢ ܐ̈ܝܕܝܟܝܢ ܘܬ̈ܕܥܢ ܕܐܢܐ ܐܢܐ ܡܪܝܐ