Ezechiele ܚܙܩܝܐܝܠ 6

¹ ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

² ܒܪܢܫܐ ܣܝܡ ܐ̈ܦܝܟ ܠܛܘܪ̈ܐ ܕܐܝܣܪܝܠ ܘܐܬܢܒܐ ܥܠܝܗܘܢ

³ ܘܐܡܪ ܛܘܪ̈ܐ ܕܐܝܣܪܝܠ ܫܡܥܘ ܦܬܓܡܗ ܕܡܪܐ ܡܪ̈ܘܬܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܠܛܘܪ̈ܐ ܘܠܪ̈ܡܬܐ ܘܠܢܚ̈ܠܐ ܘܠܦܨ̈ܝܕܐ ܗܐ ܡ̇ܝܬܐ ܐܢܐ ܥܠܝܟܘܢ ܚܪܒܐ ܘܐܘܒܕ ܦܪ̈ܟܝܟܘܢ

⁴ ܘܢܨܕܘܢ ܡܕܒܚܝ̈ܟܘܢ ܘܢܬܬܒܪܘܢ ܦܬܟܪ̈ܝܟܘܢ ܘܐܪܡܐ ܚܪ̈ܝܒܝܟܘܢ ܩܕܡ ܕܚ̈ܠܬܟܘܢ

⁵ ܘܐܪܡܐ ܫ̈ܠܕܐ ܕܒܝܬ ܐܝܣܪܝܠ ܩܕܡ ܦܬܟܪ̈ܝܗܘܢ ܘܐܕܪܐ ܓܪ̈ܡܝܟܘܢ ܚܕܪ ܡܕܒܚ̈ܝܟܘܢ

⁶ ܘܡܕܝܢܬ̈ܐ ܕܟܠܗ ܝܬܒܟܘܢ ܢܚܪ̈ܒܢ ܘܦܪ̈ܟܐ ܢܨ̈ܕܝܢ ܡܛܠ ܕܢܚܪܒܘܢ ܘܢܨܕܘܢ ܡܕܒܚ̈ܝܟܘܢ ܘܢܬܬܒܪܘܢ ܘܢܬܒܛܠܘܢ ܦܬܟܪ̈ܝܟܘܢ ܘܢܬܓܕܡܘܢ ܓܠܝ̈ܦܝܟܘܢ ܘܢܬܥܛܘܢ ܥܒ̇ܕܝ̈ܟܘܢ

⁷ ܘܢܦܠܘܢ ܚܪ̈ܝܒܐ ܒܝܢܬܟܘܢ ܘܬܕܥܘܢ ܕܐܢܐ ܐܢܐ ܡܪܝܐ

⁸ ܘܐܘܬܪ ܡܢܟܘܢ ܒܝܬ ܥܡ̈ܡܐ ܐܝܠܝܢ ܕܐܬܦܨܝܘ ܡܢ ܚܪܒܐ ܘܐܬܒܕܪܘ ܒܡ̈ܕܝܢܬܐ

⁹ ܘܢܬܕܟܪܘܢܢܝ ܐܝܠܝܢ ܕܐܬܦܨܝܘ ܡܢܟܘܢ ܒܝܬ ܥܡ̈ܡܐ ܕܐܫܬܒܝܘ ܠܬܡܢ ܡܐ ܕܬܒ̇ܪܬ ܠܠܒܗܘܢ ܙܢܝܐ ܕܣܛܘ ܡܢܝ ܘܥܝܢ̈ܝܗܘܢ ܕܛܥ̈ܝ ܒܬܪ ܦܬܟܪ̈ܝܗܘܢ ܘܢܬܩܡ̈ܛܢ ܐ̈ܦܝܗܘܢ ܒܒܝܫܬܐ ܕܥܒܕܘ ܘܒܟܠܗ̇ ܛܢܦܘܬܗܘܢ

¹⁰ ܘܢܕܥܘܢ ܕܐܢܐ ܐܢܐ ܡܪܝܐ ܘܠܐ ܗܘܐ ܣܪܝܩܐܝܬ ܐܡ̇ܪܬ ܕܐܥܒܕ ܠܗܘܢ ܒܝܫܬܐ ܗܕܐ

¹¹ ܗܟܢܐ ܐܡ̇ܪ ܡܪܐ ܡܪ̈ܘܬܐ ܩܘܫ ܒܟܦܟ ܘܪܦܘܣ ܒܪܓܠܟ ܘܐܡܪ ܐܚܢ ܥܠ ܟܘܠܗ̇ ܛܢܦܘܬܐ ܘܒܝܫܬܐ ܕܒܝܬ ܐܝܣܪܝܠ ܕܒܚܪܒܐ ܘܒܟܦܢܐ ܘܒܡܘܬܢܐ ܢܦܠܘܢ

¹² ܕܪܚܝܩ ܢܡܘܬ ܒܡܘܬܢܐ ܘܕܩܪܝܒ ܒܚܪܒܐ ܢܦܠ ܘܕܡܫܬܚܪ ܘܕܡܬܦܨܐ ܒܟܦܢܐ ܢܡܘܬ ܘܐܫܡܠܐ ܪܘܓܙܝ ܒܗܘܢ

¹³ ܘܢܕܥܘܢ ܕܐܢܐ ܐܢܐ ܡܪܝܐ ܡܐ ܕܗܘܘ ܩܛܝ̈ܠܝܗܘܢ ܒܝܢܬ ܦܬܟܪ̈ܝܗܘܢ ܚܕܪ ܡܕܒܚ̈ܝܗܘܢ ܥܠ ܟܠ ܪܡܬܐ ܕܪܡܐ ܘܬܚܝܬ ܟܠ ܪ̈ܝܫܝ ܛܘܪ̈ܐ ܘܬܚܝܬ ܟܠ ܐܝܠܢ ܕܡܛ̇ܠ ܘܬܚܝܬ ܟܠ ܒܛܡܬܐ ܥܒܝܛܬܐ ܒܐܬܪܐ ܕܣܡܘ ܬܡܢ ܒܣ̈ܡܐ ܠܟܠܗܘܢ ܦܬܟܪ̈ܝܗܘܢ

¹⁴ ܘܐܪܝܡ ܐܝܕܝ ܥܠܝܗܘܢ ܘܐܥܒܕܝܗ̇ ܠܐܪܥܐ ܠܚܒܠܐ ܘܠܬܡܗܐ ܡܢ ܡܕܒܪܐ ܕܕܒܠܬ ܘܟܠܗ ܒܝܬ ܡܥܡܪܗܘܢ ܘܢܕܥܘܢ ܕܐܢܐ ܐܢܐ ܡܪܝܐ