Numeri ܡܢܝܢܐ 8

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ. ܡܰܠܶܠ ܥܰܡ ܐܰܗܪܽܘܢ. ܘܶܐܡܰܪ ܠܶܗ.

² ܡܳܐ ܕܡܰܢܗܰܪ ܐܰܢ̱ܬ̇ ܫܖ̈ܳܓܶܐ. ܠܽܘܩܒܰܠ ܐܰܦܰܝ̈ ܡܢܳܪܬܳܐ ܢܶܗܘܽܘܢ ܡܰܢܗܪܺܝܢ ܫܰܒܥܳܐ ܫܖ̈ܳܓܺܝܢ.

³ ܘܰܥܒܰܕ ܗܳܟܰܢܳܐ ܐܰܗܪܽܘܢ. ܫܰܒܥܳܐ ܫܖ̈ܳܓܺܝܢ ܠܽܘܩܒܰܠ ܐܰܦܰܝ̈ ܡܢܳܪܬܳܐ. ܘܰܐܢܗܰܪ ܫܖ̈ܳܓܶܝܗ̇ ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.

⁴ ܘܗܳܢܰܘ ܥܒܳܕܳܗ̇ ܕܰܡܢܳܪܬܳܐ ܕܢܶܣܟܬܳܐ ܗܺܝ ܕܕܰܗܒܳܐ. ܡܶܢ ܟܰܢܳܗ̇ ܘܰܥܕܰܡܳܐ ܠܪܺܝܫܗ̇ ܕܢܶܣܟܬܳܐ ܗܺܝ. ܐܰܝܟ ܚܶܙܘܳܐ ܕܚܰܘܺܝ ܡܳܪܝܳܐ ܠܡܽܘܫܶܐ. ܗܳܟܰܢܳܐ ܥܰܒܕܳܗ̇ ܠܰܡܢܳܪܬܳܐ.

⁵ ܓܰܒܝܽܘܬܳܐ ܕܠܶܘܳܝ̈ܶܐ. ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

⁶ ܕܒܰܪ ܠܶܠܘܳܝ̈ܶܐ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ. ܘܕܰܟܳܐ ܐܶܢܽܘܢ.

⁷ ܗܳܟܰܢܳܐ ܥܒܶܕ ܠܗܽܘܢ. ܘܕܰܟܳܐ ܐܶܢܽܘܢ. ܪܽܘܣ ܥܠܰܝܗܽܘܢ ܡܰܝ̈ܳܐ ܕܰܚܛܳܗܳܐ. ܘܢܰܥܒܪܽܘܢ ܡܕܰܟܝܳܐ ܥܰܠ ܟܽܠܶܗ ܒܶܣܪܗܽܘܢ. ܘܰܢܚܰܠܠܽܘܢ ܡܳܐܢܰܝ̈ܗܽܘܢ. ܘܢܶܬܕܰܟܽܘܢ.

⁸ ܘܢܶܣܒܽܘܢ ܬܰܘܪܳܐ ܚܰܕ ܒܰܪ ܒܰܩܪܳܐ. ܘܩܽܘܪܒܳܢܶܗ ܦܺܝܠܳܣܳܐ ܚܰܕ ܟܰܕ ܡ̇ܠܶܐ̣ ܣܡܺܝܕܳܐ ܕܦܺܝܠ ܒܡܶܫܚܳܐ. ܘܬܰܘܪܳܐ ܐ̱ܚܪܺܢܳܐ ܒܰܪ ܒܰܩܪܳܐ ܩܰܪܶܒ ܠܰܚܛܳܗܳܐ.

⁹ ܘܩܰܪܶܒ ܠܠܶܘ̈ܳܝܶܐ ܩܕܳܡ ܡܰܫܟܰܢܙܰܒܢܳܐ. ܘܟܰܢܶܫ ܠܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ.

¹⁰ ܘܩܰܪܶܒ ܠܠܶܘ̈ܳܝܶܐ ܩܕܳܡ ܡܳܪܝܳܐ. ܘܰܢܣܺܝܡܽܘܢ ܒܢܰܝ̈ ܝܺܣܪܳܐܶܝܠ ܐܺܝܕܰܝ̈ܗܽܘܢ ܥܰܠ ܠܶܘ̈ܳܝܶܐ.

¹¹ ܘܢܶܦܪܽܘܫ ܐܶܢܽܘܢ ܐܰܗܪܽܘܢ ܠܠܶܘ̈ܳܝܶܐ ܦܽܘܪܫܳܢܳܐ ܩܕܳܡ ܡܳܪܝܳܐ ܡܶܢ ܠܘܳܬ ܒܢܰܝ̈ ܝܺܣܪܳܐܶܝܠ. ܘܢܶܗܘܽܘܢ ܠܡܶܦܠܰܚ ܦܽܘܠܚܳܢܶܗ ܕܡܳܪܝܳܐ.

¹² ܘܠܶܘ̈ܳܝܶܐ ܢܣܺܝܡܽܘܢ ܐܺܝܕܰܝ̈ܗܽܘܢ ܥܰܠ ܪܺܝܫܶܗ ܕܬܰܘܪܳܐ. ܘܰܥܒܶܕ ܚܰܕ ܠܰܚܛܳܗܳܐ. ܘܚܰܕ ܠܰܥܠܳܬܳܐ ܠܡܳܪܝܳܐ. ܕܢܶܬܚܰܣܶܐ ܥܰܠ ܠܶܘ̈ܳܝܶܐ.

¹³ ܘܰܐܩܺܝܡ ܠܠܶܘ̈ܳܝܶܐ ܩܕܳܡ ܐܰܗܪܽܘܢ. ܘܰܩܕܳܡ ܒܢܰܘ̈ܗܝ. ܘܢܶܦܪܽܘܫ ܐܶܢܽܘܢ ܦܽܘܪܫܳܢܳܐ ܠܡܳܪܝܳܐ.

¹⁴ ܘܰܦܪܽܘܫ ܠܠܶܘ̈ܳܝܶܐ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ. ܘܢܶܗܘܽܘܢ ܠܺܝ ܠܶܘ̈ܳܝܶܐ.

¹⁵ ܘܡܶܢ ܒܳܬܪܟܶܢ ܢܶܥܠܽܘܢ ܠܶܘ̈ܳܝܶܐ ܘܢܶܦܠܚܽܘܢ ܒܡܰܫܟܰܢ ܙܰܒܢܳܐ. ܘܕܰܟܳܐ ܐܶܢܽܘܢ. ܘܰܦܪܽܘܫ ܐܶܢܽܘܢ ܦܽܘܪܫܳܢܳܐ ܩܕܳܡ ܡܳܪܝܳܐ.

¹⁶ ܡܶܛܽܠ ܕܡܰܘܗܰܒܬܳܐ ܐܶܢܽܘܢ ܝܺܗܺܝܒܺܝܢ ܠܺܝ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ. ܚܠܳܦ ܟܽܠ ܦܳܬܰܚ ܖ̈ܰܚܡܶܐ ܒܽܘܟܪܳܐ ܕܟܽܠܗܽܘܢ ܒܢܰܝ̈ ܝܺܣܪܳܐܶܝܠ ܩܰܪܒܶܬ ܐܶܢܽܘܢ ܠܺܝ.

¹⁷ ܡܶܛܽܠ ܕܕܺܝܠܝ ܐܶܢܽܘܢ ܟܽܠ ܒܽܘܟܖ̈ܶܐ ܕܰܒܢܰܝ̈ ܝܺܣܪܳܐܶܝܠ. ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ. ܒܝܰܘܡܳܐ ܕܩܰܛܠܶܬ ܟܽܠ ܒܽܘܟܪܳܐ ܕܒܰܐܪܥܳܐ ܕܡܶܨܪܶܝܢ ܩܰܕܫܶܬ ܐܶܢܽܘܢ ܠܺܝ.

¹⁸ ܘܩܰܪܒܶܬ ܠܠܶܘ̈ܳܝܶܐ ܚܠܳܦ ܒܽܘܟܪܳܐ ܕܰܒܢܰܝ̈ ܝܺܣܪܳܐܶܝܠ.

¹⁹ ܘܝܶܗܒܶܬ ܐܶܢܽܘܢ ܠܠܶܘ̈ܳܝܶܐ. ܡܰܘܗܰܒܬܳܐ ܠܰܐܗܪܽܘܢ ܘܠܰܒܢܰܘ̈ܗܝ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ. ܠܡܶܦܠܰܚ ܦܽܘܠܚܳܢܳܐ ܕܰܒܢܰܝ̈ ܝܺܣܪܳܐܶܝܠ ܒܡܰܫܟܰܢ ܙܰܒܢܳܐ. ܘܠܰܡܚܰܣܳܝܽܘ ܥܰܠ ܒܢܰܝ̈ ܝܺܣܪܳܐܶܝܠ. ܘܠܳܐ ܢܶܗܘܶܐ ܒܰܒܢܰܝ̈ ܝܺܣܪܳܐܶܝܠ ܡܰܘܬܳܐ ܕܡܶܢ ܫܶܠܝ. ܡܳܐ ܕܰܩܪܶܒܘ ܒܢܰܝ̈ ܝܺܣܪܳܐܶܝܠ ܠܩܽܘܕܫܳܐ.

²⁰ ܘܰܥ̣ܒܰܕܘ ܡܽܘܫܶܐ ܘܰܐܗܪܽܘܢ. ܘܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܠܠܶܘ̈ܳܝܶܐ ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ ܥܰܠ ܠܶܘ̈ܳܝܶܐ. ܗܳܟܰܢܳܐ ܥܒܰܕܘ ܠܗܽܘܢ ܒܢܰܝ̈ ܝܺܣܪܳܐܶܝܠ.

²¹ ܘܶܐܬܕܰܟܺܝܘ ܠܶܘ̈ܳܝܶܐ. ܘܚܰܠܶܠܘ ܡܳܐܢܰܝ̈ܗܽܘܢ. ܘܰܦܪܰܫ ܐܶܢܽܘܢ ܐܰܗܪܽܘܢ ܠܠܶܘ̈ܳܝܶܐ ܦܽܘܪܫܳܢܳܐ ܩܕܳܡ ܡܳܪܝܳܐ. ܘܚܰܣܺܝ ܥܠܰܝܗܽܘܢ ܐܰܗܪܽܘܢ ܘܕܰܟܺܝ ܐܶܢܽܘܢ.

²² ܘܒܳܬܰܪܟܶܢ ܥܰܠܘ ܠܶܘ̈ܳܝܶܐ ܠܡܶܦܠܰܚ ܦܽܘܠܚܳܢܗܽܘܢ ܒܡܰܫܟܰܢܙܰܒܢܳܐ. ܩܕܳܡ ܐܰܗܪܽܘܢ ܘܰܩܕܳܡ ܒܢܰܘ̈ܗܝ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ ܥܰܠ ܠܶܘ̈ܳܝܶܐ. ܗܳܟܰܢܳܐ ܥܒܰܕܘ ܠܗܽܘܢ ܒܢܰܝ̈ ܝܺܣܪܳܐܶܝܠ.

²³ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

²⁴ ܗܳܢܳܐ ܢܶܗܘܶܐ ܢܳܡܽܘܣܳܐ ܠܠܶܘ̈ܳܝܶܐ ܡܶܢ ܒܰܪ ܥܶܣܪܺܝܢ ܘܚܰܡܶܫ ܫܢܺܝ̈ܢ ܘܰܠܥܶܠ. ܢܺܐܬܶܐ ܠܡܶܬܚܰܝܳܠܽܘ ܒܚܰܝܠܳܐ ܒܦܽܘܠܚܳܢܳܐ ܕܡܰܫܟܰܢ ܙܰܒܢܳܐ.

²⁵ ܘܡܶܢ ܒܰܪ ܚܰܡܫܺܝܢ ܫܢܺܝ̈ܢ ܢܶܗܦܽܘܟ ܡܶܢ ܚܰܝܠܳܐ ܕܦܽܘܠܚܳܢܳܐ. ܘܬܽܘܒ ܠܳܐ ܢܶܦܠܽܘܚ.

²⁶ ܘܰܢܫܰܡܶܫ ܠܰܐܚܰܘ̈ܗܝ ܒܡܰܫܟܰܢܙܰܒܢܳܐ. ܠܡܶܛܰܪ ܡܰܛܰܪܬܳܐ. ܘܰܥܒܳܕܳܐ ܠܳܐ ܢܶܥܒܶܕ ܗܳܟܰܢܳܐ ܥܒܶܕ ܠܠܶܘ̈ܳܝܶܐ ܒܡܰܛܖ̈ܳܬܗܽܘܢ.