Giosuè ܝܫܘܥ ܒܪܢܘܢ 17

¹ ܘܗܘܬ ܓܠܥܕ ܡܢܬܐ ܕܫܒܛܐ ܕܡܢܫܐ ܡܛܠ ܕܗܘܝܘ ܗܘܐ ܒܘܟܪܗ ܕܝܘܣܦ ܘܠܡܟܝܪ ܒܘܟܪܗ ܕܡܢܫܐ ܐܒܘܗܝ ܕܓܠܥܕ ܡܛܠ ܕܗܘ ܗܘܐ ܒܘܟܪܐ ܓܒܪܐ ܩܪܒܬܢܐ ܘܗܘܬ ܕܝܠܗ ܓܠܥܕ ܘܡܬܢܝܢ

² ܘܗܘܬ ܕܒܢ̈ܝ ܡܢܫܐ ܕܐܫܬܚܪܘ ܠܫܪ̈ܒܬܗܘܢ ܘܠܒܢ̈ܝ ܐܒܝܥܙܪ ܘܠܒܢ̈ܝ ܚܠܩ ܘܠܒܢ̈ܝ ܢܫܪܐܝܠ ܘܠܒܢ̈ܝ ܫܘܦܡ ܘܠܒܢ̈ܝ ܚܦܪ ܘܠܒܢ̈ܝ ܫܡܝܕܥ ܗܠܝܢ ܒܢ̈ܘܗܝ ܕܡܢܫܐ ܒܪ ܝܘܣܦ ܕܟܪ̈ܐ ܠܫܪ̈ܒܬܗܘܢ

³ ܘܠܨܠܦܚܕ ܒܪ ܚܦܪ ܒܪ ܓܠܥܕ ܒܪ ܡܟܝܪ ܒܪ ܡܢܫܐ ܠܐ ܗܘܘ ܠܗ ܒܢ̈ܝܐ ܐܠܐ ܒܢ̈ܬܐ ܘܗܠܝܢ ܫܡ̈ܗܐ ܕܒܢ̈ܬܗ ܡܚܠܐ ܘܝܥܐ ܘܚܓܠܐ ܘܡܠܟܐ ܘܬܪܨܐ

⁴ ܘܩܪܒ ܩܕܡ ܐܠܝܥܙܪ ܟܗܢܐ ܘܩܕܡ ܝܫܘܥ ܒܪܢܘܢ ܘܩܕܡ ܪ̈ܘܪܒܢܐ ܕܐܝܣܪܝܠ ܘܐܡܪ̈ܢ ܡܪܝܐ ܦܩܕ ܠܡܘܫܐ ܕܢܬܠ ܠܢ ܝܪܬܘܬܐ ܒܝܢܬ ܐܚ̈ܝܢ ܘܝܗܒ ܠܢ ܥܠ ܡܠܬ ܦܘܡܗ ܕܡܪܝܐ ܒܝܢܬ ܐܚ̈ܐ ܕܐܒܘܢ ܘܗܫܐ ܗܒ ܠܢ ܝܪܬܘܬܐ ܒܝܢܬ ܐܚ̈ܐ ܕܐ̈ܒܗܝܢ ܘܝܗܒ ܠܗܝܢ ܝܫܘܥ ܝܪܬܘܬܐ ܘܦܠܓܘܬܐ ܒܝܢܬ ܐܚ̈ܐ ܕܐܒܘܗܝܢ

⁵ ܘܢܦܠܘ ܚܒ̈ܠܘܗܝ ܕܡܢܫܐ ܥܣܪܐ ܠܒܪ ܡܢ ܐܪܥܐ ܕܓܠܥܕ ܘܕܡܬܢܝܢ ܕܐܝܬ ܒܥܒܪܐ ܕܝܘܪܕܢܢ

⁶ ܡܛܠ ܕܒܢ̈ܬܗ ܕܡܢܫܐ ܝܪܬ ܝܪܬܘܬܐ ܥܡ ܐܚܝ̈ܗܝܢ ܘܐܪܥܐ ܕܓܠܥܕ ܗܘܬ ܠܒܢ̈ܘܗܝ ܕܡܢܫܐ ܕܐܫܬܚܪܘ

⁷ ܘܗܘܐ ܬܚܘܡܐ ܕܒܢ̈ܝ ܡܢܫܐ ܡܢ ܬܚܘܡܐ ܕܡܥܟܬ ܕܐܝܬ ܥܠ ܝܡܝܢܐ ܕܝ̇ܬ̈ܒܝ ܥܝܢ ܬܦܘܚ

⁸ ܘܗܘܬ ܐܪܥܗܘܢ ܒܬܦܘܚ ܘܦܬܚ ܘܗܘܐ ܬܚܘܡܐ ܠܒܢ̈ܝ ܡܢܫܐ ܒܪ ܝܘܣܦ ܘܠܒܝܬ ܒܢ̈ܝ ܐܦܪܝܡ

⁹ ܘܢ̇ܚܬ ܬܚܘܡܗܘܢ ܠܢܚܠܐ ܕܝܡܐ ܡܢ ܬܝܡܢܐ ܕܢܚܠܐ ܕܩܘܪ̈ܝܐ ܗܠܝܢ ܕܐܦܪܝܡ ܠܒܝܬ ܩܘܪ̈ܝܐ ܕܡܢܫܐ ܘܬܚܘܡܐ ܕܡܢܫܐ ܡܢ ܓܪܒܝܐ ܕܢܚܠܐ ܘܗܘܘ ܡܦܩ̈ܢܘܗܝ ܠܡܥܪܒܐ

¹⁰ ܘܬܝܡܢܐ ܠܐܦܪܝܡ ܘܓܪܒܝܐ ܠܡܢܫܐ ܘܝܡܐ ܬܚܘܡܗܘܢ ܘܒܐܫܝܪ ܦ̇ܓܥܝܢ ܡܢ ܓܪܒܝܐ ܘܒܐܝܣܟܪ ܡܢ ܡܕܢܚܐ

¹¹ ܘܗܘܬ ܕܡܢܫܐ ܠܩܘܒܠܗ ܕܐܝܣܟܪ ܒܝܬ ܝܫܢ ܘܟܦܪ̈ܘܢܝܗ̇ ܘܢܒܠܥܡ ܘܟܦܪ̈ܘܢܝܗ̇ ܘܥܝܢ ܕܘܪ ܘܟܦܪ̈ܘܢܝܗ̇ ܘܬܥܢܟ ܘܟܦܪ̈ܘܢܝܗ̇ ܘܡܓܕܘ ܘܟܦܪ̈ܘܢܝܗ̇ ܬܠܬ ܙܘ̈ܝܢ

¹² ܘܠܐ ܚܪܒܘ ܒܢ̈ܝ ܐܝܣܪܝܠ ܠܩܘܪ̈ܝܐ ܗܠܝܢ ܡܛܠ ܕܐܬܛܦܝܣܘ ܟܢ̈ܥܢܝܐ ܠܡܬܒ ܒܩܘܪ̈ܝܐ ܗܠܝܢ

¹³ ܘܟܕ ܥܫܢܘ ܒܢ̈ܝ ܐܝܣܪܝܠ ܟܒܫܘ ܐܢܘܢ ܠܟܢ̈ܥܢܝܐ ܒܡܕܐܬܐ ܘܡܚܪܒ ܠܐ ܚܪܒܘ ܐܢܘܢ

¹⁴ ܘܐܡܪܘ ܒܢ̈ܝ ܝܘܣܦ ܠܝܫܘܥ ܠܡܢܐ ܝܗܒܬ ܠܢ ܝܪܬܘܬܐ ܡܢܬܐ ܚܕܐ ܘܚܒܠܐ ܚܕ ܘܚܢܢ ܥܡܐ ܚܢܢ ܣܓܝܐܐ ܥܕܡܐ ܗܘ ܠܗܪܟܐ ܒܪܟܢ ܡܪܝܐ

¹⁵ ܐ̇ܡܪ ܠܗܘܢ ܝܫܘܥ ܐܢ ܥܡܐ ܐܢܬܘܢ ܣܓܝܐܐ ܣܩܘ ܠܟܘܢ ܠܓܒܐ ܕܛܘܪܐ ܘܓܒܘ ܠܟܘܢ ܬܡܢ ܒܐܪܥܐ ܕܦܪ̈ܙܝܐ ܘܕܓܢܒܪ̈ܐ ܡܛܠ ܕܐܠܝܨ ܗܘ ܠܟܘܢ ܛܘܪܐ ܕܐܦܪܝܡ

¹⁶ ܘܐܡܪܘ ܒܢ̈ܝ ܝܘܣܦ ܠܐ ܣ̇ܦܩ ܠܢ ܛܘܪܐ ܘܡܕܝܢ̈ܬܐ ܕܦܪ̈ܙܝܐ ܡܛܠ ܕܟܢ̈ܥܢܝܐ ܝ̇ܬܒܝܢ ܒܐܪܥܐ ܕܥܘܡܩܐ ܘܒܒܝܬ ܝܫܢ ܘܒܟܦܪ̈ܘܢܝܗ̇ ܘܒܥܘܡܩܐ ܕܐܝܙܪܥܝܠ

¹⁷ ܘܐܡܪ ܝܫܘܥ ܠܕܒܝܬ ܝܘܣܦ ܠܒܢ̈ܝ ܐܦܪܝܡ ܘܡܢܫܐ ܥܡܐ ܣܓܝܐܐ ܐܢܬܘܢ ܘܚܝܠܐ ܪܒܐ ܐܝܬ ܠܟܘܢ ܐܠܐ ܣܦܩܐ ܠܟܘܢ ܡܢܬܐ ܚܕܐ

¹⁸ ܓܒܘ ܠܟܘܢ ܛܘܪܐ ܘܣ̇ܦܩ ܠܟܘܢ ܘܓܒ̈ܘܗܝ ܕܛܘܪܐ ܢܗܘܘܢ ܠܟܘܢ ܡܦܩ̈ܢܘܗܝ ܘܚܪܘܒܘ ܠܟܢܥܢ̈ܝܐ ܘܠܦܪ̈ܙܝܐ ܡܛܠ ܕܡܪ̈ܟܒܬܐ ܪ̈ܘܪܒܬܐ ܕܥܫܝ̈ܢܢ ܕܦܪܙܠܐ ܐܝܬ ܠܗܘܢ ܘܥܫܝܢܝܢ ܐܢܘܢ